|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Dy lajme nga Podujeva

KJRC ndihmon komunën e Podujevës në planin e strehimit

Podujevë, 22 janar 2004 (TN) –  zv. kryetari i komunës së Podujevës dhe udhëheqësi i Komitetit për strehim Agim Kikaj sot priti një delegacion të Komitetit të Bashkuar Kuvajtian të Bamirësisë – KJRC me seli në Prishtinë.

“Diskutuam rreth mënyrës së implementimit të projektit që ka kjo organizatë i cili ka të bëjë me planin e strehimit”, deklaroi pas takimit Kikaj. Sipas tij, në ditët vijuese Komisionet e përbashkëta të komunës dhe të KJRC-së do të bëjnë vizita në familjet me gjendje jo të mirë sociale e pastaj në bazë të kritereve të përcaktuara do të përzgjedhen 30 përfitues.

KJRC edhe më parë ka ndihmuar qytetarët e komunës së Podujevës në mbulimin e çative dhe material tjetër ndërtimor.

 

Afro  15 mijë nënshkrime janë mbledhur në peticionin për gjetjen e pengjeve të pagjetura në Podujevë

 

Podujevë, 22 janar 2004 (TN) – Kordinatori për fshatrat i komunës së Podujevës Latif Mehmeti njoftoi sot se ka mbledhur mbi 10 mijë nënshkrime gjatë aksionit për mbledhjen e nënshkrimeve në peticionin për pengjet e pagjetura nga Kosova.

 

 “Aksioni ynë që ka filluar para dy muajve është duke u realizuar në bashkëpunim me udhëheqësit e Komiteteve  dhe përfshinë qytetin e Podujevës dhe 41 fshatra”, deklaroi z. Mehmeti duke pohuar se listat po nënshkruhen në dy objekte të Kuvendit komunal.

 

Ndërkaq, kryetari i Nënkëshillit për Mbrojtjen e Lirive dhe të Drejtave të njeriut në Podujevë z. Ahmet Hasani njoftoi sot se ky nënkëshill në bashkëpunim me vullnetarët e ICAN-it ka grumbulluar gjithësej 4050 nënshkrime në peticionin për gjetjen e pengjeve dhe të zhdukurve nga Kosova. Aktualisht në komunën e Podujevës NKDLMNJ dhe institucionet komunale kanë grumbulluar afro 15 mijë nënshkrime.

 

Aksioni për nënshkrimin e peticionit të KKAF – Këshilli Koordinues i Asociacioneve Familjare dhe Rrejti i aktivistëve “Kosova Action Network” për grumbullimin e nënshkrimeve për pengjet e pagjetura do të vazhdojë deri në fund të muajit, ndërkaq që peticionin sot e nënshkruan edhe udhëheqja komunale dhe drejtorë të drejtorive. Në komunën e Podujevës aktualisht janë të evidentuar 54 persona të zhdukur.