Përmbajtja:

• Presidenti Rugova priti mbrëmë zv/ministrin e Punëve të Jashtme të Japonisë

• Holkeri i ka bërë thirrje kryparlamentarit që të ndërrpresë procesin e ndryshimit të Kornizës Kushtetuese

• Holkeri ka premtuar angazhimin e tij në zbardhjen e fatit të të zhdukurve

• Parlamenti i Maqedonisë miratoi sot Ligjin për themelimin e Universitetit shtetëror në Tetovë

• Novicki e Llojd biseduan për gjendjen e të drejtave të njeriut në Kosovë

• Janë përzgjedhur nëntë komuna që do të financohen në lëmin e infrastrukturës nga Qeveria amerikane

• Prishtinë: Arkivi Historik i Qytetit shënoi 35-vjetorin e themelimit

• Podujevë: Mbrëmë në Podujevë u vra Shefki Jusufi 54-vjeçari nga Dumnica

• GPK aprovon planin për vizitën e disa familjeve serbe në fshatin Livadicë

• Eshtë formuar nëngrupi për energjetikë në kuadër të grupit për dialog

• Zyra për persona të zhdukur thotë se në Serbi ndodhen edhe 700 trupa të ekshumuar

• Drejtuesit e organizatës së re studentore kërcënuan me bojkotim të procesit mësimor nëse UP nuk ndryshon qasjen ndaj studentëve

• Kryetari i BSPK-së dhe anëtari i Bordit të AKM-së kërkon shkarkimin e menaxherës së Bordit të AKM-së

• Përfaqësuesi e familjarëve të të zhdukurve sot takohen me shefin e UNMIK-ut

• Teatrit të qytetit në Gjilan i njihet statusi profesionist nga Ministria e Kulturës

• Prodi thotë se është i dëshpruar nga lufta e brendshme politike në Shqipëri

• Në Parlamentin maqedonas ka vazhduar debati për institucionalizimin e Universitetit të Tetovës

• Bush ka mbrojtur luftën në Irak dhe fushatën kundër terrorizmit

• OBSH me iniciativë kundër obezitetit

• SHBA: Demokratët intensifikojnë fushatën presidenciale

Presidenti Rugova priti mbrëmë zv/ministrin e Punëve të Jashtme të Japonisë

 

Prishtinë, 21 janar 2004 - Presidenti i Kosovës Ibrahim Rugova priti mbrëmë zv/ministrin e Punëve të Jashtme të Japonisë Hiroshi Macumoto dhe bisedoi me të rreth zhvillimeve në Kosovë dhe nërajon.   Në këtë takim Presidenti Rugova foli edhe për progresin e shënuar në Kosovë në të gjitha fushat e jetës dhe për objektivat e institucioneve të Kosovës për zhvillimin ekonomik. Poashtu Presidenti vuri në dukje bashkëpunimin me bashkësinë ndërkombëtare dhe përpjekjet që po bëhen në ndërtimin e një shoqërie demokratike dhe paqësore.

 

Me këtë rast ai kërkoi sa më parë të njihet pavarësia e Kosovës, e cila do ta qetësonte këtë pjesë të Evropës.Presidenti Rugova falënderoi Qeverinë japoneze për ndihmat që ka dhënë për Kosovën, duke theksuar se edhe në të ardhmen do të ketë nevojë për ndihma të tilla.

Diplomati japonez takimin me Presidentin Rugova e vlerësoi të frytshëm. Ai tha se vendi i tij deri më tash ka ndihmuar Kosovën në forma të ndryshme dhe do të vazhdojë ta ndihmojë edhe në të ardhmen me projekte të ndryshme ekonomike.

 

 

Holkeri i ka bërë thirrje kryparlamentarit që të ndërrpresë procesin e ndryshimit të Kornizës Kushtetuese

 

Prishtinë, 21 janar 2004 - Shefi i Misionit të UNMIK-ut Hari Holkeri ka apeluar te kryetari i Kuvendit të Kosovës Nexhat Daci që të ndërpresë procesin e ndryshimit të Kornizës Kushtetuese dhe të parandalojë kështu komplikimet politike që mund të sjellë ky proces.

 

Ekspertët ligjorë të UNMIK-ut i kanë thënë dje grupit punues për ndryshimin e Kornizës se ndryshimi i dokumentit është i papranueshëm për momentin, pasi ai sipas tyre ndërhynë në përgjegjësitë e kryeadministratorit Holkeri.

Ndërkaq, grupi punues u përpoq që ta bindë Misionin e OKB-së se nisma e tij është në favor të çuarjes përpara të procesit me qëllimin që ta përgatisë Kosovën për statusin e saj përfundimtar.

Përfaqësuesja e UNMIK-ut nga Zyra Ligjore tha se Kuvendi i Kosovës nuk ka të drejtë të ndryshojë Kornizën Kushtetuese, sidomos në fushat që janë përgjegjësi e rezervuar për administratën ndërkombëtare. Ajo tha se çdo ndryshim mund të bëhet vetëm nën autoritetin e shefit të UNMIK-ut me miratimin e Këshillit të Sigurimit.

Në këtë debat ekspertët juridikë vendorë, i kanë dhënë mbështetje ndryshimit të Kornizës Kushtetuese. Ata kanë rekomanduar që emri i këtij dokumenti të zëvendësohet me emrin Kushtetuta e Kosovës.

 

 

Holkeri ka premtuar angazhimin e tij në zbardhjen e fatit të të zhdukurve

 

Prishtinë, 21 janar 2004 - Kryeadministratori i Kosovës Hari Holkeri u ka premtuar familjarëve të personave të zhdukur angazhimin më të madh për zbardhjen e fatit të familjarëve të tyre të zhdukur. Ky premtim erdhi pas tri ditë protestash e grevës 24 orëshe të familjarëve.

"Është një çështje urgjente dhe duhet të jetë çështje e prioritetit më të lartë si për mua ashtu edhe për institucionet e Kosovës", citohet t'u ketë thënë Holkeri familjarëve të të zhdukurve.

Holkeri ka premtuar se deri në fund të vitit 2004, do të përfundojë ky ankth i familjarëve, ndërkohë që ata presin rezultate konkrete të takimit të Këshillit të Sigurimit në të cilin do të raportojë Hari Holkeri në muajin shkurt.

Gjithashtu familjarët kërkaun që identifikimi i trupave të pajetë dhe procedura e mëtejshme legale të zhvillohet në Kosovë.

 

 

Parlamenti i Maqedonisë miratoi sot Ligjin për themelimin e Universitetit shtetëror në Tetovë

 

Shkup, 21 janar 2004 - Më në fund Kuvendi i Maqedonisë me 68 vota pro e ka miratuar sot Ligjin për themelimin e Universitetit të tretë shtetëror në Tetovë.

Fillimisht ministri i Arsimit dhe i Shkencës Aziz Polozhani nuk pranoi asnjë nga amendamentet e proporuzra për tekstin e ligjit.

Përndryshe në përbërjen e këtij universiteti do të jenë: Fakulteti i Shkencave të Natyrës dhe i Matematikës, Fakulteti i Shkencave Humanitare dhe i Arteve, Fakulteti Ekonomik dhe Fakulteti i Drejtësisë, si dhe Qendra për studime politeknike, si shkollë e lartë profesionale.

Përgatitjet për fillimin e punës së Universitet do t'i kryejnë anëtarët e Komisionit amë, të cilët i emëron Qeveria e Republikës së Maqedonisë, me propozimin e Ministrisë së Arsimit.

Mjetet për financimin e veprimatarisë së Universitetit do të sigurohen nga buxheti i Republikës së Maqedonisë dhe nga burime të tjera të përcaktuara me ligj.

Statusi i studentëve ekzistues të Universitetit të Tetovës, i themeluar si nismë qytetare, siç thuhet në tekstin e ligjit, do të zgjidhet në pajtim me nenin 198 të Ligjit për arsim sipëror.

Ligji hyn në fuqi në ditën e shpalljes së tij në Gazetën zyrtare.

Deputetët e VMRO-DPMNE-së dhe të Partisë Liberale e braktisën seancën gjatë votimit.

 

 

Novicki e Llojd biseduan për gjendjen e të drejtave të njeriut në Kosovë

 

Prishtinë, 21 janar 2004 - Ombudspersoni i Kosovës, Marek Antoni Nowicki, u takua me z. Lloyd, reporter i Asamblesë Parlamentare për të Drejtat e Njeriut në Këshillin e Evropës.

Në këtë takim Ombudspersoni i Kosovës, e njoftoi z. Lloyd, për punën e insitucionit dhe për situatën e të drejtave të njeriut në Kosovë nga perpektiva e institucionit.

Z. Nowicki dhe z. Lloyd gjatë takimit biseduan për situatën momentale të të drejtave të njeriut në Kosovë dhe shkëmbyen përvojat dhe mendimet e tyre në këtë lëmë.

Vizita e z. Lloyd, është në kuadër të përpjekjeve të përgatitjes së një raporti për të drejtat e njeriut në Kosovë, që do të jetë bazë për diskutimin publik të kërkuar nga Unioni serbo-malazez në Asamblenë Parlamentare të KE në Strasburg.

Ky takim, është një pjesë e bashkëpunimit të gjatë dhe të ngushtë ndërmjet të Institucionit e Ombudspersonit të Kosovës dhe atij të Këshillit të Evropës.

 

Debati publik në fjalë, do të jetë debati i parë ndërkombëtarë i këtij niveli për të drejtat e njeriut në Kosovë.

 

 

Janë përzgjedhur nëntë komuna që do të financohen në lëmin e infrastrukturës nga Qeveria amerikane

 

Prishtinë, 21 janar 2004 - Zyra e SHBA-së në Prishtinë ka bërë përzgjedhjen e nëntë komunave që do të marrin pjesë në programin për mbështetjen e infrastrukturës së financuar nga Qeveria e SHBA-ve përmes Agjencisë së SHBA-ve për Zhvillim Ndërkombëtar (USAID).

Iniciativa për përkrahjen e infrastrukturës komunale (MISI), që do të implementohet nga ana e Mercy Corps-it, do të zbatojë programin e ri në komunat: Lipjan, Kamenicë, Prizren, Novobërdë, Gjilan, Obiliq, Fushë Kosovë, Istog dhe Rahovec.

MISI është një program 18 muajsh që do të mbështetë përmirësimet infrastrukturore në komunat e sipërpërmendura të Kosovës të cilat janë duke shënuar përparim drejt vendosjes së kushteve që favorizojnë kthimin dhe riintegrimin e pakicave.

 

Përveç kësaj, programi, në bashkëpunim me agjencitë e tjera të përfshira në kthime, do t'i ofrojë ndihmë qeverive komunale në përpjekjet e tyre për të përmirësuar kushtet që bëjnë të mundur kthimin dhe riintegrimin.

Kriteret e përzgjedhjes kanë përfshirë shqyrtimin e përparimit ekzistues dhe potencial në zhvillimet që kanë të bëjnë me kthimin e pakicave, mbështetjen për kthim dhe riintegrim nga IPVQ-ja (Institucionet e Përkohshme të Vetëqeverisjes) dhe ekzistimin e qasjes së barabartë në shërbimet publike, shoqërore dhe ato komunale për të gjitha pakicat. Gjithsejt kanë aplikuar 18 komuna.

Programi tani do të fillojë të punojë me zyrtarët vendorë komunalë në trajtimin e barrierave infrastrukturore dhe joinfrasrukturore për kthime.

Me përfundimin e programit, nëntë komunat do të kenë mundësi më të mirë për të demonstruar mbështetjen publike për kthimet, për të trajtuar pengesat ndaj kthimit dhe riintegrimit, dhe për të zgjeruar pëfshirjen e komuniteteve pranuese në kthime.

 

Poashtu, deri atëherë do të jetë i përfunduar financimi i 40 projekteve përmes procesit pjesëmarrës të udhëhequr nga komunat me përfshirjen e komuniteteve shumicë dhe pakicë, thuhet në një njoftim të Zyrës amerikane në Prishtinë.

 

 

Prishtinë: Arkivi Historik i Qytetit shënoi 35-vjetorin e themelimit

 

Prishtinë, 21 janar 2004 - Sot, në amfiteatrin e Bibliotekës Kombëtare Universitare në Prishtinë, Arkivi Historik i Qytetit të Prishtinës me një solemnitet rasti shënoi 35-vjetorin e themelimit, ku morën pjesë edhe udhëheqësit e komunës së Prishtinës dhe mysafirë të tjerë nga fusha e kulturës.

Duke folur në këtë solemnitet, Hysni Halilaj, drejtor i Arkivit Historik të Qytetit të Prishtinës, tha se ky institucion me rëndësi të veçantë ka shënuar rezultate të dukshme në punën e tij kërkimore.

 

Por, ai theksoi se Arkivin Historik e kanë përcjellë edhe probleme të shumta, sidomos mungesa e lokaleve, ndërsa deri tash atë e kanë preokupuar dy çështje kryesore: ndërtimi institucional dhe realizimi i punëve në bashkëveprim me të gjitha institucionet e Kosovës..

Kryetari i Kuvendit Komunal të Prishtinës, Ismet Beqiri, pasi përgëzoi këtë jubile, tha se Arkivi Historik i Qytetit arkivon dhe ruan punën që është bërë me dekada, që po bëhet tash dhe për punën që do të bëhet në të ardhmen. Beqiri premtoi zgjidhjen e problemit të lokaleve të këtij instituti dhe u angazhua për kthimin e pronave në menaxhim të komunës.

 

 

Podujevë: Mbrëmë në Podujevë u vra Shefki Jusufi 54-vjeçari nga Dumnica

 

Podujevë, 21 janar 2004 - Mbrëmë rreth orës 22.30 në qendër të Podujevës, në afërsi të Stacionit të autobusëve, ka ndodhur një vrasje, njoftoi sot zv/komandanti i stacionit policor në Podujevë Kuarterman Berni, i cili tha se në shenjestër të sulmit kanë qenë dy persona, njëri nga të cilët vdiq pasi u qëllua me disa plumba.

Familjarë të viktimës pohuan se mbrëmë u është vrarë me armë zjarri Shefki Jusufi (54) nga Dumnica, i cili ka lënë pas vetes 2 vajza. Kufoma e të ndjerit gjendet në morgun e Rahovecit për ekspertizë dhe nuk dihet për kohën e varrimit.

"Për momentin nuk mund të japim informacione të tjera meqë hetimet janë në vazhdim e sipër", tha zv/komandanti i stacionit policor në Podujevë Berni. Ndërkaq, zyrtari për media i policisë në Regjionin e Prishtinës Malkolm Eshbi tha se i ndjeri kur u qëllua ishte në shoqëri me një zyrtar të SHPK-së, mirëpo motivet e vrasjes nuk dihen ende.

 

 

GPK aprovon planin për vizitën e disa familjeve serbe në fshatin Livadicë

 

Podujevë, 21 janar 2004- Në takimin e sotëm të Grupit Punues Komunal - GPK për kthimin e të zhvendosurve u diskutua për raportin e Komisionit Punues, Task Force. Në këtë takim që e udhëhoqi përfaqësuesi i UNMIK-ut Shahzad Khan Bangash dhe zv. kryetari Agim Kikaj, pos anëtarëve të GPK morën pjesë edhe përfaqësues të UNHCR-it, UMCOR-it, KFOR-it, NKMDLNJ-së, SHPK-së, Care international, etj.

Përfaqësuesi UNMIK-ut Shahzad Bangash, por edhe ai i SHPK-së dhe i KFOR-it raportuan për gjendjen e qetë të sigurisë që po mbretëron në komunën e Podujevës. Kurse përfaqësuesi i NKDLMNJ-së Ahmet Hasani raportoi për mbledhjen e parë të Komisionit Punues.

 

Z. Hasani prezantoi para GPK-së planet për vizitat e familjeve serbe në fshatrat Livadicë, Merdar, Llaushë, Dumnicë, Kërpimeh, Pakashticë, Repë, Peran dhe Katunishtë, me theks të veçantë për vizitën e parë "Shko dhe shiko" e cila do të realizohet muajin e ardhshëm në fshatin Livadicë. Ky propozim i Task Force u miratua nga GPK.

 

 

Eshtë formuar nëngrupi për energjetikë në kuadër të grupit për dialog

 

Prishtinë, 21 janar 2004 - Dje është formuar nëngrupi për energjetikë në kuadër të grupit për dialog. Të emëruar të Kryeministrit të Kosovës në këtë grup janë: Pranvera Dobruna B koordinatore e grupit, nga njësia e rregullatorit, Edmond Nulleshi, oficier financiar në AKM, divizioni i Energjetikës, Ali Hamiti përfaqësues i menaxhmentit të KEK-ut dhe Ismet Shushka, këshilltar në Ministrinë e Tregtisë dhe Industrisë.

Kjo përbërje e grupit do të jetë për fillim të punës së këtij grupi, ndërsa të emëruarit janë në funksion profesional e nuk përfaqësojnë institucionet. Për momentin grupi ka përbërjen e tillë, por nuk përjashtohet mundësia e inkuadrimit të ekspertëve tjerë sipas nevojës, thuhet në një njoftim të Zyrës për Informim Publik të Kryeministrit të Kosovës.

 

 

Zyra për persona të zhdukur thotë se në Serbi ndodhen edhe 700 trupa të ekshumuar

 

Prishtinë, 21 janar 2004 - Zyra për persona të zhdukur dhe mjekësi ligjore përmes një njoftimi thotë se ndan shqetësimin me Asociacionin e familjeve, anëtarët e të cilave kanë mbajtur një grevë 24-orëshe dhe dje kanë protestuar para selisë së UNMIK-ut.

Kjo zyrë shpjegon vështirësitë me të cilat përballet që nga formimi i saj në vitin 2002.

Deri më tash kjo zyrë thotë se ka kthyer rreth 195 trupa të gjetura në varrezat masive në Serbi, por thekson se në Serbi ndodhen edhe 700 trupa të ekshumuar dhe ende presin që t'u kthehen familjeve të tyre.

 

 

Drejtuesit e organizatës së re studentore kërcënuan me bojkotim të procesit mësimor nëse UP nuk ndryshon qasjen ndaj studentëve

 

Prishtinë, 21 janar 2004 - Nëse Universiteti i Prishtinës nuk heq dorë nga veprimet që dëmtojnë interesat e studentëve atëherë semestri i dytë mund të sjellë bojkotim të procesit mësimor, njoftuan udhëheqësit e organizatës se re studentore në konferencën e djeshme me gazetarë.

 

Drejtuesit e organizatës së re studentore kërcënuan me bojkotim të procesit mësimor nëse Universiteti i Prishtinës nuk ndryshon qasjen ndaj studentëve. Skënder Fetahu, kryetar i Organizatës së re studentore tha se Universiteti nuk ka bërë asgjë për studentët. Sipas tij pagesa prej dy eurove për paraqitje të provimeve me vendimim të rektoratit është plaçkitje e studentëve.

Një çështje tjetër që po vështirëson jetën është moshapja e mensës. Sipas drejtuesve të Organizatës së re studentore kjo po ndodh sepse dikush është i interesuar që atë ta përdorë për marketing politik.

 

 

Kryetari i BSPK-së dhe anëtari i Bordit të AKM-së kërkon shkarkimin e menaxherës së Bordit të AKM-së

 

Prishtinë, 21 janar 2004 - Kryetari i Bashkimit të Sindikatave të Pavarura të Kosovës dhe anëtari i Bordit të AKM-së, Bahri Shabani ka kërkuar dje shkarkimin e menaxheres së Bordit të AKM-së zonjës Marie Fuçi.

 

Z. Shabani ka deklaruar se ajo dhe ndërtuesi ndërkombëtar i Bordit të AKM-së kanë bllokuar procesin e privatizimit në Kosovë. Sindikata ka kërcënuar se nëse nuk shkarkohet nga detyra zonja Fuçi ajo do të zhvillojë protesta.

Kryetari i BSPK-së thotë se kërkesa themelore janë kompensimi i dëmeve që kanë pësuar punëtorët e ndërmarrjeve të privatizuara, vazhdimi i menjëhershëm i raundit të tretë të procesit të privatizimit dhe përgjegjësia nga drejtuesit e AKM-së Nikollas Lamsdorf dhe Marie Fuçi, duke mbështetur njëkohësisht edhe vendimin e Parlamentit të Kosovës për zhvlersimin e ligjeve diskriminuese të miratuara në periudhën e regjimit të ish-presidentit jugosllav tash të akuzuar për krime lufte, Sllobodan Millosheviq.

 

 

Përfaqësuesi e familjarëve të të zhdukurve sot takohen me shefin e UNMIK-ut

 

Prishtinë, 21 janar 2004 - Kryetari i Asociacionit të Familjarëve të Personave të Zhdukur dhe Kidnapuar, Sheramet Ademi ka paralajmëruar se përfaqësuesit e këtij asociacioni do të takohen sot me kryeadministratorin e Kosovës Hari Holkeri.

 

Ai bëri të ditur se z. Holkeri për sot ndërmjet orës 11.00 dhe 12.00 ka caktuar një takim ku do ta pretë një delegacion, në fakt do të jetë ky këshilli grevist, i cili do t'ia prezentojë drejtpërsëdrejti z. Holkeri të gjitha këto kërkesa dhe familjarët do të qëndrojnë sërish para selisë së UNMIK-ut që të presin rezultatet e bisedimeve me z. Holkerin.

Në rast se kërkesat e familjarëve të të zhdukurëve dhe të rrëmbyerve nuk përmbushen, ata kanë paralajmëruar se protestat do të vazhdojnë.

 

 

Teatrit të qytetit në Gjilan i njihet statusi profesionist nga Ministria e Kulturës

 

Gjilan, 21 janar 2004 - Ministria e Kulturës e Kosovës i ka njohur Teatrit të qytetit në Gjilan statusin profesionist. Përfaqësuesi nga kjo Ministri, Zeqir Hamiti, i ka dorëzuar të martën në Gjilan kryetarit të komunës, Lutfi Haziri, vendimin për teatrin e Gjilanit, të cilit i jipet statusi profesionist.

Në një takim, ku morën pjesë edhe zëvendëskryetari i komunës, Xhemajl Hyseni, drejtoresha e kulturës, Tringa Ahmeti, drejtori i teatrit, Jashar Shahiqi e të tjerë, z. Hamiti tha se teatri i Gjilanit ka një traditë të gjatë pune dhe një përvojë të pasur teatrore.

Duke u ngritur e rritur me vite të tëra dhe pas gjithë atyre suksese që ka arritur deri tani, këtij teatri i takon statusi profesionit, i njohur edhe nga Ministria e Kulturës, e cila tash e tutje, bashkë me komunën, do të përkujdesen për teatrin dhe projektet e tij.

Duke e falënderuar Ministrinë e Kulturës për mbështetjen që i ka dhënë teatrit të Gjilanit, kryetari i komunës Lutfi Haziri tha se kjo është një mirënjohje e madhe jo vetëm për teatrin dhe aktorët, që nga Muharrem Shahiqi i ndjerë e deri te aktori më i ri, por edhe për kulturën dhe publikun e Gjilanit, në përgjithësi.

Edhe Tringa Ahmeti, drejtoreshë e kulturës dhe Jashar Shahiqi, drejtor i teatrit thanë se kjo ishte një ditë e madhe për kulturën dhe artin teatror në Gjilan, por edhe për vetë komunën e cila tash e tutje do ta ketë një institucion të tillë.

Ndërkaq, Xhemajl Hyseni, zëvendëskryetar është shprehur shkurt: "Është pritur 50 vjet dhe ky është një shpërblim i mirë për teatrin e Gjilanit, që vjen pikërisht gjatë ditëve të një manifestimi tradicional kulturor që mbahet këtu, "Flaka e janarit", e cila në pjesën e festivalit kombëtar mbledhë në qytetin tonë teatro nga të gjitha viset shqiptare".

Përfaqësuesit e Ministrisë kanë bërë me dije se për vitin 2004, Ministria do të ndajë paga për 5 punëtorë të këtij teatri dhe do t`i financojë projektet, ndërsa premtuan se përkrahja do të rritet në të ardhmen.

 

 

Prodi thotë se është i dëshpruar nga lufta e brendshme politike në Shqipëri

 

Bruksel, 21 janar 2004 - Pas takimit me kryeministrin e Shqipërisë, kreu i Komisionit Evropian, Romano Prodi tha se Evropa do t'i hapë dyert për shqiptarët, kur autoritetet vendore të kenë vendosur rregulla të forta dhe rigoroze kundër krimit.

 

Ai tha se është i dëshpruar nga lufta e brendshme politike në Shqipëri. Ndërkaq, duke komentuar qëllimin e vizitës së kryeministrit Nano në Bruksel, Romano Prodi tha se kjo është një vizitë normale, ngase çdo vit, tha ai, mbahet një takim i tillë dhe ai i fundit ishte mbajtur në ditën e fundit të janarit 2003.

 

Kështu që ka kaluar një vit dhe ishte një rast për të diskutuar bashkë përparimet e bëra, por edhe pikat e zeza, apo të errta të qasjes së Shqipërisë në Bashkimin Evropian, ka thënë Romano Prodi.

 

Ai ka shtuar se hapja e politikës të vizave për shtetasit shqiptarë për të hyrë në BE mund të ndodhë vetëm pasi të bëhen reforma të brendshme në Shqipëri së pari e jo anasjelltas.

 

 

Në Parlamentin maqedonas ka vazhduar debati për institucionalizimin e Universitetit të Tetovës

 

Shkup, 21 janar 2004 - Në Parlamentin maqedonas edhe dje ka vazhduar debati për institucionalizimin e Universitetit të Tetovës. Mirëpo edhe këtë seancë e ka karakterizuar tensioni dhe replikat e ndërsjellta ndërmjet deputetëve të pozitës dhe opozitës.

 

Deputetët e VMRO-DPMN-së në parqitjet e tyre sërish kanë vazhduar të prezentojnë argumentet e tyre kundër miratimit të këtij ligji. Ata madje kanë dalë nga kjo temë duke folur për luftën e vitit 2001, vetëm të shtyhet miratimi i këtij ligji me të cilin zyrtarizohet Universiteti i Tetovës.

Me kërkesë të deputetëve maqedonas të opozitës VMRO-DPMN për shkak të një feste fetare sllave mbetet që sot të vazhdojë debati rreth shqyrtimit të amandamenteve rreth ligjit për themelimin e Universitetit të tretë shtetëror në Tetovë.

 

 

Bush ka mbrojtur luftën në Irak dhe fushatën kundër terrorizmit

 

Uashington, 21 janar 2004 - Presidenti amerikan Xhorxh Bush, në fjalimin e tij të përvitshëm para Kongresit, ka mbrojtur luftën në Irak dhe fushatën kundër terrorizmit.

Ai tha se kjo e ka bërë SHBA-në vend më të sigurtë, por edhe më shumë se dy vjet pas sulmeve të 11 shtatorit dhe tërhoqi vërejtjen se lufta nuk kishte përfunduar dhe u bëri thirrje amerikanëve të qëndrojnë së bashku me të.

 

"Më shumë se dy vjet pa sulme mbi tokën amerikane. Kjo na bën të besojmë se rreziku ka ikur. Kjo shpresë është e kuptueshme, e rehatshme dhe false," tha presidenti Bush.

Një pjesë e madhe e fjalimit u përqëndrua në shqetësimet e brendshme, fushë kjo ku sondazhet e opinionit sygjerojnë se zoti Bush është më i prekshmi në garën për zgjedhjet presidenciale.

Presidenti tha se ekonomia ka shënuar një rritje si rezultat i shkurtimit të taksave, por u fishkëllye nga disa anëtarë kur i bëri thirrje Kongresit që t'i bëjë këto shkurtime të përhershme.

Zoti Bush propozoi që taksat për qytetarët me të ardhura të vogla t'u mundësojnë atyre të blejnë sigurimet themelore shëndetësore.

Ai shtoi se sistemi shëndetësor qeveritar ishte një recetë e gabuar.

 

 

OBSH me iniciativë kundër obezitetit

 

Gjenevë, 21 janar 2004 - Organizata Botërore e Shëndetësisë ka vonuar miratimin e një plani për të luftuar obezitetin pas kundërshtimeve që pati nga Shtetet e Bashkuara.

Ekspertët thonë se rreth 300 milionë njërëz në të gjithë botën janë mbipeshë në një kufi që e rëndon shumë shëndetin, dhe shumë prej tyre do të vdesin nga sëmundje që mund të ishin parandaluar. OBSH-ja dëshiron prej qeverive që të promovojnë një stil të shëndetshëm jetese dhe të detyrojnë kompanitë që të ulin masën e sheqerit dhe indyrnave në produktet e tyre.

Delegatët amerikanë në takimin e OBSH-së në Gjenevë, thanë se propozimet ishin një fillim i mirë, por nuk merrnin parasysh përgjegjësitë individuale të njerëzve për të mbajtur një dietë të shëndetshme.

 

 

SHBA: Demokratët intensifikojnë fushatën presidenciale

 

Boston, 21 janar 2004 - Demokratët që konkurrojnë për emërimin si kandidat i partisë së tyre për president kanë intensifikuar fushatën në shtetin Nju Hampshër pas fitores së papritur të senatorit Xhon Keri të shtetit Maseçusets në konferencat partiake të në Ajova.

Në garën e parë të fushatës presidenciale të këtij viti, veterani i dekoruar i Luftës në Vietnam, u pasua nga senatori Xhon Eduards i Karolinës së Veriut dhe nga ish guvernatori i shtetit Vermont, Hauard Din, i cili kryesonte në anketat e opinionit publik.

Anëtari i Dhomës së Përfaqësuesve, Riçard Gephart nga shteti Mizuri, u tërhoq nga gara presidenciale pasi u radhit i katërti në Iowa. Ish-udhëheqësi i demokratëve në Dhomën e Përfaqësuesve tha se do të kthehet në Uashington për të përfunduar mandatin e tij të tanishëm, por nuk do të konkurojë më pas 28 vjetësh në këtë detyrë.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |