Dy lajme nga Podujeva

Dy lajme nga Podujeva

Podujevë: Mbrëmë në Podujevë u vra 54 vjeçari Shefki Jusufi nga Dumnica

Podujevë, 21 janar 2004 (TN) – Mbrëmë rreth orës 22.30 – 22.45 në rrugën “Zahir Pajaziti”, në afërsi të stacionit të autobusëve ka ndodhur një vrasje, njoftoi sot zv. komandanti i stacionit policor në Podujevë Quarterman Bernie i cili tha se cak i sulmit ishin dy persona, njëri nga të cilët vdiq pasi u godit me shumë plumba.

Familjarë të viktimës pohuan se mbrëmë u është vrarë me armë zjarri prindi, vëllau dhe më i dashuri i tyre Shefki Jusufi (54) nga Dumnica i cili ka lënë pas vetes 2 vajza. Kufoma e të ndjerit gjendet në morgun e Rahovecit për ekspertizë dhe nuk dihet për kohën e varrimit.

“Për momentin nuk mund të japim informacione tjera meqë hetimet janë në vazhdim e sipër”, tha zv. komandanti i stacionit policor në Podujevë Bernie. Ndërkaq zyrtari për media i policisë në Regjionin e Prishtinës Malcol Ashby tha se i ndjeri kur u gjuajt ishte në shoqëri me një zyrtar të SHPK-së, mirëpo motivet e vrasjes nuk dihen ende.


GPK aprovon planin për vizitën e disa familjeve serbe në fshatin Livadicë

Podujevë, 21 janar 2004 (TN) – Në takimin e sotëm të Grupit Punues Komunal – GPK për kthimin e të zhvendosurve u diskutua për raportin e Komisionit Punues “Task Force”. Në këtë takim që e udhëhoqi përfaqësuesi i UNMIK-ut Shahzad Khan Bangash dhe zv. kryetari Agim Kikaj, pos anëtarëve të GPK morën pjesë edhe përfaqësues të UNHCR-it, UMCOR-it, KFOR-it, NKMDLNJ-së, SHPK-së, Care international, etj.

Përfaqësuesi UNMIK-ut Shahzad Bangash por edhe ai i SHPK-së dhe i KFOR-it raportuan për gjendjen e qetë të sigurisë që po mbretëron në komunën e Podujevës. Kurse përfaqësuesi i NKDLMNJ-së Ahmet Hasani raportoi për mbledhjen e parë të Komisionit Punues.

Z. Hasani prezantoi para GPK-së planet për vizitat e familjeve serbe në fshatrat Livadicë, Merdar, Llaushë, Dumnicë, Kërpimeh, Pakashticë, Repë, Peran dhe Katunishtë, me theks të veçantë për vizitën e parë “Shko dhe shiko” e cila do të realizohet muajin e ardhshëm në fshatin Livadicë.

Ky propozim i “Task Force” u miratua nga GPK. Në këtë mbledhje zv. kryetari i komunës Agim Kikaj kërkoi që vizitat të planifikohen dhe realizohen në mënyrë institucionale që të jenë të suksesshme dhe në frymën e punës së përbashkët në GPK.

Kohë më parë GPK ngriti Komisionin Punues i cili përbëhet nga dhjetë anëtarë që kryesohet nga anëtari i Komitetit për Komunitete i Kuvendit komunal të Podujevës z. Avdi Jusufi.