Përmbajtja:

• Presidenti Rugova priti shefin e Zyrës së Holandës në Kosovë

• Presidenti i Kosovës Ibrahim Rugova të enjtën flet para Kuvendit të Kosovës

• Rexhepi shkarkoi këshilltarin e tij nga posti i koordinatorit të Qeverisë për standardet

• Mari Fuçi akuzat e kryeministrit Rexhepi i ka quajtur "shpifëse dhe falco"

• Vendorët shprehen për ndryshimin e Kornizës Kushtetuese, ndërkombëtarët janë kundër

• Familjarë të personave të zhdukur protestuan sot para selisë së UNMIK-ut në Prishtinë

• Qeveria komunale e Podujevës merr masa për inkasimin e të hyrave

• Çmontohet një granatë në një lagje të Prishtinës

• Arrestohen tre meshkuj në Mitrovicë

• Dështoi takimi ndërmjet ndërkombëtarëve dhe vendorëve për vazhdimin e procesit të privatizimit në Kosovë

• Shefket Musliu, ish-komandant i UÇPMB-së, është transferuar në burgun e Mitrovicës

• Ministri Brajshori u takua në Paris me drejtorin e përgjithshëm të UNESCO-s

• Në Prishtinë u themeluar Qendra e re klinike stomatologjike e Kosovës

• Në kuadër të manifestimit "Ditët e Reçakut" u bë përurimi i muzeut të Shtimes

• U themelua sindikata e re me emrin - Unioni i Sindikatës së Pavarur të KEK-ut

• Një polic serb i SHPK-së ka bërë vetëvrasje në një fshat afër Gjilanit

• Teatri i Gjilanit hapi festivalin e dramës në "Flaka e janarit 2004"

• Mbrëmë në Galerinë e Arteve të Kosovës është hapur ekspozita ndërkombëtare e qeramikës "Pjata"

• Zyrtarët e Beogradin biseduan me diplomatët e huaj për vazhdimin e dialogut Prishtinë-Beograd

• Rusët thonë se kanë vrarë 15 kryengritës çeçenë

• Indonezi: Mbi 50 veta janë lënduar në një zjarr të madh

• Bulodozerët dhe tanket e ushtrisë izrealite kanë shkatërruar 13 shtëpi palestineze

• Të paktën 20 persona kanë vdekur dhe 74 janë lënduar në një shpërthim të gazit në Algjeri

• Keri fiton raundin e parë të zgjedhjeve nga radhët e demokratëve

• OKB pritet të vendosë për misionin në Irak

• I ftohti vështirëson operacionin e shpëtimit të anijes norvegjeze

• Presidenti Bush mban sonte fjalimin mbi gjendjen e vendit

• Uashingtoni i kërkon OKB-së të vendosë për zgjedhjet në Irak

Prishtinë, 20 janar 2004 - Presidenti i Kosovës Ibrahim Rugova priti dje pasdite shefin e Zyrës së Holandës në Kosovë Peter Bas Beker, i cili e përfaqëson në Kosovë edhe Irlandën, kryesuesen e radhës së Bashkimit Evropian.

 

Me këtë rast Beker i prezentoi Presidentit Rugova programin e Bashkimit Evropian për gjashtë muajt e ardhshëm. Ndërkaq, presidenti Rugova theksoi se institucionet e Kosovës po punojnë që vendi ynë të jetë anëtar me të drejta të plota i Bashkimit Evropian.

Kryesuesja aktuale e BE-së, Irlanda, nuk zyrë përfaqësuese në Kosovë, andaj atë e përfaqëson Holanda, si kryesuese e ardhshme e BE-së.

 

 

Presidenti i Kosovës Ibrahim Rugova të enjtën flet para Kuvendit të Kosovës

 

Prishtinë, 20 janar 2004 - Presidenti i Kosovës Ibrahim Rugova, në seancën e së enjtës më 22 janar, do të mbajë fjalimin vjetor para Kuvendit të Kosovës, në të cilën do të flasë për objektivat e institucioneve të Kosovës për këtë vit, thuhet në një njoftim të Zyrës së Presidentit të Kosovës.

Përndryshe, në seancën e së enjtës deputetët do të diskutojnë për Projektligjin për tregti me naftë dhe derivate të naftës si dhe për Projektligjin për kinematografi. Ndërkaq, diskutimi për Projektligjin për Odën Ekonomike të Kosovës është shtyrë për një javë më vonë.

 

 

Rexhepi shkarkoi këshilltarin e tij nga posti i koordinatorit të Qeverisë për standardet

 

Prishtinë, 20 janar 2004 - Ilir Deda do të zëvendësojë Rexhep Hotin në postin e koordinatorit të Qeverisë së Kosovës për standardet.

 

Vendimi është marrë nga Kryeministri Rexhepi pas sugjerimeve të zëvendësshefit të UNMIK-ut Çarlls Brajshou, që Rexhep Hoti të shkarkohet nga ky post për shkak se sipas UNMIK-ut, ai nuk ishte kooperativ.

 

Kryeministri Rexhepi tha se këshilltari Hoti do të punojë në një nga zyrat e reja të cilat Qeveria pretendon t'i hapë së shpejti.

 

 

Mari Fuçi akuzat e kryeministrit Rexhepi i ka quajtur "shpifëse dhe falco"

 

Prishtinë, 20 janar 2004 - Menaxherja e Agjencionit Kosovar të Mirëbesimit (AKM) Mari Fuçi është përgjigjur ndaj akuzave të vazhdueshme të kryeministrit Bajram Rexhepi, i cili ka akuzuar menaxheren e AKM-së për ndërprejen e procesit të privatizimit në Kosovë.

Drejtoresha e AKM-së Mari Fuçi ka mohuar të gjitha këto akuza. Në një letër dërguar shefit të Shtyllës së katërt të UNMIK-ut Nikolas Landsdorf, ajo ka shpjeguar rreth angazhimeve të saj të deri tash në detyra të ndryshme që kishin të bënin me privatizimin.

 

Zonja Fuçi akuzat e kryeministrit Rexhepi i ka quajtur "shpifëse dhe falco" që pengojnë aftësinë e saj për t'i kryer përgjegjësitë, të cilat tashmë janë duke e rrezikuar kredibilitetin e saj në publikun kosovar. "Po qe se këto akuza shpifëse vazhdojnë, unë nuk do të kem zgjedhje tjetër pos që ta vazhdoj çështjen në gjyq", ka thënë zonja Fuçi.

 

 

Vendorët shprehen për ndryshimin e Kornizës Kushtetuese, ndërkombëtarët janë kundër

 

Prishtinë, 20 janar 2004 - Një grupi i punës së Kuvendit të Kosovës për hartimin e rekomandimeve për ndryshimin e Kornizës Kushtetuese dhe përfaqësues të institucioneve të Kosovës thanë sot në një debat publik se ndryshimet në Kornizën Kushtetuese janë të domosdoshme. Ata theksuan se këto ndryshime duhet të jenë në harmoni me proceset politike aktuale në vend.

Mirëpo, përfaqësuesit e Zyrës ligjore të UNMIK-ut bënë të ditur në këtë debat se shefi i UNMIK-ut do ta njoftojë edhe zyrtarisht kryeparlamentarin e Kosovës se këto ndryshime janë të parakohshme dhe se ndryshimet në Kornizën Kushtetuese nuk janë në kompetencë të Kuvendit të Kosovës.

 

 

Familjarë të personave të zhdukur protestuan sot para selisë së UNMIK-ut në Prishtinë

 

Prishtinë, 20 janar 2004 - Familjarë të personave të zhdukur protestuan sot para selisë së UNMIK-ut në Prishtinë dhe kërkuan që t'i pranojë në një takim shefi i UNMIK-ut Hari Holkeri. Organizatorët e kësaj proteste thanë se Holkeri ka premtuar se ky takim mund të realizohet gjatë ditës së sotme.

 

Njëherit ata thanë se do të kërkojnë nga shefi i UNMIK-ut që çështjen e të zhdukurve ta praqesë para Këshillit të Sigurimit të OKB-së, ku pritet që ai të raportojë në fund të këtij muaji.

 

 

Qeveria komunale e Podujevës merr masa për inkasimin e të hyrave

 

Podujevë, 20 janar 2004 - Duke vepruar sipas masave të aprovuara nga Këshilli i Drejtorëve (KD) i komunës së Podujevës si dhe në bazë të urdhëresës administrative të Kryeshefit të Ekzekutivit, Drejtoria për Inspeksion është në realizim e sipër të masave që kanë të bëjnë me inkasimin e të hyrave vetjake.

Drejtori i inspeksionit Islam Revuçi tha se si hap i parë është heqja e produkteve të ekspozuara nga rruga e trotuaret, heqja e tezgave të improvizuara, largimi i kamionëve nga trotuaret dhe largimin i mbulojave para lokaleve afariste.

"Qëllimi është që të lirohet hapësira për qarkullim të qytetarëve" deklaroi z. Revuçi, duke pohuar se njoftimi për këto masa është bërë me kohë. Moszbatimi i këtyre masave në afatin prej 7 ditësh do të rezultojë me konfiskimin e mallrave dhe të tezgave, tha ai.

Lidhur me këtë Drejtoria për Kadastër, gjeodezi dhe pronë ka dërguar 110 vërejtje për shfrytëzuesit e pronës publike.

 

 

Çmontohet një granatë në një lagje të Prishtinës

 

Prishtinë, 20 janar 2004 - Njësiti i çminimit i KFOR-it, sot në mëngjes ka çmontuar një granatë të vendosur nën një makinë në lagjen Ulpiana të Prishtinës. Zëdhënësi i policisë rajonale të Prishtinës, Malkolm Eshbi ka thënë se granata ishte lokalizuar mbrëmë rreth mesnatës nga pronari i makinës, por meqë ishte natë, njësiti i çminimit i KFOR-it, për shkaqe sigurie ka vendosur që të largojë granatën sot në mëngjes.

Granata e çmontuar ishte e prodhimit kinez, kurse ekipi çminues kishte vërejtur gjatë çmontimit se granata ishte e vendosur nën makinë.

 

 

Arrestohen tre meshkuj në Mitrovicë

 

Mitrovicë, 20 janar 2004 - Tre burra janë arrestuar në pjesën jugore të Mitrovicës pasi u gjetën në një automjet të blinduar të KFOR-it në një vagon treni i cili udhëtonte në drejtim të Francës, njoftoi policia.
 

Sipas zëdhënësit të SHPK-së të dyshuarit i kanë thënë policisë së kanë dashur të shkojnë në Francë.

 

 

Dështoi takimi ndërmjet ndërkombëtarëve dhe vendorëve për vazhdimin e procesit të privatizimit në Kosovë

 

Prishtinë, 20 janar 2004 - Takimi disa orësh që u zhvillua dje ndërmjet Qeverisë, shefit të UNMIK-ut dhe udhëheqësve kryesorë ndërkombëtarë të Agjencionit Kosovar të Mirëbesimit, përfundoi pa ndonjë marrëveshje konkrete që do të shënonte vazhdimin e privatizimit në Kosovë.

 

Kryeministri Bajram Rexhepi pas këtij takim tha se interepretimi i dobët i rregulloreve nga ana e përfaqësuesve ndërkombëtarë është pengesa kryesore e procesit të privatizimit.

 

Ai ka kërkuar interpretim të drejtë të këtyre rregulloreve, në të kundërtën thotë kryeministri Qeveria do të ngrijë marrëdhëniet me AKM-në.

Kryeministri Rexhepi tha se shefi i UNMIK-ut Hari Holkeri ka premtuar një interpretim të drejtë të rregulloreve të AKM-së, mirëpo kjo, sipas tij, mbetet të shihet në ditët e ardhshme.

 

Sipas tij nuk do të ketë shumë kohë për të pritur që privatizimi në Kosovë të vazhdojë, në të kundërtën do të ketë keqësim të marrëdhënieve për këtë çështje ndërmjet administratës ndërkombëtare dhe Qeverisë së Kosovës.

Krerët e administratës ndërkombëtare nuk u prononcuan pas takimit këtij takimi, i cili zgjati mbi tri orë. Burimet brenda takimit thanë se gjatë diskutimit janë shënuar tensione ndërmjet zyrtarëve të Qeverisë së Kosovës dhe atyre të Shtyllës së Katërt të UNMIK-ut.

 

 

Shefket Musliu, ish-komandant i UÇPMB-së, është transferuar në burgun e Mitrovicës

 

Prishtinë, 20 janar 2004 - Shefket Musliu, ish-komandant i Ushtrisë Çlirimtare për Preshevë, Medvegjë e Bujanoc është transferuar në burgun e Mitrovicës, ka njoftuar avokati i tij Masar Morina. Ish-komandanti i guerilës shqiptare të Luginës së Preshevës, tashmë të shpërbërë dhe nënshkrues i Marrëveshjes paqësore për Luginën e Preshevës, Shefket Musliu është arrestuar në prill të vitit të kaluar nga forcat amerikane të KFOR-it. Pushteti i Serbisë ka kërkuar dorëzimin e tij drejtësisë serbe, por UNMIK-u ka refuzuar.

 

 

Ministri Brajshori u takua në Paris me drejtorin e përgjithshëm të UNESCO-s

 

Paris, 20 janar 2004 - Ministri i Kulturës, Rinisë dhe Sporteve, Behxhet Brajshori ka vizituar dje selinë e UNESCO-s në Paris. Gjjatë kësaj vizite ministri Brajshori është takuar me drejtorin e përgjithshëm të saj Koishira Macura, me të cilin ka biseduar për mundësinë e bashkëpunimit dhe zhvillimit të programeve të caktuara.

 

 

Në Prishtinë u themeluar Qendra e re klinike stomatologjike e Kosovës

 

Prishtinë, 20 janar 2004 - Me iniciativën e drejtorit të klinikave të stomatologjisë prof. Osman Sejfia u themelua Qendra klinike e Stomatologjisë. Ministria e Shëndetësisë më 17 qershor 2003 lëshoi vendim për themelimin e kësaj qendre, kurse nga 1 janari i sivjetëm edhe juridikisht filloi së funksionuari kjo qendër.

 

Qendra Stomatologjike do të ndihmojë në zhvillimin dhe në avancimin e stamotologjisë, pohoi drejtuesi i kësaj qendre dr. Blerim Kamberi. Ai shtoi se me krijimi e kësaj Qendre stomatologjike janë krijuar kushtet për përmirësimin dhe ngritjen e kualitetit të shërbimeve stomatologjike ekzistuese, për ngritjen dhe funksionalizimin e shërbimeve stomatologjike.

 

 

Në kuadër të manifestimit "Ditët e Reçakut" u bë përurimi i muzeut të Shtimes

 

Shtime, 20 janar 2004 - Në kuadër të manifestimit "Ditët e Reçakut" dje në fshatin Legjendas është zbuluar pllaka përkujtimore për dëshmorin e kombit Hajriz Muhadini. Ndërkaq në malin e Kërkovës mbi Reçak është zbuluar pllaka përkujtimore për dëshmorin Ahmet Kaçiku. Po dje në Shtime u bë përurimi i muzeut të qytetit.

 

 

U themelua sindikata e re me emrin - Unioni i Sindikatës së Pavarur të KEK-ut

 

Prishtinë, 20 janar 2004 - Anëtarët e një këshilli nismëtar kanë themeluar një organizatë të re sindikale me emrin Unioni i Sindikatës së Pavarur të Korporatës Energjetike të Kosovës. Anëtarët e këshillit nismëtar për themelimin e kësaj organizate thanë se kjo organizatë sindikale u themelua për shkak të pakënaqësisë së punëtorëve me veprimin e organizatës së deritashme.

Themeluesi e Sindikatës së re të KEK-ut deklaruan se Sindikata e Pavarur e KEK-ut deri më tash ka punuar jashtë interesave të punëtorëve. Sipas kryetarit të Sindikatës së re Nazim Feka, kryetar i Sindikatës së Pavarur të KEK-ut, Sherif Fejzullahu tash e dy vjet nuk ka treguar rezultate dhe asnjëherë nuk i ka përcjellë kërkesat e arsyeshme të anëtarëve tek Bordi i KEK-ut.

Ndërkaq nënkryetari i BSPPK-së, Ukë Bashota theksoi se ata janë të njoftuar me mosmarrëveshjet që kanë lindur në Sindikatën e Pavarur të KEK-ut. Sipas tij, BSPK nuk shpreh disponim për themelimin e degëve, përkatësisht ndarje të degëve, ngase kjo nuk është as në interesin e punëtorëve e as të BSPK-së.

 

 

Një polic serb i SHPK-së ka bërë vetëvrasje në një fshat afër Gjilanit

 

Gjilan, 20 janar 2004 - Një polic i Shërbimit Policor të Kosovës nga radhët e pakicës serbe ka bërë dje vetëvrasje në shtëpinë e tij në një fshat afër Gjilanit. Sipas zëdhënësit rajonal të SHPK-së në Gjilan, rreshterit Ismet Hashani, motivet e vrasjes dhe rasti është duke u hetuar.

 

 

Teatri i Gjilanit hapi festivalin e dramës në "Flaka e janarit 2004"

 

Gjilan, 20 janar 2004 - Teatri i qytetit në Gjilan ka hapur mbrëmë festivalin e dramës kombëtare në kuadër të manifestimit "Flaka e janarit 2004", me shfaqjen "Ura e sakrificës" të autorit Rexhep Qosja e në regji të Sokol Angjelit nga Tirana.

Teatri i Gjilanit, të cilit një ditë pas kësaj shfaqjeje do t'i jipet statusi i teatrit profesionist nga Ministria e Kulturës e Kosovës.

Ditën e dytë, të marten, në program është Teatri Kombëtar "Akt" i Prishtinës, me shfaqjen "Nata e fundit në Goli Otok" të autorit Mehmet Kajtazi, në regji të Xhevat Qorrajt.

 

 

Mbrëmë në Galerinë e Arteve të Kosovës është hapur ekspozita ndërkombëtare e qeramikës "Pjata"

 

Prishtinë, 20 janar 2004 - Mbrëmë në Galerinë e Arteve të Kosovës është hapur ekspozita ndërkombëtare e qeramikës "Pjata". Në këtë ekspozitë prezentohen punimet prej qeramike të krijuesve të njohur nga shumë vende të rajonit.

 

Ekspozita "Pjata" organizohet në kuadër të bashkëpunimit të Galerisë së Arteve të Kosovës dhe Art Areas të Zagrebit dhe nën përkujdesjesjen e Hanibal Salvano nga Zagrebi. Kjo ekspozitë ndërkombëtare e qeramikës do të qëndrojë e hapur deri më 7 shkurt të këtij viti.

 

 

Zyrtarët e Beogradin biseduan me diplomatët e huaj për vazhdimin e dialogut Prishtinë-Beograd

 

Beograd, 20 janar 2004 - Zv/kryeministri i Serbisë Nebojsha Çoviq, përfaqësues të Ministrisë së Punëve të Jashtme të Serbisë dhe Malit të Zi kanë biseduar me përfaqësuesit e vendeve të Grupit të Kontaktit, të Bashkimit Evropian dhe të NAT0-s për proceset aktuale që kanë të bëjnë me vazhdimin e dialogut ndërmjet Prishtinës dhe Beogradit.

Sipas mediave serbe, Çoviq ka mbështetur vazhdimin e dialogut ndërmjet Prishtinës dhe Beogradit dhe për formimin e grupeve multientike të punës, por ka përsëritur rezervat që kanë të bëjnë me pëmbajtjen e dhe mënyrën e miratimit të dokumentit Standardet për Kosovën.

 

 

Rusët thonë se kanë vrarë 15 kryengritës çeçenë

 

Grozni, 20 janar 2004 - Forcat ruse kanë vrarë 15 kryengritës çeçenë gjatë konflikteve të fundit në Çeçeni, njoftuan zyrtarët ushtarakë rusë.

Një grup kryengritësish çeçenë kishin shfrytëzuar dokumente falco të policisë dhe të ushtrisë ruse dhe kishin vrarë në pritë një numër personash në fshatin Tanga në jugperendim të Groznit, ka thënë zëdhënësi i ushtrisë ruse.

Agjencia ruse e lajmeve Interfaks pohon se në mesin e të vrarëve ndodhet edhe komandanti çeçen Abuvald Astamirov, i cili dyshohet për vrasjen e 35 personave dhe për sulme terroriste.

 

 

Indonezi: Mbi 50 veta janë lënduar në një zjarr të madh

 

Xhakartë, 20 janar 2004 - Mbi 50 veta janë lënduar në një zjarr të madh të shkaktuar nga dy shpërthime në kompleksin petrokimik në pjesën lindore të ishullit të Indonezisë Java.

Sipas njoftimit të policisë, punëtorët mund të ndodhen në kurthin e zjarrit që ka kapluar depon e produkteve kimike të ndërmarrjes "PT Petro Vidada" afër Surabajit.

Tashmë janë hospitalizuar mbi 50 veta që kanë marrë djegie nga zjarri. Shkaqet e zjarrit ende nuk dihen.

 

 

Bulodozerët dhe tanket e ushtrisë izrealite kanë shkatërruar 13 shtëpi palestineze

 

Jerusalem, 20 janar 2004 - Bulodozerët dhe tanket e ushtrisë izrealite kanë shkatërruar sot para agimit 13 shtëpi dhe një xhami në kampin e refugjatëve në Rripin e Gazës në kufi me Egjiptin, njofton AP, duke u mbështetur në burimet e dëshimitarëve palestinezë.

Ndërkaq, komunikatën e ushtrisë izraelite theksohet se aksioni në Rafa është zbatuar si përgjigje ndaj zjarrit që kishin hapur palestinezët nga ndërtesa në afërsi të kufirit egjiptian dhe shton se ndërtesat e shkatërruara ishin të zbrazta.

 

 

Të paktën 20 persona kanë vdekur dhe 74 janë lënduar në një shpërthim të gazit në Algjeri

 

Algjer, 20 janar 2004 - Të paktën 20 persona kanë vdekur dhe 74 janë lënduar në një shpërthim që shkatërroi stabilimentet e gazit në portin e Algjerisë, Skidi.

Shkaqet e shpërthimit nuk dihen ende, ka thënë ministri i Energjetikës Shakib Kelif, i cili vizitoi vendin e ngjarjes, njofton Frnas Press.

 

 

Keri fiton raundin e parë të zgjedhjeve nga radhët e demokratëve

 

Ajova, 20 janar 2004 - Senatori i Masaçusetit, Xhon Keri ka fituar raundin e parë të zgjedhjeve në mesin e mbështetësve të demokratëve, zgjedhje këto që do të nxjerrin kandidatin që do të sfidojë Bushin në zgjedhjet presidenciale të nëntorit.

Në fund të fundit kjo ishte nata e senatorit John Kerry, megjithëse fushata e tij vetëm disa javë më parë nuk dukej se do të jepte këtë rezultat.

Veterani dhe heroi i luftës në Vietnam, ishte qartë fituesi me 38 për qind të votave.

Rezultat i mirë ishte edhe për senatorin e Karolinës së Jugut, John Edwards, që siç duket i ngrohu zemrat e banorëve të shtetit të Ajoas me mesazhin e tij pozitiv.

Zhgënjimi i madh qe për kandidatin e renditur në vendin e tretë, ish guvernatorin e Vermontit, Hauard Din.

 

 

OKB pritet të vendosë për misionin në Irak

 

Nju Jork, 20 janar 2004 - Sekretari i Përgjithshëm i Kombeve të Bashkuara, Kofi Anan, pritet që të marrë vendimin për të dërguar një ekip në Irak që do të nxjerrë konkluzionin nëse atje ekzistojnë kushtet për mbajtjen e zgjedhjeve.

Sekretari i Përgjithshëm i Kombeve të Bashkuara, Kofi Anan, pritet që të marrë vendimin për të dërguar një ekip në Irak që do të nxjerrë konkluzionin nëse atje ekzistojnë kushtet për mbajtjen e zgjedhjeve.

Zoti Anan tha se do të ketë diskutime të tjera përpara se të merret një vendim përfundimtar.
Por një diplomat në Këshillin e Sigurimit, tha se besonte se ekipi do të shkonte në Irak.

 

 

I ftohti vështirëson operacionin e shpëtimit të anijes norvegjeze

 

Oslo, 20 janar 2004 - Skuadrat e shpëtimit në Norvegji janë duke punuar nën presionin e kohës për të gjetur të mbijetuar brenda anijes së përmbysur në bregun juperëndimor të vendit, pranë portit të qytetit Bergen.

Më herët ata mundën të nxjerrin të gjallë tre persona, duke hapur një portë në anijen e kthyer me kokë poshtë.

Nëntë persona të tjerë u shpëtuan përpara këtij aksioni, ndërsa dy të tjerë u gjetën të vdekur.

Operacioni i shpëtimit në portin e Bergenit është një garë me kohën. Anija, që vazhdon të qëndrojë e përmbysur mbi sipërfaqen e detit në fjordin e ngushtë ku edhe ka mbetur, po mbushet me ujë.

 

Për të gjithë ata që kanë mbetur të bllokuar gjetja e një vendi të thatë dhe ku mund të merret frymë lirisht, po bëhet gjithnjë e më e vështirë.

Prej një operacioni spektakular u arrit të shpëtoheshin tre prej 30 anëtarëve filipinas të ekuipazhit, të cilët ishin bllokuar atje që prej 7 orësh.

Dy persona vdiqën të hënën gjatë rrugës për në spital. Ata që janë shpallur të humbur mund të jenë ende brenda në anije.

Puna për shpëtimin e tyre vështirësohet në një kohë që uji ka ngrirë dhe anija ka filluar të rrëshqasë.

 

 

Presidenti Bush mban sonte fjalimin mbi gjendjen e vendit

 

Uashington, 20 janar 2004 - Presidenti Bush po përgatitet të mbajë të martën në mbrëmje fjalimin vjetor mbi gjendjen e vendit, në të cilin pritet t=u thotë amerikanëve se Amerika është në rrugën e duhur. Fjalimi para dy dhomave të Kongresit i jep Presidentit Bush rastin në këtë vit zgjedhjesh të argumentojë se Shtetet e Bashkuara janë më të sigurta nën udhëheqjen e tij.

Pritet që fjalimi të fillojë me komente mbi sigurinë kombëtare, duke theksuar sukseset e luftës në Irak, përfshirë kapjen e udhëheqësit të përmbysur, Sadam Husein. Njoftohet se ai do të bëjë thirrje që shkurtimet e taksave të realizuar nën administratën e tij, të bëhen të përhershme.

 

 

Uashingtoni i kërkon OKB-së të vendosë për zgjedhjet në Irak

 

Nju Jork, 20 janar 2004 - Zyrtarët amerikanë dhe irakianë u kërkuan Kombeve të Bashkuara të vendosin nëse zgjedhjet e drejtpërdrejta në Irak janë apo jo të realizueshme para afatit të 30 qershorit për kalimin e pushtetit. Shefi i administratës amerikane në Irak, Paul Bremer dhe anëtarë të Këshillit Qeverisës irakian u takuan në hënën në Nju Jork me Sekretarin e Përgjithshëm të OKB-së Kofi Anan.

Kjo vizitë u bë ndërkohë që udhëheqësit shiitë irakianë kritikojnë planin amerikan për kalimin e pushtetit brenda 30 qershorit në duart e një qeverie jo të zgjedhur me vota të drejtpërdrejta, e cila do të bënte përgatitjet për zhvillimin e zgjedhjeve brenda vitit tjetër.

Pas takimit prej dy orë e gjysmë me udhëheqësit e Këshillit Qeverisës irakian dhe të koalicionit të udhëhequr nga Shtetet e Bashkuara në Irak, sekretari i përgjithshëm i Kombeve të Bashkuara, Kofi Anan, tha se të gjitha palët u pajtruan se në Irak do të zhvillohen zgjedhjet së shpejti. Çështja është se kur.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |