Qeveria komunale e Podujevës fillon marrjen e masave që do të ndikojnë në inkasimin e të hyrave

Qeveria komunale e Podujevës fillon marrjen e masave që do të ndikojnë në inkasimin e të hyrave

Podujevë, 20 janar 2004 (TN) – Duke vepruar sipas masave të aprovuara nga Këshilli i Drejtorëve (KD) i komunës së Podujevës si dhe në bazë të urdhëresës administrative të Kryeshefit të Ekzekutivit, Drejtoria për Inspeksion është vazhdë e sipër në realizimin e masave që kanë të bëjnë me inkasimin e të hyrave vetanake.

Drejtori i inspeksionit Islam Revuçi tha se si hap i parë është heqja e produkteve të ekspozuara nga rruga e trotuaret, heqja e tezgave të improvizuara, largimi i kamionëve nga trotuaret dhe largimin i mbulojave para lokaleve afariste.

“Qëllimi është që të lirohet hapësira për qarkullim të qytetarëve” deklaroi z. Revuçi duke pohuar se njoftimi për këto masa që do të ndërmirren është bërë me kohë. Moszbatimi i këtyre masave në afatin prej 7 ditësh do të rezultojë me konfiskimin e mallrave dhe të tezgave njoftoi z. Revuçi.

Lidhur me këtë Drejtoria për Kadastër, gjeodezi dhe pronë ka dërguar 110 vërejtje për shfrytëzuesit e pronës publike. “Aktualisht kemi shkëputur 10 kontrata me shfrytëzuesit e pronës publike që të shumtën e rasteve janë kiosqe”, tha Drejtori i kësaj drejtorie Tahir Sahiti. Ai njoftoi se janë identifikuar deri më tani 71 kiosqe që ushtrojnë veprimtari afariste pa kontrata të cilat shfrytëzojnë 4 ari e 60 m tokë të pronës publike.

“Krahas masave që i ka aprovuar Qeveria komunale, për shkak të inkasimit jo të kënaqshëm të të hyrave komunale, ne do të detyrohemi ti publikojmë emrat e obliguesve më të mëdhenj të komunës, pas afatit të paraparë”, tha Mehmet Gashi, drejtor i Drejtorisë për Buxhet e financa në Podujevë.