|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

OPINIONE

  Reagim: Procesi - Anna Lindh

"Korrieri" i Tiranës, pse dezinformon ?!

19 janar 2004 / TN

 

Nexhat KITA

 

Viktima e krimit serb Anna Lindh ishte objekt i një shkrimi të shkurtër në faqet virtuale të gazetës "Korrieri", më datë 17 janar, rreth orës 2 pasdite.Më vonë lajmi u hoq dhe kjo është arsyeja që nuk mund ta citoj me përpikmëri atë pjesë qendrore të informacionit me përmbajtje dezinfarmacioni. Nuk dua të spekuloj se për çfarë arsye  theksuat se AUTORITETET e SUEDISË POHOJNË SE VRASJA e ANNA LINDH NUK KA MOTIVE POLITIKE, por dua të them  në mënyrë të veçantë se me gjithë dëshirën e tyre të flaktë e të vetëkuptueshme, një pohim të këtillë kategorik (për "mungesën" e motivit politik) nuk patën kurajo profesionale dhe morale t´ua servojnë lexuesve të vet as gazetat kryesore të Serbisë, që nuk pushojnë të jenë - mullinjtë e bluarjes së propagandës antishqiptare.

 

Nuk më kujtohet nëse në artikullin dezinformues kishte shënim për burimin e lajmit, ose për autorin e shkrimit, por sido që të jetë, përgjegjësia mbetet e gazetës. Më parë do të kërkoja të gjeja shpjegimin e një deformiteti të tillë informativ te diletantizmi redaktues i gazetës sesa te ndonjë dukuri antikombëtare brenda saj.Ta marrim me mend e të supozojmë se po të bëhej kjo vrasje objekt gjykimi në lëndën e akuzës kundër Millosheviçit, ndërsa e vërteta të ishte krejtësisht e kundërta e asaj që po pohon gazeta, ai (Slobodani i Serbisë) do ta citonte Korrierin për "korrektësi" ashtu siç e lavdëroi Nanon disa herë si autor të politikës së fqinjësisë së mirë e korrekte, nënkupto në dëm të cëshjes së Kosovës.

 

Derisa u thirrët në këtë shkrim për pohime të paqena të autoriteteve suedeze, çdo lexues i vëmendshëm do të kishte dashur të dinte se kush janë këto institucione shtetërore që po mohojnë ekzistimin e motivit politik, të quajtur në shtypin suedez - motivi i hakmarrjes kundër ndërhyrjes ushtarake të NATO-s mbi Serbinë, ndërmarrje kjo që u mbështet nga ministreja e jashtme, tashti e ndjera Anna Lindh. Autoritete të vetme që kanë kompetenca dhe detyrë ligjore që të merren me këtë çështje gjygjësore janë: Grupi i Hetimeve, Prokuroria dhe trupi i gjykimit, që po peshon drejtësinë në këtë proces.

 

Më ditën e nisjes së gjykimit, gazeta më gjurmuese dhe më e informuar rreth vrasjes së ministres së jashtme suedeze, Expressen solli informacionin e siguruar nga burimi i vet në Grupin e Hetimeve, të cilin po e citojmë me këtë rast:

 

"Ai (M.Mijailovic, N.K.) ka pranuar se është vrasësi.

 

Mirëpo policia dhe prokurori janë të sigurtë se ai nuk ka treguar cdo gjë. - Kjo ka të bëjë me një pjesë edhe me motivin. Thënia e tij se zëra të brendshëm e urdhëruan atë që ta sulmonte viktimën nuk qëndrojnë. Ka shkaqe të tjera nga të cilat e ka rrjedhimin kjo vrasje dhe këtë ai e di vetë".

 

Ky pohim i autoriteteve, pra i një pjesëtari të Grupit të Hetimeve, vetëm që i bën më të bazuara dyshimet për motivin politik të vrasjes. Me fjalë të tjera, deklarata e mësipërme e autoritetit zyrtar anonim nuk e përjashton asesi dyshimin se dorasi e ekzekutoi viktimën për shkaqe politike. Deri në këtë moment të proesit nuk kemi dëgjuar se dikush nga autoritetet suedeze të ketë deklaruar atë që po pohon kjo gazetë tiranase.

 

Të sjellim ndër mend se sistemi suedez i hetimeve penale ndoshta është i vetmi në botë ku parimi inkuizitor* përjashtohet plotësisht dhe kjo iu ndihmon ndonjëherë edhe kriminelëve ordinerë që të kalojnë pa asnjë ferrë në këmbë.

 

Të përfundojmë se asnjë autoritet zyrtar deri më tashti nuk ka pohuar se i serbi i pandehur vrasjen nuk e ka bërë për motive politike, nënkupto antishqiptare. Motivi mbetet i pazbuluar dhe kjo nuk do të thotë se përjashtohet motivi politik. Shtrembërimi i këtij konstatimi, ose rikualifikimi i tij se nuk ka motive politike pas kësaj vrasjeje është një dezinformatë e gazetës "Korrieri" në gjuhën shqipe , jo e ndonjë gazete serbe.

 

*

Parimi inkuizitor nënkupton përdorimin e dhunës, e mundimeve psikike, e torturave të ndryshme, drogimin, mashtrimin, shantazhin e të pandehurit për të treguar, përshkruar a pranuar një krim të ndodhur a të supozuar. Shumë shtete formalisht nuk e parashohin, por e përdorin në praktikën e hetimeve.