Përmbajtja:

• Qeveria nga buxheti i sivjemë i Kosovës për kthimin e të zhvendosurve ka ndarë 10 milion euro

• Gjilan: Drejtorët të emërohen në cilësinë e ushtruesve të detyrës

• Kuvendi i Gjilanit aprovoi rregulloren për mbrojtjen e mjedisit

• Grevë urie 24 orëshe e familjarëve të personave të zhdukur

• Komuna e Podujevës përfiton 5 miniprojekte për arsimin nga Banka Botërore

• Bordi i AKM do të prezentojë sot propozimet për vazhdimin e procesit të privatizimit në Kosovë

• Në portin e Durrësit u ndaluan 24 qytetarë nga Kosova me dokumenta të falsifikuara

• Ministri i Kulturës Brajshori sot do të vizitojë selinë e UNESCO-s në Paris

• Policia njofton për dy incidente në rajonin e Mitrovicës dhe të Pejës

• Vdiq Kadrush Rama, profesor në Akademinë e Arteve në Prishtinë

• Parlamenti i Shqipërisë hodhi poshtë mocionin për mosbesimin e opozitës kundër kryeministrit

• Ish-pjesëtarët e UÇPMB-së kanë themeluar Shoqatën për ruajten e vlerave njerëzore dhe kombëtare

• Rrëzohet një avion i vogël kanadez - janë zhdukur 10 pasagjerë dhe ekuipazhi

• Në Qerbela plagosen 13 veta

• Anan takohet me kryeadminsitratorin irakian Bremer

• Votime për kandidatin demokrat në Ajova

• Komision parlamentar për Karaburunin

• Në Greqi zhvillohen stërvitje për sigurinë e Olimpiadës

• Një kontingjent ushtarak japonez hyri në Irak

Qeveria nga buxheti i sivjemë i Kosovës për kthimin e të zhvendosurve ka ndarë 10 milion euro

 

Prishtinë, 19 janar 2004 - Qeveria e Kosovës nga buxheti i vitit 2004 ka ndarë 10.5 milionë euro për ta ndihmuar procesin e kthimit të të zhvendosurve, thotë Ilir Deda, nga kryeministria e Kosovës. Ndërkaq, politikani serb Millorad Todoroviq, koordinator për kthim në Qeverinë e Kosovës, kërkon hapjen e ministrisë për kthimin e të zhvendosurve.

 

 

Gjilan: Drejtorët të emërohen në cilësinë e ushtruesve të detyrës

 

Gjilan, 19 janar 2004 - Kryesia e Degës së LDK të Gjilanit, në mbledhjen e saj të fundit, diskutoi për seancën e fundit dhe të parafundit të Kuvendit të Komunës, duke u përqëndruar në statusin e drejtorëve aktualë të ekzekutivit, të cilëve u ka skaduar kontrata në fund të vitit paraprak.

Pas diskutimeve të gjata dhe mjaft argumentuese, Kryesia e Degës konstatoi se Kuvendi i Komunës, përkundër kërkesës me shkrim nga ana e kryeshefit ekzekutiv nuk ka marrë qëndrim të qartë dhe të drejtë rreth çështjes së vazhdimit apo jo të kontaratave të drejtorëve së paku derisa të nisë riorganizimi i Shërbimit Civil Komunal sipas projektit që është votuar në Kuvend.

Në këtë drejtim, Kryesia e Degës e konsideron të papranueshme dhe aspak të nevojshme krijimin e vakuumit institucional në Gjilan.

Për ta evituar këtë vakuum, Kryesia e Degës kërkon nga kryetari i komunës dhe kryeshefi ekzekutiv që drejtorëve aktualë t'ua vazhdojnë kontratat deri më 31 mars 2004 në cilësinë e ushtruesve të detyrës.

Kryesia e Degës e sheh të udhës vazhdimin e kontratave për tre muaj në mënyrë që të kryhen procedurat e nevojshme për vlerësimin e punës së drejtorëve, për shpalljen e konkursit rreth zgjedhjes së shefave të departamenteve dhe drejtorëve të nëndepartamenteve.

 

Përndryshe, Kryesia e Degës i përkujton udhëheqjes komunale se brenda këtyre tri viteve është përmbushur qind për qind plani strategjik për zhvillim të shpejtë ekonomik të komunës, duke u projektuar dhe realizuar 460 projekte në vlerë prej 38 milionë euro.

S'do mend se meritën më të madhe në këtë përmbushje të këtij plani e kanë bartur vetë drejtorët e drejtorive të KK të Gjilanit, andaj vlerësimet paushalle se ata nuk janë treguar të aftë dhe për këtë nuk mund t'ju vazhdohen kontratata janë tejet tendencioze, të dëmshme dhe me prapavijë politike.

Kryesia e Degës vlerëson se ka kohë dhe është e domosdoshme të respektohen procedurat në fuqi për punën e secilit, pra edhe të drejtorëve aktualë sikur që ka kohë dhe është më se e nevojshme që të vlerësohet edhe procedura në marrjen dhe nxjerrjen e vendimeve në Kuvendin Komunal të Gjilanit.
 

Dega e LDK të Gjilanit nuk do të lejojë që të nënvlerësohet puna dhe angazhimi i drejtorëve aktualë të KK të Gjilanit.

 

Është obligim i këshilltarëve të KK të Gjilanit e para se gjithash të atyre nga radhët e LDK që ta prezentojnë drejt e si duhet këtë angazhim dhe këto rezultate për të cilat kohë të gjatë janë mburrur si brenda ashtu dhe jashtë komunës dhe mbi bazën e këtyre rezultateve sot qëndrojnë ulur që nga posti i kryetarit e deri tek ulësja e 23-të e këshilltarit, thuhet në një komunikatë të Degës së LDK-së në Gjilan.

 

 

Kuvendi i Gjilanit aprovoi rregulloren për mbrojtjen e mjedisit

 

Gjilan, 19 janar 2004 - Kuvendi i Komunës së Gjilanit, në seancën e parë për vitin 2004, miratoi dy rregullore, atë për mbrojtjen e mjedisit si dhe rregulloren për shfrytëzimin e pallatit të sporteve. Njëkohësisht Kuvendi ka vendosur që ky objekt sportiv të jepet në të ardhmen për shfrytëzim me qira.

Këshilltarët janë njoftuar edhe me raportin e revizionit të brendshëm financiar, Sherafedin Latifi, i cili tha se gjatë kontrollimeve që janë bërë nëpër drejtori, në disa prej tyre ka patur ndonjë mangësi në udhëheqjen e procedurave, por nuk janë konstatuar keqpërdorime.

Duke iu përgjegjur pyetjeve të këshilltarëve se çfarë do të mund të thotë revizioni i brendshëm financiar, nëse një komision i pavarur ndërkombëtar do të konstatojë më vonë se ka patur keqpërdorime, z. Latifi tha se ai është plotësisht i sigurtë në raportin që ka bërë.

 

 

Grevë urie 24 orëshe e familjarëve të personave të zhdukur

 

Prishtinë, 19 janar 2004 - Mbi 50 anëtarë të familjeve të të zhdukurve kanë hyrë sot në një grevë urie 24 orëshe në selinë e KMDLNJ-së në Prishtinë. Ata në këtë mënyrë shprehin pakënaqësinë e tyre për shkak se deri më tash nuk është zbardhur fati i personave të zhdukur. Kjo grevë është organizuar nga një këshill grevist i Asiciacioneve familjare për pengjet dhe personat e zdhukur dhe viktimat e luftës.

 

 

Komuna e Podujevës përfiton 5 miniprojekte për arsimin nga Banka Botërore

 

Podujevë, 19 janar 2004 - Në kuadër të projektit për përmirësimin e pjesëmarrjes në arsim të Ministrisë për Arsim Shkencë e Teknologji, financuar nga Banka Botërore, komuna e Podujevës ka përfituar 5 miniprojekte, njoftoi Drejtori i Drejtorisë për Arsim Mr. Shpejtim Bulliqi.

Për raundin e parë të projektit të Bankës Botërore komuna e Podujevës ka përfituar pesë miniprojekte ku do të përfshihen 2 shkolla fillore në Podujevë, ajo e Brainës dhe e Popovës si dhe Shkolla e Mesme Ekonomike.

Ky projekt sipas donatorit, ka për qëllim ofrimin e mundësive të barabarta për të gjithë në kuptimin e qasjes, vazhdimit dhe përfundimit të shkollimit fillor dhe të mesëm, ngritjen e cilësisë së planifikimit arsimor në shkolla dhe ngritjen e efikasitetit të shkollave, përmirësimin e kushteve dhe ngritjen e cilësisë së mësimdhënies.

Vlera e këtyre projekteve për shkollat fillore arrinë deri në 10 mijë euro, kurse për shkollat e mesme deri në 15 mijë. Sipas z. Bulliqi shkollat do të konkurojnë me nga pesë miniprojekte prej të cilave do të përzgjidhen më të mirat.

 

 

Bordi i AKM do të prezentojë sot propozimet për vazhdimin e procesit të privatizimit në Kosovë

 

Prishtinë, 19 janar 2004 - Bordi i Agjencisë Kosovare të Mirëbesimit AKM do të prezentojë sot në një mbledhje urgjente propozimet për ndryshimet në politikat operacionale në mënyrë që të vazhdojë procesi i privatizimit në Kosovë.

 

Njoftohet se janë bërë disa ndryshime në rregullat e shitjes së ndërmarrjeve shoqërore me qëllim të mbrojtjes së të drejtave të punëtorëve. Qeveria e Kosovës ndërkaq ka shprehur pakënaqësinë e saj lidhur me punën e AKM-së dhe ka kërkuar një takim me kreun e UNMIK-ut për të përcaktuar qartë rolin e qeverisë në këtë agjenci.

 

 

Në portin e Durrësit u ndaluan 24 qytetarë nga Kosova me dokumenta të falsifikuara

 

Durrës, 19 janar 2004 - Ministria e Rendit Publik të Shqipërisë ka njoftuar se në portin e Durrësit janë ndaluar 24 qytetarë nga Kosova të cilët tentonin të kalonin për në bregdetin italian me dokumente të falsifikuara.

 

Pasagjerëve pas ndalimit nga policia lokale e portit të Durrësit u janë sekuestruar pasaportat e falsifikuara, duke zbuluar edhe vizat e tyre gjermane apo franceze jo të rregullta. Pjesa më e madhe ishin me pasaporta të UNMIK-ut, ndërkaq disa të tjerë me dokumente udhëtimi kroate dhe Unioni Serbi-Mali i Zi.

 

Komesari i policisë së Durrësit deklaroi se kanë filluar hetimet ndaj dy agjencive turistike nga Kosova "Euroturs" dhe "Sabaturs" që kishin organizuar udhëtimin dhe mendohet se fjala është për një grup mirë të organizuar të trafikut klandestin nga Kosova në portin e Durrësit me destinacion Italinë dhe vende të tjera perëndimore.

 

 

Ministri i Kulturës Brajshori sot do të vizitojë selinë e UNESCO-s në Paris

 

Paris, 19 janar 2004 - Ministri i Rinisë, Kulturës dhe Sportit, Behxhet Brajshori sot do të vizitojë selinë e UNESCO-s në Paris. Gjatë kësaj vizite ministri Brajshori do të takohet me drejtorin e përgjithshëm të saj Kojçira Macura me të cilin do të bisedojë lidhur me mundësinë e bashkëpunimit dhe zhvillimit të programeve të caktuara.

 

 

Policia njofton për dy incidente në rajonin e Mitrovicës dhe të Pejës

 

Mitrovicë-Pejë, 19 janar 2004 - Policia bën të ditur se në rajonin e Mitrovicës, përkatësisht në fshatin Smrekonicë parmbrëmë tre persona me maska dhe të armatosur nga pusia kanë gjuajtur veturën e një personi dhe janë përpjekur ta ndalin atë. Ky tentim ka dështuar dhe ata më pastaj kanë shkrepur zjarr dhe kanë plagosur viktimën. Ndërkaq, në Pejë dy persona janë përleshur me armë zjarri, njëri prej të cilëve është goditur në shpinë.

 

 

Vdiq Kadrush Rama, profesor në Akademinë e Arteve në Prishtinë

 

Prishtinë, 19 janar 2004 - Në moshën 65-vjeçare ndërroi jetë Kadrush Rama, profesor në Akademinë e Arteve në Prishtinë. Poashtu ai ka qenë krijues i njohur në fushën e arteve figurative, të cilat i ka eskpozuar në shumë ekspozita individuale e kolektive në vend dhe jashtë.

Varrimi i Kadrush Ramës do të bëhet të martën në varrezat e qytetit në Podujevë.

 

 

Parlamenti i Shqipërisë hodhi poshtë mocionin për mosbesimin e opozitës kundër kryeministrit

 

Tiranë, 19 janar 2004 - Parlamenti i Shqipërisë hodhi poshtë me shumicë votash një mocion mosbesimi të opozitës kundër kryeministrit Fatos Nano, të cilin e konsideronte përgjegjës për ngjarjen e 9 janarit në ujërat e Karaburumit, ku humbën jetën të paktën 21 veta. Pro-shkarkimit të Nanos votuan 50 deputetë, ndërkaq 76 vota kundër dhe vetëm një abstenim.

Për nëntë orë debate në parlament u karakterizuan me qëndrime bardhë e zi të deputetëve të mazhorancës dhe të opozitës. Seanca e Parlamentit u shoqërua me momente tensioni gjatë këmbimit të replikave të ashpra midis kryeministrit Fatos Nano dhe udhëheqësit të opozitës, Sali Berisha.

 

 

Ish-pjesëtarët e UÇPMB-së kanë themeluar Shoqatën për ruajten e vlerave njerëzore dhe kombëtare

 

Preshevë, 19 janar 2004 - Ish-pjesëtarët e Ushtrisë Çlirimtare për Preshevë, Medvegjë dhe Bujanoc kanë themeluar në Preshevë Shoqatën për ruajten e vlerave njerëzore dhe kombëtare.

 

Formimi i kësaj shoqate sipas kreut të saj ishte imperativ i kohës dhe ka për qëllim angazhimin e pakompromis për mbrojtjen e vlerave njerëzore në ndërtimin e paqes dhe lirisë konform ligjeve dhe standardeve ndërkombëtare. Formimin e shoqatës e ka mirëpritur edhe përfaqësuesit e spektrit politik të këtij rajoni.

 

 

Rrëzohet një avion i vogël kanadez - janë zhdukur 10 pasagjerë dhe ekuipazhi

 

Toronto, 19 janar 2004 - Një avion i vogël "cesna 208" është rrëzuar në liqenin Iri dhe të gjithë 10 pasagjerët dhe anëtarët e ekuipazhit konsiderohen të zhdukur.

Avioni është rrëzuar dje mbi sipërfaqen e ngrirë të liqenit menjeherë pasi kishte fluturuar nga ishulli kanadez Peli. Pasagjerët kanë qenë kanadezë dhe një amerikane që po shkonin në gjueti.

 

Në Qerbela plagosen 13 veta

 

Qerbela, 19 janar 2004 - Nga shpërthimi i një bombe jo larg varrit të imam Abasit në qytetin e shenjtë irakian Qeberla janë plagosur 13 veta.

"Në spital janë pranuar 13 vetë të plagosur, një nga të cilët rëbdë", ka deklaruar drejtori i shërbimit shëndetësor në rajonin e Qerbelasë, 110 km në jug të Bagdadit.

 

 

Anan takohet me kryeadminsitratorin irakian Bremer

 

Nju Jork, 19 janar 2004 - Kryeshefi i administratës amerikane në Irak, Paul Bremer do t'i bashkohet anëtarëve të tjerë të Këshillit Qeverisës irakian për bisedime me Sekretarin e Përgjithshëm të OKB-së, Kofi Anan në Nju-Jork.

Rritja e kundërshtimeve ndaj planeve të Uashingtonit për dorëzimin e pushtetit te irakianët ka bërë që ata të kthehen te OKB-ja.

Amerikanët duan që OKB-ja të përkrahë planin e tyre të dorëzimit të pushtetit që ka në thelb zgjedhje indirekte për asamblenë e re që më pas do të zgjedhë një qeveri.

Ata shpresojnë se një vulë aprovimi nga OKB-ja do t'i japë fund kritikave nga shumica sheite dhe në veçanti nga kleriku më me influencë, Ajatollah Sistani i cili kërkon zgjedhje direkte.

OKB-ja u largua nga Iraku tetorin e kaluar pas dy sulmeve me bomba ndaj selive atje.

 

 

Votime për kandidatin demokrat në Ajova

 

Ajova, 19 janar 2004 - Kandidatët demokratë për garën presidenciale në SHBA për herë të parë përballen sot me fushatën e gjatë të zgjedhjeve në Ajova.

Në 2 mijë ndarjet përgjatë shtetit, anëtarët e partisë do të votojnë për kandidatin e preferuar që do të jetë përballë presidentit Bush. Fushata ka vazhduar për muaj të tërë, por asnjë favorit nuk ka dalë në këtë shtet.

Sipas sondazheve, kandidati Hauard Din i cili kundërshtoi luftën në Irak dhe dukej se ishte para kandidatëve të tjerë, tani është shumë pranë me senatorët John kerry dhe John Edwards si dhe kongresmenin, Dik Gephard.

Cilido qoftë rezultati, ai nuk do të jetë përfundimtari, por mund të tregojë se kush ka ekipin më të fortë për fushatë elektorale dhe si rezultat edhe shansin më të mirë për të marrë edhe votën nga partia.

 

 

Forcat amerikane kanë vrarë sot dy shtetas të Jemenit dhe një sirian

 

Bagdad, 19 janar 2004 - Forcat amerikane kanë vrarë sot herët në mëngjes në një paralagje të Bagdadit dy shtetas të Jemenit dhe një sirian gjatë sulmit mbi një shtëpi, e cila, sipas policisë irakiane, ka qenë strehim për terroristët.

Ushtarët amerikanë para agimit kishin rrethuar shtëpinë në rajonin e El Moalemit dhe u dhanë arabëve 15 minuta të dorëzohen. Pasi ata refuzuan të dorëzohen, ushtarët amerikanë sulmuan shtëpinë dhe vranë tre arabë, ka bërë të ditur policia irakiane.

 

 

Komision parlamentar për Karaburunin

 

Tiranë, 19 janar 2004 - Pas sancës së jashtëzakonshme parlamentare mbi tragjedinë e 9 janarit në Karaburun, ku humbën jetën të paktën 21 persona, pritet që sot (e hënë) Kuvendi i Shqipërisë të diskutojë modalitetet e ngritjes së një komisioni të posaçëm parlamentar që do të hetojë këtë ngjarje.
Opozita e prirë nga Partia Demokratike ka kërkuar që shumica e anëtarëve të komisionit t'i përkasë asaj.

Kryetari i grupit parlamentar të demokratëve, Bamir Topi, tha se kjo do t'i shërbente transparencës së ngjarjes, ndërkohë që sipas Rregullores së parlamentit shqiptar, drejtimin e komisionit e merr forca politike që paraqet kërkesën për hetim.

Ndërkohë, autoritetet shqiptare të Policisë dhe Prokurorisë kanë vazhduar operacionet e konfiskimit dhe kjo e fundit pritet që të japë edhe zyrtarisht miratimin për sekuestrimet e bëra deri tani.

 

 

Në Greqi zhvillohen stërvitje për sigurinë e Olimpiadës

 

Athinë, 19 janar 2004 - Dy muajt e ardhshëm në Greqi do të zhvillohen stërvitje të mëdha në shërbim të sigurisë gjatë lojërave olimpike që do të fillojnë në Athinë më 13 gusht.

Sipas BBC, në këto stërvitje, që do të bëhen me pjesëmarrjen e trupave amerikane, do të trajtohen skenarë për goditje terroriste kimike, bakteriologjike dhe bërthamore.

Ministri grek i Rendit që ndodhej në fundjavë në Uashington, deklaroi se nga të dhënat e deritanishme nuk rezulton që gjatë zhvillimit të lojërave të cënohet siguria.

Qëkur fitoi të drejtën e organizimit të këtyre lojërave, në vitin 1997, Greqia ka qenë vazhdimisht nën trysninë e skepticizmit ndërkombëtar për aftësitë e saj që të garantonte lojëra të sigurta olimpike.
Deri tani organizatorët e kanë fryrë vazhdimisht buxhetin e sigurisë, që ka arritur në rreth 800 milionë dollarë, ose tri herë më shumë se në lojërat e kaluara olimpike të Sidnejt.

 

 

Një kontingjent ushtarak japonez hyri në Irak

 

Bagdad, 19 janar 2004 - Një kontingjent pararojë forcash japoneze hyri sot në Irak në përgatitje për dislokimin e një personeli jo-luftarak prej 1 mijë vetësh. Është hera e parë që Japonia dërgon trupa në një rajon lufte që nga Lufta e Dytë Botërore.

Kryeministri i Japonisë Juniçiro Koizumi e mori në mbrojtje vendimin e qeverisë për dërgimin e trupave në Irak megjithë kundërshtimin e fortë brenda vendit.

Ai tha se t'i japësh Irakut ndihmë për rindërtim është një përgjegjësi globale që i takon edhe Japonisë.
Sipas një ankete të kryer nga agjencia e lajmeve Kyodo dhe që u botua dje, më shumë se gjysma e të pyeturve u shprehën se ishin kundër dërgimit të trupave në Irak.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |