Revista bukureshtare:“Shqipëria XXI occident” (nr. 10-11)

Revista bukureshtare:“Shqipëria XXI occident” (nr. 10-11)

7 janar 2004 / TN

Baki Ymeri VOKA ( Bukuresht )

Hartuesit e kësaj formule, kryeredaktori dr. Luan Topçiu, pedagog i gjuhës shqipe pranë Universitetit të Bukureshtit dhe themeluesi i saj pasuniversitari Erion Piciri, duket se kësaj here i ofrojnë lëçitësit një formulë editoriale elitare, me materiale të përzgjedhura me sqimë e me shije, me një nivel superior të përmbajtjes së materialeve dhe të stilit të tyre.

Revista “Shqipëria XXI occident”, doli këto ditë në Bukuresht, më e plotë se kurrë, qoftë nga pikpamja e përmbajtjes (me më shumë se 40 autorë), qoftë për nga volumi i saj (130 faqe; format A4), qoftë për sa i përket paraqitjes grafike, e ilustruar me rreth 50 grafika. Revista “Shqipëria XXI occident” është një organ universitar politiko-kulturor me një spektër mjaft të gjërë, me synimin fisnik për të sjellë në gjuhën shqipe mendimin demokratik perëndimor dhe atë shqiptar. Mund të themi tashmë, pa asnjë hezitim, se formula e hartimit të revistës ka kapur nivele që meritojnë admirimin e lexuesit në gjuhën shqipe, me një fizionomi origjinale, që të kujton më tepër revistat e Europës Perëndimore, të këtij lloji. Hartuesit e kësaj formule, kryeredaktori dr. Luan Topçiu, pedagog i gjuhës shqipe pranë Universitetit të Bukureshtit dhe themeluesi i kësaj reviste dhe drejtor i saj, pasuniversitari Erion Piciri, duket se kësaj here i ofrojnë lëçitësit një formulë editoriale elitare, me materiale të përzgjedhura me sqimë e me shije, me një nivel superior të përmbajtjes së materialeve dhe të stilit të tyre. Rrethi i bashkëpunëtorëve të saj sa vjen dhe rritet.

Revista dëshmon se është një organ që ofron hapësirat e saj për bashkëpunëtorë me obcione të ndryshme, qofshin politike, qofshin kulturore, estetike etj. Autorët e përfshirë në këtë numër janë: Burke Feldman Edmund, kritik arti amerikan, Buruma Ian, shkrimtar e gazetar hollandez me banim në Sh.B.A, Giorgio del Vechio, profesor italian i filozofisë, Herman Northrop Frye kritik dhe studiues kanadez; Eduard Goldstucker, profesor çek i letërsisë së krahasuar, Aniela Jaffe sekretare e Jungut, Hans Kelsen jurist austriak, filozofi i mirënjohur Arthur Schopenhauer, Gabriel Liiceanu filozof bashkekohor rumun, Adam Michnik gazetar i njohur polak, poezi nga poeti i mirënjohur rumun Nichita Stanescu, ese nga shkrimtari kinez Lian Yang, nga shkrimtari hungarez Imre Kertez, nga komparatisti letrar rumun Romul Munteanu etj.

Po kështu meriton të rendisim autorët e dëgjuar shqiptarë, që nuk duan asnjë koment si Ismail Kadare, akademiku Luan Starova, akademiku Ali Aliu, dr. Ibrahim Rugova, analisti i mirënjohur Mustafa Nano, politikani i mirënjohur Arbën Xhaferi, poezi nga i mirënjohuri Visar Zhiti, Agnes Gonxhe Bojaxhiu (Nënë Tereza), ese nga dr.Luan Topçiu, Armand Bora, Baki Ymeri, Gani Bobi, Gustavo-Adolfo Loria-Rivel, Çlirim Kokonozi, poezi nga Afroviti Gusho, dhe deri tek më të rinjtë si Erion Piciri, Genti Kristo, Blendi Çeka, Penar Musaraj, Ermal Kaçurri, Ilir Shtino, pasuniversitarë të Universitetit të Bukureshtit, të Universiteteve Amerikane dhe të Kanadasë. Materialet e përfshira në këtë numër i përkasin shkencave politike, filozofisë, kritikës letrare, letërsisë së krahasuar, psikoanalizës, arteve pamore, teatrit, estetikës, semiotikës etj, ese vizatime mbi Shqipërinë, mbi popullin shqiptar në këtë kapërcyell mijëvjeçarësh, mbi proçesin e integrimit europian si provokim, i parë në këndvështrimin e historisë së mentaliteteve etj. Tekstet e huaja janë përkthyer nga Anjeza Kadilli, Elton Petoshati, Eugen Tata, Fjoralba Babamusta, Ibrahim Bajrami, Jonian Molla, Juxhin Vila, Livian Hamitaj, Neli Naço, Nilena Nasi, Renata Melonashi, Sonila Zisi, Sonila Bajrami, Ylli Dëshnica, Zamir Kokonozi.

Revista plotëson një nevojë për intelektualitetin shqiptar, për studentët shqiptarë dhe universitarët shqiptarë kudo që ndodhen. Vlen të theksohet se revista financohet nga antarët e redaksisë dhe shpërndahet falas. Është ky një motiv më tepër për të përgëzuar ekipin realizues që kryejnë një punë me pasion mbi baza vullnetare dhe sjellin një ndihmesë kolosale përmes kësaj reviste performante, eminamentisht europiane, me një vizion europian, me një strukturë europiane, pasqyruese e një demokracie të vërtetë europiane, me një dinamikë që përputhet dhe sinkronizohet tërësisht me atë që ndodh sot në Europë dhe në botë në fushën e mendimit filozofik, politik, estetik, letrar etj. Ana grafike e revistës është realizuar nga piktori i talentuar Gentian Zeka.