|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Mbrëmë në Podujevë: U hapën takimet e dhjeta kulturore “Kadri Kadriu”

Podujevë, 25 dhjetor 2003 (TN) – Në një atmosferë kulturore, mbrëmë në Podujevë u hapën takimet kulturore tradicionale “Kadri Kadriu” të cilat këtë vit po mbahen për të dhjetën herë. Në mbrëmjen e parë të këtyre takimeve morën pjesë krijues të Shoqatës së shkrimtarëve të Kosovës, poetë e poetesha të reja nga Podujeva, Prishtina, Mitrovica, Shqipëria, familjarë të poetit të ndjerë Kadri Kadriu, të Afrim Maliqit, etj.

Takimet kulturore “Kadri Kadriu” i shpalli të hapura drejtori i drejtorisë për rini, kulturë e sport z. Nexhmi Balaj i cili tha se sofra artistike e shpirti të kombit në Llap shënon dhjetë vjetorin e mbajtjes së takimeve të kulturës e cila mbajti gjallë frymën dhe jetën jo vetëm kulturore gjatë viteve të kaluara.

- Takimet e dhjeta po i hapim me ekspozitën e krijuesve të gjeneratave të ndryshme dhe do të vazhdojmë me prezantimin e dy botimeve të Qendrës së kulturës: librin e Albert Ukellit “Peisazh pa kornizë” dhe librin e Bekim Toçanit “Lirikat e Dhembjes” për të vazhduar me mbajtjen e orës së madhe letrare apo orës sime siç thoshte Kadri Kadriu, dhe në fund shfaqjen e premierës “Metamorfoza” të Tetarit të Qytetit që i kushtohet poetit, gazetarit dhe intelektualit Afrim Maliqi, dëshmorit Hyzri Talla dhe mikut të tyre Ilir Durmishi, tha ndër të tjera z. Balaj.

Ekspozita

Magjia Koletike e artistëve llapjanë është një botë e mrekullueshme dhe e pakufishme me të cilën na joshin; tinguj, pamje dhe figura, ka pohuar Nexhmi Balaj në katalogun e ekspozitës. Z. Balaj tha se ekspozita paraqet një ligjërim artistik magjepës që i drejtohet botës me gjuhën magjike të ngjyrave. “Ekspozitën që do ta çelim sot është e 8-ta me radhë dhe ka një traditë për t’komunikuar këndshëm me vendlindjen përmes gjuhës specifike të ligjeve të artit”, ka pohuar Balaj duke shtuar se këtë herë do të ekspozojnë artistë gjeneratash të ndryshme të cilët na bartin në krahët e botës artistike me optimizëm, shpresë dhe dashuri për jetë.

Magjia Koletike e artistëve llapjanë është një botë e mrekullueshme dhe e pakufishme me të cilën na joshin; tinguj, pamje dhe figura, ka pohuar Nexhmi Balaj në katalogun e ekspozitës. Z. Balaj tha se ekspozita paraqet një ligjërim artistik magjepës që i drejtohet botës me gjuhën magjike të ngjyrave. “Ekspozitën që do ta çelim sot është e 8-ta me radhë dhe ka një traditë për t’komunikuar këndshëm me vendlindjen përmes gjuhës specifike të ligjeve të artit”, ka pohuar Balaj duke shtuar se këtë herë do të ekspozojnë artistë gjeneratash të ndryshme të cilët na bartin në krahët e botës artistike me optimizëm, shpresë dhe dashuri për jetë.

Pjesëmarrës me 36 piktura, 16 skulptura, 2 grafika dhe punime dizajni në këtë ekspozitë ishin: Veli Blakqori, Fatmire, Fusha, Veli Gërvalla, Basri Mekolli, Arafat Hasani, Sarandë Kika, Milot Mustafa, Faton Aliu, Lirie Rrahmani, Kushtrim Balaj, Ilir Blakqori, Murat Murati, Rifadie Bllaca, etj.

Juria në përbërje: Ahmet Gashi, Burhan Blakqori dhe Izeir Mustafa zgjodhi tri punimet më të mira. Me çmimin e parë për pikturë u nderua Sarandë Kika, për grafikë Basri Mekolli dhe për skulpturë Milot Mustafa.

Prezantimi i dy botimeve të Qendrës së Kulturës

Për librin e autorit Albert Ukelli “Peisazh pa kornizë” në mungesë të redaktorit Sinan Gashi një fjalë rasti për vlerat e këtij libri e paraqiti znj. Bahrie Muçolli.

Ndërsa për librin “Lirikat e Dhembjes” të Bekim Toçanit foli shkrimtari dhe gazetari Fadil Halimi tha se libri i titulluar kështu, i përgjigjet në tërësi tematikës së vargjeve të shkruara në të cilat poeti i rrëfen bukur motivet e dhembjes që mund të lexohen edhe si dhembje përmasash më të mëdha

Ora letrare

Në Orën e madhe letrare, drejtori i DRKS Nexhmi Balaj ndau shpërblimet e konkursit letrar në të cilin arritën mbi 40 poezi.

Juria në përbërje: Bahrie Muçolli, Sabri Osmani dhe Nexhmi Balaj çmimin e parë i ndanë poezisë “Mikja ime në shi” të poetit Fadil Halimi, çmimin e dytë e fitoi poezia “Metafora e mashtrimit” e autorit Bekim Toçani dhe çmimin e tretë juria i ndau Shaban Pllanës për poezinë “Te guri i lumit”.

Në orën e madhe letrare poezitë e tyre i lexuan: Gani Xhafolli, Arlinda Kraja, Nebih Bunjaku, Bislim Aliu, Qefeser Sadiku, Arditë Latifi e Brikenë Ceraja (nga Mitrovica), Isak Havolli, Mynavere Abdullahu, Bekim Toçani, Shkurtë Kadriu, Ismete Hyseni, Flora Beqiri, Ganimete Krasniqi, Sokol Qerimi, etj. Juria e kësaj ore letrare e udhëhequr nga Nehat S. Hoxha, Sabri Osmani dhe Bahrie Muçolli çmimin për poezinë më të mirë të lexuar në këtë mbrëmje  “Afrim Maliqi” ua ndau poezive të Bislim Aliut dhe Brikenë Cerajës.

Nata e parë e Takimeve të kulturës “Kadri Kadriu” u përmbyll nën tingujt e kitaristit Imer Musa me serenadat e dashurisë interpretuar në kitarë. Nesër Teatri i Qytetit i Podujevës shfaqë premierën e Agron Gërgurit “Metamorfoza” sipas tekstit të monografisë së gani Xhafollit “Diell me tri dritare” kushtuar Afrim Maliqit, Hyzri Tallës dhe Ilir Durmishit.

Çmimi i parë për poezinë e konkursit letrar

 

Fadil Halimi

Mikja ime në shi

 

Në stacionin e mbramë

Kaherë të braktisur ishim

Krejt të hutuar e t’robëruar

Me gjethet e vjeshtës në zemër

 

Nën ombrellën e verdhësisë

Gjithçka digjej flakë

Për një fjalë

Për një çast që kurr s’e patëm

 

Mikja ime në shi

Vetëm ata sy të turbullt t’i njoh

Që përmallshëm e shprehin

Krejt atë që mungon

 

Pas kaq vitesh harrimi

Mikja ime

Kot e kërkon çelsin e ëndërrave

Në dollapin e letrave të grisura

 

Atje në stacionin e mbarmë

Kaherë të braktisur ishim

Krejt të hutuar e t’robëruar

Me gjethet e vjeshtës në zemër