Përmbajtja:

• Presidenti Rugova nënshkroi sot Rregulloren për dekorata

• Presidenti Rugova përgëzon qytetarët e Kosovës për Krishtlindjet

• Presidenti Rugova përgëzon ipeshkvin e Kosovës, imzot Mark Sopin

• Presidenti Rugova përgëzon Atin e Shenjtë Papa Gjon Pali II-të për Krishtlindjet

• Kryeministri Rexhepi tha se nga suficiti buxhetor do të bëhet riaktivizimi i minierës Trepça

• Imzot Mark Sopi përgëzoi besimtarët për festën e Kërshëndellave

• Zëdhënësja e UNMIK-ut thotë se "zgjedhjet serbe nuk nënkuptojnë asnjë paragjykim të statusit të Kosovës"

• Marsi Ris vizitoi Kuvendin komunal të Prishtinës

• Gjilan: LDK-ja zotohet se do ta realizojë projektin e pavarësisë së Kosovës

• Identifikohet kufoma e Brahim Poterës nga Podujeva, i zhdukur më 1999

• KFOR-i amerikan nderon me mirënjohje klubin e gazetarëve në Gjilan

• Moti i lig me të reshura bore ka vështirësur dukshëm komunukacionin rrugor në Kosovë

• Moti i lig me të reshura bore ka vështirësur dukshëm komunukacionin rrugor në Kosovë

• Fillojnë punimet në ndërtimin e rrugës magjistrale Komoran – Caralevë

• Marrëveshje bashkëpunimi Kosovë-Maqedoni për ndërtimin e një fabrike në Prishtinë

• Shoqata "Miqtë e TMK-së" i ka dhuruar Batalionit 40 të Mjekësisë dy autoambulanca

• Ligji mbi sigurinë në punë obligon të gjithë punëdhënësit që ta respektojnë atë

• Subjektet politike shqiptare në Luginën e Preshevës arrijnë pajtimin për themelimin e Këshillit Kombëtar

• Nga shpërthimi i një automobili bombë janë vrarë katër vetë në veri të Irakut

• Një seri shpërthimesh kanë tronditur Bagdadin

• Rasti i parë lopës së tërbuar në SHBA

• Bler e Bush do të vizitojnë Libinë gjatë vitit të ardhshëm

• Ish-ministri i jashtëm boshnjak, Muhamed Shaqirbej del në gjyq në Nju Jork

• Ndihmë evropiane për kompaninë italiane Parmalat

Presidenti Rugova nënshkroi sot Rregulloren për dekorata

 

Prishtinë, 24 dhjetor 2003 - Presidenti i Kosovës, Ibrahim Rugova, nënshkroi sot para mediave Rregulloren për dekoratat që i jep institucioni i Presidentit të Kosovës.   Kjo rregullore përfshin dekoratat, urdhërat dhe titujt e nderit që Presidentit i Kosovës i akordon për individët, institucionet, shtetasit e Kosovës apo shtetasit e huaj si dhe për personat juridikë, që shquhen për merita të veçanta ndaj Kosovës dhe interesave kombëtare. Presidenti Rugova i njoftoi gazetarët me 25 dekoratat që i ndan ai, në bazë të dispozitave kushtetuese.

 

Rregullorja për dekoratat e Presidentit të Kosovës hyn në fuqi menjëherë.

 
Sipas Kornizës Kushtetuese të Kosovës, Presidenti ka autorizime të plota për ndarjen e dekoratave, urdhërave dhe titujve të nderit.

Presidenti i Kosovës jep këto dekorata:

1. Urdhëri Hero i Kosovës

2. Medalja e Artë e Lirisë

3. Medalja e Artë e Pavarësisë

4. Medalja e Artë e Lidhjes së Prizrenit

5. Dekorata Qytetar Nderi i Kosovës

6. Dekorata Crystalla Dardanica

7. Medalja Humaniste Nëna Tereze

8. Medalja Luftëtar i Lirisë Adem Jashari

9. Medalja e Paqes dhe Pajtimit Anton Çetta

10. Medalja Artist i Merituar

11. Medalja Mësues i Merituar

12. Dekorata Qytetar i Merituar i Kosovës

13. Medalja Presidenciale e Meritave

14. Medalja Civile për Shërbim të Kosovës

15. Medalja Ushtarake për Shërbim të Kosovës

16. Çmimi Presidencial "E" për shërbim të Eksportit

17. Çmimi Presidencial për Cilësi dhe Aftësi të Menaxhimit

18. Çmimi Presidencial për Inovime, Kërkime dhe Zhvillim

19. Çmimi i Presidentit për Siguri

20. Çmimi Presidencial për Studiues

21. Çmimi i Presidentit për Meritat e Ambientit

22. Trofeu i Presidentit

23. Çmimi Presidencial për suksese në prodhim dhe në biznes

24. Ambasador Nderi

25. Ambasador i Kombit të Kosovës

 

 

Presidenti Rugova përgëzon qytetarët e Kosovës për Krishtlindjet

 

Prishtinë, 24 dhjetor 2003 - Presidenti i Kosovës, Dr. Ibrahim Rugova, ka përgëzuar të gjithë besimtarët dhe qytetarët e Kosovës për Krishtlindjet, me urimet e përzemërta.

"Kjo është një ditë e bardhë e lindjes së Krishtit, ditë e paqes, e mirëkuptimit dhe e dashurisë për njëri-tjetrin. Kjo është festë e frymëzimit për vepra të mira e për njerëzi.

Urime të përzemërta u shprehim komandantëve dhe ushtarëve të KFOR-it, NATO-s, si dhe UNMIK-ut, OSBE-së, dhe përfaqësive diplomatike në Kosovë.

Dhashtë Zoti që Krishtlindjet e ardhshme t=i presim me njohjen formale të pavarësisë së Kosovës!", thuhet në përgëzimet e Presidentit Rugova.

 

 

Presidenti Rugova përgëzon ipeshkvin e Kosovës, imzot Mark Sopin

 

Prishtinë, 24 dhjetor 2003 - Presidenti i Kosovës, Dr. Ibrahim Rugova, ka përgëzuar imzot Mark Sopin, ipeshkv i Ipeshkvisë së Kosovës, për Krishtlindjet.

"Me rastin e festës së Krishtlindjeve, pranoni urimet e mia të sinqerta dhe të popullit të Kosovës.

E çmojmë lart veprën Tuaj për lirinë dhe pavarësinë e Kosovës dhe kujdesin Tuaj për paqe, mirëkuptim e besim midis nesh.

Dhashtë Zoti që Krishtlindjet e ardhshme t=i kremtojmë me njohjen formale të pavarësisë së Kosovës", thuhet në përgëzimet Presidentit Rugova drejtuar imzot Mark Sopit.

 

 

Presidenti Rugova përgëzon Atin e Shenjtë Papa Gjon Pali II-të për Krishtlindjet

 

Prishtinë, 24 dhjetor 2003 - Presidenti i Kosovës, Dr. Ibrahim Rugova, ka përgëzuar Atin e Shenjtë, Papa Gjon Palin II, për Krishtlindjet. Në urimin e Presidentit thuhet:

"Ju lutem pranoni urimet e mia të zemrës dhe të popullit të Kosovës për festën e Krishtlindjeve të shenjta.

Shenjtëria Juaj,

Në ditën e Krishtlindjeve edhe një herë Ju falënderoj për lumturimin e Nënës Tereze. Ky është një gëzim i madh për popullin e Kosovës dhe për të gjithë shqiptarët, si dhe për njerëzimin.

Shenjtëria Juaj,

Ju falënderoj shumë për Audiencën që më dhuruat më 20 dhjetor të këtij viti, në prag të Krishtlindjeve.

 

Populli i Kosovës ka çmuar lart këtë veprim Tuajin dhe ndihet i nderuar nga Ju, që gjithmonë kujdeseni për Kosovën.

Ju përshëndes nga vendi im, Kosova B Dardania antike, me dëshirë që të vëzhdoni të luteni për njohjen formale të pavarësisë së Kosovës".

 

 

Kryeministri Rexhepi tha se nga suficiti buxhetor do të bëhet riaktivizimi i minierës Trepça

 

Mitrovicë, 24 dhjetor 2003 - Kryeministri i Kosovës Bajram Rexhepi, i shoqëruar nga Bahri Shabani, kryetar i Bashkimit të Sindikatave të Pavarura të Kosovës, qëndroi dje për vizitë në Minierën Stantërg të "Trepçës".

 

Ata me këtë rast në horizontin e pestë nga minatorët u njoftuan për së afërmi me punën e pompave të reja për pastrimin e ujit të instaluara kohë më parë.

Duke folur për perspektivën e kësja miniere, Kryeministri Rexhepi iu premtoi minatorëve se do të angazhohet për ndarjen e një pjese të suficitit buxhetor të Kosovës për riaktivizimin e minierës.

 

Ai përkrahu projektet konkrete të minatorëve dhe i vlerësoi si të qëlluara investimet në minierë. Kryeministri Rexhepi u premtoi minatorëve për rifillimin e punës së kombinatit "Trepça" gjatë vitit të ardhshëm.

 

 

Imzot Mark Sopi përgëzoi besimtarët për festën e Kërshëndellave

 

Prishtinë, 24 dhjetor 2003 - Me rastin e festës së Kërshëndellave ipeshkvi i Ipeshkvisë së Kosovës, imzot Mark Sopi ka përgëzuar besimtarët katolikë, duke uruar që midis njerëzve të mbizotërojë paqja dhe bamirësia.

"Kjo natë e shenjtë na kujton një ngjarje të madhe që ka ndodhur në këtë botë, ajo na kujton lindjen e Jezu Krishtit, Shpëtimtarit të njerëzimit", thuhet në përgëzimet e Imzot Mark Sopit.

"Duke u dëshiruar të gjithë njerëzve vullnetmirë këtë lumturi dhe këtë kuptimësi të plotë të jetës, me dhuaatat e fëmijës Hyjnor të Betlehemit, ju uroj nga zemra këtë festë të madhe.

Për shumë mot Kërshëdellat, lindjen e Krishtit Zot", thpët mes tjerash në urimin e tij imzot Mark Sopi.

 

 

Zëdhënësja e UNMIK-ut thotë se "zgjedhjet serbe nuk nënkuptojnë asnjë paragjykim të statusit të Kosovës"

 

Londër, 24 dhjetor 2003 - Misioni i OKB-së në Kosovë do të vendosë pas mbajtjes së zgjedhjeve serbe nëse do të lejojë që përfaqësuesit serbë të mbajnë dy poste, një në qeverinë e Kosovës dhe tjetrën në atë të Serbisë, thotë Meçtild Heneker (Meschthilld Heneker) (Meshtild Heneker), zëdhënëse e UNMIK-ut.

Zonja Heneker në një bisedë me BBC-në tha se "marrëdhëniet ndërmjet Serbisë dhe Kosovës janë shumë komplekse dhe Kosova sipas Rezolutës 1244 është ende nën protektoratin e UNMIK-ut por edhe pjesë e Jugosllavisë", duke shtuar se "Kosova nuk është shtet i pavarur".

Në konstatimin e gazetarit se duke e lejuar mbajtjen e zgjedhjeve serbe në Kosovë mund të paragjykohet statusi përfundimtar i Kosovës, zëdhënësja e UNMIK-ut tha se "zgjedhjet serbe nuk nënkuptojnë asnjë paragjykim të statusit të Kosovës, sepse statusi përfundimtar i saj do të përcaktohet nga Këshilli i Sigurimit i OKB-së".

Znj. Heneker tha në vazhdim se po qe se një zyrtar publik në Kosovë zgjedhet në një post tjetër në një vend tjetër, atëherë duhet të shihet se çfarë ligji të zbatohet dhe të vlerësohet nëse postet e dyfishta shënojnë shkelje e ligjit.

 

"Ky person duhet ta shprehë dëshirën e tij. Nëse do që të mbajë dy postet apo vetëm njërën. Nëse ai thotë se do të mbajë të dyja, atëherë ne duhet të gjejmë një zgjidhje", tha zonja Heneker. Por, ajo pranon se nuk e di se çfarë thotë ligji, sepse ende nuk e ka lexuar.

 

 

Marsi Ris vizitoi Kuvendin komunal të Prishtinës

 

Prishtinë, 24 dhjetor 2003 - Shefja e Zyrës Amerikane në Prishtinë, Marsi Ris vizitoi sot Kuvendin komunal të Prishtinës, ku është njoftuar nga Ismet Beqiri, kryetar, për punët që janë duke u bërë në kryeqytet.

 

Marsi Ris ka thënë se ka interesim të firmave të mëdha amerikane për të investuar në Prishtinë dhe në gjithë Kosovën, ndonëse deri më tash nuk ka asnjë plan konkret.

Sipas zonjës Ris, prioritet i Zyrës amerikane është përmbushja e standardeve për Kosovën, sidomos në fushën ekonomike.

Në emër të popullit amerikan, Marsi Ris u ka uruar të gjithë qytetarëve të Kosovës festat e Kërshëndellave dhe Vitin e Ri.

 

 

Gjilan: LDK-ja zotohet se do ta realizojë projektin e pavarësisë së Kosovës

 

Gjilan, 24 dhjetor 2003 - Dega e LDK-së në Gjilan, e cila udhëheq pushtetin lokal në këtë komunë, të mërkurën ka shënuar 14-vjetorin e themelimit.

 

Në një solemnitet rasti, ku pos veprimtarëve të shumtë të kësaj partie, merrnin pjesë edhe kryetari i Degës së PDK-së, Ismail Kurteshi, kryetari i Degës së AAK-së, Fadil Gashi, këshilltari i UNMIK-ut, Charles Mesier, përfaqësues të KFOR-it, OSBE-së dhe të tjerë, kryetari i Degës, Xhemajl Hyseni tha se LDK-ja, për këto 14 vite ishte emblemë e Kosovës dhe e qytetarëve të saj.

Më tutje, Hyseni tha se LDK-ja, që nga themelimi e deri në qershor të vitit 1999, ishte lokomotivë e rezistencës aktive politike dhe krijuese e vlerave politike e institucionale në Kosovë, kurse pas luftës u shndërua në promotor të rimëkëmbjes, rindërtimit dhe zhvillimit ekonomik të Kosovës.

Dega e LDK-së në Gjilan, sipas Hysenit, për gjithë këto vite ishte besnike dhe e paluhatshme në kursin politik dhe në filozofinë politike të Dr.Ibrahim Rugovës. Ai tha se kjo parti ka mbështetje të madhe te qytetarët edhe në Gjilan.

Hyseni i ka rikujtuar në fund të pranishmit në premtimin e kësaj partie gjatë fushatës zgjedhore se LDK-ja do të finalizojë projektin e pavarësisë së Kosovës.

 

 

Identifikohet kufoma e Brahim Poterës nga Podujeva, i zhdukur më 1999

 

Podujevë, 24 dhjetor 2003 - Familjarët e Brahim Poterës, 52-vjeçar nga Llapashtica e Poshtme e Podujevës njoftuan sot se më i dashuri i tyre është identifikuar pas testit të ADN-së në morgun e Rahovecit.

I ndjeri Brahim Potera ishte baba i 4 fëmijëve dhe është arrestuar më 25 mars 1999 bashkë me 5 persona tjerë. Që nga kjo kohë familja nuk ka ditur asgjë për prindin dhe familjarin e tyre deri para dias ditëve kur është bërë identifikmi i kufomës së të ndjerit.

Nga grupi prej 6 peronash që u arrestuan nga forcat serbe, janë rivarrosur 4 persona: Xhevahir Gashi dhe Zenel Begolli nga Podujeva, Sinan Maçastena (65) nga Katunishta dhe ky i fundit nga Llapashtica e poshtme, ndërkaq që ende konsiderohen të pagjetur edhe 2 persona që janë arrestuar në grupin e njëjtë, kurse në gjithë Podujevën 57 persona.

Rivarrimi i Brahim Poterës do të bëhet të premten në orën 14.00 në varrezat e Llapashticës së Poshtme, kanë njoftuar familjarët.

 

 

KFOR-i amerikan nderon me mirënjohje klubin e gazetarëve në Gjilan

 

Gjilan, 24 dhjetor 2003 - Zyra për mardhënie me publikun e kampit ushtarak "Monetith" në Gjilan, që është njëra nga nënbazat më të mëdha amerikane në Kosovë, ka nderuar të martën me mirënjohje të veçantë për përkushtim të drejtë në gazetari pres-klubin "Beqir Musliu", gjatë një pritje që eprorët e këtij sektori kanë organizuar për gazetarët e këtushëm.

Shoqëria kosovare sot ka shumë nevojë për informim të drejtë, korrekt dhe të paanshëm, tha me këtë rast majori Gregori Tin, përgjegjës i zyrës për mardhënie me publikun në këtë kamp. Ai me këtë rast falënderoi korrespodentët për punën korrekte që po bëjnë në pasqyrimin e realitetit në Kosovë e në këtë aspekt edhe të aktiviteteve të paqeruajtësve amerikanë.

 

 

Moti i lig me të reshura bore ka vështirësur dukshëm komunukacionin rrugor në Kosovë

 

Prishtinë, 24 dhjetor 2003 - Si pasojë e motit të lig, të përcjellë me të reshura bore dje dhe sot është vështirësuar dukshëm komunikacioni rrugor në shumë pjesë të Kosovës.

 

Zyrtarë të Shërbimit Policor të Kosovës kanë bërë të ditur se gjendja më e rëndë ishte paraqitur dje pasdite në rrugët dalëse të Prishtinës. Ka pasur mbrëmë bllokime të trafiku në rrugët që çojnë për në Mitrovicë, Prizren, e Pejë.

 

Si pasojë e kësaj gjendje të rëndë në komunikacion kanë ndodhur edhe shumë aksidente rrugore.
Sipas SHPK, sot të gjitha rrugët magjistrale janë të kalueshme, por kërkohet syçeltësi nga vozitësit dhe të kenë pajisjet dimërore.

 

 

Fillojnë punimet në ndërtimin e rrugës magjistrale Komoran – Caralevë

 

Prishtinë - Prizren, 24 dhjetor 2003 - Ministri i Transportit dhe Postelekomunikacionit në Qeverinë e Kosovës, Zef Morina ka bërë inaugurimin e fillimit të punimeve në ndërtin e rrugës magjistrale që lidh Komoranin me Caralevën, përkatësisht magjistralen Prishtinë - Pejë me atë Prishtinë - Prizren. Ndërtimi i kësaj magjistrale, e cila është e gjatë mbi 15 kilometra, do të kushtojë mbi 3 milionë euro, mjete këto të siguruara nga Ministria e Transportit.

 

 

Marrëveshje bashkëpunimi Kosovë-Maqedoni për ndërtimin e një fabrike në Prishtinë

 

Shkup, 24 dhjetor 2003 - Gjatë një takimi në Shkup mes një delegacioni të Odës Ekonomike të Kosovës dhe asaj të Maqedonisë u nënshkrua marrëveshja ndërmjet ndërmarrjes "Ohrid" nga Maqedonia dhe ndërmarrjes private kosovare "Mona" për investim të përbashkët për ndërtimin e një fabrike për prodhimin e deterxhentit në Prishtinë.

 

Fabrika që do t'i punësojë rreth 150 punëtorë do të fillojë prodhimin në vitin 2004. Planifikohet që investimi i përbashkët të jetë në raport 50 me 50 për qind në vlerë prej 3.5 milion euro për prodhimtarinë e deterxhentëve të ndryshëm. Në fazën e parë do të punësohen rreth 80 punëtorë dhe do të investohen rreth një milion euro.

Kryetarët e Odës Ekonomike të Kosovës dhe asaj të Maqedonisë u pajtuan se marrëveshjet e tilla do të kenë ndikim pozitiv në zhvillimin ekonomik ndërmjet këtyre dy vendeve fqinje. Poashtu ata paralajmëruan nënshkrimin e marrëveshjes për tregti të lirë ndërmjet Kosovës dhe Maqedonisë.

 

 

Shoqata "Miqtë e TMK-së" i ka dhuruar Batalionit 40 të Mjekësisë dy autoambulanca

 

Prishtinë, 24 dhjetor 2003 - Shoqata "Miqtë e TMK-së" i ka dhuruar Batalionit 40 të Mjekësisë dy autoambulanca të cilat janë donacion i degës së kësaj shoqate në Zvicër, e cilia drejtohet nga Idriz Mehmeti. Në emër të kësaj shoqate këtë donacion Batalionit të Dyzet të Mjekësisë ia dorëzoi kryetari i Shoqatës "Miqtë e TMK-së", Xheladin Gashi.

 

 

Ligji mbi sigurinë në punë obligon të gjithë punëdhënësit që ta respektojnë atë

 

Prishtinë, 24 dhjetor 2003 - Ministri i Punës dhe Mirëqenies Sociale Ahemt Isufi, në një takim me inspektorët e punës, ka thënë se Ligji mbi sigurinë në punë, shëndetin dhe mjedisin e punës obligon të gjithë punëdhënësit, që në afat prej gjashtë muajsh të sigurojnë kushtet dhe masat e nevojshme të parapara me dispozita të këtij ligji.

 

Zbatimi i këtij ligji në praktikë do të mundësonte mbrojtjen e punëtorëve në kryerjen e detyrave të tyre, thotë ministri Isufi, i cili u ka shpërndarë inspektorëve të punës Ligjin, duke kërkuar nga ata që këto ligje të zbatohen me përpikshmëri.

 

 

Subjektet politike shqiptare në Luginën e Preshevës arrijnë pajtimin për themelimin e Këshillit Kombëtar

 

Preshevë, 24 dhjetor 2003 - Drejtuesit e tri subjekteve politike shqiptare që veprojnë në Luginë të Preshevës kanë arritur një marrëveshje për të themeluar Këshillin Kombëtar të Shqiptarëve të këtij rajoni.

 

Kryetari i Partisë për Veprim Demokratik Rizah Halimi, kryetari i Partisë Demokratike Shqiptare, Rahmi Mustafa dhe kryetari i Lëvizjes së Progresit Demokratik, Jonuz Musliu, në një takim të mbajtur në Bujanoc janë marrë vesh që brenda kësaj jave t'i bëjnë konturat e Këshillit Kombëtar.

 

 

Nga shpërthimi i një automobili bombë janë vrarë katër vetë në veri të Irakut

 

Arbil, 24 dhjetor 2003 - Një vetëvrasës me automobil bombë ka sulmuar ndërtesën qeveritare në qytetin kurd Arbil në veri të Irakut, ku janë vrarë të paktën katër njerëz dhe janë plagosur 20 të tjerë, njofton Rojter duke cituar zyrtarë irakianë.

Automobili ka shpërthyer para ndërtesës së Ministrisë së Brendshme në këtë qytet, dhe ka vrarë sulmuesin me bombë, dy policë roje dhe një kalimtar.

Ndërtesa e ministrisë ka pësuar dëme materiale dhe janë thyer xhamat në ndërtesat e afërta të banimit.

 

 

Vriten tre ushtarë amerikanë në veri të Bagdadit

 

Bagdad, 24 dhjetor 2003 - Nga shpërthimi i një bombe skaj rrugës, ndërsa po kalonte një kolonë amerikane, janë vrarë tre ushtarë amerikanë, njoftn Rojter.

Automjeti ushtarak është shkatërruar nga shpërthimi që ka ndodhur sot në qytetin Samar, 60 milja në veri të Bagdadit, thuhet në një deklaratë ushtarake.

 

 

Një seri shpërthimesh kanë tronditur Bagdadin

 

Bagdad, 24 dhjetor 2003 - Një seri shpërthimesh tronditi sot sërish Bagdatin. Njoftohet për mëse 15 shpërthime. Sipas të dhënave të dëshmitarëve okularë helikopterët amerikanë goditën destinacione në jugperëndim të Bagdatit, pasi në këtë zonë u sulmua një autokolonë e ushtrisë amerikane.

 

Nuk ka të dhëna për viktima. Një zëdhënëse e ushtrisë amerikane konfirmoi, se këto veprime jane kryer në kuadër të operacionit "Iron Justice" (drejtësi e hekurt), qëllimi i të cilit është ndërprerja e burimeve financiare të parave për grupet e rezistencës dhe lufta kundër korrupsionit në Irak.

 

 

Rasti i parë lopës së tërbuar në SHBA

 

Uashington, 24 dhjetor 2003 - Sekretarja amerikane e Bujqësisë, Ann Veneman, njoftoi rastin e parë të njohur të sëmundjes së lopës së tërbuar në Shtetet e Bashkuara, por ajo tha se ka besim në sigurinë e furnizimeve amerikane të ushqimit dhe se rreziku për konsumatorët është minimal.

Ajo tha se megjithatë është ende herët të thuhet nëse ky është një rast i izoluar. Njoftimi u bë shkak për rënien e menjëhershme të çmimit të aksioneve të kompanive të tilla me shtrirje ndërkombëtare, si McDonald's - një nga përdoruesit e mëdhenj të mishit të gjedhit.

Japonia dhe Koreja e Jugut po ndalojnë përkohësisht importin e mishit amerikan të gjedhit pas zbulimit dje të një rasti të sëmundjes së lopës së tërbuar në shtetin perëndimor të Washingtonit. Vendet e Azisë Lindore janë ndër importuesit kryesorë të mishit amerikan të gjedhit.

 

 

Bler e Bush do të vizitojnë Libinë gjatë vitit të ardhshëm

 

Tripoli, 24 dhjetor 2003 - Kryeministri britanik Toni Bler dhe Presidenti amerikan Xhorxh Bush, gjatë vitit 2004 ndaras do të vizitojnë Libinë, ka deklaruar i biri i liderit libian Moamer Gadafi, për një gazetë arabe.

"Kryeministri britanik do të vizitjë Tripolin në fillim të vitit të ardhshëm. Pastaj duhet të pasojë vizita e Presidentit amerikan Xhorxh Bush në Tripoli. Supozoj se Presidenti amerikan do të vijë në Libi pas pezullimit të embargos amerikane, e cila sipas mendimit tim, nuk duhet të zgjasë më shumë se tre muaj", ka thënë Seif-el islam el Gadafi.

 

 

Ish-ministri i jashtëm boshnjak, Muhamed Shaqirbej del në gjyq në Nju Jork

 

Nju Jork, 24 dhjetor 2003 - Ish-ministri i jashtëm boshnjak, Muhamed Shaqirbej, tha para një gjykate të New Yorkut se armiqtë e tij politikë kanë ngritur akuza të rreme kundër tij për përvetsim parash.

Zoti Shaqirbej doli dje para gjykatës për të kundërshtuar kërkesën për ekstradim të paraqitur nga Bosnje-Hercegovina. Autoritetet amerikane e arrestuan atë në muajin mars.

Sarajeva e akuzon atë se ka vjedhur më shumë se 2 milionë dollarë nga fonde qeveritare gjatë kohës kur ishte ambasador pranë Kombeve të Bashkuara nga viti 1992 deri në vitin 2000.

 

 

Ndihmë evropiane për kompaninë italiane Parmalat

 

Romë, 24 dhjeteor - Qeveria italiane i ka kërkuar Komunitetit Evropian që të pezullojë rregullat e BE-së që kanë të bëjnë me ndihmën shtetërore që i jepet industrisë bulmetore.

Dy vendime të rëndësishme dolën të martën nga mbledhja e kabinetit e thirrur nga kryeministri Berluskoni për t'u marrë me krizën që ka përfshirë kompaninë Parmalat dhe që kërcënon mijëra vende pune.

Së pari, Italia i ka kërkuar BE-së të pezullojë rregullat që udhëheqin ndihmën shtetërore për industrinë e qumështit dhe të djathit dhe masa përkrahëse të komunitetit.

Së dyti, kabineti aprovoi një dekret në risktrukturimin e kompanive të mëdha që përballen me falimentim.

Burime qeveritare thanë se një komision parlamentar hetues do të ngrihet gjithashtu.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |