Përmbajtja:

• Në Prishtinë u kremtua 14-vjetori i themelimit të Lidhjes Demokratike të Kosovës

• Kryeministri Rexhepi përgëzoi qytetarët e Kosovës me rastin e Krishtlindjeve

• Kryeparlamentari Daci përgëzoi të gjithë qytetarët për Kërshëndella

• Sot në Gjakovë, në një ceremoni mortore, u bë rivarrimi 11 trupave të sjella nga Serbia

• Gjilani po e përmbyll këtë vit me 119 projekte të realizuara

• Maqedonia do të kërkojë nga UNMIK-u ekstradimin e Xhemail Hysenit

• Një delegacion i lartë i armatës çeke dhe asaj sllovake po viziton komunën e Podujevës

• Ish-komandanti i UÇK-së në Maqedoni Xhemail Hyseni u është dorëzuar KFOR-it

• Ministri i Kulturës e vlerëson të suksesshëm këtë vit

• Policia beson të ketë gjetur armën me të cilën dyshohet se është kryer vrasja e argjendarit Ylber Topërllaku

• UNMIK-u nuk kundërshton votuesit serbë të Kosovës që të marrin pjesë në zgjedhjet e Serbisë

• Qeveria e Kosovës vitin e ardhshëm do të angazhohet për uljen e papunësisë dhe krijimin e legjislaturës së nevojshme

• Publikohet projekti për ngritjen e një memoriali për ushtarët e rënë për lirinë e Kosovës

• U përurua fillimi i punimeve në rregullimin e rrugës Batushë - Koshare

• Në Prishtinë u bë promovimi i 18 titujve të rinj të botuar nga ndërmarrja botuese "Rilindja"

• Trajkovski takoi liderët e katër partive politike nënshkruese të Marrëveshjes së Ohrit

• Në Tiranë policia ka kapur një sasi të madhe droge

• Një gjykatës është vrarë në veri të Irakut

• Të paktën tetë palestinezë janë vrarë sot nga izraelitët

• Çeçenët vrasin dy oficerë dhe një kalimtar në Grozni

• Në Rripin e Gazës vriten katër palestinezë

• Një tërmet i fuqishëm Kaliforni, dy vetë humbën jetën

• Ministri i jashtëm egjiptian sulmohet në Jerusalem

• Presidenti Bush u bën thirrje amerikanëve të vazhdojnë planet e tyre me rastin e festave të fund-vitit

• Rusia premton t'i falë Irakut më shumë se gjysmën e borxhit

Në Prishtinë u kremtua 14-vjetori i themelimit të Lidhjes Demokratike të Kosovës   Rugova: LDK-ja është parti politike kompatibile me vlerat e traditës dhe me vlerat moderne Prishtinë, 23 dhjetor 2003 - Lidhja Demokratike e Kosovës kremtoi sot 14-vjetorin e themelimit. Në një solemnitet të organizuar me këtë rast në hotelin "Grand" në Prishtinë, Presidenti i Kosovës, njëherit edhe kryetar i LDK-së, Dr. Ibrahim Rugova, foli për arritjet dhe sukseset e kësaj partie, e cila është formuar e para në hapësirat shqiptare.

 

Merrnin pjesë funksionarë të lartë të LDK-së, aktivistë të shumtë nga terreni, ministra e deputetë të saj, përfaqësues të partive të tjera politike, përfaqësues të zyrave të huaja diplomatike në Prishtinë dhe mysafirë të tjerë.

Presidenti Rugova, pasi përshëndeti të pranishmit, tha se në emër të LDK-së i ka ftuar sot në këtë ceremoni solemne për ta festuar së bashku këtë përvjetor.

"Dita e themelimit të LDK-së, ka një simbolikë të veçantë se bie në vigjilie të festave të Krishtlindjeve dhe të Vitit të Ri. Do të thotë një ditë e lindjes dhe e fillimit të stinës së re. Kështu e deshi Zoti dhe populli i Kosovës, atëherë kur u themelua. Ishte një ndërrim epokash dhe vitesh", theksoi Dr. Rugova dhe vazhdoi:

 

"Prandaj, sot mund të themi pas 14 vjetësh, se 23 dhjetor 2003i i vitit 1989, është një Ditë e shënuar për LDK-në, ditë e shënuar për popullin e Kosovës, ditë e shënuar për Kosovën. Pra është një ditë e madhe e Kosovës".

Presidenti Rugova në vazhdim tha: "LDK u themelua si parti dhe lëvizje për të mbrojtur Kosovën, për t'i mbrojtur vlerat kombëtare dhe vlerat e dinjitetit të popullit të Kosovës. Është partia e parë demokratike në botën shqiptare dhe në këtë pjesë të Evropës e të botës pas Luftës së Dytë Botërore.

 

LDK-ja krijoi shtetin e Kosovës përmes akteve madhore, siç janë Deklarata e Pavarësisë (Korrik 1990), Kushtetuta e Kaçanikut e Republikës së Kosovës (shtator 1990) dhe Referendumit për Pavarësi (shtator 1991) si dhe i krijoi institucionet me zgjedhjet parlamentare e presidenciale të vitit 1992.

 

Kështu LDK-ja krijoi shtetin funksional Republikën e Kosovës, që në botë u bë i njohur si 'shtet paralel', apo 'shtet i shqiptarëve të Kosovës'. Ky është kontributi i LDK-së dhe i popullit të Kosovës në historinë e lëvizjeve kombëtare botërore për liri e pavarësi", nënvizoi Dr. Rugova.

 

"Poashtu LDK-ja e mbrojti këtë shtet kur u sulmua nga armiku ynë më 1998 dhe 1999. E mbrojti së bashku me popullin e Kosovës duke marrë pjesë aktive në luftën për liri e pavarësi, dhe falë Zotit e NATO-s të udhëhequr nga SHBA dhe aleatët e tyre evropianë, Kosova u bë një vend i lirë dhe de facto i pavarur".

"Pas luftës, në liri, LDK-ja ishte promotorja kryesore në ndërtimin dhe rindërtimin e Kosovës, bashkë me miqtë ndërkombëtarë. Ajo duke gëzuar besimin e popullit të Kosovës në dy palë zgjedhje lokale dhe në ato nacionale fitoi me shumicë solide votash. LDK-ja për këto katër vjet e gjysmë e tregoi fuqinë e vet të madhe.

 

Gjatë kësaj kohe LDK-ja kontribuoi në ndërtimin e institucioneve shtetërore të Kosovës dhe kujdeset për stabilitetin dhe efikasitetin e tyre. LDK-ja kontribuoi në ngritjen e kulturës dhe tolerancës politike dhe të kulturës shtetërore të Kosovës, gjithmonë në të mirë të vendit dhe të popullit".

Ndërkaq, duke folur për programin e sotëm të kësaj partie, Ibrahim Rugova tha: "Sot LDK-ja punon në realizimin e programit nacional me të cilat i fitoi zgjedhjet. Këtë Program e realizon përmes institucioneve.

 

Ajo i përkrah objektivat e institucioneve të Kosovës, siç janë zhvillimi ekonomik, privatizimi, krijimi i vendeve të reja të punës për të rinjtë dhe integrimin e minoriteteve në shoqërinë dhe shtetin e Kosovës.

 

LDK-ja insiston në njohjen e drejtpërdrejtë formale të pavarësisë së Kosovës nga SHBA, BE dhe formalizimi nga OKB-ja. Kjo do t'i shpejtonte proceset e brendshme demokratike e ekonomike dhe do të qetësonte këtë pjesë të Europës e të botës. Pra, një Kosovë e pavarur, demokratike e integruar në BE në NATO dhe në miqësi permanente me SHBA", theksoi Presidenti Rugova.

"LDK-ja ka pasur sukses në profilizimin e saj si parti politike. Ajo po e bën dhe do të bëjë me efikase strukturën e partisë dhe do të ruajë frymën gjithëpërfshirëse të anëtarësisë dhe të popullit, që ishte shpirt i veprimit të saj në këtë periudhë 14-vjeçare. Pra, ishin 14 vjet pune, veprimi e sakrifice.

 

Prandaj sot i përkujtojmë në këtë ditë gëzimi të LDK-së të gjithë ata që dhanë jetën për liri, pavarësi e demokraci të Kosovës", tha ai dhe theksoi se "sot LDK është e aftë si gjithmonë, të vazhdojë dhe fuqizojë veprimin e vet në të mirë të Kosovës, sepse e gëzon besimin e popullit të Kosovës".

Presidenti Rugova paralajmëroi se vitin 2004, LDK-ja do ta shpallë vit të LDK-së, në përmbushjen e 15-vjetorit të saj, që do të shënohet me veprime dhe manifestime të ndryshme, sidomos nga Forumi i Rinisë.

"Do thënë se LDK-ja është parti politike kompatibile me vlerat e traditës së lëvizjeve më të mira që nga Skënderbeu e Lidhja e Prizrenit e këndej dhe kompatibile me vlerat moderne të partive politike të botës demokratike perëndimore", theksoi Dr. Rugova.

"Sot në këtë 14-vjetor mund të themi se LDK-ja e kremton një përvjetor të artë të veprimit dhe të besimit të saj. Kështu ajo është bërë simbol dhe fuqi aktive e Kosovës", tha Presidenti dhe theksoi se nga ky përvjetor solemn përshëndet Presidentin Bush, Kryeministrin Bler, Presidentin Shirak, Kancelarin Shreder dhe Kryeministrin Berluskoni, si dhe Atin e Shenjtë, Papa Gjon Pali II, që siç tha, gjithmonë kujdeset për Kosovën.

"Me fat Dita e LDK-së. Me fat Krishtlindjet dhe Gëzuar Viti i Ri 2004. Zoti e bekoftë LDK-në. Zoti e bekoftë Kosovën", tha në fund të fjalës së tij, Ibrahim Rugova, kryetari i LDK-së dhe President i Kosovës.

 

 

Kryeministri Rexhepi përgëzoi qytetarët e Kosovës me rastin e Krishtlindjeve

 

Prishtinë, 23 dhjetor 2003 - Kryeministri i Kosovës Bajram Rexhepi, me rastin e Krishtlidnjeve, përmes një mesazhi ka përgëzuar qytetarët e Kosovës, me urimet më të përzemërta për këtë festë të madhe.

 

"Është kjo ditë dhe festë e ringjalljes, hapjes së zemrës, dhënjes së ndihmës dhe shtrirjes së dorës vëllazërore ndaj njëri-tjetrit", thuhet në mesazhin e kryeministrit Rexhepi.

"Le të jetë kjo një ditë kur i përkushtohemi njëri-tjetrit dhe i forcojmë lidhjet me të afërmit, miqtë dhe me të dashurit tanë. Le të jetë festë e forcimit të solidaritetit, miqësisë, dhe tolerancës sonë të pashterrshme ndërfetare", thotë Rexhepi, duke uruar paqe, mirësi dhe dashuri në ketë festë të madhe!

"Sikurse çdo vit, edhe këtë herë, le të na shërbej kjo festë e madhe si përkujtim për mirëkuptimin, besimin, paqen dhe drejtësinë në botë si dhe të sjellë mbarësinë dhe begatinë në familjen e çdo kosovari", thuhet në mesazhin e Kryeministrit Rexhepi me rastin e Krishtlindjeve.

 

 

Kryeparlamentari Daci përgëzoi të gjithë qytetarët për Kërshëndella

 

Prishtinë, 23 dhjetor 2003 - Kryetari i Kuvendit të Kosovës, akademik Nexhat Daci përgëzoi sot të gjithë qytetarët e Kosovës për festën e Kërshëndellave me urimet që t'i kalojnë në mirëqenie e begati, në shëndet e mirëkuptim, në harmoni e paqë shpirtërore, në familjet e veta dhe në mesin e më të dashurve, miqëve, shokëve dhe dashamirëve.

Në përgëzimet e Dacit thuhet se "Kërshëndellat në Kosovë ka kohë që janë festë tradicionale, festë e tubimit familjar, e këmbimit të dhuratave, festë e gëzimit dhe e dëfrimit, si dhe festë e kujtimit të më të dashurve tanë, që në këto momente nuk janë pranë neve.

 

Kosova dhe qytetarët e saj Krishtëlindjet i presin me një vargë suksesesh në rrugën e vet të zhvillimit dhe emancipimit, si shoqni dhe civilizim evropian si qytetarë të lirë e të dinjiteshëm", thuhet në urimin e kryeparlamentarit Daci.

 

 

Sot në Gjakovë, në një ceremoni mortore, u bë rivarrimi 11 trupave të sjella nga Serbia

 

Gjakovë, 23 dhjetor 2003 - Sot në Gjakovë, në një ceremoni mortore, u bë rivarrimi 11 trupave nga 28 sish që kohë më parë ishin sjellë nga Serbia. Të gjithë ata ishin zhvarrosur nga një varrezë masive në Serbi. Në mesin e tyre ishte edhe trupi i këngëtarit të njohur Esat Bicurri.

Në këtë ceremoni mortore në kodrën e Çabratit ishin tubuar familjarë të viktimave të terrorit serbe nga viti 1999, qytetarë dhe zyrtarë komunalë të Gjakovës dhe nga Prishtina.

Fillimisht arkivolet me trupat e 11 martirëve ishin vendosur para Shtëpisë së Kulturës, ku mijëra qytetarë u bënë homazhe për herë të fundit dhe u dhanë nderimet e fundit. Në këtë ceremoni foli kryetari i komunës së Gjakovës Aqif Shehu, ndërkaq në emër të shoqatës "Thirrjet e nënave", foli Nusrete Kumnova.

 

 

Gjilani po e përmbyll këtë vit me 119 projekte të realizuara

 

Gjilan, 23 dhjetor 2003 - Programi i festave të fundvitit, në Gjilan, ka vazhduar mbrëmë me koncertin e muzikës klasike të Lule Elezit, Alisa Barakut dhe mysafirët e tyre "Tri Kosova".

Në hapje të natës së dytë, ku ishin të pranishëm edhe ministrat e Qeverisë së Kosovës, Behxhet Brajshori e Ali Sadriu, kryetari i komunës Lutfi Haziri mbajti një fjalë rasti, ku përmendi në pika të shkurta të arriturat e këtij viti. "Nuk themi se i kemi bërë të gjitha ato që na duhen, por as nuk kemi ndejur duarkryq. Jemi munduar të bëjmë sa më shumë përparime", tha Haziri.

Për më pak se një vit, komuna e Gjilanit ka arritur t`i realizojë 119 projekte, me vlerë të përgjithshme prej 12 milionë Euro dhe komuna ka marrë pjesë nga buxheti i saj me 1 milion e 800 mijë euro. Edhe 70 projekte tjera janë në fazën e tenderimit.

Sot Gjilani ka infrastrukturë më të mirë: më shumë rrugë të asfaltura në qytet dhe më shumë rrugë të kalueshme në fshatra, ka më shumë hapësirë të re shkollore, shëndetësore, kulturore, ka më tepër ujë, ose thënë ndryshe, ka më shumë kushte për jetë normale, tha Haziri.

Por, nuk duhet të harrojmë se për të ndryshuar një të kaluar të keqe, duhen me shumë se katër vite. Projektet tona janë shpërndarë në 515 kilometra të komunës sonë, që nga qendra e qytetit e deri te vendbanimi më i largët, atje ku jeton qoftë edhe një familje e vetme.

"Dua t`ju rikujtoj se Gjilani ka përfituar për këto katër vite më tepër se 500 projekte dhe vlerësohet komuna më e sukseshme në Kosovë, duke ju falënderuar dhe donatorëve si USAID, SDC, AER e të tjerë, tha kryetari Lutfi Haziri.

 

 

Maqedonia do të kërkojë nga UNMIK-u ekstradimin e Xhemail Hysenit

 

Shkup, 23 dhjetor 2003 - Ministria e Punëve të Brendshme të Maqedonisë njofton se ka përgatitur dokumentacionin e nevojshëm për të kërkuar nga UNMIK-u që t'ia ekstradojë Xhemail Hysenin, një ish-komandant i Ushtrisë Çlirimtare Kombëtare, i cili dje u është dorëzuar vullnetarisht autoriteteve të KFOR-it në Kosovë.

KFOR-i ka bërë të ditur se Xhemail Hyseni mbahet i arrestuar në bazën ushtarake amerikane Bondstil. Ai është ndaluar për t'u marrë në pyetje dhe pas kësaj do t'u dorëzohet autoriteteve të UNMIK-ut. Muajin e kaluar, autoritetet maqedone e dënuan Hysenin, në mungesë, me 7 vite burgim, me akuzën për "terrorizëm".

 

 

Një delegacion i lartë i armatës çeke dhe asaj sllovake po viziton komunën e Podujevës

 

Podujevë, 23 dhjetor 2003 - Sot për një vizitë në komunën e Podujevës po qëndron një delegacion i lartë i udhëhequr nga Ministri i Mbrojtjes i Republikës Çeke Miroslav Kostelka dhe shefi i Shtatmadhorisë i Armatës gjenerali Pavel Shtefka dhe ambasadorë të Republikës Çeke e Sllovake dhe personalitet tjera shtetërore.

Vizita e delagacionit çek e sllovak filloi në bazën e KFOR-it në Shajkofc ku ushtarëve paqeruajtës iu drejtua Ministri i Mbrojtjes z. Kostelka i cili përgëzoi ushtarët për misionin e tyre paqeruajtës në Kosovë.

 

"Qëllimi i vizitës është që të jemi afër ushtarëve tanë në prag të Krishtlindjeve meqë ata janë larg familjeve të tyre", deklaroi ministri Kostelka, duke shtuar se është i kënaqur me punën që po bëjnë paqeruajtësit nga Çekia por edhe ushtarët sllovakë në Kosovë.

Një fjalë përshëndetëse para ushtarëve dhe personaliteteve tjera e mbajti edhe shefi i Shtatmadhorisë gjenerali Pavel Shtefka si dhe ambasadorja Judita Shtouraçova.

 

Në këtë ceremoni rasti kryetari i komunës së Podujevës Agim Veliu përgëzoi ministrin Kostelka për punën e mirë që po bën KFOR-i çek e sllovak duke shprehur gatishmërinë që miqësia në mes Çekisë dhe popullatës së Podujevës dhe të Kosovës të vazhdohet dhe të forcohet edhe më shumë.

 

 

Ish-komandanti i UÇK-së në Maqedoni Xhemail Hyseni u është dorëzuar KFOR-it

 

Prishtinë, 23 dhjetor 2003 - Forcat ushtarake ndërkombëtare në Kosovë kanë njoftuar se komandanti i ish- Ushtrisë Çlirimtare Kombëtare në Maqedoni Xhemail Hyseni, u është dorëzuar KFOR-it dhe ndodhet në paraburgim në bazën amerikane Bondstill.

 

Hyseni i njohur si "komandant Xhimi Shia", po mbahet në bazën amerikane për shkak të hetimeve, por së shpejti do t'i dorëzohet policisë së UNMIK-ut. Në një komunikatë të KFOR-it të lëshuar mbrëmë, theksoshet se Hyseni "më herët është dënuar në mungesë për krime të kryera në Maqedoni".

 

 

Ministri i Kulturës e vlerëson të suksesshëm këtë vit

 

Prishtinë, 23 dhjetor 2003 - Ministria e Kulturës, Rinisë dhe Sportit në një raport vjetor thekson se, megjithëse ka pasur një buxhet shumë të vogël, arriti sukses të mjaftueshëm që të plotësojë planprogramin e saj, tha ministri Behxhet Brajshori.

 

Sipas tij, kjo ministri nuk ka suficit buxhetor, por ka deficit për shkak të disa projekteve të cilat vazhdojnë edhe në vitin e ardhshëm.

Brajshori nënvizoi se kultura është çështja kryesore për jetën e kombeve, rajoneve, territoreve dhe popujve. Ndërkaq, përfshirja e minoriteteve në të gjitha sferat e jetës kulturore ka qenë dhe do të mbetet njëra ndër prioritetet e kësaj ministrie, tha Brajshori.

 

Vetëm 9 milion euro është buxheti për vitin 2004 për këtë ministri, tha ai dhe kjo nuk do të mjaftojë, por megjithatë me ndihmën e donatorëve do t'i plotësojnë kërkesat, tha ai.

 

 

Policia beson të ketë gjetur armën me të cilën dyshohet se është kryer vrasja e argjendarit Ylber Topërllaku

 

Podujevë, 22 dhjetor - Një revole e tipit jugosllav e cila ishte e mbushur dhe e gatshme për t'u përdorur është gjetur në Podujevë, ka njoftuar policia rajonale e UNMIK-ut. Sipas policisë, arma e gjetur besohet të jetë përdorur në disa rastin e tentim plaçkitjeve dhe vrasjes së datës 18 dhjetor në Podujevë.

Zëdhënësi i policisë së UNMIK-ut Malkolm Eshbi tha se derisa të kryhet testi nuk mund të konfirmohet dyshimi. "Mirëpo, policia beson se arma e gjetur besohet të jetë përdorur edhe në rastin e tentim plaçkitjes dhe vrasjes së fundit të personit në Podujevë", tha Eshbi, i cili shtoi se hetimet po vazhdojnë dhe se po punohet në kapjen e personit të katërt, i dyshuar për krimin.

Policia ka informuar edhe për arrestimin e një personi në fshatin Herticë të cilit i kanë konfiskuar një revole TT të kalibrit 7.62 mm, katër rrathë municion, 25 rrathë municion të ndryshëm, thikë, etj. Policia e UNMIK-ut ka raportuar edhe aksionin e quajtur AAli Baba@ i cili është zhvilluar në stacionet e policisë në Podujevë, Lipjan, Obiliq, Shtime dhe në Prishtinë.

Policia rajonale e UNMIK-ut ka njoftuar edhe për dy bomba dore të dorëzuara nga një qytetar.

 

 

UNMIK-u nuk kundërshton votuesit serbë të Kosovës që të marrin pjesë në zgjedhjet e Serbisë

 

Prishtinë, 23 dhjetor 2003 - Administrata e UNMIK-ut në Prishtinë në një deklaratë për opinion, që është reagim ndaj deklaratës së djeshme të Parlamentit të Kosovës kundër mbajtjes së zgjedhjeve parlamentare të Serbisë në territorin e Kosovës më 28 dhjetor theksohet:

 

"Është praktikë e rëndomtë dhe e respektuar ndërkombëtarisht që votuesit të marrin pjesë në zgjedhje aty ku kjo është e mundshme, pa marrë parasysh nëse banojnë ose jo në hapësirën e administruar nga autoriteti që organizon zgjedhjet".

Në këtë komunikatë pastaj theksohet se "Misioni i OKB-së nuk organizon votimet për institucionet jashtë territorit që administron, mirëpo çdo veprim për pengimin e tyre do të ishte shkelje e të drejtave themelore demokratike dhe një gjë e tillë është e papranueshme".

 

 

Qeveria e Kosovës vitin e ardhshëm do të angazhohet për uljen e papunësisë dhe krijimin e legjislaturës së nevojshme

 

Brezovicë, 23 dhjetor 2003 - Kryeministri i Kosovës Bajram Rexhepi në një takim me gazetarë të mbajtur në Brezovicë, paraqiti objektivat kryesore të qeverisë për vitin 2004, si dhe falenderoi mediat për raportimin mbi punën e saj.

 

Ai me këtë rast u zotua se në vitin 2004 Kosova nuk do të ketë fare suficit dhe shfaqi shpresën se procesi i privatizimit do të vazhdojë me ritëm më të shpejtë në mënyrë që vendi të ketë një zhvillim më të hovshëm ekonomik.

 

Sipas tij edhe suficiti i sivjemë nuk është aq i lartë siç është publikuar në media. Kryeministri Rexhepi tha se nuk është e vërtetuar as shuma aq e lartë e suficitit, ngase sipas tij, që prej shtatorit, kur është publikuar në media, rreth 80 për qind e buxhetit është shfrytëzuar.

Kryeministri Rexhepi tha se Qeveria do të angazhohet për uljen e papunësisë në vend dhe krijimin e legjislaturës së nevojshme e cila do të shërbejë si një segment për shtetësinë e Kosovës.

Rexhepi tha se pas zgjedhjeve në Serbi ministrat e pakicës serbe në Qeverinë e Kosovës duhet të vendosin se a duan të mbesin anëtarë të kësaj qeverie, apo do të merren me aktivitete të tjera.

 

 

Publikohet projekti për ngritjen e një memoriali për ushtarët e rënë për lirinë e Kosovës

 

Prishtinë, 23 dhjetor 2003 - Miqtë privatë amerikanë të Kosovës publikuan dje në Prishtinë planet për ngritjen e parkut memorial për nder të ushtarëve të rënë në luftën për lirinë e Kosovës.

 

Parku memorial do të përmbajë një mur mermeri të zi me emrat e 2000 ushtarëve të UÇK-së të gdhendur në të dhe një monument 15 metra të gjatë me flakë të përjetshme për nder të ushtarëve të paidentifikuar.

 

Ky park memorial do të ndërtohet në rajonin e Drenicës në gjysmë hektari tokë të dhuruar nga Komuna e Skënderajt. Benito Mores, sponsorizues i Komitetit për Memorialin e UÇK-së me këtë rast tha se zbulimi i këtij disenji është hap i rëndësishëm për krijimin e memorialit në kujtim të atyre që bënë sakrifica të mëdha për t'ia sjellë Kosovës lirinë.

Memoriali parashihet të hapet me 10 qershor të vitit të ardhshëm.

 

 

U përurua fillimi i punimeve në rregullimin e rrugës Batushë - Koshare

 

Gjakovë, 23 dhjetor 2003 - Ministri i Transportit dhe Posttelekomunikacionit të Kosovës, Zef Morina përuroi dje fillimin e punimeve në rregullimin e rrugës Batushë - Koshare. Me këtë rast ai theksoi se ndërtimi i kësaj rruge është i një rëndësie të veçantë pasi kjo përfshinë një zonë të tërë kufitare e cila gjatë luftës ishte bërë qëndresa vendimtare e UÇK-së.

 

Në këtë ceremoni ishin të pranishëm edhe udhëheqësit e komunave të Pejës, Gjakovës, Deçanit dhe përfaqësues të TMK-së. Ndërtimi i kësaj rruge të gjatë rreth 6 kilometra do të kushtojë rreth 600 mijë euro që i ka siguruar Ministria e Transportit dhe Postelekomunikacionit të Kosovës.

 

 

Në Prishtinë u bë promovimi i 18 titujve të rinj të botuar nga ndërmarrja botuese "Rilindja"

 

Prishtinë, 23 dhjetor 2003 - Duke përmbyllur vitin mjaft të suksesshëm të botimeve mbrëmë në Prishtinë u bë promovimi i 18 titujve të rinj të botuar nga Ndërmarrja botuese "Rilindja" të Prishtinës. Kjo është festë tha në në hapje të këtij promovimi, Daut Demaku, drejtor i ndërmarrje botuese "Rilindja".

 

Ai tha se prej veprave të botuara brenda këtij projekti janë gjashtë romane, pesë vëllime me poezi dhe tri vëllime tregime për të rritur.

Edicionin e fundit për këtë vit të Shtëpisë botuese "Rilindja" të Prishtinës e ndihmoi financiarisht Ministria e Kulturës.

 

 

Trajkovski takoi liderët e katër partive politike nënshkruese të Marrëveshjes së Ohrit

 

Shkup, 23 dhjetor 2003 - Presidenti i Maqedonisë Boris Trajkovski ka takuar dje liderët e katër partive politike nënshkruese të Marrëveshjes së Ohrit, përfaqësues të Qeverisë dhe ndërkombëtarët në Maqedoni. Temë e këtij takimi ishte propozimi i paketës së ligjeve për decentralizimin e pushteit lokal.

 

Për VMRO-DPMN-në propozim-ligji për ndarjen territoriale e Maqedonisë është i papranueshëm. Sipas kësaj partie, Qeveria maqedonase duhet të mbajë llogari për kultivimin e karakterit shumetnik gjatë organizimit territorial e në veçanti në Maqedoninë Perëndimore.

Kryetari i Partisë për Prosperitet Demokratik Abdylmenaf Bexheti tha se vërejtjet konkrete të kësaj partie kanë të bëjnë me ligjin për qytetin e Shkupit. Ai nënvizoi se është e pakuptueshme politikisht privimi i qytetit të Shkupit nga përdorimi i gjuhës shqipe në kushtet kur kjo është e drejtë kushtetuese në nivel të shtetit.

Njoftohet se është arritur pajtueshmëri që të mbahet një takim i ekspertëve partiakë, qëndrimet e të cilëve do të shqyrtoheshin në takimin e radhës të liderëve të partive politike nënshkruese të Marrëveshjes së Ohrit, që do të mbahet të premtën.

 

 

Në Tiranë policia ka kapur një sasi të madhe droge

 

Tiranë, 23 dhjetor 2003 - Në dalje të Tiranës policia ka kapur një sasi të madhe droge në një autobus të linjës Tiranë - Athinë. Droga ishte fshehur në bagazhin e udhëtarëve.

 

Policia që më parë kishte ndaluar katër persona të dyshuar për përfshirje në trafikun e lëndëve narkotike. Drejtori i policisë tha se bëhet fjalë për një rrjet të fuqishëm të trafikut ndërkombëtar të drogës. Ky operacion tha ai vazhdon edhe për zbulimin e anëtarëve të tjerë të këtij rrjeti.

Disa javë më parë po në Tiranë u konfiskuan pesë kilogram drogë, e cila i përkiste një grupi që vepronte me Gjermaninë.

 

 

Një gjykatës është vrarë në veri të Irakut

 

Mosul, 23 dhjetor 2003 - Një gjykatës është vrarë në veri të Irakut në qytetin Mosul natën e kaluar, ka bërë të ditur një zyrtar i policisë, njofton Rojter.

Gjykatësi Jusef Khoshi, përndryshe kurd, është vrarë nga tre sulmues me veturë.

"Ai është vrarë natën e kaluar. Ai është qëlluar gjashtë herë pas shpine dhe ka vdekur menjeherë", ka thënë shefi i policisë Ali Mohamed.

Khoshi ka qenë një nga tre gjykatësit kryesorë në hetimet gjyqësore në Mosul.

 

 

Të paktën tetë palestinezë janë vrarë sot nga izraelitët

 

Rripi i Gazës, 23 dhjetor 2003 - Të paktën tetë palestinezë janë vrarë, midis të cilëve edhe civilë, dhe disa të tjerë janë plagosur gjatë një inkursioni izraelit në një kamp refugjatësh në Gaza.

Inkursioni izraelit shkaktoi luftimet më intensive në këtë zonë gjatë javëve të fundit.

Rreth 40 tanke dhe mjete të blinduara izraelite hynë në kampin e refugjatëve Rafa vetëm pak orë pasi dy oficerë izraelitë u vranë gjatë një beteje të armatosur me militantët në veri të Rripit të Gazës. Ata u bënë viktimat e para izraelite gjatë konfliktit të këtij muaji.

Ushtria izraelite ka deklaruar se inkursioni në Rafa është pjesë e një operacioni në vazhdimësi për të shkatërruar tunelet që përdoren nga militantët palestinezë për të sjellë armë nga Egjipti.

Ndërkaq, policia izraelite ka arrestuar disa palestinezë në lidhje me zhvillimet e të hënës afër xhamisë Al-Aksa në Jeruzalem.

Palestinezë të zemëruar shanë dhe sulmuan ministrin e jashtëm egjiptian, Ahmed Maher që vizitoi xhaminë.
Ministri egjyptian u lëndua lehtë gjatë konfrontimit.

 

 

Çeçenët vrasin dy oficerë dhe një kalimtar në Grozni

 

Grozni, 23 dhjetor 2003 - Kryengritësit çeçenë të hënën kanë vrarë në një treg në Grozni dy oficerë dhe një kalimtar, njofton agjencia ruse Interfaks. Bëhet fjalë për dy oficerë të Republikës kabardino-ballkanike, republikë ruse në Kaukaz.

 

 

Në Rripin e Gazës vriten katër palestinezë

 

Rripi i Gazës, 23 dhjetor 2003 - Burime palestineze thonë se katër palestinezë u vranë të martën në mëngjes gjatë një inkursioni ushtarak izraelit në pjesën jugore të Rripit të Gazës, njofton Rojter.

Dhuna shpërtheu pasi forca të armatosura izraelite thanë se 2 oficerë izraelitë dhe një ekstremist palestinez ishin vrarë gjithashtu gjatë një përleshjeje në pjesën qëndrore të Rripit të Gazës.

Ndërkohë, policia izraelite njoftoi se ka arrestuar të paktën 5 palestinezë në lidhje me sulmin e së hënës kundër Ministrit të Jashtëm të Egjiptit, Ahmed Maher, në xhaminë Al-Aksa në pjesën e vjetër të Jeruzalemit.

 

 

Një tërmet i fuqishëm Kaliforni, dy vetë humbën jetën

 

San Francisko, 23 dhjetor 2003 - Një tërmet i fuqishëm tronditi Kaliforninë bregdetare. Forca e tërmetit arrinte në 6.5 sipash shkallës së Rihterit. Njoftohet se kanë vdekur të paktën dy vetë.

Tërmeti ra afër qytetit San Luis Obispo, në vijën bregdetare të Kalifornisë midis San Franciskos dhe Los Anxhelosit. Tërmeti u ndje deri në periferitë e Los Anxhelosit.

Epiqendra e tërmetit ishte afër qytetit Kambria.

 

 

Ministri i jashtëm egjiptian sulmohet në Jerusalem

 

Jerusalem, 23 dhjetor 2003 - Ministri i Jashtëm egjiptian, Ahmed Maher ka dalë nga spitali në Jeruzalem ku u kurua pasi u sulmua nga disa protestues palestinezë.

Makina e tij, pas daljes nga spitali, u nis drejt aeroportit Ben Gurion pranë Tel Avivit për t'u nisur për në Kajro.

Dëshmitarë okularë thanë se sulmi ndodhi kur një grup palestinezësh i gjuajtën atij me një breshëri këpucësh dhe e akuzuan atë si tradhëtar dhe kolaborator.

Kryeministri palestinez, Ahmed Kureia u shpreh i shokuar për incidentin e ndodhur që u cilësua nga presidenti egjyptian për të ardhur keq.

Grupet militante palestineze i kanë rezistuar presionit egjyptian për të ndaluar sulmet kundër Izraelit si hap i parë drejt një paqe të dyanshme.

 

 

Presidenti Bush u bën thirrje amerikanëve të vazhdojnë planet e tyre me rastin e festave të fund-vitit

 

Uashington, 23 dhjetor 2003 - Presidenti Bush u bëri thirrje amerikanëve që të vazhdojnë planet e tyre me rastin e festave të fundit vitit, megjithëse në Shtetet e Bashkuara u rrit niveli i gadishmërisë si përgjigje ndaj sulmeve të mundshme.

Presidenti vuri dje në dukje se personeli i sigurisë kombëtare do të punojë sa më shumë për të mbrojtur amerikanët. Zoti Bush i bëri këto komente një ditë pasi niveli i gadishmërisë ndaj kërcënimeve terroriste u rrit në nivelin e ngjrës portokalli.

Po dje, presidenti thirri këshilltarët e tij të sigurisë kombëtare për të shqyrtuar masat e mara për të shtuar sigurinë në aeroporte, porte, ura, centrale bërthamore dhe objekte të tjera të mundshme sulmesh.

 

 

Rusia premton t'i falë Irakut më shumë se gjysmën e borxhit

 

Moskë, 23 dhjetor 2003 - Zyrtarë irakianë thonë se Presidenti rus, Vladimir Putin, është përgatitur t’i falë Irakut më shumë se gjysmën e borxhit prej 8 miliardë dollarësh në këmbim të kontratave të biznesit në të ardhmen.

Kreu i Këshillit Qeverisës të Irakut, të caktuar nga administrata amerikane, Abdel-Aziz al-Hakim, tha dje pas bisedimeve në Kremlin se rreth 65 për qind e borxhit të Irakut mund të falet.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |