KATERVJETORI I DY GREVAVE TE URISE

KATËRVJETORI I DY GREVAVE TE URISË



Pas suspendimit të Autonomisë, pra, pas okupimit të Kosovës e shndërrimit të saj në kamp ushtarak; pas protestave masovike gjithëshqiptare, mandej të Grevës së Minatorëve e vrasjes së dhjetra e dhjetra djem e vajzave të Kosovës martire, masmediat e huaja, duke ofruar ca të dhëna rreth gjendjes alarmuese në Kosovë, dalë nga dalë filloi të aktivizohet e të kuptojë de fakto realitetin faktori ndërkombëtar.
... Për t’i ardhur në shërbim popullit të vet, si dhe për të senzibilizuar dhe afirmuar çështjen tonë kombëtare në instancat më të larta ndërkombëtare, lindi dhe lëshoi shtat Lidhja Shqiptare në Botë, e cila më 26 e 27 Nëntor, në qytetin historik të Prizrenit, mbajti Kongresin e Parë madhor mbarkombëtar, në të cilin, jo vetëm që u miratuan të gjitha dokumentat e L SH B -së, por në ate Kongres për herë të parë në historinë e popullit tonë, njëzëri u miratua dhe për shëndet nga më se dy mijë delegatë të ardhur nga mbarë bota-Platforma kombëtare.
... Që nga themelimi i saj, LSHB-së filloi të trokasë nëpër dyert e diplomacive evropiane e botrore. Ky senzibilizim, më së qarti u vu në dukje me rastin e aktit sublim të ngujosjes në Grevën 13 ditore të urisë, që u mbajt në Bruksel të Belgjikës, nga drejtuesit e LSHB -së,vëllezërit Simon e Mikel Kuzhnini, të evroparlamentarit Bart Staes e të z.Ramis Zekolli, për lirimin e 7000 të burgosurve e të rrëmbyerve nga Kosova; ndësa siç dihet, një pjesë e të cilëve akoma edhe sot e kësaj dite mbahen peng nëpër kazamatet e Sërbisë. Me këtë rast, të gjitha masmediat e opinionit demokratik evropian, Grevës së Brukselit i dhënë publicitet të jashtëzakonshëm, kështu që me javë të tëra u shkrua e u fol rreth saj.
... Vlen të përmendet se, të vetmit e të parët që u solidarizuan në vepër me Grevën e Brukselit qenë katër anëtarët e Kryesisë të L SH B-së për shtetet skandinave, të cilët Natën e Vitit të Ri 2000, në qytetin Malme të Suedisë u ngujuan në Grevë: Ibrahim Egriu-drejtues, Beqir Hatashi, Remzi Basha e Alush Bajraktari. Edhe Greva shtatëditore e Malmes bëri jehonë e senzibilizim, jo vetëm në masmediat suedeze, siç janë: -shtypi, TV1, TV 2 dhe TV4, por edhe në mbarë Skandinavinë. Në fakt, siç deklaruan shumë bashkëkombas, Greva e urisë në Malme bëri senzibilizim aq të madh tek opinioni skandinavik, sa që edhe pesë protesta s’do ta arrinin atë efekt.
... Pra, ky qe hapi i parë dhe përpjekja e parë e vëllezërve të nderuar Kuzhnini dhe e Udhëheqësisë së saj, e përbërë kryesisht nga intelektualë e aktivistë të shquar të popullit tonë, që de fakto dhe para mbajtjes së Kongresit dëshmoi se ky asociasion i pavarur i të gjithë shqiptarëve në botë është, jo vetëm për bashkimin, afrimin e bashkëpunimin e të gjitha shoqatave, asociasioneve e individëve në Diasporë, por edhe për të senzibilizuar dhe trokitur në dyert e diplomacisë evropiane e botrore; për t’i kërkuar dhe mbrojtur të drejtat e shqiptarëve kudo në botë.
NISMËTARËT E PARË TË LSHB-së
... Vëllezërit tanë të nderuar, Simon e Mikel Kuzhnini, duke pasur dashuri të madhe ndaj kombit e atdheut dhe, duke dashtë t’i vijnë në shërbim popullit të vet më se dy shekuj të robëruar, saktësisht, m’u në vazhdën e ngjarjeve më traumatike të popullit tonë, në kohën kur populli shqiptar u gjënd para një sprove të rëndë e dinjitoze, pjesa më e ndërgjegjëshme e Komunitetit shqiptar, nën nismën e vëllezërve Kuzhnini e të disa intelektualëve të shquar, siç janë, zotërinjtë: Esat Stavileci, Pajazit Nushi e të tjerë, në qytetin Mynih të Gjermanisë, themeluan L SH B, me moton që të gjitha shoqatat, asociasionet e individë intelektualë, të koordinojnë aktivitetin e tyre fisnik e të bashkëveprojnë për të mirën e popullit tonë të ndarë në pesë shtete.
... Pas takimit të Mynhenit filloi organizimi rreth mbajtjes së kuvendeve nëpër komunitete të Evropës e gjetkë. Kuvendi i Parë i L SH B-së u mbajt në Malme të Suedisë, më 20.11.99,në të cilin morën pjesë 385 delegatë nga mbarë Skandinavia, në të cilin Kuvend, të gjithë përfaqësuesit e asociasioneve, shoqatave e subjekteve politike, njëzëri mbështetën Projektprogramin, Statutin dhe Rregulloren e L SH B-së, duke u betuar se të gjithë tok së bashku do të punojnë e veprojnë bashkarisht për të mirën e Kombit e të Atdheut.
... Mandej, më 26 / 27. 11. 01 u mbajtë Kongresi historik i LSHB-së ku, më se dymijë delegatë miratuan Platformën Kombëtare dhe një njëzëri u vendos që ky bashkëveprim i të gjitha asociasioneve e shoqatave do të jetë një akt i ndërgjegjës kombëtare për të bashkuar të gjitha forcat individuale të intelektualëve në Disasporë, këshshtu që LSHB-së do të funksionojë si asociasion mirëkuptimi e respekti në mes shqiptarëve, pa marrë parasysh pikëpamjet ideologjike, rajonale apo fetare, duke e riaktivizuar e rivitalizuar moton e Rilindjes sonë kombëtare: « Feja e shqiptarit është shqiptarizmi « , filozofia politiko patriotike e së cilës është e do të mbetet më univerzalja e më e vlefshmja për shpirtin shqiptar kudo në botë.
Dashtë Zoti që Viti i Ri 2004 t’i ofrojë e bashkojë gjithë shqiptarët !
Malme, dhjetor 2003
Gëzuar kremten e Krishtlindjes dhe Vitin e Ri 2004 !
Këshilli Informativ i L SH B-Skandinavi.

Pamje nga Greva e urisë, Malme-Suedi, botuar në gazetën suedeze ”Sydsvenska dagbladet”-Ibrahim Egriu, Beqir Hatashi, Remzi Basha dhe Alush Bajraktari