Përmbajtja:

• Presidenti Rugova u kthye në Prishtinë nga një vizitë në Vatikan ku u takua me Papa Gjon Pali i Dytë

• Kuvendi i Kosovës miratoi buxhetin për vitin e ardhshëm dhe nxori një deklaratë kundër zgjedhjeve serbe në Kosovë

• Në Meje të Gjakovës u bë rivarrimi i 17 kufomave të zbuluara në varrezat masive në Serbi

• Gjatë javës që shkoi në Kosovë janë arrestuar 18 persona për armëmbajtje pa leje

• UNMIK-u nuk ka lejuar pjesëmarrjen në miting në veri të Mitrovicës shefin e Partisë Radikale Serbe

• Nesër shënohet 14 vjetori i themelimit të LDK-së

• Zyrtarët serbë të Kosovës nuk mund të kandidojnë për zgjedhjet parlamentare të Serbisë

• Ministri i Mbrojtjes dhe shefi i Shtatmadhorisë së Armatës çeke nesër vizitojnë Podujevën

• Filloi turneu përkujtimor në nderim të Hasan Zemajt

• Presidenti Rugova kthehet sot në Kosovë

• LDK në Dragash i ka përmbushur premtimet zgjedhore

• Fronti për Bashkim Kombëtar Shqiptar kërkon nga Qeveria gjermane lirimin nga arresti të Idajet Beqirit

• Në Preshevë u formua partia e re shqiptare - Bashkimi Demokratik për Luginën

• Mbi 20 kryetarë të komunave në Maqedoni paralajmërojnë se me referendum do t'i kundërvihen ndarjes së re territoriale

• Inicohet ndryshimi i Rregullores së punës në Parlamentin maqedonas

• Në Bagdad vriten dy ushtarë amerikanë dhe një irakian

• El Baradei do të shkojë në Libi për verifikimin e programit të armëve

• Forcat amerikane kanë arrestuar ish-zyrtarin e lartë të shërbimit sekret të Sadam Huseinit

• Forcat amerikane kanë arrestuar ish-zyrtarin e lartë të shërbimit sekret të Sadam Huseinit

• Administrata amerikane rrit nivelin e kërcënimit nga sulmet terroriste

• Kapja e Sadam Huseinit ka çuar në arrestimin e qindra irakianëve

• Libia paralajmëron nënshkrimin e protokollit për armët bëthamore

• Në Irak vriten dy dhe plagoset një irakian tjetër

• Ministri i jashtëm egjiptian viziton Izraelin

• Ushtarë izraelitë refuzojnë të shërbejnë në rajonet autonome

• Sudani në prag të marrëveshjes për dhënjen fund të luftës qytetare

• Në Filipine mbi 200 të vdekur si pasojë e përmbytjeve

Presidenti Rugova u kthye në Prishtinë nga një vizitë në Vatikan ku u takua me Papa Gjon Pali i Dytë

 

Prishtinë, 22 dhjetor 2003 - Presidenti i Kosovës Ibrahim Rugova u kthye sot në Prishtinë nga një vizitë që bëri në selinë e shenjtë në Vatikan, ku u takua me Papa Gjon Pali II dhe me sekretarin e Shtetit Anxhelo Sadano. Presidenit Rugova në një prononcim për media në aeroportin e Prishtinës vlerësoi lart takimin që pati në Selinë e Shenjtë me Papa Gjon Pali i Dytë, duke e quajtur audiencën një nder të madh që ka bërë Ati e Shenjtë për të dhe anëtarët e Presidencës.

 
Presidenti tha se ka falenderuar Atin e Shenjtë për lumturimin e Nënës Tereze dhe se e kishte njoftuar me progresin e arritur në Kosovë në këto katër vite e gjysmë në liri, duke shtuar se Papa e këtë e ka vlerësuar pozitivisht.

Presidenti tha poashtu nse ë bisedë me Atin e Shenjtë ka insistuar në objektivat për zhvillim ekonomik e të përgjithshëm të Kosovës dhe në njohjen formale të pavarësisë së Kosovës, duke shtuar se ka kërkuar nga Papa Gjon Pali të lutet dhe të ushtrojë ndikimin e tij për këtë çështje të madhe të popullit tonë.

"Ishte një moment mjaft i rëndësishëm - edhe krenar edhe prekës - kur Ati i Shenjtë përmendi Gjergj Kastriotin - Skënderbeun edhe në këtë audiencë, gjë që e ka bërë edhe më parë", tha Presidenti Rugova.

Presidenti tha se i kishte përcjellë Papa Gjon Pali i Dytë edhe përgëzimet e popullit të Kosovës në prag të Krishtlindjeve dhe Vitit të Ri.

 

 

Kuvendi i Kosovës miratoi buxhetin për vitin e ardhshëm dhe nxori një deklaratë kundër zgjedhjeve serbe në Kosovë

 

Prishtinë, 22 dhjetor 2003 - Kuvendi i Kosovës, në seancën e sotme të jashtëzakonshme, miratoi një deklaratë nëpërmjet të së cilës kërkon nga UNMIK-u pengimin e organizimit dhe mbajtjes së zgjedhjeve për parlamentin e Serbisë në Kosovë më 28 dhjetor. Këtë deklaratë e përkrahën të gjitha grupet parlamentare, përveç atij serb.

Sabri Hamiti, shef i grupit parlementar të LDK-së, tha se zgjedhjet e Serbisë në Kosovë poltikisht janë të dëmshme dhe shkaktojnë tensione politike sidomnos midis bashkësive etnike në Kosovë.

 

Duke kriktikuar UNMIK_un dhe OSBE-në që lejojnë zgjedhjet serbe në Kosovë, tha se këto dy institucione ndërkombëtare duhet të lirohen nga politika dyfytyrëshe, hipokrite dhe të tregojnë që nuk mund të ketë zgjedhje politike të Beogradit në Kosovë.

Sabri Hamiti poashtu i quajti të paprananueshme edhe kandidaturat e disa deputetëve serbë të Kosovë për zgjedhjet në Serbi.

Ndryshe në këtë deklaratë thuhet se organizimi i zgjedhjeve serbe në Kosovë janë jokushtetuese dhe janë ndërhyrje flagrante në jetën institucionale të Kosovës. Në këtë deklaratë thuhet:

Kuvendi i Kosovës i deklaron jokushtetuese dhe të papranueshme zgjedhjet e organizuara nga Serbia në territorin e Kosovës, si provokim të rëndë për institucuionet e Kosovës, qytetarët e saj dhe për institucionet ndërkombëtare në Kosovë.

Kuvendi i Kosovës kërkon nga UNMIK-u që të parandalojë organizimin dhe mbajtjen e zgjedhjeve të Serbisë në Kosovë, të cilat paraqesin ndërhyrje flagrante në jetën institucionale të Kosovës dhe tensionojnë raportet e përgjithshme në Kosovë.

Deputetët e koalicionit serb "Kthimi" kundërshtuan miratimin e kësaj deklarate dhe braktisën sallën ku mbahej seanca e sotme, me justifikim se kjo çështje nuk është në kompetencë të Kuvendit të Kosovës.

Gjithashtu Kuvendi në seancën e sotme miratoi edhe ligjin për Buxhetin e Konsoliduar të Kosovës. Ndryshe buxheti për vitin 2004 do të jetë 619.3 milionë euro dhe në tërësi është krijuar prej mjeteve vetjake.

 

 

Në Meje të Gjakovës u bë rivarrimi i 17 kufomave të zbuluara në varrezat masive në Serbi

 

Gjakovë, 22 dhjetor 2003 - Në Meje të Gjakovës u bë rivarrimi i 17 kufomave të zbuluara nëa varrezat masive në Serbi, të cilat ditë më parë u identifikuan në morgun e Rahovecit. Në ceremoninë mortore moren pjesë mijëra qytetarë nga fshatrat Dobrosh, Rracaj, Mullliq, Korenicë, Sheremet, Skivjan dhe Novokaz dhe nga mbarë Kosova.

Në rivarrimin e djeshëm të 17 trupave të pajetë të shqiptarëve "Ledina e pikëllimit" në fshatin Meje u bë vendi i përmotshëm për 127 persona, ndërkohë që pritet në këtë vend të rivarrosen edhe 337 të tjerë, të gjithë këta nga masakra e Mejes. Në këtë ceremoni mortore foli Anton Shala, nënkryetar i Kuvendit komunal të Gjakovës, ndërkaq në emër të organizatës 17 prilli Meje - Ardita Pajaziti.

 

 

Gjatë javës që shkoi në Kosovë janë arrestuar 18 persona për armëmbajtje pa leje

 

Prishtinë, 22 dhjetor 2003 - Gjatë javës që shkoi në Kosovë janë kryer disa arrestime për armëmbajtje pa leje. Policia e UNMIK-ut dhe SHPK kanë konfiskuar armë edhe në Aeroportin e Prishtinës dhe për këtë hetimet janë duke vazhduar. Zëdhënësja e UNMIK Angjela Xhozef ka thënë se në policia është raportuar edhe për kërcënime me armë dhe vjedhje të ndryshme.

 

Ai ka theksuar se në 24 orët e fundit nuk ka pasur asnjë incident të rëndë. Mirëpo, gjatë kontrollave rutinore policia e UNMIK-ut, SHPK kanë arrestuar 18 veta. Arrestimet janë bërë për shkak të posedimit të armëve ilegal, prishjes së qetësisë dhe rendit publik.

 

 

UNMIK-u nuk ka lejuar pjesëmarrjen në miting në veri të Mitrovicës shefin e Partisë Radikale Serbe

 

Prishtinë, 22 dhjetor 2003 - Autoritetet ndërkombëtare nuk e lejuan dje pjesëmarrjen në një miting serb në veri të Mitrovicës shefin e Partisë Radikale serbe Tomisllav Nikoliq.

 

Në këtë tubim drejtuesit e Partisë Radikale të Serbisë i premtuan pjesëtarëve të pakicës serbe të Kosovës se do të kthejnë pushtetin serbë në vendin tonë. Ata thanë se Kosova do të mbetet pjesë e Serbisë, ndërkaq këtu do të kthehet ushtria dhe policia serbe.

Zëdhënësit e administratës ndërkombëtare thanë se këtë miting nuk e kanë lejuar për shkaqe sigurie.

 

 

Nesër shënohet 14 vjetori i themelimit të LDK-së

 

Prishtinë, 22 dhjetor 2003 - Me rastin e 14-vjetorit të themelimit të Lidhjes Demokratike të Kosovës, më 23 dhjetor 2003 ( e martë ), në Hotelin Grand në Prishtinë mbahet një ceremoni solemne.
Në këtë solemnitet një fjalë rasti do ta mbajë Presidenti i Kosovës dhe Kryetari i LDK-së, Ibrahim Rugova, thuhet në një njoftim të Kryesisë së LDK.

 

 

Zyrtarët serbë të Kosovës nuk mund të kandidojnë për zgjedhjet parlamentare të Serbisë

 

Prishtinë, 22 dhjetor 2003 - Për qeverinë e Kosovës është e papranueshme që zyrtarët serbë në Qeverinë e Kosovës të kandidohen për zgjedhjet parlamentare në Serbi, deklaroi zëdhënësja e Qeverisë së Kosovës, Mimoza Kusari, duke thënë se për një veprim të tillë nuk është informuar zyrtarisht, as Kryeministri e as Qeveria e Kosovës.

Një qëndrim të njëjta e kanë edhe deputetët e Kuvendit të Kosovës. Por këtë nuk e sqaron Korniza Kushtetuese, as rregulloret e UNMIK-ut.

Nga zyrtarët serbë të institucioneve të Kososvës, disa prej kandidatëve për Kuvendin e Serbisë, janë Oliver Ivanoviq, anëtar i Kryesisë së Kuvendit, Milorad Todoroviq, koordinator ndërministror për kthimin, deputetët Gojko Saviq e Rangjel Nojkiq, si edhe 20 këshilltarë të Asambleve Komunale në Kosovë.

 

 

Ministri i Mbrojtjes dhe shefi i Shtatmadhorisë së Armatës çeke nesër vizitojnë Podujevën

 

Podujevë, 22 dhjetor 2003 (QIK) - Ministri i Mbrojtjes i Republikës Çeke Miroslav Kostelka dhe shefi i Shtatmadhorisë i Armatës, gjenerali Pavel Shtefka nesër, më 23 dhjetor, vizitojnë trupat e KFOR-it çek e sllovak në Shajkofc. Në delgacionin e lartë ushtarak merr pjesë edhe ambasadori Sllovak në Republikën e Çekisë dhe personalitet tjera të rëndësishme jetës ushtarake e politike.

Sipas zv.komandantit të KFOR-it çek e sllovak Jan Parimuha gjatë kësaj vizite delegacioni i lartë nga Republika Çeke do të vizitojë bazën e trupave të KFOR-it në Shajkofc, ku do të ketë një brifing dhe ku do të marrin pjesë edhe autoritetet lokale të komunës së Podujevës të UNMIK-ut.

Delegacioni nga Çekia pritet që ta vizitojë edhe njërën nga shkollat fillore të qytetit e cila në sallën e kinemasë do të shfaqë program kulturo-asrtistik për nder të delgacionit nga Çekia.

KFOR-i çek e sllovak ka bërë rregullimin dhe meremtimin e shkollave në Brainë, Metërgofc, Ballofc, Herticë, Dobërdol, Kërpimeh, etj. në bashkëpunim me OJQ "Qindkëbëshja".

 

 

Filloi turneu përkujtimor në nderim të Hasan Zemajt

 

Prishtinë, 22 dhjetor 2003 - Në organizim të Kryesisë qendrore të Forumit të Rinisë të LDK-së, me rastin e njëvjetorit të vrasjës së Tahir, Enis dhe Hasan Zemajt, dje në Prishtinë ka filluar turneu përkujtimor në basketboll "Hasan Zemaj 2003" në nderim të kolegut ish-kryetarit të degës së FR të LDK-së në Deçan.

 

Në mesin e qindra të rinjve që kishin ardhur nga të gjitha degët e FR të LDK-së në Kosovë, për të marrë pjesë në këtë turne ishte edhe kryetari i FR të LDK-së, Lulzim Zeneli, i cili edhe bëri hapjen solemne të këtij turneu, i cili filloi me një minutë heshtje. Më pas u zhvilluan edhe ndeshjet e rrethit të parë të cilat u karakterizuan me një korrektësi të madhe.

 

 

Presidenti Rugova kthehet sot në Kosovë

 

Prishtinë, 22 dhjetor 2003 - Presidenti i Kosovës, Ibrahim Rugova, dhe grupi i këshillëtarëve të tij, kthehet sot në mesditë në Prishtinë.

Presidenti Rugova gjatë javës që shkoi mori pjesë në një takim Vjenë, si dhe u takua me Papa Gjon Pali II në në selinë e shenjtë në Vatikan.

 

 

LDK në Dragash i ka përmbushur premtimet zgjedhore

 

Dragash, 22 dhjetor 2003 - Alush Gashi, anëtar i Kryesisë së LDK-së dhe deputet i Kuvendit të Kosovës, i shoqëruar nga Ali Sadriu, deputet dhe ministër i financave, të shtunën mori pjesë në mbledhjen e zgjeruar të Kryesisë së Degës së LDK-së në Dragash.

 

Në këtë takim merrnin pjesë edhe anëtarët e Kuvendit Komunal nga radhët e LDK-së, përfaqësues të nëndegëve, aktivave, si edhe simpatizues të LDK-së nga komuna e Dragashit, si edhe z.Sali Asllani, kryetar i Degës së LDK-së në Therandë, si dhe përfaqësues të Zhurit dhe të Rahovecit.

Lidhur me aktivitetin e Degës së LDK-së në Dragash dhe Kuvendit Komunal foli kryetari i saj, Halim Shemsedini, i cili theksoi se tani në Dragash është një pushtet demokratik, i cili e ka përmbushur pjesën dërrmuese të projekteve të zhvillimit të infrastrukturës të premtuar në fushatën elektorale të LDK-së. Ai tha se në radhët e LDK-së ekziston një mbështetje e fuqishme për vazhdimin e këtij procesi.

Dr. Alush Gashi, në emër të Kryesisë Qendore të Lidhjes Demokratike të Kosovës, vlerësoi lart punën e kësaj Dege dhe kërkoi një angazhim të shtuar në realizimin e projekteve të zhvillimit të demokracisë.

 

Ai theksoi nevojën e përmbushjes së vendimeve të Kuvendit të Lidhjes Demokratike të Kosovës, duke theksuar se LDK-ja do t'i përmbushë të gjitha projektet e miratuara në mënyrë demokratike, sepse ka një program të mirë, anëtarësi të gjerë dhe, mbi të gjitha, një figurë qëndrore të fuqishme B Presidentin Rugova, i cili është simbol i unitetit të organizimit tonë politik.

Në vazhdim, ministri Ali Sadrija, foli lidhur me realizimin e buxhetit të Kosovës dhe kapacitetin e nivelit komunal për zbatim të tij. Duke përfunduar, z.Sadriu paraqiti të dhëna lidhur me buxhetin për vitin 2004, duke kontestuar propagandën mediatike lidhur me suficitin buxhetor.

Gjatë këtij takimi u zhvillua një debat i mirë lidhur me nevojat për përmbyllje të projekteve të filluara, si edhe kërkesa e qytetarëve të Dragashit që në zgjedhjet e ardhshme nacionale ta kenë përfaqësuesin e tyre nga kjo komunë.

 

Ata theksuan se gjatë këtyre ditëve të festës ekziston një interesim i shtuar për zhvillimet në Dragash dhe mundësitë e investimit të bashkatdhetarëve që jetojnë në botën e jashtme dhe se ditëve të ardhshme Dega e LDK-së në Dragash do të organizojë bashkëbisedime me qytetarë.

 

 

Fronti për Bashkim Kombëtar Shqiptar kërkon nga Qeveria gjermane lirimin nga arresti të Idajet Beqirit

 

Prishtinë, 22 dhjetor 2003 - Kryesia qendrore e Frontit për Bashkim Kombëtar Shqiptar me rastin e arrestimit të sekretarit politik të Frontit të Bashkimit Kombëtar Shqiptar, Idajet Beqiri, ka lëshuar një deklaratë në të cilën pos të tjerash thotë se Idajet Beqiri nuk ka qenë dhe nuk është lider politik Aramtës Kombëtare Shqiptare, por ka qenë dhe është njëri ndër shumë sekretarët e Frontit për Bashkim Kombëtar Shqiptar.

 

AKSH nuk ka pasur, nuk ka dhe as nuk do të ketë liderë politikë, thuhet në këtë deklaratë dhe kërkohet nga Qeveria gjermane që sa më parë ta lirojë Idajet Beqirin që të shkoje tek familja e vetë në Belgjikë.

 

 

Në Preshevë u formua partia e re shqiptare - Bashkimi Demokratik për Luginën

 

Preshevë, 22 dhjetor 2003 - Në Preshevë u mbajt Kuvendi themelues i subjektit të ri politik shqiptar në Luginë të Preshevës me emrin Bashkimi Demokratik i Luginës dhe drejtuesi i saj është zgjedhur Skënder Destani, kryetar i deritashëm i Kuvendit komunal të Preshevës. Ai u përjashtua nga Partia për Veprim Demokratik për shkak të mospajtimeve me kryetarin e saj Riza Halimin.

 

Në tubimin e organizuar, u tha se kjo forcë e re politike, e katërta parti shqiptare në Luginën e Preshevës, do të angazhohet për formimin e Këshillit Kombëtar të Shqiptarëve në këtë trevë dhe për integrimin e luftëtarëve të ish-Ushtrisë Çlirimtare të Preshevës, Medvegjës dhe Bujanocit.

 

Bashkimi Demokratik për Luginën do të angazhohet edhe për respektimin e një marrëveshjeje që u nënshkrua në verën e vitit 2001 ndërmjet Qeverisë serbe, përfaqësuesve të komunitetit ndërkombëtar dhe shqiptarëve të Preshevës për t'i dhënë fund përpjekjeve të armatosura në këtë zonë.

 

 

Mbi 20 kryetarë të komunave në Maqedoni paralajmërojnë se me referendum do t'i kundërvihen ndarjes së re territoriale

 

Shkup, 22 dhjetor 2003 - Mbi 20 kryetarë të komunave në Maqedoni kanë paralajmëruar se do të organizojnë referendume me të cilat do t'i kundërvihen propozimit të Qeverisë maqedonase për ndarjen e re territoriale. Sipas tyre, gjatë kësaj ndarjeje është marrë parasysh politika dhe jo gjendja faktike.

 

Sipas ndarjes së re territoriale Qeveria parasheh që në vend 123 komunave sa ka tani të mbeten 71. Reagime për këto ndarje ka pasur edhe nga opozita shqiptare. Me të zëshëm kundër propozimit të Qeverisë për ndarjen e re territoriale të Maqedonisë kanë qenë kryetarët e Komunës së Kërçovës dhe të Strugës, të cilët vlerësojnë se kinse me këtë propozim dëmtohet popullata maqedonase.

 

 

Inicohet ndryshimi i Rregullores së punës në Parlamentin maqedonas

 

Shkup, 22 dhjetor 2003 - Polemika që u zhvillua ndërmjet pozitës dhe opozitës në Parlamentin maqedonas lidhur me propozim-ligjin e Qeverisë maqedonase për zyrtarizimin e Universitetit të Tetovës, i ka shtyrë udhëheqësit e Parlamentit ta shqyrtojnë rrregulloren e punës.

 

Në fakt, deputetët e VMRO-DPMN-së disa herë i shfrytëzuan seancat për t'i zgjatur tejmase fjalimet e tyre, duke pamundësuar votimin mbi ligjin, i cili do ta mundësonte legalizimin e UT.

 

Prandaj, kryetari i Parlamentit të Maqedonisë Lubçe Jordanovski ka paralajmëruar mundësinë për ndryshimin e Rregullores së punës së Parlamentit për shkak të mangësive teknike, të cilat së fundi ndikuan që Parlamenti të zhvillojë seanca maratonike dhe që mundi edhe të mos përfundonte asnjëherë.

Ky propozim i kryetarit të Parlamentit është mbështetur nga Bashkimi Demokratik për Integrim, parti kjo që kishte inicuar themelimin e një universiteti shtetëror në gjuhën shqipe në Tetovë.

 

 

Në Bagdad vriten dy ushtarë amerikanë dhe një irakian

 

Bagdad, 22 dhjetor 2003 - Dy ushtarë amerikanë dhe një përkthyes irakian janë vrarë dhe dy ushtarë të tjerë amerikanë janë plagosur sot kur një bombë e vendosur skaj rrugës ka shpërthyer në kolonën ushtarake në Baghdad, thanë zyrtarët ushtarakë amerikanë, njofton Rojter.

Vdekjet nga sulmi i sotëm rreth orës 11.45, ka rritur numrin e ushtarëve të vrarë amerikanë në 202, qëkur SHBA-të e deklaruan të përfunduar luftën në Irak.

 

 

El Baradei do të shkojë në Libi për verifikimin e programit të armëve

 

Vjenë, 22 dhjetor 2003 - Kreu i Agjencisë së Kombeve të Bashkuara për Energjinë Atomike ka thënë të hënën se do të shkojë në Libi javën e ardhshme për të verifikuar programin e armëve bërthamore në shtetet e Afrikës Veriore.

Shefi i Agjencisë Ndërkombëtare të Energjisë Bërthamore (IAEA) Mohamed el Baradei kë thënë se do të shkojë në Libi për të nisë procesin e verifikimit të programit të armëve të Libisë dhe ka thënë se inspektimi mund të fillojë javën e ardhshme.

 

 

Forcat amerikane kanë arrestuar ish-zyrtarin e lartë të shërbimit sekret të Sadam Huseinit

 

Bagdad, 22 dhjetor 2003 - Forcat amerikane kanë arrestuar ish-zyrtarin e lartë të shërbimit sekret të Sadam Huseinit, i cili dyshohet se ka organizuar sulmet kundër amerikanëve në veri të Bagdadit, njofton Rojter.

Gjenerali i ish-shërbimit sekret irakian është arrestuar pas një aksioni natën e kaluar në qytetin Bakubi, 65 km në veri të kryeqytetit.

Në aksione të ngjashme nëpër qytetet e Irakut qendror me popullsi shumicë sunite, janë arrestuar me dhjetra njerëz.

 

 

Forcat amerikane kanë arrestuar ish-zyrtarin e lartë të shërbimit sekret të Sadam Huseinit

 

Bagdad, 22 dhjetor 2003 - Forcat amerikane kanë arrestuar ish-zyrtarin e lartë të shërbimit sekret të Sadam Huseinit, i cili dyshohet se ka organizuar sulmet kundër amerikanëve në veri të Bagdadit, njofton Rojter.

Gjenerali i ish-shërbimit sekret irakian është arrestuar pas një aksioni natën e kaluar në qytetin Bakubi, 65 km në veri të kryeqytetit.

Në aksione të ngjashme nëpër qytetet e Irakut qendror me popullsi shumicë sunite, janë arrestuar me dhjetra njerëz.

 

 

Administrata amerikane rrit nivelin e kërcënimit nga sulmet terroriste

 

Uashington, 22 dhjetor 2003 - Amerikanët janë në një nivel më të lartë gatishmërie gjatë periudhës së festave. Njoftimi zyrtar u bë të djelën nga Sekretari i Departamentit të Sigurisë Kombëtare, Tom Rixh.

 

"Qeveria e Shteteve të Bashkuara, e rriti shkallën e kërcënimit në shkallë kombëtare prej sulmeve terroriste nga niveli i kërcënimit të shtuar në atë të lartë, apo siç njihet në Amerikë, nga kodi i verdhë në atë portokalli.

Zoti Rixh tha se kjo masë u mor duke u bazuar në të dhënat e zyrtarëve të zbulimit, të cilët thonë se kanë vënë re një rritje të ndjeshme në informacionin e besueshëm rreth veprimtarisë së mundshme terroriste.

 

"Treguesit strategjikë, përfshirë dëshirën e vazhdueshme të al-Kaidës për të kryer sulme kundër Shteteve të Bashkuara janë ndoshta më të fortë se asnjëherë më parë që nga 11 shtatori i vitit 2001".

 

 

Kapja e Sadam Huseinit ka çuar në arrestimin e qindra irakianëve

 

Bagdad, 22 dhjetor 2003 - Shefi i Shtatmadhorisë së Shteteve të Bashkuara, gjeneral Riçard Majers, tha se kapja e Sadam Huseinit ka çuar në arrestimin e disa qindra irakianëve, përfshirë disa udhëheqës të kryengritjes anti-amerikane.

Në një intervistë me rrjetin televiziv Fox, gjenerali Majers tha se kapja e Sadam Huseinit u ka dhënë forcave amerikane informacion që ka krijuar mundësitë për të kuptuar më mirë strukturën e qendresës. Shefi i Shtatmadhorisë amerikane tha se ish udhëheqësi irakian nuk po bashkëpunon me hetuesit.

Ndërkohë, gazeta Nju Jork Tajms thotë se Sdam Huseini iu shmang arrestimit për muaj të tërë duke lëvizur nëpër 20 deri në 30 strehime në zemër të rajonit suni të vendit.

 

 

Libia paralajmëron nënshkrimin e protokollit për armët bëthamore

 

Vjenë, 22 dhjetor 2003 - Libia planifikon nënshkrimin e protokollit shtesë të marrëveshjes për armë bërthamore i cili i mundëson Entit Ndërkombëtar për energji bërthmaore inspektime të pakufizuara pa nevojën e paralajmërimit të mëhershëm.

 

Ky është rezultati i bisedimeve të zhvilluara në Vjenë ndërmjet një delegacioni të lartë libian me shefin e Entit Ndërkombëtar për energji bërthamore Mohamed El Baradej. Një diplomat i Entit, nënshkrimin e protokollit shtesë e quajti "konsekuencë logjike të paralajmërimeve të Libisë" që të heq dorë nga armët e shkatërrimit në masë.

 

 

Në Irak vriten dy dhe plagoset një irakian tjetër

 

Bagdad, 22 dhjetor 2003 - Në kërkim të kryengritësve, trupat amerikane kanë përforcuar aksionet e bastisjeve në ish-fortifikatat e presidentit të përmbysur nga pushteti Sadam Hysein. Sipas të dhënave të forcave të sigurimit janë vrarë dy dhe është plagosur një irakian tjetër.

 

Shefi i shtabit të përgjithshëm Richard Majers, tha për televizionin amerikan se pas arrestimit të Sadam Hyseinit janë arrestuar edhe qindra irakianë tjerë të dyshimtë, në mesin e tyre edhe autorë e nxitës të sulmeve kundër trupave maerikane.

 

 

Ministri i jashtëm egjiptian viziton Izraelin

 

Jerusalem, 22 dhjetor 2003 - Ministri i jashtëm egjiptian Ahmed Maher pritet sot për bisedime politike në Izrael. Në takimet që Maher do të zhvilloj me kryeministrin izraelit Ariel Sharon dhe ministrin e jashtëm Silvan Shalom në qendër pritet të jetë vazhdimi i procesit paqësor në Lindjen e Mesme.

 

Maher është ministri i parë i jashtëm egjiptian që viziton Izraelin prej fillimit të kryengritjes palestineze në shtator të vitit 2000. Vizita e tij kryhet në kohën kur Egjipti është duke u përpjekur të bind grupet militante palestineze që të heqin dorë prej dhunës kundër Izraelit.

 

 

Ushtarë izraelitë refuzojnë të shërbejnë në rajonet autonome

 

Jerusalem, 22 dhjetor 2003 - 15 ushtarë të njësisë elitë izraelite kanë refuzuar të shërbejnë në rajonet palestineze. Siç njoftoi një stacion televiziv izraelit, rezervistët e një njësie speciale për aksione komando i kanë drejtuar një letër përkatëse kryeministrit Ariel Sharon.

 

Në të thuhet se ata nuk janë më të gatshëm që të japin jetën e tyre për shtypjen dhe shkeljen e të drejtave të njeriut të miliona palestinezëve në rajonet autonome. Përveç kësaj ata nuk duan më të jenë "mish për top" gjatë ndërtimit të murit të sigurisë përgjatë rajoneve autonome palestineze. Para tre muajsh ishin 27 pilotë izraelitë që paralajmëruan refuzimin e kryerjes së aksioneve luftarake në rajonet e banuara me civilë palestinezë.

 

 

Sudani në prag të marrëveshjes për dhënjen fund të luftës qytetare

 

Nairobi, 22 dhjetor 2003 - Në negociatat për mënjanimin e luftës qytetare në Sudan janë regjistruar përparimet e para. Delegacioni qeveritar dhe përfaqësues të Organizatës së rebelëve "Ushtria Çlirimtare Popullore Sudaneze" ranë dakord në Kenia që të ndajnë fitimet nga të ardhurat e pasurisë së derivateve të naftës në jug të vendit.

 

Deri më tash përfitues kryesor ishte qeveria. Një marrëveshje përkatëse pritet të nënshkruhet ditën e martë. Si pasojë e luftës qytetare gati 20 vjeçare në rajon jetën kanë humbur të paktën 1,5 milionë njerëz.

 

 

Në Filipine mbi 200 të vdekur si pasojë e përmbytjeve

 

Manila, 22 dhjetor 2003 - Si pasojë e përmbytjeve dhe rrëshqitjeve të dheut pas reshjeve të pandërprera disa ditore atmosferike në Filipine numri i vikrtimave është ngritur mbi 200. Autoritetet filipinase sot njoftuan për gjithsejt 214 të vdekur.

 

Më tepër se 97 mijë njerëz tjerë kanë lëshuar shtëpitë e tyre duke u strehuar në rajone më të sigurta. Ndërkohë në jug të Filipineve është zhdukur një anije me 68 njerëz në bord. Sipas të dhënave të rojeve bregdetare anija më parë kishte dërguar një sinjal për ndihmë.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |