|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

OPINIONE

  “Kolumnistët” që kërkojnë nga kryetari Rugova që të flasë serbisht!

Ju "kolumnistë", nëse nuk dëshironi t’i takoni kategorisë më të poshtër – kategorisë së tradhtarëve, së paku, heshtni bile tash. Heshtni! Që të mos e bëni veten që ato “kolumnet” tuaja t’ua pështyjnë edhe vetë fëmijët tuaj. Heshtni, se tash nuk keni nevojë ta tradhtoni lirinë e Kosovës, që është shumë herë më e rëndë se tradhtia në robëri. Heshtni, se mjaft jeni mbëshjellur me marre. Mos e shtresoni më tepër këtë. Se përrallë u bëtë me ato kolufet tuaja…

Shkruan: Nazmi LUKAJ

Disa “kolumnistë” të disa mediave të majta, kryetarin e Kosovës e kanë akuzuar dhe vazhdojnë ta akuzojnë pse nuk po merr pjesë në disa manifestime multietnike, në të cilat parashihet që ai të flasë edhe në gjuhën serbe! D.m.th., kërkojnë prej tij që ta flasë këtë gjuhë, që ende i ka lënë gjurmët e freskëta të vandalizmit në Kosovë!

Kërkojnë prej tij ta flasë këtë gjuhë, ende pa u gjetur sa e sa të zhdukur gjatë kohës së pirromanisë serbe! Kërkojnë prej tij ta flasë këtë gjuhë, edhe pse nga Serbia çdo ditë zhvarrosen eshtrat e shqiptarëve, të masakruar nga soldateska e Milosheviqit!

 

Kur edhe në këtë prag të ndërrimit të motmoteve, në Pejë u rivarrosen eshtrat e atyre shqiptarëve që, më shumë se katër vjet, u “prehen” në tokat e atyre që ua morën shpirtin! Këta “kolumnistë” e bëjnë këtë pa iu kërcënuar askush! Dhe, pa qenë askund e pranishme makineria serbe! E bëjnë këtë vetëm pse serbishten duan ta dëgjojnë në Kosovë, si nostalgji për të, gjuhë kjo që në trojet e Dardanisë është sinonim i vrazhdësisë dhe barbarizmit të fundshekullit 20.

 

Shih poshtërsinë e tyre: këtë e kërkojnë gjoja për të mirën e Kosovës!!! Të këtillët e bëjnë këtë kritikë në adresë të dr. Rugovës, ngase asnjëherë soldateska serbe nuk u ka sjellë dhimbje. Se, po t’ua kishte vrarë ajo babain si dr . Rugovës që kur ky ishte në djep, dhe po t’i kishte marrë peng si e mori këtë makineria serbe e urdhëruar nga kryekrimineli Milosheviq, jo sot, po as pas shumë shekujsh, nuk kishin pranuar ta flisnin këtë gjuhë, që shqiptarëve u ka sjellë shumë vuajtje dhe shumë trishtim.

 

E, si mundet, pra zotërinj kaq lehtë ta flasë këtë gjuhë që ia asocionon këto dy dhimbje të mëdha?! Kjo kërkesë juaja, s'është gjë tjetër veç një denoncim që po ia bëni para ndërkombëtarëve.

 

Më sakt: po bëni me gisht tek ta se, ja, ky është ai nacionalisti që nuk po na lejon ta kthejmë Serbinë në Kosovë, se sa për ne ajo do të ishte këtu. Shkrimet tuaja, që ju i titulloni “kolumne” / për ta fshehur nocionin tradhti/ nuk e habisin askë, sepse dihet nostalgjia që keni për Jugosllavinë e Serbinë. Por, habitemi pse vazhdoni të silleni kështu në liri, kur nuk keni nevojë ta bëni këtë idiotllëk.

 

Kur fëmijët tuaj tash e kanë mësuar veshin se Kosova duhet të jetë e pavarur, në të cilën do të jenë të dinjitetshëm. Në të cilën do të rriten si njerëz në radhë të parë. Si nostalgjikë projugosllavë që jeni, nuk po i prani poshtërsitë që po i bëni ndaj kryetarit Rugova. Dhe, ndaj kombit. As tash kur po e denonconi dr. Rugovën tek ndërkombëtarët, asnjë denocim të ri nuk jeni duke e bërë.

 

As ndonjë poshtërsi sui generis. Në fakt, ju po vazhdoni rrugën e mëparshme. Se, sa për kryetarin Rugova, jo vetëm shqiptarët, por tërë opinioni botëror e ka të qartë se ky e do atdheun e tij. E do Kosovën e pavarur. E do këtë që të bëhet një shtet modern. Habit vetëm një fakt:

 

Pse ky soj i "kolumnistëve" nuk hesht bile sot, kur i tërë populli pret të realizohet synimi humëshekullor i tij! Pse nuk hesht sot, kur edhe shumë shtete të botës janë të interesuara që Kosovën ta bëjnë të pavarur. Sa më shumë që do t’i mëshojnë këtij teli, aq më shumë do t’i rrisin rrathët e poshtërsisë që po bëjnë ndaj presidentit dhe çështjes së Kosovës.

 

Andaj, ju "kolumnistë", nëse nuk dëshironi t’i takoni kategorisë më të poshtër –kategorisë së tradhtarëve, së paku, heshtni bile tash. Heshtni! Që të mos e bëni veten që ato “kolumnet” tuaja t’ua pështyjnë edhe vetë fëmijët tuaj.

Heshtni, se tash nuk keni nevojë ta tradhtoni lirinë e Kosovës, që është shumë herë më e rëndë se tradhtia në robëri. Heshtni, se mjaft jeni mbëshjellur me marre. Mos e shtresoni më tepër këtë. Se përrallë u bëtë me ato kolufet tuaja…