Përmbajtja:

• Presidenti Rugova u prit në audiencë te Ati i Shenjtë Papa Gjon Pali i Dytë

• Shefi i UNMIK-ut ia ktheu parlamentit për rishqyrtim ligjin për regjistrimin e popullsisë

• Raporti i OSBE-së për procesin gjyqësor "Grupi i Llapit"

• Qeveria kundërshton fuqishëm nismën e "bashkësisë së komunave serbe" për organizim të ri territorial në Kosovë

• Bejkon: Kthimi i të zhvendosurve në Kosovë - shumë i ngadaltë

• Kuvendi i Kosovës të hënën në një seancë të jashtëzakonshme do të debatojë për buxhetin e Kosovës

• Stacioni policor në Leposaviq drejtohet nga pjesëtarët e SHPK-së

• UNMIK-u dhe institucionet e Kosovës nga buxheti kanë ndarë 2 milionë euro për projekte të kthimit

• Zëdhënësja e UNMIK-ut thotë se çdo përpjekje për ndarje territoriale të Kosovës është e papranueshme

• Furrëtari Feti Martinaj dhuron 4 tonë miell për skamnorët e Gjilanit

• Të hënën në Beograd fillon një proces gjyqësor kundër 36 personave të ukazuar për vrasjen e kryeministrit serb Gjingjiq

• Hiqet pengesa për udhëtimin e emigrantëve

• Të paktën 12 pasagjerë kanë vdekur në aksidentin e një autobusi

• Libia do të eliminojë armët e shkatërrimit në masë

• Beagle 2 vazhdon rrugën drejt Marsit

• Gabimisht vriten tre policë irakianë

• Të paktën 70 njerëz kanë gjetur vdekjen dhe mbi 100 janë zhdukur nga dy shembjet e dheut në Filipine

• Kryeministri spanjoll Hoze Maria Aznar mbërriti sot i paparalajmëruar në Irak

Presidenti Rugova u prit në audiencë te Ati i Shenjtë Papa Gjon Pali i Dytë

 

Rugova pati takim edhe me Kardinalin Anxhelo Sodano, Sekretar i Shtetit të Vatikanit

Vatikan, 20 dhjetor 2003 - Sot (e shtunë), Ati i Shenjtë Papa Gjon Pali II-të e priti në audiencë Presidentin e Kosovës, Dr. Ibrahim Rugovën. Audienca, që zgjati rreth 20 minuta, ishte shumë e përzemërt.

Në fillim Presidenti Rugova e falënderoi Papa Gjon Palin II për beatifikimin e Nënës Tereze. Pastaj, Presidenti Rugova e njoftoi Atin e Shenjtë me progresin që është arritur në Kosovë në të gjitha fushat e jetës.

 

Presidenti kërkoi nga Ati i Shenjtë që që të lutet dhe të ushtrojë ndikimin e tij për njohjen formale të pavarësisë së Kosovës.

Presidenti Ibrahim Rugova e njoftoi Papa Gjon Palin II me përgatitjet që po bën Ipeshkvia e Kosovës për ndërtimin e Katedrales në Prishtinë.

Ati i Shenjtë e vlerësoi progresin që është arritur në Kosovë dhe shprehu interesimin e tij për shumë çështje të zhvillimeve pozitive në Kosovë.

Gjatë audiencës, Ati i Shenjtë e përmendi edhe Gjergj Kastriotin - Skënderbeun, Heroin Kombëtar të shqiptarëve.

Presidenti Rugova ia uroi Papës Gjon Pali II Këshëndellat dhe Vitin e Ri, duke i dëshiruar shëndet dhe jetë të gjatë. Poashtu, edhe Ati i Shenjtë i uroi Presidentit të Kosovës Kërshëndellat dhe Vitin e Ri.

Në fund të audiencës, Presidenti Rugova i dhuroi disa dhurata Papës Gjon Pali II: Medalonin e Nënës Tereze, Medalonin e Lidhjes së Prizrenit, si dhe kristale të çmueshme të Kosovës.

 

Ndërkaq, Ati i Shenjtë i dhuroi Presidentit medalje papnore të punuara me rastin e 25-vjetorit të shërbimit të tij si Papë.

Pas audiencës tek Ati i Shenjtë, Presidenti i Kosovës Ibrahim Rugiva u prit nga Sekretari i Shtetit të Vatikanit, Hirësia e Tij, Kardinal Anxhelo Sodano, me të cilin pati një bisedë të gjatë miqësore e përmbajtësore.

 

 

Shefi i UNMIK-ut ia ktheu parlamentit për rishqyrtim ligjin për regjistrimin e popullsisë

 

Prishtinë, 20 dhjetor 2003 - Shefi i UNMIK-ut, Hari Holkeri nuk e ka nënshkruar Ligjin për Regjistrimin e Popullsisë të miratuar kohë më parë nga Parlamenti i Kosovës.

 

Ky ligj është kthyer për rishqyrtim në parlament për shkak se ai, siç thuhet, duhet t'i kete parasysh brengat legjitime të komunitetit serb në Kosovë.

 

Është bërë e ditur se kryeadministratori Holkeri ka nënshkruar katër ligje të tjera që janë miratuar në Parlamentin e Kosovës.

 

Këto janë: Ligji mbi shërbimin postar, amandamentet e ligjit për menaxhimin e financave publike, inspektoratit sanitar në Kosovë dhe Ligji mbi pensionet me aftësi të kufizuara.

 

 

Raporti i OSBE-së për procesin gjyqësor "Grupi i Llapit"

 

Prishtinë, 20 dhjetor 2003 - Departamenti i OSBE-së për të Drejtat e Njeriut dhe Vëzhgimin e Sistemit Ligjor, paraqiti dje në Prishtinë raportin për procesin gjyqësor të të ashtuquajturit "Grupi i Llapit", ku bëjnë pjesë ish-drejtues të UÇK-së të akuzuar dhe të dënuar për krime lufte në Kosovë.

 

Në këtë grup bëjnë pjesë Latif Gashi, Rrustem Mustafa -Remi, Naim Kadriu dhe Nazif Mehmeti.

 

Në këtë raport theksohet se ky asociacion është i kënaqur me zhvillimin e procedurave gjyqësore dhe se paneli i gjykatësve kishte bërë përpjekje të mëdha për t'u siguruar që gjykimi të zhvillohej në mënyrë të drejtë dhe që të gjitha çështjet e ngritura nga palët të dëgjoheshin me kujdes dhe të shqyrtoheshin thellësisht.

OSBE gjithashtu konstaton se procedurat konsiderohen korrekte, por bëhen vërejtje lidhur me nënyrën e marrjes në pyetje të dëshmitarëve të mbrojtur.

 

Gjithashtu theksohet se të drejtat e të akuzuarve nuk ishin dëmtuar seriozisht në asnjë rast dhe se ky ishte gjykimi i parë i madh në Kosovë për akuza ndaj shqiptarëve të Kosovës për krime lufte që ishte zhvilluar në bazë të ligjeve të zbatueshme vendore.

 

Siç vihet në dukje në raport, ato krime ishin kryer në pjesën më të madhe kundër viktimave shqiptare. Në raport thuhet se nga 26 viktimat e paraqitura në akuzë vetëm një ishte serb i Kosovës. Të katër personat u akuzuan për dyshime për pjesëmarrje në burgim të paligjshëm, torturim dhe vrasje civilësh në periudhën gusht 1998 deri në qershor 1999.

 

Latif Gashi është dënuar me 10 vjet burg nën akuzën për krime lufte, Nazif Mehmeti me 13 vjet burg po ashtu i akuzuar për krime lufte, Naim Kadriu me pesë vjetë burg i akuzuar për krime lufte dhe Rustem Mustafa - Remi me 17 vjet burg po ashtu i akuzuar për krime lufte.

 

 

Qeveria kundërshton fuqishëm nismën e "bashkësisë së komunave serbe" për organizim të ri territorial në Kosovë

 

Prishtinë, 20 dhjetor 2003 - Qeveria e Kosovës nëpërmjet një komunikate shprehu kundërshtimin e fuqishëm ndaj të ashtuquajturës "Deklaratë të Shënkollit" për njëfarë organizimi të ri territorial, të cilën e publikoi e ashtuquajtura "bashkësi e komunave serbe të Kosovës" në veri të Mitrovicës.

Ky është një akt antikushtetues dhe provokativ, i cili bie ndesh me të ardhmen paqësore dhe respektimin e të drejtave për të gjithë, thuhet në komunikatë të Qeverisë së Kosovës. Po kështu theksohet se nuk do të ketë riorganizim territorial në baza etnike dhe serbët duhet ta kuptojnë se nuk do të ketë më kthim të Kosovës në Serbi.

 

Qeveria e Kosovës kërkon nga UNMIK-u që në përputhje më përgjegjësitë që ka të marrë qëndrim dhe masa adekuate ndaj këtij akti dhe akteve të tjera të ngjashme provokuese nga e ashtuquajtuara "bashkësi e komunave serbe" në veri të Mitrovicës.

 

 

Bejkon: Kthimi i të zhvendosurve në Kosovë - shumë i ngadaltë

 

Uashington, 20 dhjetor 2003 - "Pas përfundimit të luftës në Kosovë, më 1999, Kombet e Bashkuara, Shtetet e Bashkuara dhe NATO-ja deklaruan se Kosova duhet të jetë një shoqëri shumetnike, por deri tani, jemi ende larg kësaj, edhe për faktin se kthimi i të zhvendosurve po zhvillohet shumë ngadalë", tha presidenti i organizatës "Refugees International", Keneth Bekon.

 

Zoti Bejkon, i cili gjatë luftës në Kosovë ka qenë zëdhënës i Pentagonit, në një intervistë që i dha "Zërit të Amerikës", tha gjithashtu se serbët nuk kanë bashkëpunuar plotësisht për këtë çështje dhe ata janë përpjekur ta manipulojnë procesin e kthimit të të zhvendosurve.

"Natyrisht, që gjendja është shumë më e mirë nga ç=ishte në vitet 1998-99, megjithatë, Kosova nuk është Zvicra. Atje vazhdon të ketë shumë tensione etnike, ka ende shumë probleme ekonomike dhe megjithëse vrasjet atje nuk janë më diçka e zakonshme, vazhdon të ketë një numrë të madh sfidash", tha Bejkon.

 

Sipas smendimti të tij, e rëndësishme, si për serbët, edhe për shqiptarët është se NAT0 i dha të këtyre popujve shansin e ri për të ndërtuar një jetë dhe një vend më të mirë.

 

"Është shumë e rëndësishme, që të dy palët të bashkëpunojnë, për të arritur premtimin që kanë bërë. Lufta ka 4 vjet që ka mbaruar, mund të thuhet se progres ka, por jo ai që SHBA, OKB-ja dhe NATO-ja kishin menduar menjëherë pas përfundimit të luftës", tha Bejkon.

 

 

Kuvendi i Kosovës të hënën në një seancë të jashtëzakonshme do të debatojë për buxhetin e Kosovës

 

Prishtinë, 20 dhjetor 2003 - Kuvendi i Kosovës të hënën do të mbajë një seancë të jashtëzakonshme ku pritet të diskutohet për buxhetin e përgjithshëm të konsoliduar të Kosovës. Kjo pikë e rendit të ditës në senacën e së enjtës ishte shtyrë për shkak të përgatitjeve të pamjaftueshme.

 

 

Stacioni policor në Leposaviq drejtohet nga pjesëtarët e SHPK-së

 

Albanik, 20 dhjetor 2003 - Kompetencat në stacionin e policisë në Leposaviq prej dje kanë kaluar në Shërbimin Policor të Kosovës. Në këtë ceremonial kanë marrë pjesë përfaqësuesit më të lartë të SHPK-së në krye me kolonel Sheremet Ahmetin si dhe përfaqësues të policisë ndërkombëtare, ku ishte edhe komandanti rajonal i Mitrovicës.

 

"Ky është stacioni i dhjetë me radhë që po pavarësohet dhe gradualisht kompetencat po kalojnë nga ndërkombëtarët në vendorët", ka thënë zëdhënësi i SHPK-së Refki Morina.

 

Ai theksoi se është në këtë mënyrë po realizohet dëshira e të gjithë pjesëtarëve të SHPK-së dhe mbarë popullatës së Kosovës.

Stacioni policor në Leposaviq do t'i ketë 55 pjesëtarë të SHPK-së, një toger dhe tetë rreshterë. Përbërja nacionale e pjesëtarëve të SSPK-së është ajo përbërje nacionale çfare është në atë mjedis, ku ata veprojnë. Deri në fund të vitit do të pavarësohen edhe dy stacione tjera policore.

 

 

UNMIK-u dhe institucionet e Kosovës nga buxheti kanë ndarë 2 milionë euro për projekte të kthimit

 

Prishtinë, 20 dhjetor 2003 - Në një deklaratë të përbashkët UNMIK-u dhe institucionet e Kosovës kanë bërë të ditur se nga buxheti i Kosovës janë ndarë 2 milionë euro për projekte të kthimit. Pegi

Hiks, zyrtare në UNMIK, ka thënë se këto nisma do ta ndryshojnë jetën për të mirë të njerëzve nga të gjitha komunitetet. Ndërkaq kryeministri Bajram Rexhepi ka thënë se këto fonde demonstrojnë përkrahjen e fuqishme të Qeverisë së Kosovës për procesin e kthimit.

 

 

Zëdhënësja e UNMIK-ut thotë se çdo përpjekje për ndarje territoriale të Kosovës është e papranueshme

 

Prishtinë, 20 dhjetor 2003 - Çdo përpjekje e njëanshme për ndarje territoriale të Kosovës është e papranueshme, ka thënë zëdhënësja e UNMIK-ut Methild Heneke, ngase vendime të këtilla mund të marrë vetëm Këshilli i Sigurimit të OKB-së.

 

Këto komente ajo i bëri pas një deklarate, që një pjesë e përfaqësuesve politikë serbë e miratoi pardje në pjesën veriore të Kosovës.

 

Kjo zëdhënëse e administratës së UNMIK-ut ka theksuar se standardet për Kosovën janë përkrahur edhe nga KS të OKB-së dhe se çdo tentim për përbuzjen e tyre është i papranueshëm.

 

 

Furrëtari Feti Martinaj dhuron 4 tonë miell për skamnorët e Gjilanit

 

Gjilan, 20 dhjetor 2003 - Nga 27 nëntori, në Gjilan ka filluar aksioni humanitar për grumbullimin e ndihmave për nevojtarët e kësaj komune, i cili po zhvillohet me moton "Gjilani 2003 - Viti i Nënës Terezë".

Këtij aksioni iu ka bashkangjitur dhe Feti Martinaj, pronar i furrës "Aroma", i cili, siç ka thenë koordinatori Nehat Ibrahimi, ka dhuruar 4 tonë miell. Z. Martinaj ka premtuar se do t`i inkurajojë edhe furrtarët tjerë që të ndihmojnë aksionin "Gjilani 2003".

Siç dihet një numër bukur i madh i qytetarëve jeton në kushte të këqija, ndërsa sipas evidencave të qendrës sociale, nga ndihmat janë të varur 1.871 familje me 6.956 anëtarë, por përgjegjësit thonë se kërkesat për asistencë janë më të mëdha dhe ato po rriten dita-ditës.

Shpërndarja e ndihmave nga aksioni i tashëm "Gjilani 2003 - Viti i Nënës Terezë", që po zhvillohet në organizim të Kuvendit të Komunës dhe në bashkëpunim me shoqatën "Nëna Terezë" do të bëhet në bazë të listave të Qendrës Sociale.

 

 

Të hënën në Beograd fillon një proces gjyqësor kundër 36 personave të ukazuar për vrasjen e kryeministrit serb Gjingjiq

 

Beograd, 20 dhjetor 2003 - Një gjykatë speciale e Beogradit të hënën më 22 dhjetor do të fillojë një proces gjyqësor kundër 36 personave të akuzuar për vrasjen e kryeministrit serb Zoran Gjingjiq, si dhe për 14 vrasje, tri rrëmbime, dy akte terroriste, posedem ilegal dhe shpërndarje të drogës dhe bashkim kriminal, ka bërë të ditur zëdhënësi i kësaj gjykate, njoftojnë mediat serbe.

 

 

Hiqet pengesa për udhëtimin e emigrantëve

 

Athinë, 20 dhjetor 2003 - Mijëra emigrantë shqiptarë në Greqi që nuk janë pajisur me leje qëndrimi, do të mund të udhëtojnë për në atdhe e të kthehen pa probleme, deri më 10 janar të vitit të ardhshëm.

Ministri grek i Rendit, Jorgos Floridis, ka nënshkruar në prani të ambasadorit shqiptar në Athinë, Bashkim Zeneli, urdhërin përkatës, drejtuar pikave të kalimit të kufirit, të cilat udhëzohen të lejojnë hyrjen në Greqi të emigrantëve që kanë me vete vërtetimin se ata kanë dorëzuar kërkesën për rinovimin e lejes së qëndrimit.

"Ministri në prezencën time firmosi urdhërin për pikat e kalimit kufitar ku bashkatdhetarët do të lejohen të kalojnë duke filluar që nga momenti që ai firmosi këtë urdhër, rreth orës 14,00, dhe deri më 10 janar," tha zoti Zeneli për BBC-në të premten.

 

 

Të paktën 12 pasagjerë kanë vdekur në aksidentin e një autobusi

 

Bruksel, 20 dhjetor 2003 - Të paktën 12 pasagjerë kanë vdekur dhe 37 janë lënduar rëndë e lehtë në aksidentin e një autobusi me regjistrim gjerman që ndodhi të shtunën në mëngjes, në autostradën midis Brukselit dhe Parisit, njofron Fran Press.

"Duket se në autobus kanë qenë 49 pasagjerë dhe se 37 pasagjerë ka qenë e mundur të të nxirren. Nga kjo mund të konkludohet se 12 persona kanë vdekur", ta zëdhënësi i zjarrfikësve në Monsë.

Ndërkaq, shënimet zyrtare mund të publikohen vetëm pasi në vendin e aksidentit të kenë shkuar përfaqësuesit e prokurorisë.

Aksidenti ka ndodhur në momentin kur autobusi u përplas për murin e betonit afër kalimit kufitar Hensis afër Monsës. Autobusi menjeherë mori flakë.

 

 

Libia do të eliminojë armët e shkatërrimit në masë

 

Tripoli, 20 dhjetor 2003 - Libia ka pranuar se është përpjekur të zhvillojë armë të shkatërrimit në masë, por ka pranuar tani të heqë dorë prej tyre.

Presidenti libian Mohamar Gadafi tha nëpërmjet një deklarate se Libia ishte e gatshme të luajë rolin e saj në ndërtimin e një bote pa armë të shkatërrimit në masë dhe pa të gjitha format e terrorizmit.

Libia gjithashtu do të pranojë traktatet ndërkombëtare të kontrollit të armëve dhe do të pranojë inspektime.

Pak pas kësaj deklarate presidenti amerikan Xhorxh Bush dhe kryeministri britanik Toni Bler thanë se Libia mund të kthehet tani në komunitetin ndërkombëtar.

Zyrtarë britanikë thonë se gjatë tre javëve të një vizite në Libi ekspertëve ndërkombëtarë u janë treguar uzina të fshehta, përfshirë edhe projekte për pasurimin e uraniumit, bomba të projektura për t'u mbushur me armë kimike dhe punë që lidhet me zhvillimin e agjentëve biologjikë.

Kryeministri Bler tha se Libia ishte afruar me zyrtarë britanikë e amerikanë në mars pas negociatave të sukseshme - ku libianët pranuan përgjegjësinë për bombën në aeroplanin amerikan të pasagjerëve që ra mbi Lockerbi, SKoci - "për të parë nëse mund të zgjidhte po me bashkëpunim problemet e saj lidhur me armët e shkatërimit në masë".

"Pasuan nëntë muaj punë me ekspertë nga Amerika e Britania gjatë të cilave libianët diskutuan me ne programet e tyre," tha kryeministri britanik.

 

 

Beagle 2 vazhdon rrugën drejt Marsit

 

Londër, 20 dhjetor 2003 - Sonda e destinuar për Mars e Agjensisë Evropiane Hapësinore Beagle 2, është shkëputur me sukses nga sonda mëmë dhe është drejtuar për t'u ulur në mars pas gjashtë ditësh - ditën e Krishtlindjes.

Sonda e vogël, me peshë vetëm 70 kg, u largua nga anija hapësinore Mars Ekspres që tani do të orbitojë planetin, në bazë të sinjaleve që do të marrël nga sonda.

Kjo ishte një nga fazat më të rrezikshme të të gjithë projektit.

Misioni do të ishte kompromentuar në mënyrë fatale nëse dy sondat nuk do të arrinin të ndaheshin gjashtë ditë para ditës së planifikuar për të arritur në Mars.

Kur sinjali erdhi që ndarja kishte dalë me sukses, shkencëtarët e Beagle 2 të mbledhur në Londër duartrokitën.

 

 

Gabimisht vriten tre policë irakianë

 

Kirkuk, 20 dhjetor 2003 - Tre policë irakianë janë vrarë dhe dy të tjerë janë plagosur rëndë gjatë natës së kaluar në jug të qytetit Kirkuk kur ushtarët amerikanë hapën zjarr duke menduar se fjala është për guerilët, bëri të ditur policia irakiane.

"Policët po mbanin një barrikadë në rrugën e cila lidh Kirkukun dhe Bagdadin. Patrulla amerikane erdhi tek ajo rreth orës 2.00 pas mesnatës dhe hapi zjarr duke menduar se fjala është për pjesëtarët e guerilës", ka thënë nënkoloneli i policisë Salam Zankana.

Ushtria amerikane thotë se po verifikon këto informacione.

 

 

Të paktën 70 njerëz kanë gjetur vdekjen dhe mbi 100 janë zhdukur nga dy shembjet e dheut në Filipine

 

Manila, 20 dhjetor 2003 - Të paktën 70 njerëz kanë gjetur vdekjen dhe mbi 100 janë zhdukur nga dy shembjet e dheut të shkaktuara nga shirat e fuqishme gjatë gjashtë ditëve të kaluara në Filipine, bënë të ditur të shtunën zyrtarët.

Zyra e mbrojtjes civile ka njoftuar se nga shembja e dheut në afërsi të San Franciskos në provincën jugore Lejte në pjesën qendrore të Filipineve janë shembyr edhe 80 shtëpi. Me dhjetra njerëz janë lënduar dhe pritet që numri i viktimave të rritet, druajnë zyrtarët, njofton Rojter.

 

 

Kryeministri spanjoll Hoze Maria Aznar mbërriti sot i paparalajmëruar në Irak

 

Bagdad, 20 dhjetor 2003 - Kryeministri spanjoll Hoze Maria Aznar mbërriti sot i paparalajmëruar në Irak, ku janë të stacionuar rreth 1.300 ushtarë spanjollë.

Aznar ka vizituar bazën ushtarake në qytetin Divani, në jug të vendit, ku janë të stacionuar ushtarët spanjollë. Kthimi i tij në Spanjë pritet sot më vonë.

Sipas një ankete të opinionit publik, shumica e spanjollëve dëshirojnë tërheqjen e ushtarëve të tyre nga Iraku, ku në një sulm muajin e kaluar janë vrarë shtatë agjentë spanjollë të zbulimit.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |