|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Këshilli Britanik: nga konkursi i fotografisë te gazeta e gjimnazistëve

20 dhjetor 2003 / TN

 

Çerçiz LOLOÇI

 

Mbrëmjen e datës 16 dhjetor 2003, në mjediset e Galerisë Kombëtare të Arteve në Tiranë, British Council organizoi ceremoninë e shpalljes së fituesve të konkursit fotografik me temë "Ju tregoj Tiranën time". Drejtoresha e British Council, Joan Barry dhe Ambasadori i Britanisë së Madhe në Tiranë Z. Richard Jones prezantuan fituesit e garës. Çmimi special shkoi për nxënësin Rubin Hado, të cilit iu ofrua anëtarësim i plotë njëvjeçar pranë Qendrës së Informacionit të British Council, çmimin e tretë e meritoi studentja Sabina Dauti, në vend të dytë u rendit nxënësi i shkollës "Sami Frasheri" Besard Hoxha.

 

Për këtë vend, përfaqësuesi i firmës Kodak ofroi një aparat fotografik digital. Fitues i konkursit fotografik "Ju tregoj Tiranën time" u shpall studenti Elio Skuqi, të cilit British Council do t’i krijojë mundësinë e një vizite në Britaninë e Madhe. Rreth 100 të rinj morën pjesë në këtë aktivitet me më shumë se 500 foto, të cilat kishin fiksuar aspekte të ndryshme të jetës së kryeqytetit. Në një ekspozitë të posaçme  u ekspozuan 160 punimet më të mira. Pas prezantimit të tij në mes të muajit nëntor, projekti i fotografisë krijuese "Ju tregoj Tiranën time" ngjalli interes të madh gjë që e tregoi edhe numri i madh i pjesëmarrësve.

 

Për ta bërë më interesant atë si dhe për të ndihmuar të rinjtë e interesuar të përmirësonin njohuritë e tyre në fushën e fotografisë artistike, nga data 1-4 dhjetor British Council ftoi në Tiranë fotografen britanike me origjinë shqiptare Lala Meredith Vula. Gjatë qëndrimit të saj në Tiranë, Lala drejtoi tre sesione trainimi mbi teknikat e fotografimit. Ajo pati mundësi të demostronte para audiencës se si artistë të njohur botërorë kanë trajtuar temën e fotografimit të qytetit. Rreth 60 të rinjtë që morën pjesë në këto aktivitete patën mundësi të praktikonin vetë nëpër qytet njohuritë teorike që morën.

 

Në datën 3 Dhjetor, po në ambjentet e qendrës së informacionit të British Council u zhvillua një debat me profesionistë të fotografisë ku përsëri tema e fiksimit të qytetit në fotografi dhe ky art në përgjithësi ishin temat kryesore. Gjatë këtij aktiviteti Lala Meredith Vula dhe Albes Fusha debatuan me publikun kurse Aida Bërxholi, manaxhere e projektit të British Council ju përgjigj interesimit të tyre për idenë, mënyrën e seleksionimit dhe plane të ardhshme të British Council në fushën e Artit.

 

Gazeta "4us"

 

Gazeta "4US" publikoi numrin e parë të saj në nëntor. Kjo gazetë është iniciativa e senatorëve të katër shkollave të mesme në Tiranë, “Qemal Stafa”, “Petro Nini Luarasi”, “Asim Vokshi” dhe “Partizani” por që synon të zgjerojë rrjetin e saj në të gjitha shkollat e mesme të Tiranës duke u bërë kështu mjet komunikimi i rrjetit të qeverive të nxënësve në kryeqytet. British Council mbështet këtë gazetë në kuadër të projektit për shkollat e mesme që po zbatohet që prej një viti si dhe do të mundësojë që nëpërmjet kësaj gazete të komunikojë me komunitetin e të rinjve të shkollave të mesme të qytetit për t’i informuar ata mbi shërbimet e British Council, aktivitetet dhe tema të tjera me interes.

 

Ku shkon gjuha angleze

 

Është duke u zhvilluar faza e tretë dhe përfundimtare e projektit “Studim mbi sistemin e mësimit të gjuhës angleze në Shqipëri”. Ky studim i ndërmarrë në bashkëpunim me Ministrinë e Arsimit ka si qëllim kryesor të tij identifikimin dhe gjetjen e rrugëve për eliminimin e vështirësive në mësimin e gjuhës angleze si për studentët ashtu edhe për mësuesit në shkallë kombëtare. Faza e parë e këtij projekti konsistoi në krijimin e një grupi kërkimor i përbërë nga 14 mësues dhe profesorë përfaqësues të departamenteve të gjuhës së huaj pranë Shkollave të mesme dhe të Univestitetit të Tiranës. Si pjesë e kësaj faze Keshilli Britanik organizoi një program trajnimi për grupin kerkimor me Profesor dhe Konsulent, Tony Luxon, nga Universiteti Lancaster, Britani e Madhe. Në këtë trajnim u përcaktua metodologjia dhe instrumentat kryesor për mbledhjen e të dhënave të këtij studimit.

 

Faza e dytë e projektit konsistoi në analizimin dhe interpretimin e të dhënave sasiore dhe cilësore të mbledhura si dhe në përgatitjen e raporteve për cdo kapitull të vecantë të këtij studimi. Faza e tretë konsiston në përpunimin e raporteve të shkruara gjatë fazës së dytë dhe në dhënien e disa konkluzioneve përfundimtare për ngritjen e cilësisë së procesit të mësimit të gjuhës angleze. Grupi kërkimor ka qenë nën konsulencën e vazhdueshme të Prof. Tony Luxon. Ky studim do të prezantohet në fillim të vitit 2004.

 

Takim rajonal i mësuesve të anglishtes

 

Nga data 21-23 Nëntor 2003 Këshilli Britanik i Maqedonisë organizoi "Takimin Rajonal" të Shoqatave të mësuesve të Anglishtes. Takimi u zhvillua në Shkup. Tim Philips (ET project manager at the British Council in Skopje) luajti një rol të rëndësishëm në organizimin dhe zhvillimin e këtij takimi. Në të morën pjesë përfaqësues nga Maqedonia, Bullgaria, Rumania, Bosnja-Hercegovina, Kosova, Kroacia, Greqia, Hungaria, Ukraina, dhe 3 përfaqësuses të Shoqatës së Mësuesve të Anglishtes në Shqipëri, ELTA-ALBANIA, të mbështetur nga Këshilli Britanik nën kujdesin e Sheilagh Neilson.

 

Përfaqësuesit e shoqatave gjatë takimit shkëmbyen mendime për një bashkërendim më të mirë të punës së tyre në të ardhmen dhe mundësia për projekte të përbashkëta. Në fund u nënshkruan edhe marrëveshje dypalëshe që konsistojnë në këmbim përfaqësuesish në konferenca kombëtare të shoqatave si dhe botimet e ndryshme të tyre (revista, gazeta etj).

 

Konferenca  "A sense of place"

 

Kjo konferencë u organizua nga British Council në Wales, Britani e Madhe më datat 24-27 nëntor 2003. Thelbin e kësaj konference e përbënte roli i artit dhe i medias në riformimin e shoqërive dhe identiteve në Europë. Ajo iu dedikohet parësisht personave të zhvendosur, refugjatëve, minoriteteve e të tjerë. Konferenca u drejtua nga z.Poppy Szaybo i cili ka një eksperiencë të gjatë në fushat e artit, të drejtave të njeriut dhe edukimit në lidhje me këtë target grup.

 

Shqipëria u përfaqesua në këtë konference nga z.Arian Hoxha këshilltar ekonomik në Ministrinë e Punës dhe Çështjeve Sociale.Gjatë kësaj konference theksi u vu në integrimin shumëplanësh të minoriteteve (veçanërisht romëve) dhe personave azilkërkues të cilët përballen me vështirësi të ndryshme gjatë qëndrimit në vendet ku jetojnë. Për Shqipërinë ky ishte një shans i mirë për të diskutuar dhe përmisuar strategjinë kombëtare për pakicat në vendin tonë.