Përmbajtja:

• Presidenti Rugova nesër do të ketë një audiencë te Papa Gjon Pali II

• Kryeparlamentari Daci priti këshilltarin e Presidentit të Shqipërisë

• Pesë të vdekur në një aksident të rëndë trafiku në Banullë të Lipjanit

• A. Çeku thotë se prioritet në punën e TMK-së në vitin 2004 do të jetë përmbushja e standardeve

• Bordi i AKM-së në mbledhjen e fundit ka nënshkruar kontratat për 18 ndërmarrje të raundit të tretë

• Instituti i Albanologjisë shënoi 50-vjetorin e themelimit

• AKM-ja i dorëzoi kontratën pronarit të "Termosistemit"

• Marrëveshje e spitaleve të Prishtinës dhe Stambollit

• Arrestohen tre të dyshimtë për vrasjen e Ylber Topërllakut dje në Podujevë

• Gjilan: Punëtoria në shkollën teknike - projekt i përbashkët me vlerë 250 mijë euro

• Në komunën e Podujevës janë të evidentuar 533 të vrarë dhe 57 persona të pagjetur pas luftës

• Komandanti amerikan i KFOR-it Xheri Bek thotë se forcat amerikane në Kosovë ende janë të nevojshme

• Në Prishtinë u mbajt takimi i grupit punues të UNMIK-ut dhe Qeverisë së Kosovës për standardet

• Delegacioni i përfaqësuesve të institucioneve të Kosovës dhe atyre poltike u kthye nga Vjena e Austrisë

• Përfaqësuesit e pakicës serbe kërkojnë formimin e dy etniteteve në Kosovë dhe kthimin e forcave serbe

• Në 60-vjetorin e Konferencës së Bujanit u tha se ajo ishte gurthemeli i shtetit të Kosovës

• Në Mal të Zi ka 47.682 shqiptarë, nga gjithsej 672.659 banorë sa ka ky vend

• Presidenti Moisiu ka ftuar kryeministrin Nano që të plotësojë sa më parë qeverinë

• Presidenti maqedonas u shpreh kundër legalizimit të Universitetit të Tetovës dhe decentralizimit të vendit

• Në Tetovë u protestua për lirimin e ish-pjesëtarëve të Ushtrisë Çlirimtare Kombëtare

• Xhejms Lajon thotë se ideja për ndarjen e Kosovës në entitete "është shumë e rrezikshme"

• Dy gjykata amerikane marrin vendime kundër politikës së Presidentit Bush

• Policia turke thotë se ka arrestuar një të dyshuar për sulmet në Stamboll

• Nga shpërthimi i një kamioni plagosen dy ushtarë amerikanë

• Bremer thotë se i ka shpëtuar një atentati në Irak

• Vriten dy ushtarë amerikanë afër Bagdadit

• Të burgosurit në Guantanamo akses tek avokatët

• Trupa shtesë amerikane gjatë rotacionit në Irak

• Kryeministri i Izraelit i ka kërcënuar palestinezët me ndarjen e njëanshme të vendit

• Ushtria amerikane gjen një listë me emra spiunësh të infiltruar radhët e forcave të sigurimit të amerikanëve

• Kofi Anan propozoi një takim për Irakun

• Irani e nënshkroi protokollin shtesë për marrëveshjen e bllokimit të armëve bërthamore

• Presidenti rus, Putin është i gatshëm të diskutojë për një pakësim të borxheve Irakut

Presidenti Rugova nesër do të ketë një audiencë te Papa Gjon Pali II

 

Romë, 19 dhjetor 2003 - Nesër, më 20 dhjetor, Shenjtëria e Tij, Papa Gjon Pali II e pret Presidentin e Kosovës, Ibrahim Rugova në një audiencë në Vatikan.

Pas audiencës, që do të jetë në orën 11:00, Presidenti Ibrahim Rugova do të takohet me sekretarin e Shtetit të Vatikanit, Hirësinë e Tij, Kardinalin Shodano.

 

 

Kryeparlamentari Daci priti këshilltarin e Presidentit të Shqipërisë

 

Prishtinë, 19 dhjetor 2003 - Kryetari i Kuvendit të Kosovës, Nexhat Daci, priti sot Muhamet Kapllanin, këshilltar i lartë i presidentit të Shqipërisë, Alfred Moisiu. Kryeparlamentari Daci e njoftoi zotin Kapllani për zhvillimet aktuale në Kosovë, sidomos me planin e ri për operacionalizimin e Standardeve për Kosovën.

Nga ana e tij z. Kapllani tha se disa nga këto standarde tashmë janë përmbushur nga institucionet e Kosovës dhe shtoi se pret që deri në mesi e vitit 2005 apo më heret të plotësohen edhe standardet e tjera, për të shpejtuar procesin negociator për statusin final.

Kapllani tha se Kosova gjatë kësaj kohe mund të llogarisë shumë edhe në mbështetjen e Shqipërisë, sidomos në përvojat e mira që mund t'i ofrojë për plotësimin e standardeve.

 

 

Pesë të vdekur në një aksident të rëndë trafiku në Banullë të Lipjanit

 

Lypjan, 19 dhjetor 2003 - Në aksin rrugor Prishtinë - Shkup në, afërsi të fshatit Banullë të Lipianit te restorani "Ulpi" ka ndodhur një aksident i rëndë trafiku, në të cilën kanë humbur jetën pesë persona dhe një tjetër është lënduar rëndë. Zëdhënësi i SHPK-së Refki Morina tha se aksidenti ka ndodhur si pasojë e përplasjes zinxhirore të disa veturave.

 

 

A. Çeku thotë se prioritet në punën e TMK-së në vitin 2004 do të jetë përmbushja e standardeve

 

Prishtinë, 19 dhjetor 2003 - TMK-ja gjatë këtyre viteve falë angazhimit tonë, ndihmës dhe mbështetjes suaj ka bërë përparime të shumta në të gjitha fushat. Kështu tha komandanti i përgjithshëm i TMK-së, gjeneral Agim Çeku në një takmim me donatorët për TMK-në të mbajtur dje në Prishtinë.

 

Në këtë takim përveç ministrit të Ekonomisë dhe Financave të pranishëm ishin të gjithë përfaqësuesit e të gjithë zyrave diplomatike në Kosovë si dhe kryesuesit e sektorit mbështetës të UNMIK-ut për TMK-në.

Prioritet themelor në punën e TMK-së në vitin 2004 do të jetë zbatimi dhe përmbushja e standardit të tetë, u shpreh gjeneral Agim Çeku në prezentimin e tij para donatorëve.

Ministri i Financave dhe Ekonomisë Ali Sadria në këtë takim tha se TMK-ja kërkon një trajtim më adekuat. Me këtë rast për periudhën 2004-2006 para donatorëve u paraqitën 39 milion ero për projekte prioritare. Ndërkaq buxheti për TMK-në nga buxheti i konsoliduar i Kosovës është 15 milionë euro.

Në fund të konferencës së djeshme përfaqësuesja e Zyrës finlandeze shprehu gatishmërinë për shqyrtimin e nevojave dhe ndihmën për TMK-në.

 

 

Bordi i AKM-së në mbledhjen e fundit ka nënshkruar kontratat për 18 ndërmarrje të raundit të tretë

 

Prishtinë, 19 dhjetor 2003 - Bordi i AKM-së në mbledhjen e fundit ka nënshkruar kontratat për 18 ndërmarrje të raundit të tretë, ndërkaq është vendosur që pesë prej tyre të ritenderohen. Kështu bërë të ditur shefi i Shtyllës së Katërt të UNMIK-ut Nikolaus Lambsdorf në takimin e djeshëm me gazetarë.

 

Ai bëri të ditur se politikat operative do të ndryshohen, ndërkaq takimi i ardhshëm i Bordit të AKM-së do të mbahet me 14 janar. Lambsdorf tha se Bordi i AKM-së ka ratifikuar katër kontrata të shitjes së ndërmarrjeve, kështu që pronarët e rinj mund të marrin udhëheqjen e tyre menjëherë. Pra katër kompanitë e para janë të shitura.

 

 

Instituti i Albanologjisë shënoi 50-vjetorin e themelimit

 

Prishtinë, 19 dhjetor 2003 - Me një solemnitet rasti Instituti i Albanologjisë shënoi dje pesëdhjetëvejtorin e themelimit të tij. Në këtë solemnitet përveç studiusve nga Kosova, Shqipëria dhe nga trojet tjera shqiptare, mori pjesë edhe ministri i Arsimit, Shkencës dhe Teknologjisë, Rexhep Osmani.

Në kuadër të këtij jubileu dje filloi simpoziumi me titull: "50 vjet përpjekje për studime albanologjike".
Në fjalën e tij akademik Rexhep Qosja, kryetar i Këshillit Organizativ tha: "Sot në këtë përvjetor të Intitutit të Alabanologjisë mund të shprehemi të kënaqur me punën e deritashme të tij, sepse ai gjatë kësaj kohe përveç se ka bërë një punë shumë të çmuar profesionale e shkencore, ka zhvilluar edhe një veprimtari me një rëndësi të veçantë politike e shoqërore institucionale", tha Qosja.

Ndërkaq, drejtori i këtij Instituti Sadri Fetiu tha se në këtë Institut janë ndërmarrë nisma, veprime e ide që janë treguar udhërrëfyes në lëvizjen tonë kombëtare gjatë këtyre 50 vjetëve, të cilat kanë kryer kështu edhe një mision historik. Ai shtoi se për punën e Institutit flasin qartë mëse 300 tituj dhe vepra shkencore të botuara deri më tash, ku është përmbledhur një punë e madhe e brezave.

Jorgo Bulo nga Akademia e Shkencave të Tiranës, duke theksuar rëndësinë e këtij Instituti gjatë viteve të shkuara, tha se mbështetja dhe përkrahja e studiusve të Akademisë së Tiranës nuk i ka munguar dhe nuk do t'i mungojë edhe në të ardhmen këtij Instituti.

Simpoziumi vazhdon punën edhe sot me paraqitje shkencore të shumë studjuesve të kësaj fushe nga Kosova, Shqipëria dhe trojet tjera shqiptare.

 

 

AKM-ja i dorëzoi kontratën pronarit të "Termosistemit"

 

Prishtinë, 19 dhjetor 2003 - Sot në një ceremoni rasti, Agjencia Kosovare e Mirëbesimit (AKM) i dorëzoi kontratën pronarit të ri të fabrikës të frigoriferëve "Termosistemi" në Rahovec, Selami Osës. Ndërmarrja "Termosistemi" u privatizua në raundin e parë, por për shkak të bllokimit të procesit të privatizimit, dorëzimi i kontratës nuk u bë deri më sot.

Pronari i ri, Selami Osa, tha se punëtorët e fabrikës së privatizuar, gjatë këtij vakumi ligjor janë përkujdesur për fabrikën dhe kanë vazhduar prodhimtarinë.

 

 

Marrëveshje e spitaleve të Prishtinës dhe Stambollit

 

Prishtinë, 19 dhjetor 2003 - Sot është zyrtarizuar marrëveshja e bashkëpunimit mes Qendrës Klinike Universitare të Kosovës si dhe spitaleve "Siamihersek" të Stambollit dhe Qendrës Ortopedike të Ankarasë.

Këto marrëveshje kanë për synim bashkëpunimin e ndërsjellë në fushë të problemeve shëndetësore, në edukimin dhe trajnimin e kuadrove si dhe në punën shkencore e hulumtuese të spitaleve të Kosovës dhe ato turke, tha Sali Ahmeti, drejtor i QKU-së. Ai tha se kjo është hera e parë që në nivel shtetëror të nënshkruhen marrëveshje të tilla.

Ndërkaq, Ibrahim Jekeler, drejtori i spitalit të Stanbollit, tha se kosovarët do të kenë mundësi që në spitalin e Stanbollit, i cili është i pajisur me mjete më moderne të teknologjisë së sotme, t'i kryejne operacionet e zemrës me sukses. Turqia është shteti i parë që në mënyrë zyrtare nënshkruan marrëveshje me Kosovën në nivele shtetërore.

 

 

Arrestohen tre të dyshimtë për vrasjen e Ylber Topërllakut dje në Podujevë

 

Podujevë, 19 dhjetor 2003 - Zv.komandanti i policisë së Podujevës, togeri Selim Ejupi deklaroi se, si rezultat i angazhimit të ekipeve të policisë, janë arrestuar tre persona të dyshimtë se e kanë kryer veprën e tentim plaçkitjes dhe vrasjes së pronarit të argjendarisë "Te Ylberi", Elber Topërllakut, kurse njëri nga ata ka arritur të arratiset.

Ndërkohë, ka reaguar Sindikata e Pavarur e Ekonomisë së Vogël dhe Zejtarisë e Podujevës (SPEZ) për vrasjen e anëtarit të kësaj sindikate, të ndjerit Ylber Topërllaku, i cili dje rreth orës 10 në qendër të qytetit, në një tentim plaçkitjeje është plagosur për vdekje me armë zjarri, në dyqanin e tij dhe më vonë vdiq në Qendrën emergjente në Prishtinë.

Kjo sindikatë kërkon nga organet kompetente që vrasësit e Ylber Topërllaku të nxirren para drejtësisë dhe ta marrin dënimin e merituar" ANjëherit kërkojmë nga organet tona përgjegjëse siguri më të madhe në përgjithësi për ndërmarrësit privat dhe zejtarët e komunës, pasi që këso rastesh po ndodhin shpesh", thuhet në reagimin me shkrim të SPEZ të Podujevës.

Kufoma e të ndjerit gjendet në morgun e Rahovecit për obduksion kurse familja pret është në pritje për ta varrosur më të dashurin e tyre.

 

 

Gjilan: Punëtoria në shkollën teknike - projekt i përbashkët me vlerë 250 mijë euro

 

Gjilan, 19 dhjetor 2003 - Një donacion i përbashkët i USAID-it amerikan, Swiss Contaktit zviceran dhe komunës së Gjilanit, në vlerë prej 250 mijë euro, ka mundësuar të enjten lëshimin në punë të punëtorisë praktike për nxënës në shkollën e mesme teknike "Mehmet Isai", në Gjilan.

Punëtoria për automekanikë, në shkollën e teknike është investim i Qeverisë amerikane, përmes USAID-it, Qeverisë zvicerane, përmes Swiss Contaktit dhe i komunës së Gjilanit, e cila ka marrë pjesë me 15 përqind të mjeteve në këtë projekt.

Dejvid Leong, zëvendësdrejtor i misionit të USAID-it në Kosovë, tha se duke punuar kështu së bashku, mund t'i ndihmojmë të rinjtë e Kosovës që të përgatiten dhe aftësohen për nevojat e vendit të tyre dhe të ardhmen.

Ai rikujtoi se USAID-i amerikan ka investuar deri tani kryesisht në shkolla. Për popullatën e re të Kosovës, arsimi është parakusht për progres dhe të ardhme më të mirë. Që nga viti 1999, USAID-i ka investuar në këtë komunë 2.5 milionë dollarë, në mbi njëzet projkete në arsim, infrastrukturë, shëndetësi, bujqësi e të tjera, tha Leong.

Ndërkaq, Peter Porten, përfaqësues nga Swiss Contakt tha se kjo punëtori është fryt i bashkpunimit mes shkollës, komunës, USAID-it e Qeverisë Zviverane. Vetëm me bashkëpunim të tillë mund të ndërtojmë një të ardhme më të mirë për rininë tuaj, tha Porten. Pajisjet e kësaj punëtorie, në vlerë prej 150 mijë ?uro janë dhuratë e Swiss Contaktit.

Lutfi Haziri, kryetar i komunës, pasi ka përgëzuar nxënësit e shkollës teknike për dhuratën e çmuar, ka premtuar së shpejti aty do të rregullohet edhe nxemja. Shkollat profesionale si kjo, janë ato që tash e tutje i duhen Gjilanit dhe Kosovës, tha Haziri.

 

 

Në komunën e Podujevës janë të evidentuar 533 të vrarë dhe 57 persona të pagjetur pas luftës

 

Podujevë, 19 dhjetor 2003 - Kordinatori i Komitetit të fshatrave i komunës së Podujevës Latif Mehmeti me ndihmën e kryetarëve të këtyre komiteteve kanë bërë evidentimin e pasojave të luftës së fundit për të pasur një pasqyrë më të saktë rreth viktimave, të të plagosurve dhe dëmeve materiale.

Të dhënat e sjella nga përgjegjësit e fshatrave në 67 fshatra dhe 3 lagjet e qytetit janë sistemuar e verifikuar. Në 9 fshatra nuk ka viktima, kurse prijnë fshatrat Bellopojë me 24, Gllamniku 20, Bradashi e Dumnica e Poshtme me 18, Shajkofci me 15 dhe Bajçina e Dobratini me 14 të vrarë.

Sipas këtyre shënimeve, përkatësisht nga numri i përgjithshëm i të vrarëve gjatë luftës së fundit, në komunën e Podujevës prej 533 të evidentuar aktualisht, 97 i takojnë gjinisë femërore, kurse në bazë të moshës viktimat janë kategorizuar në: 32 të vrarë moshës deri në 14 vjeçare, prej 14-27 vjet 114 persona, prej 27-65 vjeç janë vrarë 309 dhe 73 viktima janë të moshës mbi 65 vjeç.

Këto shënime tregojnë se 28 familje i kanë nga 2 të vrarë në familjet e tyre, 8 familje nga 3, tri familje nga 5 anëtarë, 2 familje nga 6, një familje shtatë anëtarë dhe 1 familje ka 8 anëtarë të vrarë.

Sipas shënimeve të grumbulluara nga Kordinatori i Komiteteve të fshatarave Latif Mehmeti rezultojnë se 5 persona janë varrosur të paidentifikuar. Kurse nga numri i personave të pagjetur, 9 prej tyre janë femra, ndërkaq që 5 familje i kanë nga 2 anëtarë të pagjetur dhe familje tjera kanë nga një anëtar. Aktualisht janë të evidentuar 57 persona në listat e të zhdukurve nga komuna e Podujevës.

 

 

Komandanti amerikan i KFOR-it Xheri Bek thotë se forcat amerikane në Kosovë ende janë të nevojshme

 

Bonstell - Ferizaj, 19 dhjetor 2003 - Përkundër përmirësimit të situatës, trupat amerikane ende janë të nevojshme në Kosovë,tha komandanti i paqeruajtësve amerikanë në kuadër të KFOR-it, gjenerali Xheri Bek. Ai ka theksuar se ka edhe shumë gjëra për t'u bërë derisa të merret ndonjë vendim për çështje ushtarake në një intervistë për Asoshieted Press.

Gjenerali Bek citohet të ketë thënë se trupat amerikane nuk përballen me ndonjë kërcënim të madh nga grupet ekstremiste në Kosovë, ku shumica muslimane e popullatës shqiptare ka treguar dashamirësi të madhe ndaj amerikanëve.

"Kërcënimi më i madh që kam hasur është vozitja e ushtarëve të mi në kushtet e dimrit", ka thënë gjenerali Bek, duke shtuar se në Kosovë duhet përmirësuar vendosjen e sundimit të ligjit dhe bashkëpunimin e popullatës me policinë lokale në luftën kundër krimit të organizuar.

 

 

Në Prishtinë u mbajt takimi i grupit punues të UNMIK-ut dhe Qeverisë së Kosovës për standardet

 

Prishtinë, 19 dhjetor 2003 - Përfaqësuesit e UNMIK-ut dhe të Qeverisë së Kosovës e kanë shfaqur besimin se në janar mund të bëhen raportet e para vlerësuese në fushën e përmbushjes së standardeve të cilat i kërkon bashkësia ndërkombëtare.

 

Këto komente u bënë publike pas takimit të grupeve të përbashkëta të UNMIK-ut dhe të Qeverisë së Kosovës. Përfaqësuesi i UNMIK-ut, Khan Ros tha se plani për standardet do të kryhet shpejt.

Në takimin e grupeve të përbashkëta të UNMIK-ut dhe Qeverisë së Kosovës në lidhje me standardet nuk kanë marrë pjesë përfaqësuesit serbë nën arsyetimin se nuk janë konsultuar lidhur me versionin final të Planit për Standardet. Duke shfaqur brengosjen për këtë fakt z. Ros tha se pjesëmarrja e serbëve është e nevojshme.

 

 

Delegacioni i përfaqësuesve të institucioneve të Kosovës dhe atyre poltike u kthye nga Vjena e Austrisë

 

Prishtinë, 19 dhjetor 2003 - Delegacioni i përbërë nga përfaqësuesit e institucioneve kosovarea dhe atyre poltike dje është krthyer nga Viena e Austrisë ku për tri ditë me radhë morën pjesë në tryezën ndërkombëtare "Projekti për drejtësinë në kohë të tranzicionit". Ishte vizitë me dobi të dyfishtë, u shpreh me të kthyer kryeparlamentari Nexhat Daci.

 

 

Përfaqësuesit e pakicës serbe kërkojnë formimin e dy etniteteve në Kosovë dhe kthimin e forcave serbe

 

Mitrovicë, 19 dhjetor 2003 - Në pjesën veriore të Mitrovicës e ashtuquajtur "bashkësia e komunave serbe të Kosovës", një organizatë kjo që UNMIK-u nuk e njeh është shprehur kundër standardeve për Kosovën.

 

Kjo organizatë nëpërmjet një deklarate të veçantë për opinion ka kërkuar formimin e dy etniteteve në Kosovë, si dhe rikthimin e ushtrisë dhe policisë serbe, si dhe të institucioneve të tjera serbe, pasi sipas tyre të gjitha institucionet e formuara pas vitit 1999 në Kosovë janë struktura paralele. Sipas tyre, deklarata është përgjigje ndaj planit Standardet për Kosovën.

 

 

Në 60-vjetorin e Konferencës së Bujanit u tha se ajo ishte gurthemeli i shtetit të Kosovës

 

Prishtinë, 19 dhjetor 2003 - Veteranët e LNÇ-së nga Kosova dhe Shqipëria shënuan dje në Prishtinë 60-vjetorin e Konfrencës së Bujanit. Në manifestimin e mbajtur në Teatrin Kombëtar pjesëmarrësit thanë se Konferenca e Bujanit ishte gurthemeli i shtetit të Kosovës.

Rëndësia e konferencës së Bujanit qëndron në vendimin për çlirimin e Kosovës dhe bashkimin e saj me Shqipërinë, pavarësisht se vendimi i saj nuk u zbatua. Xhevdet Pula, kryetar i Veteranëve të LNÇ-së tha se vendimi i Konferencës së Bujanit ishte vullnet i popullit shqiptar. Ai Konferencën e Bujanit e ka çmuar si një nga ngjarjet më të ndritshme në historinë e Kosovës.

 

 

Në Mal të Zi ka 47.682 shqiptarë, nga gjithsej 672.659 banorë sa ka ky vend

 

Podgoricë, 19 dhjetor 2003 - Sipas rezultateve jozyrtare të regjistrimit të popullsisë, në Mal të Zi ka 47.682 shqiptarë ose 7.09 për qind.

 

Ndërkaq, Mali Zi ka gjithsej 672.659 banorë.

 

Malazezë janë deklaruar 273.366 ose 40.64 për qind,

serbë 201.892 ose 30.01 për qind.

Si boshnjakë janë deklaruar 63.272, ose 9.41 për qind,

muslimanë 28.714 ose 4.27 për qind etj.

Sipas mediave malazeze këto janë rezultate jozyrtare të regjistrimit të popullsisë të zbatuar që nga data 1 deri më 15 nëntor.

Për përkatësinë kombëtare nuk janë deklaruar 27.715 qytetarë ose 4.12 për qind, ndërkohë që nuk ka shënime për 10.532 qytetarë.

Është interesant se në krahasim me regjistrimin e vitit 1991, numri i qytetarëve që janë shprehur si malazezë ka rënë për 107.101, ndërkaq numri i qytetarëve të cilët janë shprehur si serbë është më i madh për 144.439.

Ndryshe rezultatet përfundimtare do të njoftohen të hënën, më 22 dhjetor.

 

 

Presidenti Moisiu ka ftuar kryeministrin Nano që të plotësojë sa më parë qeverinë

 

Tiranë, 19 dhjetor 2003 - Presidenti i Shqipërisë Alfred Moisiu në një mesazh të dhënë dje para deputetëve të Parlamentit në lidhje me situatën në vend, deklaroi se nuk mund të vazhdohet më qeverisja me zëvendësministra.

 

"Dëshiroj të ndaj me ju dy shqetësime: kriza në qeveri dhe problemet e zgjedhjeve të 12 dhjetorit", u shpreh presidenti Moisiu. Ai ka ftuar kryeministrin Fatos Nano që të plotësojë sa më parë Qeverinë, ose të ofrojë alternativa të reja. Në listën e emrave të rinj në kabinetin qeveritar nuk duhet të përfshihen figurat e përfolura dhe të akuzuara nga vetë drejtuesit e lartë të ekzekutivit, tha presidenti Moisiu.

 

Ai po ashtu u tha deputetëve se në rast se nuk do të gjendet ndonjë zgidhje në Parlament për problemin e Qeverisë, atëherë çdo alternativë ligjore do të jetë e hapur përfshirë edhe zgjedhjet e parakohshme.

 

 

Presidenti maqedonas u shpreh kundër legalizimit të Universitetit të Tetovës dhe decentralizimit të vendit

 

Shkup, 19 dhjetor 2003 - Në fjalimin vjetor në Parlamentin maqedonas, presidenti Boris Trajkovski është shprehur kundër propozimligjit të Qeverisë maqedonase për zyrtarizimin e Universitetit të Tetovës, si dhe kundër ligjeve për decentralizimin e vendit. Lidhur me çështjet e sigurisë ai ka thënë se në Maqedoni ende në disa zona veprojnë grupe të armatosura, të cilat qeveria duhet t'i neutralizojë.

 

Prononcimet e Trajkovskit kanë shkaktuar reagime të ashpra nga partitë politike, të cilat nuk pajtohen me kundërshtimin që i bëri Trajkovski zyrtarizimit të Universitetit të Tetovës. Nënkryetarja e BDI-së, Teuta Arifi tha se nuk është mirë që presidenti Trajkovski qysh tash ta fillojë fushatën e tij për t'u bërë kandidat presidencial i VMRO-DPMN-së.

Edhe Lidhja Socialdemokrate nuk pajtohet me fjalimin e presidentit Trajkovski. "Fushata elektorale për Trajkovskin ka filluar shumë më herët. Ai u përqëndrua në çështjet për të cilat nuk është kompetent", tha përfaqësuesi i LSDM-së Jani Makraduli, duke shtuar se Trajkovski në pjesën më të madhe të fjalimit ishte kontradiktor me vlerësimet e mëparshme.

 

 

Në Tetovë u protestua për lirimin e ish-pjesëtarëve të Ushtrisë Çlirimtare Kombëtare

 

Tetovë, 19 dhjetor 2003 - Disa qindra shqiptarë protestuan dje në Tetovë për lirimin e ish-pjesëtarëve të Ushtrisë Çlirimtare Kombëtare. Ata kanë shprehur indinjatë dhe shqetësimin e tyre për atë se edhe pas përfundimit të konfliktit shqiptaro-maqedonas të vitit 2001 nuk kanë të ndalur përndjekjet, dënimet dhe burgosjet e shqiptarëve.

Organizatorët e protestës kërkuan që pushteti maqedonas të respektojë Ligjin e Amnistisë, ndërkaq përfaqësuesit shqiptarë të politikës zyrtare, faktori relevant në vend dhe ai ndërkombëtar, të angazhohen për lirimin e e të burgosurve politikë shqiptarë.

 

 

Xhejms Lajon thotë se ideja për ndarjen e Kosovës në entitete "është shumë e rrezikshme"

 

Nju Jork, 19 dhjetor 2003 - Shefi i Grupit Ndërkombëtar të Krizave për Serbinë e Malin e Zi, Xhejms Lajon ka thënë se ideja për ndarjen e Kosovës në entitete "është shumë e rrezikshme" dhe se mund të ketë pasoja të rrezikshme për serbët që jetojnë atje.

 

"Shumica e serbëve nuk jetojnë në veri të Kosovës, por jetojnë nëpër enklava dhe unë kam frikë nga reagimi i shqiptarëve", ka thënë Lajon. Sipas mendimit të tij, do të ishte më mirë që pala shqiptare dhe ajo serbe të "ulin topin" dhe pa provokacionr nacionale, "esull të nisen përpara".

Xhems Lajon ka theksuar se në Kosovë ka edhe një problem, e ky është se ka dy interesa serbe - ai shtetëror nga Beogradi dhe i serbëve që jetojnë në Kosovë, të cilat nganjeherë nuk janë të njëjtë.

 

 

Dy gjykata amerikane marrin vendime kundër politikës së Presidentit Bush

 

Uashington, 19 dhjetor 2003 - Në Shtetet e Bashkuara, dy gjykata federale apeli morën vendime që shikohen si grusht i rëndë kundër politikës së administratës së Presidentit Bush në lidhje me personat që mbahen nën arrest si luftëtarë armiq.

Një gjykatë federale në San Francisko vendosi të enjten se mbi 600 të burgosur nuk mund të mbahen për një kohë të pacaktuar në bazën detare amerikane në Gjirin Guatanamo të Kubë pa u dhënë atyre mundësinë të bien në kontakt me avokatë apo me gjykata amerikane. Gjykata tha se Shtetet e Bashkuara janë të detyruara, në bazë të sandardeve ndërkombëtare, që t=u sigurojnë të burgosurve kontakte të tilla.

Zyrtarët amerikanë nuk kanë bërë ndonjë koment në lidhje me vendimin e gjykatës, i pari nga një gjykatë federale apeli në lidhje me të burgosurit në Guatanamo.

Zëdhënësi i Shtëpisë së Bardhë, Skot Mekllellen, tha se Presidenti Bush i ka kërkuar Departamentit të Drejtësisë të kërkojë pezullimin e urdhërit të gjykatës ose apelimin e tij pranë gjykatës së lartë. Zoti McClellan e cilësoi vendimin e djeshëm si shqetësues dhe me të meta.

 

 

Policia turke thotë se ka arrestuar një të dyshuar për sulmet në Stamboll

 

Stamboll, 19 dhjetor 2003 - Policia turke thotë se ka kapur një burrë i cili kinse personalisht ka marrë urdhërin e Osama bin Ladenit për fundamentalistët islamikë turq që të kryejnë sulme mbi objektivat amerikane në Turqi, por për shkak të mesave të rrepta të sigurimit, sulmet i ka drejtuar mbi objektivat civile në Stamboll.

Shtypi turk shkruan sot se Adnan Ersoz para tri ditësh është ndaluar në Stamboll. Pritet që kërkesa për padi kundër tij të bëhet sot.

Gazeta "Hyriet" shkruan se Ersoz është trajnuar në kampin e Al Kaidës në Afganistan më 2001 e 2002 dhe se ka qenë në kontakt të përhershëm me turqit e tjerë për të cilët besohet se qëndrojnë pas sulmeve në Stamboll.

 

 

Nga shpërthimi i një kamioni plagosen dy ushtarë amerikanë

 

Bagdad, 19 dhjetor 2003 - Një bombë ka shpërthyer afër një kamioni ushtarak amerikan jashtë Bagdadit të premtën dhe ka plagosur dy ushtarë amerikanë, ndërkaq një grua irakiane ka vdekur nga një shpërthim tjetër në një sulm në zyrën e Partisë shiite.

Kapiteni Tami Gallouei nga Divizioni 82 ajror ka thënë se eksplozivi ka shpërthyer skaj rrugës ndërsa kamioni po kalonte aty pari. Dëshmitarët irakianë thanë më herët se dy ushtarë amerikanë ishin vrarë në atë shpërthim, njofton AP.

 

 

Bremer thotë se i ka shpëtuar një atentati në Irak

 

Bagdad, 19 dhjetor 2003 - Administratori i përkohshëm në Irak Pol Bremer deklaroi të premtën se ka shpëtuar nga vdekja në fillim të dhjetorit në Bagdad, njofton Rojter.

"Po, është e vërtetë, por për fat, ende jam gjallë dhe ndodhem para jush", u përgjegj Bremer para gazetarëve në pyetjen se a ka mbijetuar një atentat më 6 dhjetor.

Rrjeti televiziv amerikan ABC ka njoftuar se Bremer ka shpëtuar i palënduar kur kolona e tij u ndesh me një mjet shpërthyes dhe me zjarrin nga armët e vogla në rrugën për në aerportin e Bagdadit.

Incidenti ka ndodhur po atë ditë kur sekretari amerikan i Mbrojtjes Donald Ramsfeld mbërriti në Bagdad. Bremer dhe administrata e tij në Irak nuk iu paraqitën gazetarëve.

 

 

Vriten dy ushtarë amerikanë afër Bagdadit

 

Bagdad, 19 dhjetor 2003 - Dy ushtarë amerikanë janë vrarë nga shpërthimi i një kamioni ushtarak në një rrugë jashtë Bagdadit të premtën, thanë dëshmitarët, njofton AP.

Më herët po të premtën në një shpërthim tjetër në një zyrë të Partisë shiite një grua irakiane është vrarë dhe janë plagosur pesë të tjerë.

 

 

Të burgosurit në Guantanamo akses tek avokatët

 

Guantanamo, 19 dhjetor 2003 - Për herë të parë, një gjykatë në SHBA ka vendosur që qindra të burgosur të huaj që mbahen në bazën ushtarake të Guantanamos në Kubë të kenë akses te avokatët dhe sistemi gjyqësor amerikan.

Që nga fillimi më shumë se dy vjet më parë, administrata e Bushit është përpjekur të krijojë një vrimë të zezë ligjore për qindra të burgosurit nga 42 vende që u kapën gjatë të ashtuquajturës luftë amerikane kundër terrorizimit.

Ata janë në territor amerikan, një bazë ushtarake 90 vjeçare në Guantanamo, në Kubë. Megjithatë, ligjërisht, ata nuk janë në SHBA.

Xhorxh Bush shpiku një term për t'i përshkruar ata - luftëtarë armiq- një koncept i padefinuar sipas ligjit ndërkombëtar.

Sipas amerikanëve kjo do të thotë se ata nuk janë ligjërisht të burgosur lufte, kështu që nuk mund të mbrohen nga Konventa e Gjenevës.

 

 

Trupa shtesë amerikane gjatë rotacionit në Irak

 

Uashington, 19 dhjetor 2003 - Pentagoni thotë se po dërgon edhe dy mijë trupa të tjera në Irak dhe u ka kërkuar tre mijë e gjysmë të tjerëve të qëndrojnë për një kohë më të gjatë sesa ishte planifikuar në fillim për të ruajtur nivelin e forcave për këto pak muajt e ardhshëm.

Pentagoni pritet të fillojë një zëvendësim masiv të trupave të tij në irak. Të 123 mijë trupat amerikane që ndodhen tani atje do të zëvendësohen gjatë muajve të ardhshëm me një numër gati të njëjtë njësish të reja.

Por, Pentagoni sapo ka njoftuar se do të dërgojë edhe dy mijë trupa shtesë nga Divizioni 82 sulmues parashutist për të ruajtur nivelin e trupave gjatë këtij tranzicioni.

Ato do të nisen në janar dhe do të qëndrojnë për katër muaj. Përveç kësaj, rreth 3500 trupave të divizionit 82 parashutist, që ndodhen tani në Irak dhe që duhet të ktheheshin në atdhe në shkurt, u është kërkuar të qëndrojnë edhe për disa muaj shtesë.

 

 

Kryeministri i Izraelit i ka kërcënuar palestinezët me ndarjen e njëanshme të vendit

 

Tel Aviv, 19 dhjetor 2003 - Kryeministri i Izraelit i ka kërcënuar palestinezët me ndarjen e njëanshme të vendit dhe me humbje territori, nëse do të dështonte plani ndërkombëtar i paqes. Në një fjalim parimor Ariel Sharoni tha se Izraeli do të fillojë ta marrë këtë masë sigurie, nëse palestinezët nuk do ta vënë në jetë brenda muajsh pjesën tyre të planit.

 

Për palestinezët kjo do të ishte e barabartë me humbjen e territoreve. Ai bëri të ditur se ndërtimi i gardhit rrethues të kritikuar nga SHBA dhe shtetet evropiane do të vazhdojë në mënyrë të përshpejtuar. Kryeministri palestinez, Ahmed Korei u shpreh i zhgënjyer për fjalimin e Sharonit.

 

 

Ushtria amerikane gjen një listë me emra spiunësh të infiltruar radhët e forcave të sigurimit të amerikanëve

 

Bagdad, 19 dhjetor 2003 - Në vendin ku qe fshehur presidenti irakian, Sadam Husein, ushtria amerikane ka gjetur një listë me emra spiunësh, të cilët ndër të tjera kanë infiltruar rradhët e forcave të sigurimit të amerikanëve.

 

Dokumentat qenë gjetur në cantën e ish-pushtetmbajtësit,bëri të ditur kanali televiziv amerikan, ABC. Një oficer amerikan e quajti listën si "minierë ari". Spiunët e patën informuar Sadamin për aktivitetet e forcave amerikane. Ata qenë futur jo vetëm në radhët e forcave të sigurimit të SHBA, por edhe në forcat e sigurimit të Irakut dhe në administratën civile.

 

 

Kofi Anan propozoi një takim për Irakun

 

Kombet e Bashkuara, 19 dhjetor 2003 - Sekretari i përgjithshëm i OKB-së, Kofi Anan propozoi një takim të përfaqësuesve të Kombeve të Bashkuara, të Këshillit Provizor qeveritar irakian dhe të fuqive pushtuese në mes të janarit.Në takim do të diskutohet për detyrat e ardhshme të OKB-së në Irak.

 

Anani ka theksuar se do të verë në balancë kërkesat ndaj OKB-së me rreziqet. Pas atentateve ndaj zyrave të OKB-së në Bagdad ai i tërhoqi të gjithë bashkëpunëtorët e OKB-së. Anan paralajmëroi më tej se edhe në Afghanistan mund të dështojnë përpjekjet për paqe, nëse nuk krijohen kushte më tw mira sigurie:

 

"Ne duhet të trajtojmë cështjen e sigurisë, dhe nëse nuk e trajtojmë atë, ne mund ta humbasim Afganistanin. Mendoj se ishte legjitime që i ngarkuari i OKB-së, Brahimi i ra këmbanës së alarmit, dhe unë u kërkoj shteteve anëtare të na ndihmojnë për ta pëmirësuar sigurinë në Afganistan, që të mund të vazhdojmë punën."

 

 

Irani e nënshkroi protokollin shtesë për marrëveshjen e bllokimit të armëve bërthamore

 

Teheran, 19 dhjetor 2003 - Pas lëkundjeve disamujore, Irani e nënshkroi protokollin shtesë për marrëveshjen e bllokimit të armëve bërthamore. Me këtë Teherani u lejon në të ardhmen inspektorëve të Organizatës Ndërkombëtare të Energjisë Atomike kontrolle të palajmëruara dhe të hollësishme të pajisjeve të tij bërthamore. SHBA e përshëndetën nënshkrimin, por thanë se ky është vetëm një hap i parë. BE tha se me këtë Irani i ka plotësuar ato që priste BE.

 

Drejtori i Organizatës Ndërkombëtare të Energjisë Bërthamore, Mohamed el Baradei tha: "Shpresoj se me protokollin në fuqi ne do të jemi në gjendje të lëvizim përpara. Shpresoj të jemi në gjendje për këtë sa më shpejt që të jetë e mundur, për ta garantuar komunitetin ndërkombëtar se programi atomik i Iranit është vetëm për qëllime paqeje".

 

 

Presidenti rus, Putin është i gatshëm të diskutojë për një pakësim të borxheve Irakut

 

Moskë, 19 dhjetor 2003 - Presidenti rus, Vladimir Putin është i gatshëm të diskutojë për një pakësim të borxheve Irakut. Pas një takimi me të dërguarin e posacëm amerikan, Xhejms Bejker, Putini tha se kjo do të ndodhë në kuadër të bisedimeve me shtete të tjera kreditore në Klubin e Parisit.

 

Me tetë miliardë dollarë, Rusia është kreditorja më e madhe e Irakut. Më parë, në një bisedë në televizion, presidenti i Rusisë foli për një rritje të dukshme ekonomike të vendit të tij.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |