Podujevë, 19 dhjetor 2003 (TN) – Kordinatori i Komitetit të fshatrave i komunës së Podujevës z. Latif Mehmeti me ndihmën e kryetarëve të këtyre komiteteve kanë bërë evidentimin e pasojave të luftës së fundit me qëllim që të kihet një pasqyrë më e saktë rreth viktimave, të të plagosurve dhe dëmeve materiale.

“Të dhënat e sjella nga përgjegjësit e fshatrave në 67 fshatra dhe 3 lagjet e qytetit janë sistemuar e verifikuar”, deklaroi z. Mehmeti duke  njoftuar se në 9 fshatra nuk ka viktima, kurse prijnë fshatrat Bellopojë me 24, Gllamniku 20, Bradashi e Dumnica e Poshtme me 18, Shajkofci me 15 dhe Bajçina e Dobratini me 14 të vrarë.

Sipas këtyre shënimeve, përkatësisht nga numri i përgjithshëm i të vrarëve gjatë luftës së fundit, në komunën e Podujevës prej 533 të evidentuar aktualisht, 97 i takojnë gjinisë femërore, kurse në bazë të moshës viktimat janë kategorizuar në: 32 të vrarë moshës deri në 14 vjeçare, prej 14-27 vjet 114 persona, prej 27-65 vjeç janë vrarë 309 dhe 73 viktima janë të moshës mbi 65 vjeç.