Përmbajtja:

• Kuvendi i Kosovës sot miratoi Projektligjin për bashkëpunimin me Tribunalin e Hagës

• H. Holkeri kërkoi të shkyçen nga rrjeti ata të cilët nuk i kanë kryer obligimet ndaj KEK-ut

• Havier Solana tha se viti 2004 dhe 2005 do të jenë me rëndësi vendimtare për Kosovën

• Në Këshillin e Sigurimit u theksua se Kosovës i është dhënë rasti që të dalë nga hija e errësirës dhe të lëvizë përpara

• Prezentohet strategjia e zhvillimit ekonomik të Kosovës 2004- 2008

• KFOR-i amerikan do t`i kompensojë pronarët e tokave në Kosovë

• Në Prishtinë u përuruan katër rrugë të asfaltuara

• Podujevë: Nga plagët me armë zjarri vdes 63 vjeçari Ylber Topërllaku

• Në Gjilan ndalohet shitja dhe përdorimi i fishekzjarreve

• Prishtinë: Nënshkruhet një marrëveshje bashkëpunimi mes Kosovës dhe Turqisë në fushën e shëndetësisë

• Ngritet aktakuza kundër Shefket Musliut dhe tre personave të tjerë

• Mbrëmë ndodhi një shpërthim në Ferizaj, por pa viktima

• Serbi Nikoliq lirohet nga akuza për vrasjen e një shqiptari në fshatin Lubizhdë të Vitisë

• Programi për Zhvillim i OKB-së ka ndarë rreth 10 milionë euro për realizimin e projekteve gjatë vitit 2004

• Në Pejë me nderime u bë varrimi i nëntë martirëve të kombit

• Zgjedhet kryesia e re e PS

• Policia e Kukësit ka arrestuar tre vetë të cilët kanë rrëmbyer tregtarin Irfan Idrizin nga Gostivari

• Në Ohër u mbajt një tryezë për sigurinë dhe intensifikimin e zhvillimit ekonomik ndërmjet Shqipërisë dhe Maqedonisë

• Universiteti i Tetovës shënoi dhjetëvjetorin e themelimit të tij

• Qeveria e Serbisë ka formuar Këshillin e përkohshëm komunal në Preshevë

• Tetë policë janë lënduar në përleshjet në pjesën veriore të Belfastit

• Partia shiite njofton për vrasjen e zyrtarit të saj

• Putin thotë se Moska dhe Uashingtoni mbeten partnerë në luftën kundër terrorizmit

• Kryetari i Këshillit Provizor Irakian viziton Gjermaninë

• Konsultimet për kushtetutën në Afganistan ndodhen në një krizë të thellë

• Në aksidentin rrugor vdesin 17 pasagjerë

• Vriten katër palestinezë

• Një ushtar amerikan është vrarë dhe një tjetër është lënduar

• Irani të dëmshpërblehet për luftën

• Projekt-rezolutë kundër përhapjes së armëve kimike-biologjike

• Italia e gatshme për t'i falur një pjesë të borxheve Irakut

• Zhak Shirak kërkon ndalimin e përdorimit të simboleve fetare në shkolla

• Këshilli Qeverisës të Irakut: Sadam Huseini do të gjykohet nga një gjykatë irakiane

Kuvendi i Kosovës sot miratoi Projektligjin për bashkëpunimin me Tribunalin e Hagës

 

Prishtinë, 18 dhjetor 2003- Deputetët e Kuvendit të Kosovës, me gjithë vërejtjet që patën, në seancën e sotme miratuan Projektligjin për bashkëpunimin me Tribunalin e Hagës. Përfaqësuesit e grupeve parlamentare mbështetën në parim miratimin e këtij projektligji, duke theksuar disa mangësi në emërtimin e dokumentit në fjalë.

Fillmisht një ekspoze lidhur me këtë projektligj e paraqiti kryeministri Bajram Rexhepi, i cili tha se me këtë projektligj Kosova vazhdon të përfshirjen e saj në zhvillimet e rendit juridik ndërkombëtar dhe integrimin në strukturat euroatlantike.

 

Rexhepi theksoi nevojën e një bashkëpunimi me Tribunalin, duke thënë se Projektligji do të jetë në funksion të zbatimit të drejtësisë. "Projektligji shpreh gatishmërinë e institucioneve të Kosovës për të bashkëpunuar me Tribunalin e Hagës dhe kryerjen e obligimeve që burojnë nga rezoluta e Këshillti të Sigurimit nr. 827/1993", tha ai.

 

Sipas Rexhepit "ky projektligj i mundëson Kosovës që drejtpërdrejt të vazhdojë kontributin në vendosjen e paqes dhe stabilitetit në rajon". Poashtu ai nënvizoi se "përmes këtij projektligji synohet vendosja e bashkëpunimit me Tribunalin e Hagës, pa anashkalim të institucioneve vendore dhe me një rol parësor të këtyre institucioneve", tha ai.

Kuvendi sot nuk diskutoi për buxhetin e konsoliduar të Kosovës për shkak të përgatitjeve të pamjaftueshme të komisioneve përkatëse parlamentare, por i njëjti do të shqyrtohet në seancën e jashtëzakonshme të Kuvendit të hënën e ardhshme.

 

  

H. Holkeri kërkoi të shkyçen nga rrjeti ata të cilët nuk i kanë kryer obligimet ndaj KEK-ut

 

Kastriot, 18 dhjetor 2003- Kryeadministratori i Kosovës Hari Holkeri vizitoi dje pasdite Korporatën Energjetike të Kosovës në Kastriot dhe u njoh me zhvillimet në këtë kolektiv të madh kosovar. Ai tha me këtë rast se KEK-u nuk mund të mbijetojë nëse qytetarët nuk paguajnë për energjinë e shpenzuar.

 

Holkeri kërkoi që të shkyçen nga rrjeti të gjithë ata të cilët nuk i kanë kryer obligimet ndaj kësaj koorporate. Ndërkaq, udhëheqësi i KEK-ut Ali Hamiti tha se vetëm UNMIK-u i ka borxh KEK-u mbi 45 mijë euro.

 

 

Havier Solana tha se viti 2004 dhe 2005 do të jenë me rëndësi vendimtare për Kosovën

 

Uashington, 18 dhjetor 2003- Përfaqësuesi i lartë për Politikë të Jashtme dhe Siguri i Bashkimit Evropian, Havier Solana tha se viti 2004 dhe 2005 do të jenë me rëndësi vendimtare për Kosovën.

 

Ai i deklaroi "Zërit të Amerikës" se pas anlizës për të parë se si janë zbatuar standardet komuniteti ndërkombëtar do të jetë në gjendje të fillojë të merret me çështjen e statusit përfundimtar të Kosovës, gjë që do të ndodhë aty nga viti 2005.

Z. Solana i bëri këto komente në Uashington gjatë një takimi të Institutit Evropian e cili merret me marrëdhëniet ndëratlantike.

Vendet e Ballkanit tha z. Solana e kanë rrugën të hapur për integrime evropiane.

 

 

Në Këshillin e Sigurimit u theksua se Kosovës i është dhënë rasti që të dalë nga hija e errësirës dhe të lëvizë përpara

 

Nju-Jork, 18 dhjetor 2003- Këshilli i Sigurimit të OKB-së ka diskutuar mbrëmë për Kosovën. Nënsekretari i Përgjithshëm për Paqeruajtje, Zhan Mari Gyeno tha se domosdoshmëri për çfarëdo diskutimi për statusin e ardhshëm të Kosovës mbetet arritja e tetë standardeve.

Në këtë takim u tha se kthimi dhe integrimi i minoriteteve është standardi kryesor në politikën e OKB-së për Kosovën - Standardet para statusit.

Zhan Mari Gyeno në debatin e djeshëm në KS të OKB-së për Kosovën ka thënë se është e qartë se nuk ka afat se procesi i statusit të ardhshëm nuk do të fillojë automatikisht në datën e paraparë për rishikim.

 

Ai ka thënë se standardet e tjera përfshijnë funksionimin e institucioneve demokratike, pushtetin e ligjit, lëvizjen e lirë dhe dialogun me Beogradin. Anëtarët e KS shprehën pakënaqësi se një pjesë e madhe e këtyre standardeve po zvarriten. Ata veçanërisht u bënë thirrje Prishtinës dhe Beogradit të vazhdojnë dialogun e drejtpërdrejtë.

Ambasadori gjerman në OKB Gynter Plojger tha se dështimi për t'u angazhuar në dialog dhe në reforma të tjera do të ketë ndikim në të ardhmen e Kosovës në integrimet evropiane. Sipas tij implementimi i standardeve do të jetë ngushtë i lidhur me procesin e asociimit me Bashkimin Evropian dhe në të kundertën obstruksioni i përpjekjeve për t'i arritur standardet do të këtë padyshim konsekuenca serioza për aspiratat për t'u afruar kah Evropa, tha ambasadori Plojger.

Përfaqësuesit e Britanisë dhe të Shteteve të Bashkuara po ashtu kërkuan vazhdimin e bisedimeve që së pari u mbajtën në mesin e tetorit të këtij viti. Ambasadori amerikan Xhon Negroponte shprehu gatishmërinë e bashkëissë dnërkombëtare që Kosovën ta ndohmojë në përmbushjen e standardeve.

Ambasadori britanik Emir Xhons Peri po ashtu kërkoi nga udhëheqësit shqiptarë të Kosovës që sinqerisht t'i përqafojnë përpjekjet për reforma. Ai ka theksuar se Kosovës i është dhënë rasti që të dalë nga hija e errësirës dhe të lëvizë përpara. Pra i tërë procesi - Standardet para statusit nuk është i natyrës retorike. Është absolutisht bazik për një Kosovë që të gjithë ne dëshirojmë ta shohim të krijuar, tha ambasadori britanik Xhons.

Ndërkaq, Zhan Mari Gyeno më tutje tha se më pak se 10 mijë serbë janë kthyer në Kosovë nga popullata e para vitit 1999, që sipas tij ishte afërsisht 250 mijë. Ai tha se serbët e Kosovës kanë pak ndikim në vendimmarrje në secilin nivel të Qeverisë në Kosovë dhe shtoi se serbë janë dobët të integruar.
Ambasadori i Serbisë dhe Malit të Zi në OKB, Shahoviq i kanë thënë KS se liderët kosovarë do të fajësohen për dështimin e vazhdimit të bisedimeve.

 

 

Prezentohet strategjia e zhvillimit ekonomik të Kosovës 2004- 2008

 

Prishtinë, 18 dhjetor 2003- Në një takim të mbajtur në Prishtinë, ku morën pjesë ekspertë vendorë dhe ndërkombëtarë, Ministria e Tregtisë dhe Industrisë, prezentoi strategjinë e zhvillimit ekonomik të Kosovës 2004- 2008.

 

Mori pjesë dhe diskutoi edhe Kryeministri Bajram Rexhepi, i cili theksoi se Kosova nuk guxon të jetë një shtet social, por duhet të stimulohet prodhimi vendor.

 

"Ne si qeveri jemi të gatshëm ndoshta edhe të sakrifikojmë pak buxhetin e konsoliduar në favor të një stimuilimi të prodhimtarisë vendore për arsye se ambiciet e Kosovës nuk janë që të mbetet vetëm një shtet social, i cili përmbush nevojat minimale, por që në të ardhemn të pavarësohet ekonomikisht dhe të krijojë një perspektivë më të mirë", tha Bajram Rexhepi.

Strategjinë e zhvillimit ekonomik të Kosovës e paraqiti Ministri i Tregtisë dhe Industrisë Ali Jakupi, i cili tha se Ministria që drejton ai, do të dalë me një strategji komplete në fund të muajit janar të vitit 2004.

 

"Krijimi i mundësive të ndërtimit të banesave, lokaleve dhe objekteve të tjera me kosto më të lirë dhe me shitje më të lirë dhe zgjidhja e problemit të strehimit dhe e çëshjeve të tjera do të fillojë një ofensivë për shfrytëzimin e kapacitetit të industrisë ndërtimore dhe do të hapen vende të reja të punës", tha ministri Jakupi.

 

 

KFOR-i amerikan do t`i kompensojë pronarët e tokave në Kosovë

 

Gjilan, 18 dhjetor 2003- Komandanti i kampit "Montith" në Kosovë, koloneli Alen Ponsini tha të enjtën në Gjilan, në një konferencë të përbashkët me kryetarin e komunës Lutfi Haziri, se KFOR-i amerikan ka vendosur që t`ua njohë të drejtën për kompensim pronarëve të tokave në Kosovë, në të cilat, nga 10 qershori 1999 janë vendosur forcat e SHBA-ve.

Kërkesat e pronarëve të ligjshëm do të pranohen nga përfaqësuesit e armatës së SHBA-ve, të cilët do t`i kenë zyrat e tyre enkas për këtë çështje në objektet komunale në Gjilan, Kamenicë, Viti, Shtërpcë, Artanë e Ferizaj.

Afati i fundit për parashtrimin e kërkesave për kompenzim do të jetë më 30 qershor 2004. Formularët mund të merren në zyrat e komunave, ku qytetarët do të mësojnë edhe për detajet tjera që kërkohen për të aplikuar për kompensim të pronës së tyre.

KFOR-i amerikan është forca e vetme ushtarake në Kosovë, që ka vendosur për kompensim të tokave.

 

 

Në Prishtinë u përuruan katër rrugë të asfaltuara

 

Prishtinë, 18 dhjetor 2003- Kryetari i Kuvendit Komunal të Prishtinës, Ismet Beqiri, me bashkëpunëtorët, përuroi katër rrugë e sapoasfaltuara dhe të renovuara në qytetin e Prishtinës dhe rrethojën e shkollës fillore "Zenel Hajdini" në kryeqytet.

Udhëheqja komunale e Prishtinës bëri përurimin e rrugëve të asfaltuara "Mic Sokoli", "27 Nëntori", "Enver Hadri" dhe "Rugova", afër stacionit policor "Veriu" në Prishtinë.

Në përurimin e këtyre rrugëve morën pjesë edhe banorët e atyre lagjeve.

 

 

Podujevë: Nga plagët me armë zjarri vdes 63 vjeçari Ylber Topërllaku

 

Podujevë, 18 dhjetor 2003- Rreth orës 10.05 në qendër të Podujevës u plagos një qytetar i cili është dërguar menjëherë në Qendrën spitalore në Prishtinë. Dëshmitarët thanë se afër shitores "Qendra" është plagosur një person në shitoren e tij, lajm që e konfirmoi edhe Qendra emergjente në Prishtinë.

"Në tretman mjekësor kemi pranuar Ylber Topërllakun (1940) nga Prishtina i cili është plagosur në Podujevë", pohuan nga kjo qendër. Mjeku kujdestar dr. Begush Canaj nga Qendra emergjente në Prishtinë njoftoi se personi i plagosur vdiq nga plaga aktive me armë zjarri.

Policia nuk ka dhënë ende infomatë zyrtare për identitetin e të plagosurit i cili në Prishtinë është dërguar në gjendje kritike, por ka konfirmuar se njëri nga të dyshuarit është arrestuar, ndërkaq personi i dytë i dyshuar ka arritur të ikë nga vendi i ngjarjes. Motivet dhe shkaqet e kësaj ngjarjeje që tronditi qytetarët e Podujevës ende nuk dihen.

 

 

Në Gjilan ndalohet shitja dhe përdorimi i fishekzjarreve

 

Gjilan, 18 dhjetor 2003- Kryeshefi ekzekutiv i komunës së Gjilanit, Enver Muja ka lëshuar të enjtën një urdhëresë që ndalon shitjen dhe përdorimin e materialeve piroteknike dhe mjeteve tjera shpërthyese, të cilat prishin rendin dhe qetësinë publike si dhe shkaktojnë zhurmë e shqetësim të qytetarëve.

Personave fizikë, pos që do t'u konfiskohen mjetet e këtilla shpërthyese, ndaj tyre do të bëhet edhe padi për kundërvajtje në gjykatë, ndërsa personat juridikë do t`i nënshtrohen edhe dënimeve mandatore në shumë prej 100 - 200 euro.

Për zbatimin e kësaj urdhërese do të përkujdesen Drejtoria për siguri dhe emergjencë e komunës, shërbimi i inspekcionit si dhe Shërbimi Policor i Kosovës.

 

 

Prishtinë: Nënshkruhet një marrëveshje bashkëpunimi mes Kosovës dhe Turqisë në fushën e shëndetësisë

 

Prishtinë, 18 dhjetor 2003- Ministrja e Shëndetësisë së Kosovës, Dr.Resmije Mumxhi dhe ministri i Shëndetësisë së Turqisë, Dr.Rexhep Akdag, në prani edhe të përfaqësuesit të Unmik-ut, Fançesko Bastagli, sot në nënshkruan Marrëveshjen e bashkëpunimit mes dy ministrive respektive.

Marrëveshja konsiston në tri fusha bashkëpunimi: të ndihmës së drejtpërdrejtë të pacientëve kosovarë, shkollimit të kuadrit dhe ndihmës tjetër teknike në fushën e shëndetësisë.

 

 

Ngritet aktakuza kundër Shefket Musliut dhe tre personave të tjerë

 

Gjilan, 18 dhjetor 2003- Prokurorja ndërkombëtare në Gjilan Cecelia Tilada ka ngritur aktakuzën kundër Shefket Musliuit, ish- komanadant i UÇPMB-së dhe tre pjesëtarëve të tjerë: Besim Tahiri, Jeton Arifi dhe Feriz Qerimi.

Të gjithë ata ngarkohen për rrëmbim të personave të caktuar, detyrim, bashkëshoqërim kriminal dhe armëmbajtje pa leje. Sipas prokurores, provat kanë treguar se të akuzuarit janë anëtarë të një organizate kriminale, e cila është e financuar mirë dhe është udhëhequr nga Shefket Musliu. Ndërkaq, avokatët e Musliut thonë se aktakuza mbështetet në supozime dhe pa prova konkrete.

 

 

Mbrëmë ndodhi një shpërthim në Ferizaj, por pa viktima

 

Ferizaj, 18 dhjetor 2003- Mbrëmë rreth orës 23, në rrugën "Emin Duraku" në Ferizaj, ka ndodhur një shpërthim i fuqishëm. Për fat përveç dëmeve materiale, viktima nuk pati.

Shërbimi Policor i Kosovës, policia e UNMIK-ut, pjesëtarët amerikanë e grekë të KFOR-it kanë dalë në vendin e ngjarjes për të bërë hetimet. Kjo është hera e dytë brenda një jave që në Ferizaj kanë ndodhur shpërthime.

 

 

Serbi Nikoliq lirohet nga akuza për vrasjen e një shqiptari në fshatin Lubizhdë të Vitisë

 

Gjilan, 18 dhjetor 2003- Kolegji gjyqësor ndërkombëtar në Gjilan e ka liruar sot, Dragan Nikoliqin nga akuza për vrasjen e një shqiptari në fshatin Lubizhdë të Vitisë, në vitin 1999. Aktgjykimin lirues kolegji gjyqësor, i kryesuar nga gjyqtari Gustin Rimboh, e ka marrë në bazë të rekapitulimit komplet të ngjarjes, duke vërtetuar pafajësinë e të akuzuarti Nikoliq, ka thënë avokati i Nikoliqit.

 

  

Programi për Zhvillim i OKB-së ka ndarë rreth 10 milionë euro për realizimin e projekteve gjatë vitit 2004

 

Prishtinë, 18 dhjetor 2003- Programi për Zhvillim i OKB-së (UNDP) në Kosovë ka ndarë rreth 10 milionë euro për realizimin e projekteve të ndryshme gjatë vitit 2004 po aq sa ka investuar edhe gjatë vitit 2003.

 

Kjo agjenci do të menxhojë pesë milionë euro të dhuruara nga Qeveria e Kosovës për menaxhimin e programit të kthimit të të zhvendosurve. Përfaqësuesi i përhershëm i UNDP-së Robert Pajper theksoi se viti 2004 do të jetë vit i përpjekjeve për zhvillimin e ekonomisë së Kosovës. Ai u bëri ftesë të gjitha institucioneve dhe subjekteve profesionale që të angazhohen për ta çuar përpara këtë proces.

 

 

Në Pejë me nderime u bë varrimi i nëntë martirëve të kombit

 

Pejë, 18 dhjetor 2003- Në Pejë dhe në fshatin Lybeniq me nderime të larta u bë varrimi i kufomave të nëntë martirëve të kombit, të cilët u zhdukën dhe u vranë nga forcat paramilitare serbe në mars dhe në prill të viti 1999.

 

Eshtrat e tyre ditë më parë u zbuluan në një varrezë masive në afërsi të Beogradit. Eshtrat e shtatë martirëve nga Dardani I dhe II u varrosën në varrezat e qytetit të Pejës, kurse dy të tjerëve në Kompleksin Memorial në Lybeniq.

Eshtrat e këtyre martirëve para se të bëhej ceremoniali i varrimit ishin vendosur në Palestrën e sporteve "Karagaçi" në Pejë me ç'rast mijëra qytetarë të Pejës u bënë homazhe.

 

Në ceremoninë mortore që u mbajtë në këtë palestër sportive para disa mijëra qytetarëve folën kryetari i Komunës së Pejës Ali Lajçi, komandanti i kazermës së TMK-së në Pejë, nënkolonel Rasim Agushi dhe kryetari i KMDLNJ-së në Pejë Tahir Demaj dhe Elhame Haradinaj nga Shoqata për Persona të Zhdukur.

 

 

Zgjedhet kryesia e re e PS

 

Tiranë, 18 dhjetor 2003- Mbledhja e parë e Komitetit të Përgjithshëm Drejtues të Partisë Socialiste e cila ka zgjedhur kryesinë e re të partisë dhe më pas sekretariatin e saj ka vazhduar për disa orë rresht.

 

Në këto forume figurojnë emra të rinj si ish ministri i turizmit, Fatmir Xhafa, ndërsa janë rikthyer edhe emra të njohur të socialistëve si ish kryeministri Ylli Bufi, ministri aktual i financave Kastriot Islami, anëtarët e disa kabineteve qeveritare Maqo Lakrori, Petro Koçi etj.

Sekretari i përgjithshëm i PS, Gramoz Ruçi tha me këtë rast se tashmë do të fillojë puna për ndryshime në qeveri.

Ndërkohë në mungesë të mbështetjes së deklaruar të grupit të ish kryeministrit Ilir Meta, kryeministri Fatos Nano pritet të fillojë bisedimet me krerët e partive aleate, si Skënder Gjinushi e zoti Dule.

 

 

Policia e Kukësit ka arrestuar tre vetë të cilët kanë rrëmbyer tregtarin Irfan Idrizin nga Gostivari

 

Kukës, 18 dhjetor 2003- Forcat e Komesariatit të Drejtorisë së Policisë së Qarkut të Kukësit kanë arrestuar mbrëmë në flagrancë tre shqiptarë, dy banorë të Kukësit, njëri prej tyre oficer pranë këtij komesariati. I treti është banor i Gostivarit të Maqedonisë.

 

Ata kanë rrëmbyer kohë më parë dhe kanë mbajtur peng me 800 mijë eruo tregtarin Irfan Idrizin nga Gostivari i Maqedonisë. Policia nuk dha hollësi se çfarë ka ndodhur me fatin e Irfan Idrizit dhe ku ndodhet ai.

 

 

Në Ohër u mbajt një tryezë për sigurinë dhe intensifikimin e zhvillimit ekonomik ndërmjet Shqipërisë dhe Maqedonisë

 

Ohër, 18 dhjetor 2003- Si të vendoset një besim më i madh, si të rritet siguria dhe të intensifikohen zhvillimi ekonomik dhe bashkëpunimi në rajonin kufitar ndërmjet Maqedonisë dhe Shqipërisë, ishin tema të tryezës të rrumbullakët kombëtare që u mbajt dje në Ohër. Këtë tryezë e organizuan Qendra për Demokraci e Siguri e Insititutit Evroballkan dhe Qendra për Edukim dhe Mediacion nga Tirana.

 

 

Universiteti i Tetovës shënoi dhjetëvjetorin e themelimit të tij

 

Tetovë, 18 dhjetor 2003- Universiteti i Tetovës me një akademi solemne shënoi dhjetëvjetorin e themelimit dhe funksionimit, por ende pa mbështetje ligjore, ngase Parlamenti maqedonas të martën kryer punimet pa miratuar propozim-ligjin për zyrtarizimin e Universitetit të Tetovës.

Në këtë manifestim jubilar, rektori i Universitetit të Tetovës, Nexhmedin Bahadini tha se gjatë këtyre dhjetë vjetëve të funksionimit ky insitucion arriti të absorbojë mbi 13 mijë studentë, avancoi procesin mësimëdhënës bashkëkohor, kadrovik, shkencor dhe arsimor.

 

 

Qeveria e Serbisë ka formuar Këshillin e përkohshëm komunal në Preshevë

 

Preshevë, 18 dhjetor 2003- Qeveria e Serbisë ka marrë vendimin për formimin e Këshillit të përkohshëm komunal në Preshevë, i cili përbëhet nga radhët e PVD-së dhe të koalicionit për Preshevën, është publikuar sot në Gazetën zyrtare.

 

Këshilli i përkohshëm, i cili do ta kryejë funksionin e pushtetit lokal deri në organizimin e zgjedhjeve të reja dhe konstituimit të parlamentit të ri lokal, përbëhet nga katër anëtarë të PVD-së dhe një anëtari të koalicionit për Preshevën.

Të përkujtojmë se Qeveria e Serbisë e ka shpërndarë KK të Preshevës për shak të mosfunksionimit të parlamentit lokal, i cili mbledhjen e fundit e ka mbajtur më 24 korrik.

 

 

Tetë policë janë lënduar në përleshjet në pjesën veriore të Belfastit

 

Belfast, 18 dhjetor 2003- Tetë policë janë lënduar në përleshjet me afro njëzet rebelë gjatë natës së kaluar në kuartin e protestanëve në pjesën veriore të Belfastit, bëri të ditur policia.

Një patrullë e policisë është përgjegjur në thirrjen për ndihmë në një rrugë me popullsi shumicë protestane, rreth orës 2.00 pas mesnatës, kur një grup prej 20 vetash u përball me policët.

Banorët deklaruan se janë sulmuar edhe disa shtëpi.

"Kur policët tentuan t'i drejtohen masës, u sulmuan. Rezultat është: tetë të lënduar", tha zëdhënësi i policisë.

 

 

Partia shiite njofton për vrasjen e zyrtarit të saj

 

Bagdad, 18 dhjetor 2003- Partia më e madhe e myslimanëve shiitë të Irakut njofton se njerëz të Saddam Husseinit kanë vrarë një prej përfaqësuesve të saj.

Këshilli i Lartë i partisë Revolucioni Islamik i Irakut tha se përfaqësuesi në fjalë, Muhammad al-Hakim, u vra dje me armë zjarri në afërsi të shtëpisë së tij në Bagdat.

Një drejtues i partisë, tha se zoti al-Hakim kishte marrë kërcënime nga zyratrë të ish regjimit të Saddam Husseinit.

Ndërkohë, kryetari aktual i Këshillit Qeverisës të Irakut, Abdul Aziz al-Hakim tha se Saddam Husseini do të gjykohet nga një gjykatë speciale irakiane.

I pyetur nëse Saddami duhet të dënohet me vdekjke, zoti al-Hakim tha se është përgjegjësi e gjykatës të vendosë për dënimin e tij.

 

 

Putin thotë se Moska dhe Uashingtoni mbeten partnerë në luftën kundër terrorizmit

 

Moskë, 18 dhjetor 2003- Presidenti rus Vladimir Putin tha se Moska është partnere në luftën e udhëhequr nga Shtetet e Bashkuara kundër terrorizmit por vazhdon të besojë se ndërhyrja në Irak ishte e pajustifikuar.

Putin tha sot se koalicioni i drejtuar nga Shtetet e Bashkuara duhet të kishte marrë autorizimin e Këshillit të Sigurimit të OKB-së para se të fillonte luftën.

Por ai theksoi se Rusia dhe Shtetet e Bashkuara mbeten partnerë në luftën kundër terrorizmit, megjithë mosmarrëveshjet rreth Irakut.

Zoti Putin pritet të takohet sonte në Moskë me të dërguarin e posaçm amerikan Xhems Bejker për të diskutuar rreth përpjekjeve për uljen e borxhit të madh irakian.

 

 

Kryetari i Këshillit Provizor Irakian viziton Gjermaninë

 

Berlin, 18 dhjetor 2003- Kryetari i Këshillit Provizor Irakian, Abdelazis el Hakim është takuar në krye të vizitës së tij në Gjermani me të ngarkuarën për të drejtat e njeriut të qeverisë gjermane, Klaudia Rot. Temë qendrore ishte gjendja në Irak pas arrestimit të ish-diktatorit Sadam Husein. Në vazhdim të ditës el Hakimi do të pritet edhe nga kancelari Gerhard Shrëder dhe ministri i jashtëm, Joshka Fisher.

 

 

Konsultimet për kushtetutën në Afganistan ndodhen në një krizë të thellë

 

Kabul, 18 dhjetor 2003- Konsultimet për kushtetutën te Asamblesë së Madhe në Afganistan, katër ditë pas fillimit ndodhen në një krizë të thellë. Mbështetësit e ish-presidentit Burhanudin Rabani kërcënuan disa herë në mënyrë demonstrative me largimin e tyre nga Loja Xhirga.

 

Ata kërkojnë që presidenti i ardhshëm të ketë pranë një kryeministër me kompetenca të gjera. RReth 200 nga 500 delegatët e Loja Xhirgës nënshkruan një deklaratë, me anë të së cilës kërkohet një votim për këtë. Presidenti tranzitor i Afganistanit, Hamid Karzai u përpoq që ta minimizojë rrezikun e dështimit të Asamblesë.

 

 

Në aksidentin rrugor vdesin 17 pasagjerë

 

Kiev, 18 dhjetor 2003- Të paktën 17 persona kanë vdekur dhe 19 të tjerë janë lënduar në një aksident të autobusit që rrëshqiti nga rruga në Krime, bënë të ditur sot zyrtarët e Ukrainës.

Aksidenti ndodhi të mërkurën në mbrëmje kur shoferi humbi kontrollin mbi makinën në rrugën që çon nga kryeqyteti i Krimesë Simferopol drejt pushimores së Deti të Zi në Jaltë.

Shumica e pasagjerëve ishin minatorë që po shkonin në pushime.

 

 

Vriten katër palestinezë

 

Nablus, 18 dhjetor 2003- Katër palestinezë janë vrarë të enjtën në një aksion të ushtarëve izraelitë në pjesën e vjetër të Nablusit, në veri të Bregut Perëndimor.

Burimet izraelite thanë se ushtarët kishin vrarë tre palestinezë të armatosur të cilët kishin hapur zjarr nga armët automatike.

Më herët ushtarët izraelitë kishin vrarë një palestinez, i cili, sipas burimeve izraelite, po vendoste eksploziv pranë rrugës. Me atë rast është plagosur dhe një palestinez.

 

 

Një ushtar amerikan është vrarë dhe një tjetër është lënduar

 

Bagdad, 18 dhjetor 2003- Një ushtar amerikan është vrarë dhe një tjetër është lënduar mbrëmë në një pritë në Bagdad, bëri të ditur ushtria amerikane, njofton Rojter.

"Një ushtar amerikan është vrarë, dhe një tjetër është lënduar, si dhe një përkthyes irakian, kur mbrëmë vonë ranë në një pritë", ka thënë zëdhënësi i ushtrisë amerikane, duke shtuar se incidenti ka ndodhur në një kuart të Bagdadit.

 

 

Irani të dëmshpërblehet për luftën

 

Teheran, 18 dhjetor 2003- Kreu i Këshillit Qeverisës irakian, i emëruar nga amerikanët, Abdel Aziz al-Hakim, ka thënë se Irani meriton dëmshpërblim për luftën e nisur nga Saddam Husseini në vitin 1980, me ç'rast u vranë deri në një milion njerëz.

Duke folur në Londër pas bisedimeve me kryeministrin britanik, Tony Blair, zoti Hakim e pranoi se Kombet e Bashkuara kanë konfirmuar të drejtën e Iranit që të marr kompensim, por tha se diskutime të mëtejme duhet të vendosin nëse Iraku do të paguaj.

Zyrtarët në Iran thonë se vendit i kanë borxh më shumë se njëqind miliardë dollarë si dëmshpërblim dhe pohojnë se Iraku i ka paguar dëmshpërblime Kuvajtit për pushtimin e vitit 1990.

Irani ka kërkuar njëqind miliardë dollarë dëmshpërblim, duke theksuar se Kuvajti tashmë ka marrë miliarda dollarë përmes programit të Kombeve të Bashkuara për Irakun 'naftë për ushqim', si kompensim për pushtimin nga Saddam Husseini.

 

 

Projekt-rezolutë kundër përhapjes së armëve kimike-biologjike

 

Nju Jork, 18 dhjetor 2003- SHBA ka hartuar një projekt-rezolutë për Këshillin e Sigurimit që ka si qëllim të parandalojë rrjedhën e armëve kimike, biologjike dhe bërthamore te terroristët dhe aktorët e tjerë jo shtetërorë.

Pas debateve të gjata në Uashington, SHBA tashmë i ka dhënë Kinës, Francës, Britanisë dhe Rusisë një projektrezolutë për Këshillin e Sigurimit.

Projekt-rezoluta bën thirrje që të gjitha shtetet të mos i japin përkrahje aktorëve jo shtetërore që përpiqen të zhvillojnë, gjejnë, manifakturojnë transportojnë dhe përdorin armë kimike, biologjike dhe bërthamore.

 

 

Italia e gatshme për t'i falur një pjesë të borxheve Irakut

 

Romë, 18 dhjetor 2003- Kryeministri italian Silvio Berluskoni dhe i dërguari i posacëm amerikan, Xhejms Bejker janë të një mendimi përsa i përket nevojës së faljes së një pjese të borxheve për Irakun. Zyra e Berluskonit deklaroi pas takimit se lehtësimi nga borxhet do të jetë një faktor vendimtar për rifillimin ekonomik në Irak.

 

Të martën e kësaj jave, Gjermania dhe Franca e mbështetën iniciativën amerikane për një falje të pjessshme të borxheve, që kapin shumën prej 120 miliardë dollarësh.

 

 

Zhak Shirak kërkon ndalimin e përdorimit të simboleve fetare në shkolla

 

Paris, 18 dhjetor 2003- Presidenti francez, Zhak Shirak ka kërkuar një ndalim të shamive myslimane të kokës, të kapeles hebreje Kipa dhe të kryqeve të mëdha të krishtera në shkolla. Shiraku tha në një fjalim parimor se mbajtja dhe tregimi i simboleve të dukshme fetare duhet të ndalohet në shkolla. Ai i bëri thirrje parlamentit që të vendosë për një ligj përkatës deri në fillim të vitit të ri shkollor në shtator.

 

E lejuar megjithatë do të jetë edhe më tej mbajtja e simboleve diskrete fetare. Presidenti kujtoi ndarjen më 1905 të shtetit nga kisha në Francë.Kjo është një nga arritjet më të mëdha të republikës, meqenëse ajo luan një rol të rëndësishëm për harmoninë sociale. Sipas anketimeve, pjesa më e madhe e francezëve mbështet pozicionin e Shirakut.

 

 

Këshilli Qeverisës të Irakut: Sadam Huseini do të gjykohet nga një gjykatë irakiane

 

Bagdad, 18 dhjetor 2003- Kryetari aktual i Këshillit Qeverisës të Irakut, tha se Sadam Huseini do të gjykohet nga një gjykatë speciale irakiane.

Abdyl Aziz al-Hekim tha se gjykata do të shqyrtojë akuzat e ngritura kundër Saddam Husseinit dhe do ta trajtojë atë në përputhje me ligjin ndërkombëtar. Kur u pyet nëse Saddami duhet të dënohet me vdekjke, zoti al-Hekim tha se është përgjegjësia e gjykatës të vendosë për dënimin e tij.

Zoti al-Hekim i bëri këto deklarata në një konferencë shtypi në Londër me Sekretarin e Jashtëm britanik, Xhek Stro, i cili shprehu besimin se irakianët janë në gjendje ta gjykojnë drejt Sadamin.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |