Përmbajtja:

• Hari Holkeri mbrëmë me një fjalim publik u është drejtuar qytetarëve të Kosovës

• Holkeri thotë se vlerësimi i përmbushjes së standardeve për Kosovën do të fillojë në muajin janar të vitit të ardhshëm

• Ministrat serbë në Qeverinë e Kosovës refuzojnë të marrin pjesë në grupet e punës

• Këshilli i Sigurimit të KB diskuton sot për situatën në Kosovë

• N.Kelmendi: UNMIK-u ka bërë amnistimin e ligjeve diskriminuese

• Të rinjtë e LDK-së në rrugën e anëtarësimit në familjen e të Rinjve të Partive Popullore të Evropës

• Pas borës së mbrëmshme, mirëmbahen shumica e rrugëve të Prishtinës

• Bordi i AKM-së thotë se të gjitha ndërmarrjet e tre raundeve të para i plotësojnë kushtet për t'u shitur

• Mark Krasniqi u bëri thirrje aktivistëve të PSHDK-së që të bashkëpunojnë për arritjen e pavarësisë së Kosovës

• Në Vjenë po i zhvillon punimet konferenca ndërkombëtare mbi tranzicionin në Kosovë

• KAKK debatoi për projektet për vitin 2004 me theks të veçantë për zbatimin e reformave në qeverisjen lokale

• Shpallet tenderi për operatorin e dytë të telefonisë mobile në Kosovë

• Në shënimin e 130-vjetorit të Ferizajt, në Slivovë u bë zbulimi solemn i lapidarit të Mic Sokolit e Sefë Koshares

• KFOR-i ka njoftuar për disa projekte të rëndësishme në fushën e infrastrukturës

• Kammerhof vizitoi trupat e KFOR-it çek e sllovak në Podujevë

• Buxheti i komunës së Podujevës për vitin 2004 do të jetë 24 për qind më i madh se një vit më parë

• Përfaqësuesit e mdiave e siguruan Holkerin se plani standardet për Kosovën do të ketë përkrahjen e tyre

• Gjenerali Klark thotë se i akuzuari Millosheviq ka mbetur i vjetri dhe nuk i ka ndryshuar qëndrimet

• Meurs: Shqipëria ka disa avantazhe në krahasim me vendet e tjera

• Nuk ka lëvizje pozitive në ndjekjen e tregtarëve me qenie njerëzore në Evropën Juglindore

• Tirana dhe Podgorica thellojnë bashkëpunimin

• Në Gjermani arrestohet Idajet Beqiri

• Parlamenti maqedonas ndërpreu punimet pa e miratuar Propozimligjin për zyrtarizimin e Universitetit të Tetovës

• Holandezi Shefer merr drejtimin e NATO-s

• Indi: Mbi 50 vetë kanë humbur jetën dhe tetë mijë të tjerë kanë mbetur pas strehë

• Burg i përjetshëm për dy krerët e grupit radikal grek "17 nëntori"

• Nga shpërthimi i bombës në Bagdad, 17 vetë të vrarë

• Presidenti Bush: Sadam Huseini duhet të dënohet me vdekje

• Rrëzohet një avion ushtarak francez, gjashtë vetë kanë humbur jetën

Hari Holkeri mbrëmë me një fjalim publik u është drejtuar qytetarëve të Kosovës

 

Prishtinë, 17 dhjetor 2003 - Shefi i Misionit të Kombeve të Bashkuara në Kosovë, Harri Holkeri mbrëmë me një fjalim publik u është drejtuar qytetarëve të Kosovës dhe ka shpjeguar rëndësinë e përmbushjes së standardeve për Kosovën, duke heksuar se Kosova ka potencial për të qenë një model për rajonin.

"Dokumenti Standardet për Kosovën paraqet një definim të qartë dhe të kuptueshëm të llojit të shoqërisë që Kosova synon. Ky është një udhërrëfyes për të hapur diskutimet për statusit përfundimtar," tha Holkeri.

Shefi i UNMIK-ut pastaj ka thënë se ajo që këto standarde përshkruajnë është një shoqëri normale, një vend ku njerëzit janë të lirë të udhëtojnë të flasin gjuhën e tyre dhe të punojnë kudo në Kosovë, pavarësisht nga përkatësia e tyre etnike.

 

Ai ka nënvizuar se përmbushja e standardeve nuk është provim për Kosovën, por synimi i saj, mirëpo për të filluar vendimet mbi statusin e Kosovës duhet të ketë përparim për të arritur përparimin substancial:

"Kosova, populli dhe liderët e saj do të tregojnë që janë të gatshëm që statusi i tyre i ardhshëm të përcaktohet nëpërmjet standardeve," tha zoti Holkeri sipas të cilit UNMIK-u është i gatshëm që në partneritet me kryeministrin Rexhepi të nisë procesin e përmbushjes së standardeve.

"Me punë, rruga e Evropës do të hapet edhe për Kosovën," tha zoti Holkeri, sipas të cilit kjo është rruga e vetme për Kosovën, e cila ka potencial për të përmbushur standardet:

"Kosova ka potencial që të bëhet një model në rajon. Kosova tashmë ka forcën policore multietnike më së miri të trajnuar në Evropën Juglindore," tha ndër të tjera në fjalimin e tij publik zoti Holkeri.

 

 

Holkeri thotë se vlerësimi i përmbushjes së standardeve për Kosovën do të fillojë në muajin janar të vitit të ardhshëm

 

Prishtinë, 17 dhjetor 2003 - Kryeadministratori i Kosovës Hari Holkeri ka thënë në një konferencë me gazetarë se vlerësimi i përmbushjes së standardeve për Kosovën do të fillojë në muajin janar të vitit të ardhshëm në të njejtën kohë, kur pritet edhe hartimi i planit për zbatimin e tyre.

 

Vlerësimet, thotë Holker, do të përsëriten çdo tre muaj deri në mesin e vitit 2005 kur do të bëhet rishikimi i përgjithshëm i gjendjes në Kosovë.

Ai tha se tash duhet punuar së bashku në mënyrë që kur të vijë koha Këshilli i Sigurimit të OKB-së të mund të vendosë se kur do të fillojë e statusit politik të Kosovës. Holkeri nënvizoi se mospajtimet që kanë ekzistuar në disa raste ndërmjet Misionit të tij dhe institucioneve të Kosovës nuk do të pengojnë zbatimin e standardeve, sepse tash është koha e punës së përbashkët.

Çdo tre muaj Holkeri do t'i raportojë KS të OKB-së mbi rezultatet e arritura. Ai tha se dyert do të mbeten të hapura edhe për përfaqësuesit politikë serbë, të cilët deri tash kanë refuzuar të marrin pjesë në hartimin e projektit.

 

 

Ministrat serbë në Qeverinë e Kosovës refuzojnë të marrin pjesë në grupet e punës

 

Prishtinë, 17 dhjetor 2003 - Ministrat serbë në Qeverinë e Kosovës Milorad Todoroviq dhe Goran Bogdanoviq kanë paralajmëruar se nuk do të marrin pjesë në grupet e punës për hartimin e planit për zbatimin e dokumentit Standaradet për Kosovën.

 

Sipas mediave serbe, Todoroviq dhe Bogdanoviq është dashur të marrin pjesë në Grupin për monoritetet dhe atë për ekonomi dhe financa.

 

Todoroviq ka thënë se "grupi për minoritetet është emërtim i papanueshëm për bashkësinë serbe në Kosovë dhe as mendja nuk më shkon të radhitem në minoritetet ndërsa është në fuqi rezoluta 1244", ka thënë ai.

Ministrat serbë thonë se nuk do të marrin pjesë në grupet e punës ndërsa nuk zgjidhet çështja e e standardeve dhe ndërsa nuk merren parasysh vërejtjet e serbëve në Kosovë.

 

 

Këshilli i Sigurimit të KB diskuton sot për situatën në Kosovë

 

Kombet e Bashkuara, 17 dhjetor 2003 - Këshilli i Sigurimit të Kombeve të Bashkuara do të diskutojë sot për situatën në Kosovë, dhe siç bëhet e ditur, në qendër të debatit do të jetë plani Standardet për Kosovën. Anëtarët e KS rreth zhvillimeve në Kosovë do t'i njoftojë zv.sekretari i përgjitheshm, Zhan Mari Geno.

KS me një komunikatë më herët tashmë ka mbështetur dokumentin Standardet për Kosovën, i cili tek zyrtarët e pushtetit në Beograd dhe midis përfaqësuesve politik të serbëve të Kosovës ka shkaktuar reagime negative.

 

 

N.Kelmendi: UNMIK-u ka bërë amnistimin e ligjeve diskriminuese

 

Prishtinë, 17 dhjetor 2003 - Duke komentuar vendimin e Kuvendit të Kosovës për shfuqizimin e të gjitha ligjeve serbe në Kosovë, si dhe shpalljen e pavlefshme të atij vendimi nga shefi i UNMIK-ut, deputetja e LDK-së Nekibe Kelmendi vlerësoi se Kuvendi ka marrë një vendim jashtëzakonisht të rëndësishëm politik.

 

Kjo për faktin, tha ajo, se që nga ardhja e UNMIK-ut në Kosovë, ato ligje kanë qenë të shpallura si të pavlefshme me rregulloren e UNMIK-ut 1999/29, jo të gjitha ligjet, por shumica prej tyre. "Konsideroj se me zhvlerësimin e këtij vendimi të Kuvendit të Kosovës nga ana e Përfaqësuesit Special, në fakt është bërë një, ashtu ta quaj, amnestim i diskriminimit apo rehabilitim i një sistemi diskriminues, i cili funksiononte në Kosovë dhe bënte diskriminim institucional ndaj popullatës shqiptare të Kosovës", nënvizoi për radion "Evropia e lirë", deputetja Nekibe Kelmendi.

Ajo sqaroi se shume ligje jo vetëm që kanë patur karakter diskriminues, por edhe kanë qenë të nxjerra mbi një bazë nulë. "Prandaj, unë kujtoj se Përfaqësuesi Special, përkatësisht zyra e tij ligjore, i ka sygjeruar gabimisht që të shfuqizohen këto ligje, sepse këto ligje edhe ashtu nuk mund të jenë ligje të zbatueshme në Kosovë.

 

Nga ana tjetër, gjithsesi këto ligje nëse ne do t'i zbatojmë edhe më tutje, por mua më mban shpresa se faktikisht këtë do ta vërejë edhe Përfaqësuesi Special dhe nuk do të lejojë që ato të zbatohen, do të ngadalësojnë proceset e zhvillimeve të mëtejshme demokratike në Kosovë, por edhe të ndërtimit të institucioneve të Kosovës", tha zonja Kelmendi.

 

 

Të rinjtë e LDK-së në rrugën e anëtarësimit në familjen e të Rinjve të Partive Popullore të Evropës

 

Prishtinë, 17 dhjetor 2003 - Kryetari i Forumit të Rinisë të LDK-së, Lulzim Zeneli më 12 e 13 dhjetor mori pjesë në mbledhjen e rregullt të Këshillit Drejtues të organizatës së të Rinjve të Partive Popullore Evropiane (YEPP). Në këtë takim, i cili u mbajt në Vjenë, pashtu morën pjesë përfaqësues të më se 40 shteteve.

 

Me këtë rast, kryetari i FR të LDK-së pati takime të veçanta me kryetarin e YEPP-it, z. Daniel Bautista Lopez, i cili njëherit është këshilltar politik i kryeministrit spanjoll, Hoze Maria Aznar. Kryetari i FR të LDK-së, po ashtu u takua edhe me nënkryetarët e YEPP-it, Markus Posentrup (nga CDU Gjermani) dhe me Paolo Zanetto (nga "Forza Italia").

 

Në të gjitha këto takime u konfirmua mbështetja e plotë e udhëheqësisë së YEPP-it për Forumin e Rinisë të LDK-së, sidomos bazuar në forcën dhe ndikimin që ka FR i LDK-së në të gjitha zhvillimet në Kosovë.

Kryetari i FR të LDK-së, Lulzim Zeneli, me një fjalim iu drejtua edhe Këshillit të YEPP-it, ku ka folur për progresin e arritur në Kosovë dhe rrugën që po e ndjekin institucionet e Kosovës deri në njohjen e pavarësisë së Kosovës si zgjidhje e vetme dhe çelës i stabilitetit të rajonit dhe Evropës.

 

Zoti Zeneli përmendi edhe sfidat dhe vështirësitë, nëpër të cilat po kalon Kosova gjatë këtij rrugëtimi. Ai gjithashtu në fjalën e tij u fokusua edhe për rolin e LDK-së, si partia më e madhe në Kosovë, në të gjitha proceset në vend.

Në të gjitha takimet e kryetarit Zeneli me përfaqësuesit e partive të djathta të Evropës doli në pah mbështetja e fuqishëm e filozofisë politike të LDK-së dhe të Presidentit Rugova që gëzon në arenën ndërkombëtare.
Drejtuesit e YEPP-it premtuan anagzhimin maksimal në përshpejtmimin e procedurave për anëtarësim të Forumit të Rinisë së LDK-së në radhët e kësaj organizate.

Kjo pjesëmarrje e kryetarit të FR të LDK-së në takimin e YEPP-it dëshmon edhe një herë fuqinë e Forumit të Rinisë si organizata më masive politike e të rinjve në Kosovë, që di dhe mund t'i përfaqësoj interesat e brezit të ri në Kosovë.

 

 

Pas borës së mbrëmshme, mirëmbahen shumica e rrugëve të Prishtinës

 

Prishtinë, 17 dhjetor 2003 - Drejtorati për Inspeksion i Kuvendit Komunal të Prishtinës, sot që nga orët e hershme të mëngjesit i ka inspektuar të gjitha rrugët e qytetit të Prishtinës, pas fillimit të rënies së borës gjatë orëve të natës së kaluar, thuhet në një njoftim të këtij Drejtoratit.

Sot, që në orët e mëngjesit është hedhur kripë në sheshin "Nënë Tereze", ndërsa rruga përgjatë këtij sheshi është e kalueshme. Të kalueshme janë po ashtu rrugët "Agim Ramadani", "Nazim Gafurri" deri në lagjen "Velania".

Po ashtu të mirëmbajtura janë edhe rrugët "Tirana", "UÇK", "Ilir Konushefci" dhe "Vëllezërit Fazliu".

Të pamirëmbajtura janë rrugët në lagjen "Kodra e Diellit", "Arbëria" dhe rruga e "Vushtrrisë" që çon drejt varrezave të qytetit.

Drejtorati për Inspeksion i KK të Prishtinës po ashtu bën të ditur se të gjitha rrugët dytësore në Prishtinë janë të pamirëmbajtura dhe për këtë shkak vozitësit duhet të kenë kujdes në trafik.

 

 

Bordi i AKM-së thotë se të gjitha ndërmarrjet e tre raundeve të para i plotësojnë kushtet për t'u shitur

 

Prishtinë, 17 dhjetor 2003 - Mbrëmë pas një mbledhjeje maratonike, Bordi drejtues i AKM-së mori vendime se të gjitha ndërmarrjet e tre raundeve të para janë shoqërore dhe se i plotësojnë kushtet për t'u shitur.

 

Poashtu Bordi i AKM-së vendosi të ratifikojë kontratat si dhe të nënshkruajë kontratat e shitjes për të gjitha ndërmarrjet e dy raundeve të para, përpos të atyre të cilat fituesi i parë është tërhequr dhe të cilat do të tenderohen sërish në raundin e tretë.

 

Bordi i AKM-së vendosi që të rishqyrtohet shitja e "Plastikës" sepse dyshohet në keqpërdorime nga blerësit. "Jemi marrë me të gjitha ndërmarrjet dhe kemi votuar për të gjitha.

 

Me katër ndërmarrje të raundit të parë është vendosur të ratiflkohen kontratat. Për shumën e plotë të raundit të dytë është vendosur të nënshkruheh kontratat ndërsa disa të tjera do të ritenderohën në raundin e tretë", tha shefi i Bordit të AKM-së Nikolaus Lambsdorf pas takimit.

 

Ai tha se në raundin e tretë do të tenderohen 19 ndërmarrje. Lambsdorf nuk e tha datën kur do të shpallen tenderët por shtoi se kjo do të bëhet sa më shpejt që të jetë e mundur.

 

 

Mark Krasniqi u bëri thirrje aktivistëve të PSHDK-së që të bashkëpunojnë për arritjen e pavarësisë së Kosovës

 

Gjakovë, 17 dhejtor - Kryetari i Partisë Shqiptare Demokristiane të Kosovës, akademik Mark Krasniqi u bëri thirrje qytetarëve dhe aktivistëve politikë që të bashkëpunojnë ndërmjet veti për një të ardhme më të mirë të të gjithëve e cila synon arritjen e pavarësisë së Kosovës.

 

Ai e bëri këtë prononcim në rrethinën e Gjakovës ku Bashkësia e Degëve të PSHDK-së në Gjakovë, kohëve të fundit është duke themeluar degët e saj edhe në ato lokacione në të cilat nuk kishte shtrirje administrative partiake. Kështu në fshatin Blinish kryetar i Bashkësisë së Degëve të PSHDK-së u zgjodh Driton Halili, ndërkaq në Osek Pash Luigj Rokaj.

 

Në themelimin e këtyre degëve ishin të pranishëm edhe kryetari i PSHDK-së akademik Mark Krasniqi, nënkryetari dhe ministri Zef Morina.

 

 

Në Vjenë po i zhvillon punimet konferenca ndërkombëtare mbi tranzicionin në Kosovë

 

Vienë, 17 dhjetor 2003 - Në Vjenë dje i ka filluar konferenca ndërkombëtare mbi tranzicionin në Kosovë në të cilën po marrin pjesë udhëheqësit më të lartë të Kosovës dhe përfaqësuesit e minoriteteve që jetojnë në vendin tonë, pos atij serb.

 

Në ditën e parë të konferencës ishte paraparë që pjesëmarrësve të këtij tubimi t'u drejtohet nëpërmjet linjës së drejtpërdrejtë televizive edhe ish-presidenti i Shteteve të Bashkuara të Amerikës Bill Klinton.

 

 

KAKK debatoi për projektet për vitin 2004 me theks të veçantë për zbatimin e reformave në qeverisjen lokale

 

Prishtinë, 17 dhjetor 2003 - Këshilli i Asociacionit të Komunave të Kosovës diskutoi dje për projektet e këtij asociacioni për vitin 2004 me theks të veçantë për zbatimin e reformave në qeverisjen lokale. Në këtë takim u kërkua që regjistrimi civil dhe ai i bizneseve të bëhet në të gjitha komunat dhe u diskutua rreth krijimit të një modeli të përbashkët për grumbullimin e tatimit mbi pronë.

 

 

Shpallet tenderi për operatorin e dytë të telefonisë mobile në Kosovë

 

Prishtinë, 17 dhjetor 2003 - Ministri i Postë-Telekomunikacionit Zef Morina shpalli sot tenderin për operatrorin e dytë të telefonisë mobile në Kosovë. Morina i bëri të qarta kushte dhe procedurat për konkurrim dhe tha se fituesi i tenderit do të shpallet pas të eknë kaluar 30 deri më 45 ditë. Kështu në bazë të ligjit vitin e ardhshëm, edhe një rrjet komunikues mobil GSM do të operojë në Kosovë.

Morina tha se vendimi për shpalljen edhe të një licence shtesë për operim të rrjetit komunikues mobil, u mor në bazë të Ligjit për Telekomunikacionin, të miratuar nga Kuvendi i Kosovës dhe të dekretuar nga shefi i UNMIK-ut.

 

 

Në shënimin e 130-vjetorit të Ferizajt, në Slivovë u bë zbulimi solemn i lapidarit të Mic Sokolit e Sefë Koshares

 

Ferizaj, 17 dhjetor 2003 - Në kuadër të shënimit të 130-vjetorit të Ferizajt në Slivovë u bë zbulimi solemn i lapidarit të Mic Sokolit, Sefë Koshares dhe të një trimi të panjohur, të cilët ranë heroikisht para 122 vitesh në përleshje me forcat turke.

 

Në përurimin e lapidarit morën pjesë pasaardhës të Mic Sokolit e Sefë Koshares, qindra banorë të Feizajt e rrethinës dhe drejtues të institucioneve lokale e të Kosovës.

Vepra e këtyre heronjve dhe e Lidhjes së Prizrenit u cilësua si një kontribut i çmuar në dhënien e themeleve të shtetësisë shqiptare, ndërkaq lapidari pëjetësim e kujtim për ta.

Për rëndësinë e luftës së Slivovës dhe ngjarjeve të tjera të zhvilluara në Ferizaj, foli Dr. Zekeria Cana.

 

 

KFOR-i ka njoftuar për disa projekte të rëndësishme në fushën e infrastrukturës

 

Prishtinë, 17 dhjetor 2003 - Në konferencën e djeshme me gazetarë në Prishtinë KFOR-i ka njoftuar për disa projekte të rëndësishme në fushën e infrastrukturës në Kosovë. Është fjala për rrugën dytësore në Mitrovicë, e cila do të lidhë rrugët e tjera me Prishtinë, Pejën, Malin e Zi dhe Serbinë.

 

Projekti tjetër i madh është përmirësimi apo rindërtimi i 17 urave në maxhistralën Prishtinë - Bllace, rrugë kjo kryesore tregtare që lidhë Kosovën me Maqedoninë dhe Greqinë.

 

Zëdhënësi i KFOR-it Kris Tompson ka thënë se këto dy projekte të mëdha, të cilat i ka ndërmarrë KFOR-i me qëllim të përmirësimit të jetës së qytetarëve dhe infrastrukturës së Kosovës.

 

Ai po ashtu tha se KFOR-i do të mbulojë 20 për qind të shpenzimeve të përgjithshme të caktuara nga Ministria e Transportit dhe AER-i për 15 muajt e ardhshëm.

 

 

Kammerhof vizitoi trupat e KFOR-it çek e sllovak në Podujevë

 

Podujevë, 17 dhjetor 2003 - Komandanti i trupave paqeruajtëse të KFOR-it në Kosovë, gjenerali Holger Kamerhof sot vizitoi trupat e Batalionit të Katërt çek e sllovak që kujdesen për sigurinë dhe paqen në rajonin e komunës së Podujevës. Gjenerali Kamerhof u prit nga komandanti i KFOR-it çek e sllovak nënkoloneli Zdenek Havala me bashkëpunëtorë.

Sipas komandantit Havala komandanti i KFOR-it gjenerali Kamerhof u interesua për situatën e përgjithshme të sigurisë në rajonin e përgjegjësisë të KFOR-it çek e sllovak, realizmin e detyrave nga ushtarët, raportet mes KFOR-it dhe popullatës vendore, etj.

 

Komandanti i KFOR-it kërkoi bashkëpunim më të mirë me institucionet vendore, deklaroi nënkoloneli Havala dhe u interesua për kishën serbe për çka do të bisedojë edhe me udhëheqjen komunale të Podujevës.

Gjenerali Kamerhof vizitoi shkollën fillore në fshatin Dobërdol të renovuar nga KFOR-i çek e sllovak si dhe bazën e trupave të KFOR-it në Shajkofc.

 

 

Buxheti i komunës së Podujevës për vitin 2004 do të jetë 24 për qind më i madh se një vit më parë

 

Podujevë, 17 dhjetor 2003 - "Jemi të vetëdijshëm se kërkesat dhe nevojat janë të shumta, por ato nuk mund të bëhen për një vit. Për këtë duhet edhe kohë edhe mjete edhe bashkëpunim të ndërsjellë komuna-qytetari", tha kryetari i komunës së Podujevës Agim Veliu në seancën e sorme, ku morën pjesë edhe qytetarë të interesuar. Kjo senacë në rendin e punës pati buxhetin për vitin 2004, me theks të veçantë projektet me përparësi dhe çështjen e tatimit në pronë.

Agim Veliu shkurtimisht i njoftoi qytetarët për punët që janë bërë, objektet e infratsrukturës që janë kryer dhe aktvitete tjera duke i ilustruar këto me shifra e fakte. Sipas tij, Projektbuxheti i komunës për vitin 2004 është 7.999.145 euro apo 24% më i madh se vitin 2003.

Në diskutim mori pjesë edhe përfaqësuesi i UNMIK-ut për Podujevën z. Shahzad Khan Bangash i cili përgëzoi komunën për sukseset e arritura me buxhetin vetjak por edhe qytetarët për angazhimin e tyre në krijimin e jetës institucionale dhe jetës më të mirë për të gjithë.

 

 

Përfaqësuesit e mdiave e siguruan Holkerin se plani standardet për Kosovën do të ketë përkrahjen e tyre

 

Prishtinë, 17 dhjetor 2003 - Përfaqësuesit e mdiave në Kosovë i siguruan shefit të UNMIK-ut Hari Holkerit se plani standardet për Kosovën do të ketë përkrahjen e mediumeve të tyre.

 

Standardet për Kosovën kanë rëndësi jetike për të ardhmen e Kosovës, andaj mediumet vendore do të ofrojnë përkrahje të vazhdueshme për zbatimin e këtij plani. Në këtë takim theks i veçantë është kushtuar draft-ligjit për Komisionin e Pavarur për Media i cili pritet të miratohet vitin e ardhshëm.

 

 

Gjenerali Klark thotë se i akuzuari Millosheviq ka mbetur i vjetri dhe nuk i ka ndryshuar qëndrimet

 

Hagë, 17 dhjetor 2003 - Ish-presidenti jugosllav, Sllobodan Millosheviq, i cili po gjykohet për krime lufte, ka mbetur i vjetri dhe nuk i ka ndryshuar qëndrimet, ka deklaruar ish-komandanti i NATO-s, Uesli Klark pas dëshmisë kundër Millosheviqit në Hagë.

 

"Nuk pashë ndryshime në sjelljen e tij, në kokëfortësinë e tij, në sedrën e tij dhe vrazhdësinë e personit për të cilin unë besoj se ishte përggjegjës për aq shumë masakrab të viktimave në Ballkan", tha gjenerali Klark, duke përshkruar kështu arrogancën e Millosheviqit.

 

I pyetur se si është sjellë i akuzuari ndaj tij personalisht, Klark tha se ishte kjo një performancë tipike e Millosheviqit për t'i mohuar faktet, por gjykatësit ishin të kujdesshëm dhe e mbanin atë nën kontroll.

 

Ai tha se në dëshminë e tij më së shumti është përqëndruar në përgjegjësinë komanduese të Millosheviqit,sepse ai qëndronte prapa të gjitha krimeve dhe mizoriva të tjera që ndodhën. Klark tha se edhe personalisht ka pasur njohuri të veçanta për të akuzuarin, prandaj edhe e konsideron të rëndësishme dëshminë e tij që bëri dje.

"Unë jam me siguri i vetmi komandant i shekulli XX në historinë ushtarake, i cili ka njohur kundërshtarët e tij, karakterin dhe sjelljet e tij, mënyrën e të menduarit dhe mënyrën sesi ai do t'u përgjigjej situatave.

 

Kisha njohuri të mëdha dhe të detajuara për të dhe ato njohuri i përdora për të mirë gjatë fushatës në Kosovë", tha gjenerali Klark, duke përshkrua njohuritë e tij që kishte më parë nga përvoja e tij për të akuzuarin Millosheviq.

Dëshmia e gjeneralit Uesli Klark do të mund të transmetohet për publik ditën e premtë pasi që Tribunali i Hagës kishte vendosur me kërkesë të Qeverisë amerikane që kjo dëshmi të jetë e mbyllur për opinion në mënyrë që Administrata amerikane të mund të kontrollojë se mos në ndonjë pjesë së dëshmisë së tij janë rrezikuar interesat kombëtare amerikane.

 

 

Meurs: Shqipëria ka disa avantazhe në krahasim me vendet e tjera

 

Këln, 17 dhjetor 2003 - Wim Van Meurs, ekspert në Institutin e Politikës së Aplikuar në Mynih, duke folur përproblemet më të mëdha që e pengojnë Shqipërinë të funksionojë sipas standardeve të BE, tha se është ndoshta paradoksale, por për momentin Shqipëria ka disa avantazhe në krahasim me vendet e tjera.

 

"Megjithëse gjendja politike është disi e bllokuar, por brenda vendit gjendja është relativisht stabile.

 

Atje nuk ka përplasje etnike të gjera, prandaj nga katër shtetet e tjera mendoj se Shqipëria ka shanset më të mira për të nënshkruar një marrëveshje stabilizimi dhe asociimi", tha Meurs për "Dojçe velen". Sipas tij, "negociatat me BE kanë natyrë më shumë teknike dhe ato mund të vazhdojnë edhe kur mungon ministri i jashtëm".

 

 

Nuk ka lëvizje pozitive në ndjekjen e tregtarëve me qenie njerëzore në Evropën Juglindore

 

Vjenë, 17 dhjetor 2003 - Pakësimi i numrit të viktimave të identifkuara të tregtisë me njerëz në Evropën Juglindore është pasojë e zbatimit joefikas dhe mungesa e mundësive alternative për viktimat, theksohet në raportin më të ri për gjendjen në këtë fushë në Shqipëri, Bosnjë e Hercegovinë, Bullgari, Serbi e Mal të Zi, Kosovë, Moldavi dhe Rumani.

 

Në dokumentin e prezentuar në Vjenë paralajmërohet se nuk ka lëvizje pozitive kur është fjala për ndjekjen apo ndëshkimin e tregtarëve me qenie njerëzore.

 

 

Tirana dhe Podgorica thellojnë bashkëpunimin

 

Tiranë, 17 dhjetor 2003 - Sot në Tiranë u zhvillua një takim pune midis zv.ministrit të Punëve të Jashtme të Shqipërisë, Luan Hajdaraga dhe ministrit të Punëve të Jashtme të Malit të Zi, Dragisha Burzan.

Të dyja palët shfaqën kënaqësinë për ecurinë e bashkëpunimit shqiptaro-malazez, i cili është intensifikuar edhe më tej pas normalizimit dhe përparimit të marrëdhënieve ndërmjet Republikës së Shqipërisë dhe Serbisë e Malit të Zi, dhe konfirmuan vullnetin për t'i zhvilluar edhe më tej shkëmbimet në fusha me interes të ndërsjellë, thuhet në një komunikatë të lëshuar nga ky takim.

Në takim, ku merrnin pjesë edhe ekspertë nga dikastere të ndryshme të të dyja vendeve, u përvijuan disa nga drejtimet kryesore, ku do të përqëndrohen përpjekjet e dyanshme për konkretizimin e bashkëpunimit.

Palët ranë dakord që synimi i bashkëveprimit në të ardhmen do të jetë zhvillimi i projekteve dhe nismave, të cilat lehtësojnë shkëmbimet veçanërisht ndërmjet zonave kufitare dhe për fusha të tilla si transporti, mjedisi, turizmi, arsimi, shëndetësia, kultura, rendi, kufiri etj.

 

 

Në Gjermani arrestohet Idajet Beqiri

 

Konstanz, Gjermani, 17 dhjetor 2003 - Kreu i Partise se Unitetit Kombëtar dhe njekohësisht sekretar politik i FBKSH-se, është arrestuar të hënën në qytetin kufitar Konstanz të Gjermanise. Prej gati dy vitesh, Beqiri ishte larguar nga Shqiperia dhe mendohet se jetonte në Belgjike, ku kishte marrë azil politik. Ai akuzohet nga porkuroria shqiptare "për nxitje të urrejtjes nderetnike".

Vetëm tri javë pasi një gjykatë e Tiranës vendosi të dënojë Gafur Adilin dhe të shpalle të pafajshem Taip Mustafain, dy prej krerëve të AKSH-se, policia gjermane arrestoi Idajet Beqirin.

 

Ai ka deklaruar para medias vendase dhe të huaj si sekretari politik i AKSH- se, dhe mendohet se vepronte ne Belgjikë. Lajmi u pohua nga burime zyrtare të Ministrisë shqiptare të Rendit Publik ttë cilet thanë se ai ishte arrestuar dy dite më parë, ne qytetin kufitar të Gjermanise Konstanz.

 

Sipas burimeve mesohet se Beqiri po tentonte te kalonte kufirin për të hyre në këtë vend, ndersa gjate kontrollit te pasaportes, u ndalua prej policeve ne piken e kalimit te kufirit te ketij qyteti.

Më 25 shtator 2003, Idajet Beqiri shpallet në kërkim nga prokuroria shqiptare nën akuzënpër "nxitjen e urrejtjes etnike". Prokuroria dy muaj me pare solli ne Gjykaten e Tiranes dosjen per gjykimin e Beqirit se bashku me dy te pandehurit Taip Mustafa dhe Gafurr Adili mbi te cilet rendonte e njejta akuze.

 

Por ndersa Mustafa dhe Adili u gjykua nga Gjykata e Tiranes dhe tashme jane te lire per Beqirin u kerkua ndarja e çështjes, pasi i pandehuri nuk ishte i pranishem madje nuk perfaqesohej as nga avokati mbrojtes.

 

 

Parlamenti maqedonas ndërpreu punimet pa e miratuar Propozimligjin për zyrtarizimin e Universitetit të Tetovës

 

Shkup, 17 dhjetor 2003 - Parlamenti i Maqedonisë në orët e mbrëmjes ka ndërprerë punimet e djeshme pa e miratuar Propozimligjin e Qeverisë për zyrtarizimin e Universiteti të Tetovës. Kështu që Universiteti i Tetovës sot do ta shënojë dhjetëvjetorin e themelimit të këtij institucioni të parë unversitar me mësim në gjuhën shqipe në këtë vend.

Për shtyrjen e kësaj seance ndikuan akuzat e rrepta ndërmjet pozitës dhe opozitës. Miratimin e këtij ligji me fjalimet e tyre të gjatë në foltore e penguan deputetët opozitarë të partisë maqedonase VMRO-DPMN, duke spekuluar se formimi i Univeritetit shtetëror në Tetovë është vetëm qëllim politik i propozuesve dhe një institucion i egër.

Ndaj këtij reagimi, deklaroi ashpër deputeti i BDI-së Nevzat Bejta, i cili duke iu drejtuar deputetëve të opozitës, ka thënë se "nëse Universitetin e Tetovës e quani të egër, do të thotë se ju që keni përfunduar fakultete, jeni egërsira".

 

 

Holandezi Shefer merr drejtimin e NATO-s

 

Bruksel, 17 dhjetor 2003 - Në takimin e sotëm të NATO-s në krye të kësaj organizate veriatlantike erdhi shefi i gjertanishëm i diplomacisë holandeze Jap de Hop Shofer. Pasi që ka kryesuar takimin e sotëm të NATO-s sekretari i përgjithshëm i saj Xhorxh Robertson i ka dhënë fund mandatit të tij katërvjeçar.

 

 

Bejker ndodhet në Itali për diskutime mbi borxhin irakian

 

Romë, 17 dhjetor 2003 - I dërguari i posaçëm amerikan, Xhems Bejker, ndodhet sot në Itali, në kuadrin e turneut të tij evropian që synon uljen e borxhit irakian i cili kap miliarda dollarë. Zoti Bejker ka në plan të diskutojë për këtë çështje me kryeministrin italian Silvio Berlusconi.

Dje ai siguroi mbështetjen e Francës dhe Gjermanisë për lehtësimin e borxhit irakian.

Udhëheqësit francezë dhe gjermanë të cilët dje u takuan veç e veç me zotin Bejker, ranë dakord se i ashtuquajturi grup i Parisit duhet ta pakësojë në mënyrë të ndjeshme borxhin e Irakut.

Grupi i përbërë nga 19 vende kryesore huadhënëse do të vendosë më vonë se në çfarë mase do të pakësohet borxhi prej 40 miliardësh që Iraku u ka atyre.

Iraku u ka gjithashtu rreth 80 miliardë dollarë borxh vendeve që nuk bëjnë pjesë në këtë grup si edhe kreditorëve privatë.

 

 

Indi: Mbi 50 vetë kanë humbur jetën dhe tetë mijë të tjerë kanë mbetur pas strehë

 

Një Delhi, 17 dhjetor 2003 - Mbi 50 vetë kanë humbur jetën dhe tetë mijë të tjerë kanë mbetur pas strehë nga një ciklon i fuqishëm që përfshirë rajonet bregdetare të shtetit indian Andra Pradesh.

Era e fuqishme që frynte 120 km në orë, e shoqëruar me shirat e stuhishme, ka rrënuar shumë shtëpi dhe ka dëmtuar rrjetin elektrik dhe atë të telefonisë.

 

 

Burg i përjetshëm për dy krerët e grupit radikal grek "17 nëntori"

 

Athinë, 17 dhjetor 2003 - Dy krerët e grupit radikal grek "17 nëntori" janë dënuar me burgim të përjetshëm nga një gjykatë në Athinë. Aleksandros Giotopoulos dhe Dimitris Koufodinas janë ndër 15 personat që u shpallën fajtorë javën e kaluar për përfshirjen e tyre në aktivitetin kriminal 25 vjeçar të organizatës.

Ndër viktimat e krimeve të grupit, ka personalitete greke dhe të huaja, mes tyre një shef i CIA-s dhe një atashe britanik i mbrojtjes.

Giotopoulos, 59 vjeç, që u shpall fajtor për planifikimin e veprimeve të grupit, nuk e ka pranuar se kishte lidhje me organizatën.

Trupi gjykues, i përbërë prej tre gjykatësish, shpenzoi nëntë muaj duke dëgjuar dëshmi që lidhen me rreth 2.500 krime, përfshi këtu vrasje dhe plaçkitje.

Gjyqi ndaj tyre ishte i pari për terrorizëm në Greqi.

 

 

Nga shpërthimi i bombës në Bagdad, 17 vetë të vrarë

 

Bagdad, 17 dhjetor 2003 - Një bombë e cila ka shpërthyer të mërkurën në Bagdad, me një rezervuar benzine, ka shkaktuar vdekjen e 17 personave, të cilët ndodheshin në një kombibus njofton Rojter. Në shpërthimin që ndodhi në kuartin Baja poashtu janë plagosur disa vetë.

Vazhdimi i dhunës është shenjë se shpresat, që me arrestimin e Sadam Huseinit do të pakësohen sulmet guerile, ishin të kota. Bombat e vendosura nëpër rrugë dhe skaj rrugës janë metoda të preferuara të guerilëve kundër amerikanëve.

 

 

Presidenti Bush: Sadam Huseini duhet të dënohet me vdekje

 

Uashington, 17 dhjetor 2003 - Në një intervistë me rrjetin televiziv ABC, Presidenti Bush tha se kapja e Sadam Huseinit ishte një moment gëzimi për popullin irakian, i cili, tha ai, i ka të gjitha aftësitë të gjykojë vetë ish-udhëheqësit e tij. "Mendoj se ai duhet të dënohet me vdekje për ato që ka bërë kundër popullit të tij.

 

Ai është torturues e vrasës, regjimi i tij kishte dhoma të posaçme përdhunimi. Sadam Huseini është një tiran i neveritshëm, i cili meriton dënimin më të rëndë që parashikon drejtësia. Por, kjo do të vendoset nga qytetarët irakianë dhe jo nga presidenti i Shteteve të Bashkuara".

Nëse gjykohet në Irak, siç pritet, Sadam Huseinit mund të dënohet me vdekje. Dënimi më i rëndë i dhënë nga një gjykatë e Kombeve të Bashkuara do të ishte me burgim të përjetshëm. Disa udhëheqës botërorë, mes të cilëve Sekretari i Përgjithshëm i OKB-së, Kofi Anan, dhe një zëdhënës i Vatikanit, janë shprehur kundër dënimit të Sadam Huseinit me vdekje.

 

 

Rrëzohet një avion ushtarak francez, gjashtë vetë kanë humbur jetën

 

Paris, 17 dhjetor 2003 - Një avion ushtarak francez është rrëzuar në jugperendim të vendit. Më atë rast gjashtë vetë kanë humbur jetën, ndërkohë që vazhdojnë kërkimet për viktimën e shtatë, kanë konfirmuar burimet zyrtare në rajonin Ariezh.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |