Kuvendi komunal i Podujevës mbajti Senacën e radhës me publikun



“E di se kërkesat dhe nevojat janë të shumta, por mundësitë janë të kufizuara. Me ndihmën dhe përkrahjen tuaj, autoritet që i keni zgjedhur do të bëjnë më shumë”, u deklaroi qytetarëve përfaqësuesi i UNMIK-ut z. Bangash. Ndërkaq Kryetari Veliu në përfundim tha se të gjitha vërejtjet tuaja, kërkesat dhe sugjerimet e propozimet do të ndihmojnë udhëheqjen komunale që të planifikojë aktivitet e veta më me sukses.

Bekim TOÇANI

Podujevë, 17 dhjetor 2003 (TN) – Jemi të vetëdijshëm se kërkesat dhe nevojat janë të shumta, por ato nuk mund të bëhen për një vit. Për këtë duhet edhe kohë edhe mjete edhe bashkëpunim të ndërsjellë komuna-qytetari, tha ndër të tjera kryetari i komunës së Podujevës z. Agim Veliu në senacën me publikun e cila u mbajt sot në sallën e Kuvendit komunal. Kjo senacë në rendin e punës pati buxhetin për vitin 2004, me theks të veçantë projektet me përparësi dhe çështjen e tatimit në pronë. Në këtë seancë pos udhëheqjes dhe qeverisë komunale morën pjesë shumë qytetarë që paraqitën idetë, vërejtjet dhe sugjerimet e propozimet e veta.

Duke hapur sencën e radhës me publikun Kryetari Agim Veliu tha: Këtë mbledhje me publikun kisha dashur ta bëjmë në atë mënyrë që të Kuvendojmë lirshëm për çështjet e shtruara në Rendin e Punës e që prekin interesat dhe nevojat tona e njëherit janë në përgjegjësitë e nivelit të komunës, për tu komunikuar pjesëmarrësve se për kuvendimin e sotëm qytetarët janë njoftuar me kohë përmes mediave lokale por përmes thirrjes publike.

Në vazhdim Veliu shkurtimisht i njoftoi qytetarët për punët që janë bërë, objektet e infratsrukturës që janë kryer dhe aktvitete tjera duke i ilustruar këto me shifra e fakte. Afër 15 km rrrugë të asfaltuara, rrjete kanalizmi të ujërave të zeza dhe atmosferike rreth 3 km, kyçjen e mbi 11 fshatrave në rrjetin e ujësjellësit afër 60 km gjatësi, projekte që janë realizuar nga qytetarët dhe komuna.

Kryetari Veliu përmendi rreth 50 km rrugë të riparuara në fshatra, ndërtimin dhe riparimin e shkollave, ambulancave, sigurimin e mjeteve për palestrën sportive nga Ministria për sport e kulturë, dy objektet kapitale transformatorin e ri me fuqi 80 Mw dhe Deponinë e mbeturinave në Dumnicë, të cilat janë financuar me mjete të donatorëve, përkatësisht të BE dhe miniprojekte tjera.

Z. Veliu tha se qytetarët i çmojnë më së miri vlerën e punëve të kryera e të cilat janë bërë publike përmes Drejtorisë për Marrëdhënie me Publikun dhe Demokratizim, e cila sipas kryetarit Veliu ka bërë një punë të vyeshme në planin e bërjes publike dhe përmbushjes së kushtit të bërjes transparente të aktiviteteve dhe ushtrimit të përgjegjësive në lëmin e Shërbimeve publike për qytetarët, nga komuna.

“Për të pasur një jetë më të kulturuar, një standard më të përparuar duhet të kontribuojmë me punë e kompetencë nga përgjegjësit në komunë, vetëdije dhe përgjegjësi qytetare në përmbushjen e detyrimeve në komunitet” tha kryetari Veliu duke shtuar se konceptimi dhe strukturimi i agjendës së kësaj mbledhjeje ka për qëllim shtrimin dhe kuvendimin bashkërisht të buxhetit për vitin vijues, përcaktimin e projekteve me përparësi për vitin 2004, përgjegjësitë e komunës dhe detyrat e qytetarëve.

Kryetari Veliu njoftoi pjesëmarrësit se Projektbuxheti për vitin 2004 është 7.999.145 euro apo 24% më i madh se vitin 2003 dhe kërkoi nga ata që në përputhje me Rendin e punës, që qytetarët të paraqesin pikëpamjet, propozimet dhe idetë e tyre por edhe të mjedisit dhe kategorisë që ata përfaqësojnë, në mënyrë që të “kemi një vit edhe më të suksesshëm dhe kompatibël me nevojat dhe interesat e qytetarëve”, ka theksuar në fund të fjalës kryetari i Kuvendit komunal të Podujevës.

Në vazhdim kryetari ua dha fjalën qytetarëve duke kërkuar nga ata që lirshëm ti shtrojnë brengat e tyre, të propozojnë, të bëjnë vërejtejt dhe propozimet e tyre. Islam Haziri nga fshati Repë, përgëzoi udhëheqjen komunale për investimet në rrugët, shkollat, furnizimin me energji elektrike dhe kërkoi të bëhet më shumë për jetën kulturore e sportive në fshatra në mënyrë që të mbahet rinia në fshatra, ndërkaq që Ekrem Shala kërkoi ndriçim për qendrën, rregullim të hapsirës para dhe pas banesave, rregull në rrugë dhe shkolla si dhe investime e kujdes më të veçantë për kulturën dhe arsimin.

Halil Halili nga Braina tha se ndërtimi i rrugës deri tek vija kufitare është një e arritur e madhe e komunës, Rifat Hajdari nga Podujeva kërkoi mirëmbajtje të rrugëve si dhe përkujdesje për klubin futbollistik “Llapi” themelues i së cilës është Kuvendi komunal. Sheqir Zeneli sugjeroi udhëheqjen komunale që të angazhohet më shumë rreth uzurpimit të pasurisë publike, pranimit të palëve si dhe punë më të avansuar në projektet që duhet ti pranojnë dhe mbikqyrin ekspertët, kurse Selman Salihu kërkoi më shumë përkrahje për bujqësinë, blegtorinë dhe investime në këto fusha.

Përfaqësuesi i HANDIKOS-it foli rreth brengave të personave me aftësi të kufizuar si dhe kërkoi një lokal më të përshtatshëm për punë derisa mërgimtari Fitim Zeneli kërkoi hapjen e një zyreje për kategorinë e mërgatës, me theks të veçantë për problemet rreth rregullimit të dokumentacionit. Në diskutimin e sotëm publik brengat e tyre i paraqitën edhe Enver Latifi, Esat Mehmeti, Hamit Aliu, Ramadan Mahmuti, Fetah Haziri, Mehdi Rushiti, Sheqir Osmani, Bejtush Dushi, Qerim Shabani, Shaban Ahmeti, etj. që përmblidhen në vërejtjet rreth krijimit të rregullit në qytet, ndërtimit të shkollave të reja dhe përparimit të procesit arsimor si dhe përparimit të standardit jetësor në fshatra dhe qyetet.

Në diskutim mori pjesë edhe përfaqësuesi i UNMIK-ut për Podujevën z. Shahzad Khan Bangash i cili përgëzoi komunën për sukseset e arritura me buxhetin vetjak por edhe qytetarët për angazhimin e tyre në krijimin e jetës institucionale dhe më të mirë për të gjithë. “E di se kërkesat dhe nevojat janë të shumta, por mundësitë janë të kufizuara. Me ndihmën dhe përkrahjen tuaj, autoritet që i keni zgjedhur do të bëjnë më shumë”, u deklaroi qytetarëve z. Bangash. Ndërkaq Kryetari Veliu në përfundim tha se të gjitha vërejtjet tuaja, kërkesat dhe sugjerimet e propozimet do të ndihmojnë udhëheqjen komunale që të planifikojë aktivitet e veta më me sukses për vitin 2004.