|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

VIZITË E SUKSESSHME E NJË DELEGACIONI`TË PARLAMENTIT TË KOSOVËS NË VJENË

15 dhjetor 2003 / TN

 

Skënder GASHI - Vjenë

 

Nga e martja (9 dhjetor) deri të premten (13 dhjetor, 2003) një delegacion i Parlametit të Kosovës, i përbërë nga kryetarë të komisioneve të ekonomisë, të financave, të tregtisë e të industrisë dhe të atij të buxhetit të këtij parlamenti e zhvilloi në Vjenë një aktivitet të ngjeshur me kontakte pune që i pati me asociacione homologe - kryesisht të paralamentit të Austrisë. Vizita e këtij delegacioni parlamenar të Kosovës u jetësua me mbështetjen finansiare të Fondacionit gjerman Friedrich Naumann.

 

Pas takimit të parë,  cili kishte të bënte me njohjen e delegacionit kosovar me të dhënat më relevante për shtetin e Austrisë në pikëvështrimin historik e aktual, delegacioni kosovar u prit së pari nga zyrtarë të OSBE-së. Me këtë rast delegacioni kosovar u njoftua me strukturën e këtij asociacioni – me theks të veçantë mbi aktivitetin e OSBE-së në Kosovë. Nga z. Nitzsche (Niçe) – përgjegjës i OSBE-së për Meidia e për Informim - u skicua struktura dhe fushëveprimi i këtij institucioni në përgjithësi me theks të veçantë mbi kontributin e tij sidomos në organizimin e zgjedhjeve nacionale të fundit dhe të atyre të ardhshmeve në Kosovë.

 

Grupi i parlamentarëve kosovarë, i përfaqësuar nga kuvendarë të LDK, PDK, nga një administrator i Parlamentit të Kosovës dhe nga një përfaqësuese e partisë së minoritetit turk u prit, në vazhdim, nga Parlamenti i Austrisë me ç’rast delegacioni kosovar u njoftua me strukturën dhe me mënyrën e funskionimit të parlamentarizmit austriak. Në këtë kuadër, delegacioni parlamentar kosovar pati takime të ndara pune me komisionet austriake homologe, përkatësisht me kryetarë të komisioneve të buxhetit dhe të atij të ekonomisë në kuadër të parlamentit të Austrisë.

 

E vlefshme për t’u përmendur në këtë mes është dëshira e gatishmëria e shprehur individualisht - në emër të komisioneve që i drejtojnë në kuadër të parlamentit austriak- e kryetarëve të komisioneve gjegjëse austriake për të mbajtur kontakte intensive me kolegët e tyre kosovarë me qëllim të vënies në disponim të përvojave të tyre (austriake) – punë që do të bëhej me kontakte pune (edhe) në Prishtinë. Me shumë rëndësi për t’u nënvizuar është në këtë mes se bashkëbiseduesit kompetentë austriakë shfaqën interesim të madh e serioz për gjetjen e shtigjeve e të mundësive të inkuadrimit të mëtejshëm, përkatësisht të ngulitjes së ndërmarrjeve austriake të veçanta në fusha të ndryshme të ekonomisë në Kosovë. Si edhe në takimet e mëparëshme të punës, edhe këtu përfaqësuesit e delegacionit kosovar ishin në nivelin profesional plotësisht të barabartë me kolegët e tyre austriakë dhe me shumë arësye mund të pritet që jo shumë largë do të konkretiziohet angazhimi i kapitalit auistriak në fusha konkrete të eknomisë së Kosovës.

 

Me interes të veçantë ishte takimi i delegacionit parlamentar të Kosovës me presidentin shumëvjeçar, tani kryetar i dytë i Parlamentit të Austrisë dhe kandidat potencial për president të të këtij shteti, zotin Heinz Fischer (Hajnc Fisher). Zoti Fischer përmendi, në fillim të fjalës së tij, se në shtatorin e vjemë kishte qenë mysafir i Parlamentit të Kosovës; se e njeh gjendjen në këtë vend si dhe pozitën aktuale të Kosovë në të gjitha rrafshet e jetës.

 

Për t’u veçuar është përgjegjja e tij pyetjes së njërit nga parlamentarë të Kosovës për mundësinë e anëtarësimit të Kosovës në Bashkësinë Europiane. I zoti i Shtpisë e krahasoi pozitën e Kosovës në këtë kontekst me atë të Republikës së ndarë të Qipros. Anëtarësimi i Kosovës në BE është, kështu tha zoti Fischer, tani për tani i varur nga statusi politik final i Kosovës. Për këtë (status final politik) zoti Fischer do ta dëshironte një zgjidhje paqësore e të drejtë. Porosia finale e këtij burri të shtetit ishte që, në fazën e fundit të zgjerimit të BE, edhe Kosova - bashkë me disa nga vendet përreth- do të jetë kandidate për t’u bërë anëtare e familjes së Bashkësisë Europiane. Me këtë rast, z. Fischer e shprehu edhe keqardhjen e tij të thellë që përfaqësuesit e minoritetit serb në parlamentin e Kosovës e refuzuan udhëtimin për në Vjenë bashkë me kolegët e tyre kosovarë.

 

Takim shumë i frytshëm i delegacionit kosovar ishte ai që e pati me kolegë të tyre, përkatësisht me ekspertë gjermanë e austriakë të fushës së energjitikës. Më shumë se të gjitha takimet e tjera, ky i fundit karakterizohet për mungesë kurtuazie, gjuhe diplomatike e të gjuhës dhe sjelljes protokolare. Këtu, si edhe në të gjitha takimet e tjera, kuvendarët kosovarë patën rastin që me kompetencë në rrafshin profesional, të shkëmbejnë mendime e përvoja me ekspertët e pranishëm gjermanë e austriakë. Të dy këta të fundit e përdorën në këtë takim fort miqësor një fjalor të përshkuar nga një sinqeritet shumë transparent.

 

Në këtë takim, rezultoi e qartë gjendja ekzistuese, nevojat, mundësitë dhe perspektivat e zhvillimit të energjetikës, me theks të veçantë mbi segmentin e energjisë elektrike, në Kosovë (edhe) në relacion e në krahasim me gjendjen në këtë fushë në shtetet fqinje të drejtpërdrejta të Kosovës (Shqipëri, Mal i Zi, Maqedoni, Serbi) dhe të fqinjëve të gardhit të dytë e të tretë si Bullgaria, Rumania e Republika Serbe në shtetin e Bosnje Herzegovinës) si edhe interesimi i motivuar dhe i mbështetur fort mbi realitetin ekzistues dhe të së mundshmes (tani për tani në pritje e në vëzhgim të vëmendshëm, prej investitori potencial, të zhvillimeve politike, përkatësisht të formës së statusit final politik- juridik të vendit tonë) i palës gjermane dhe i asaj austriake për të qenë të dyja veç e veç aktivisht të pranishme si investitorë potencialë në këtë segment të ekonomisë së Kosovës. Në këtë kontekst, pritet një vizitë pune së pakut e ekspertit austriak të energjitikës dhe njohësit të mirë të rrethanave të gjithëmbarshme në Kosovë – z. Dr. Volker Kier.