E hëne, 15 dhjetor 2003

E hëne, 15 dhjetor 2003

Përmbajtja:

Presidenti Rugova përgëzon Presidentin Bush për arrestimin e Sadam Huseinit
Filluan punimet në ndërtimin e rrugës Shtime-Godancë dhe Fushë -Kosovë - Albanë e Madhe
Ministri turk i Shëndetësisë viziton Kosovën
Nesër mbahet takimi i parë i Këshillit të Asociacionit të Komunave te Kosovës
Në Vjenë sot fillon "Projekti për drejtësi në kohë të tranzicionit"
Në Vitomiricë të Pejës është plagosur një pjesëtar i SHPK-së
Podujevë: Afro 7 mijë nënshkrime janë mbledhur në peticionin për gjetjen e pengjeve të pagjetura
U identifikuan nëntë persona të zhdukur nga Komuna e Pejës
Në fshatin Mamushë të Prizrenit është paraqitur epidemia e verdhzës ku janë sëmurë 43 fëmijë parashkollarë
Përkujtohet Mujë Krasniqi dhe 152 dëshmorët në pesëvjetorin e rënies
Bashkimi i Intelektualëve Shqiptarë në Zvicër mbështet vendimin për pezullimin e ligjeve serbe
Shqipëria dhe Koreja nënshkruan Marrëveshjen "Për Mbrojtjen dhe Nxitjen e Investimeve"
Solana sot në Beograd diskuton edhe për Kosovën
Kongresi i PS rizgjodhi kryetar të partisë Fatos Nanon
Sot në Maqedoni fillon Misioni policor i BE-së "Proksima"
Çoviq i bëri thirrje Holkerit që ta ndërpresë procesin e privatizimit në Kosovë
Në Maqedoni sot përfundon aksioni për dorëzimin vullnetar të armëve dhe materieve shpërthyese
Ish gjenerali i NATO-s dëshmon në Hagë kudnër Millosheviqit
Irani padit Sadamin para gjykatës ndërkomëtare
Sadam Huseini u ka ofruar bisedime trupave amerikane që e kishin arrestuar
Vriten dy palestinezë në Rripin e Gazës
Musharaf i shpëtoi një sulmi
Në dy shpërthime afër Bagdadit janë vrarë të paktën 10 vetë dhe shumë të tjerë janë plagosur
Uashingtoni: Sadam Huseini duhet të nxirret para drejtësisë
Sadami nuk po bashkëpunon me hetuesit
Statusi i Sadamit

Presidenti Rugova përgëzon Presidentin Bush për arrestimin e Sadam Huseinit

Prishtinë, 15 dhjetor 2003 - Presidenti i Kosovës, Dr. Ibrahim Rugova, ka mirëpritur arrestimin e ish-dikatorit irakian Sadam Husein. Në një letër që Presidenti Rugova i ka dërguar Presidentit amerikan thuhet:
"Ju përgëzoj për arrestimin e ish-diktatorit të Irakut Sadam Husein nga forcat e fuqishme të SHBA-ve.
Kjo është një ngjarje me rëndësi për popullin e Irakut dhe për SHBA-të, që kanë rol udhëheqës për paqe dhe liri të kombeve në botë.

Kjo ngjarje është pritur me gëzim nga populli i vendit tim, që më së miri e di çmimin e lirisë dhe të pavarësisë, që sot e gëzon falë vendit Tuaj dhe aleatëve Tuaj", thuhet në letrën e Presidentit Rugova.


Filluan punimet në ndërtimin e rrugës Shtime-Godancë dhe Fushë -Kosovë - Albanë e Madhe

Shtime/Fushë Kosovë, 15 dhjetor 2003 - Sot në mënyrë solemne fillaun punimet në ndërtimin e rrugës Shtime-Godancë, e gjatë 4.6 km. Mjetet për ndërtimin e këtij aksi rrugor janë siguruar nga Ministria e Transportit dhe Postë Telekomunikacionit dhe kapin shumën prej 500 mijë eurosh.
Në nje ceremoni të organizuar me këtë rast fillimin e punimeve për ndërtimin e kësaj rruge e bëri ministri i Transportit dhe Postë-Telekomunikacionit Zef Morina dhe kryetari i Kuvendit të Komunës z.Fehmi Mujota.
Poashtu sot solemnisht filluan punimet në ndërtimin e një aksi tjetër rrugor, rruga Fushë -Kosovë - Albanë e Madhe. Fillimin e ndërtimit të këtij aksi rrugor e bëri ministri i MTPT Zef Morina dhe kryetari i Kuvendit të komunës së Fushë-Kosovës, Skender Zogaj.


Ministri turk i Shëndetësisë viziton Kosovën

Prishtinë, 15 dhjetor 2003 - Me ftesë të ministres së Shëndetësisë, Dr.Resmije Mumxhi, më 17 dhjetornë Kosovë arrin ministri i Shëndetësisë së Turqisë, Dr. Rexhep Akdag.
Gjatë vizitës dyditore në Kosovë, ministri turk i Shëndetësisë do të takohet me Kryeministrin e Kosovës, Dr. Bajram Rexhepin dhe me zyrtarë të tjerë të lartë të Qeverisë.
Ministri i Shëndetësisë së Turqisë dhe Ministrja e Shëndetësisë së Kosovës do të nënshkruajnë një Marrëveshje bashkëpunimi mes dy ministrive. Këtë marrëveshje do ta nënshkruaj edhe Zyrtari i lartë i UNMIK-ut, Françekso Bastali.
Në Qendrën Klinike Universitare do të nënshkruhet dhe publikohet Protokolli i Bashkëpunimit të "Spitaleve Simotra" - mes QKUK-së dhe Spitalit kardiokirurgjik të Stambollit e Spitalit Ortopedik të Ankarasë.


Nesër mbahet takimi i parë i Këshillit të Asociacionit të Komunave te Kosovës

Prishitnë, 15 dhjetor 2003 - Të martën do të mbahet takimi i parë i Këshillit të Asociacionit të Komunave te Kosoves (AKK) pas zgjedhjeve të dyta të mbajtura në tetor.
Në këtë takim do të diskutohet për projektet e vitit 2004 të AKK-së, problemet e komunave lidhur me Regjistrimin Civil dhe atë të Bizneseve, Taksa mbi pronën etj.
Takimi do të mbahet ne Hotelin "Grand" në Prishtinë në orën 14.00.


Në Vjenë sot fillon "Projekti për drejtësi në kohë të tranzicionit"

Vjenë, 15 dhjetor 2003 - Në Vjenë të Austrisë fillon sot tryeza ndërkombëtare "Projekti për drejtësi në kohë të tranzicionit", organizuar nga OSBE-ja dhe nga ish-shefi i misionit verifikues të OSBE-së, në Kosovë Uiliam Uoker dhe Tim Filips nga Universiteti i Harvardit.
Në këtë tryezë pritet të marrin pjesë zyrtarët më të lartë të institucioneve vendore e liderë të partive politike. Kjo tryezë do të kryesohet nga Volfgang Petriç dhe Tomas Hamarberg.


Në Vitomiricë të Pejës është plagosur një pjesëtar i SHPK-së

Pejë, 15 dhjetor 2003 - Në Vitmoricë të Pejës është plagosur me armë zjarri një pjesëtar i Shërbimit Policor të Kosovës, njoftuan zyrtarët e policisë së UNMIK-ut. Incidenti sipas zëdhënëses së policisë Anxhela Xhozef ka ndodhur gjatë një zënke ndërmjet dy pjesëtarëve të SHPK-së të cilët nuk ishin në detyrë dhe pronarit të kafiterisë "Bani" në Vitomiricë. Njoftohet se pronari i kafiterisë është arrestuar.
Pronari i kafiterisë ka mundur ta marrë revolën e njërit nga pjesëtarët e SHPK-së dhe më pas e ka plagosur njërin prej tyre në atë moment. Bëhet e ditur se polici i plagosur tash gjendet në qendrën spitalore të Pejës dhe nuk është në rrezik jete. Tash për tash rrethanat e këtij incidenti nuk dihen, kurse policia është duke i kryer hetimet.


Podujevë: Afro 7 mijë nënshkrime janë mbledhur në peticionin për gjetjen e pengjeve të pagjetura

Podujevë, 15 dhjetor 2003 - Aksioni i Këshillit Koordinues i Asociacioneve Familjare të Pengjeve, të zhdukurve dhe familjeve me viktima të luftës (KKAF) dhe Rrjeti i aktivistëve "Kosova Action Network" kanë grumbulluar rreth 7.000 nënshkrime në komunën e Podujevës. Organizatorët thonë se ky aksion vazhdon ende në terren.

Sipas organizatorëve të aksionit "Të gjithëve po na mungojnë", numri i pengjeve dhe i personave të zhdukur është mbi 3500 persona.
Në nivel të Kosovës, sipas organizatorit, janë grumbulluar 50 mijë nënshkrime.


U identifikuan nëntë persona të zhdukur nga Komuna e Pejës

Pejë, 15 dhjetor 2003 - Kryetari i Kuvendit komunal të Pejës Ali Lajçi dhe kryetari i Këshillit rajonal KMDLNBJ-së Tahir Demaj i kanë vizituar dje familjet e personave të zhdukur nga Komuna e Pejës, të cilët u identifikuan ditë më parë në Institutin e Mjekësisë Ligjore në Rahovec.

Me këtë rast kryetari Ali Lajçi familjarëve të viktimave të identifikuara u shprehu ngushëllime të sinqerta për humbjen e më të dashurëve të tyre. Familjarët e viktimave falënderuan Lajçin dhe institucionet e Kosovës për angazhimin e tyre për ndriçimin e fatit të personave të zhdukur.
Nga nëntë personat e identifikuar nga komuna e Pejës janë: Milazim Berisha, Milaim Hoxha, Afrim Buçaj, Rexhep Smajli, Malë Kelmendi, Enver Gashi dhe Ismet Berisha të gjithë nga lagja Dardania e Pejës dhe Gani Shoshi e Ramë Abdullahu nga fshati Lybeniq i Pejës. Dita e varrimit të eshtrave të personave të identifikuar nga Komuna e Pejës do të caktohet më vonë.
Ndryshe prej përfundimit të luftës në Kosovë në Shoqatën për Persona të Zhdukur në Pejë janë evidencuar 124 veta të humbur, prej tyre deri më sot janë identifikuar 38 persona kurse për fatin e 86 të zhdukurve të tjerë nuk dihet as sot e kësaj dite.


Në fshatin Mamushë të Prizrenit është paraqitur epidemia e verdhzës ku janë sëmurë 43 fëmijë parashkollarë

Prizren, 15 dhjetor 2003 - Në fshatin Mamushë të Prizrenit është paraqitur epidemia e verdhzës, hepatiti viral A. Nga kjo sëmundje janë paraqitur 43 raste të gjithë fëmijë të moshës parashkollore. Pas anketimit që i kanë bërë ekipet mjekësore në këtë 43 raste të prekura nga hepatiti viral A, në 39 raste është verifikuar se ata janë të sëmurë prej muajit shtator.

Në bazë të përpunimit të dhënave është konstatuar se ka epidemi, ngase 11 raste janë familjare, që do të thotë se ka raste kur në një familje nga kjo sëmundje ngjitëse janë prekur dy ose tre fëmijë.


Përkujtohet Mujë Krasniqi dhe 152 dëshmorët në pesëvjetorin e rënies

Prishtinë, 15 dhejtor - Me rastin e pesëvjetorin e rënies së Mujë Krasniqit i njohur me nofkën komandant "Kapuçi" dhe të 152 dëshmorëve, dje në Teatrin Kombëtar Zona e Parë Mbrojtëse e TMK-së organizoi një akademi përkujtimore. Ndërkaq në vendlindjen e Mujë Krasniqit në fshatin Çabiq të Klinës, u vu gurthemeli i kompleksit memorial "Mujë Krasniqi".


Bashkimi i Intelektualëve Shqiptarë në Zvicër mbështet vendimin për pezullimin e ligjeve serbe

Bernë, 15 dhjetor 2003 - Kryesia e Bashkimit të Intelektualëve Shqiptarë në Zvicër (BISHZ) e mbështet pa rezervë Vendimin e drejtë të Kuvendit legjitim të Kosovës të datës 11 dhjetor 2003 për pezullimin e ligjeve diskriminuese serbe në Kosovë të miratuara pas 22 marsit të vitit 1989. Me këtë vendim Kuvendi i Kosovës në mënyrë të drejtë ka suspenduar ligjet dhe aktet e tjera diskriminuese të cilat me forcë i janë imponuar popullit të Kosovës.
BISHZ shfaq indinjatë të thellë për anulimin e vendimit nga shefi i UNMIK-ut, z. Hari Holkeri. Është i pakontestueshëm fakti se mu këto ligje e revoltuan popullin e Kosovës i cili pa hamendje u hodh në luftë, duke mos kursyer as gjakun e vet, vetëm e vetëm për tu liruar nga po këto ligje të cilat tani UNMIK-u dhe Zoti Holker i mbrojnë.
Duhet ta dinë të gjithë ata që merren me Kosovën se ligjet e lartpërmendura e sollën NATO-n dhe UNMIK-un në Kosovë. Andaj, mbrojtja e ligjeve të tilla diskriminuese do ta vinte në pikëpyetje legjimitetin e tyre në Kosovë.
Duke patur respekt të veçantë për përkrahjen e madhe të bashkësisë ndërkombëtare që i dha dhe po i jep Popullit të Kosovës, i bëjmë thirrje Holkerit që të rishqyrtojë vendimin e tij dhe të aprovojë Vendimin e Kuvendit të Kosovës.


Shqipëria dhe Koreja nënshkruan Marrëveshjen "Për Mbrojtjen dhe Nxitjen e Investimeve"

Tiranë, 15 dhjetor 2003 - Sot, në Ministrinë e Punëve të Jashtme të Shqipërisë u nënshkrua Marreveshja "Për Mbrojtjen dhe Nxitjen e Investimeve" ndërmjet Republikës së Shqipërisë dhe Republikës së Koresë.
Në emër të Qeverisë shqiptare kjo marrëveshje u nënshkrua nga Zv/Ministri i Punëve të Jashtme, Luan Hajdaraga, ndërsa për Qeverinë e Republikës së Koresë nga Ambasadori i Jashtezakonshem dhe Fuqiplote i Republikes së Koresë në Shqiperi, Tae Kuy Han.
Me këtë marrëveshje synohet tëi hapet rrugë investimeve të rëndësishme të Qeverisë së Koresë në Shqipëri dhe konkretisht Marreveshjes mjaft të favorshme të kredisë prej 25 milion dollarësh për zonat rurale dhe kryesisht në Vlorë, e cila parashikohet të nënshkruhet në fund të janarit të vitit 2004.


Solana sot në Beograd diskuton edhe për Kosovën

Beograd, 15 dhjetor 2003 - Përfaqësuesi i lartë i Bashkimit Evropian për politikë të jashtme Havier Solana sot viziton Beogradin. Solana në Beograd do të takohet me krerët e Serbisë dhe Malit të Zi për të diskutuar për gjendjen në prag të zgjedhjeve parlamentare serbe më 28 dhjetor.
Solana do të bisedojë në Beograd edhe për Kosovën dhe do të theksojë qartë se BE mbështet nismën e Grupit të Kontaktit për zbatimin e standardeve për Kosovën.
BE mbështet politikën e standardeve para statusit dhe konsideron se serbët e Kosovës kanë një rast të qartë që nëpërmjet këtij procesi të zgjidhin atë që i mundon dhe çfarë dëshirojnë të arrijnë.


Kongresi i PS rizgjodhi kryetar të partisë Fatos Nanon

Tiranë, 15 dhjetor 2003 - Kongresi i Gjashtë i Partisë Socialiste të Shqipërisë rizgjodhi kryetar të partisë Fatos Nanon, ndërkaq dy kandidatët e tjerë Edi Rama dhe Rexhep Meidani së bashku morën vetëm 20 për qind të votave, që grumbulloi Fatos Nano. Ai fitoi 456 vota.

Ndërkaq, sekretar i përgjithshëm i socialistëve u zgjodh Gramos Ruçi. Për herë të parë në historinë 13-vjeçare të Partisë Socialiste të Shqipërisë kjo parti vuri rregulla të rrepta dhe dënoi me përjashtim deputetët e saj që mendojnë ndryshe nga mazhuranca e grupit parlamentar.
Tani pritet të shihet se si do të jetë balanca e forcave në përbërjen e Komitetit të përgjithshëm drejtues të kësaj partie.
Kongresi ligjëroi përjashtimet nga grupi parlamentar për deputetët që votojnë kundër vendimit politik të partisë.
Ish-kryeministri Ilir Meta e quajti të dështuar Kongresin e PSSH-së. Edi Rama tha se socialistët në Shqipëri nuk duhet të lejojnë që lidershipi aktual i socialistëve t'i çojë si një tufë delesh në opozitë.


Sot në Maqedoni fillon Misioni policor i BE-së "Proksima"

Shkup, 15 dhjetor 2003 - Sot në Maqedoni fillon Misioni policor i BE-së "Proksima". Një nga detyrat e këtij Misioni është aftësimi i policisë maqedonase në luftën kundër krimit të organizuar. Misioni "Proksima" do të fillojë më 15 dhjetor 2003 dhe shpresohet se deri në atë kohë do të ketë deri 50 policë ndërkombëtarë.

Do të fillohet në Shkup, Tetovë dhe Kumanovë, pastaj më vonë do të arrijnë edhe anëtarët e tjerë të Misioni, ku ata do të shtrihen edhe në Gostivar, Dibër, Ohër, Strugë dhe në Kërçovë. Në fund numri i policëve ndërkombëtarë do të jetë 230, ndërkaq 150 prej tyre do të punojnë në terren.


Çoviq i bëri thirrje Holkerit që ta ndërpresë procesin e privatizimit në Kosovë

Beograd, 15 dhejtor - Zëvendëskryeministri serb Nebojsha Çoviq i ngarkuar për Kosovën i ka bërë thirrje shefit të UNMIK-ut Hari Holkerit që ta ndërpresë procesin e privatizimit në Kosovë. Në të kundërtën ka thënë Çoviq Serbia do të ankohet në Gjykatën Ndërkombëtare.


Në Maqedoni sot përfundon aksioni për dorëzimin vullnetar të armëve dhe materieve shpërthyese
¨
Shkup, 15 dhjetor 2003 - Në Maqedoni sot përfundon aksioni për dorëzimin vullnetar të armëve dhe materieve shpërthyese. Grupi Koordinues për realizimin e këtij operacioni që ka filluar me 1 nëntor bëri të ditur se janë dorëzuar rreth 5000 copë armë të llojeve të ndryshme. Ndërkaq ky numër deri në përfundimin e aksionit "Amnisti për armët" pritet të jetë edhe më i lartë.
"Prej fillimit të realizimit të aksionit gjithësej janë dorëzuar mbi 80 mijë copë municione të kalibrit të ndryshëm dhe mbi 10 mijë materie shpërthyese", tha zëdhënësi i Trupit kordinues Muhamet Hoxha. Sipas tij trupi koordinues është shprehur i kënaqur nga mbështetja që i ka dhënë popullata realizimit të opracionit për dorëzimin vullnetar të armëve.


Ish gjenerali i NATO-s dëshmon në Hagë kudnër Millosheviqit

Hagë, 15 dhjetor 2003 - Dëshmia e Wesley Clarkut është pjesë e një marrëveshjeje të paprecedent midis gjykatës së Hagës dhe qeverisë amerikane.
Zoti Clark do të dëshmojë në një sesion me dyer të mbyllura.
Pastaj Uashingtoni ka dy ditë kohë për të kërkuar që pjesë të dëshmisë që do të konsiderohen se mund të dëmtojnë interesat e tij kombëtare të mos bëhen publike.
Të premten pritet të bëhet publike një pjesë e redaktuar e dëshmisë së tij.
Është e sigurt se përballja midis Wesley Clarkut dhe Slobodan Milosheviqit do të kthehet në një debat politik. Zoti Clark tha se ai priste të jepte informacione për më shumë se 100 orë takime gjatë katër viteve me Millosheviçin gjatë viteve 1990.


Irani padit Sadamin para gjykatës ndërkomëtare

Teheran, 15 dhjetor 2003 - Irani ka ndërmend që para gjykatës ndërkomëtare të akuzojë ish-presidentin e Irakut Sadam Husein për shkak të krimeve që i ka bërë mbi Iranin, ka thënë të hënën zëdhënësi i Qeverisë iraniane.
"Irakianët kanë të drejtë të parët të akuzojnë Sadamin, por kjo nuk do të thotë se dhe të tjerët nuk kanë të drejtë ta bëjnë këtë para gjykatave ndërkombëtare", ka thënë zëdhënësi.
Sadami është përgjegjës për tri kriza në dy dhjetëvjetëshet e fundit dhe për këtë arsye duhet të përgjigjet, ka thënë zëdhënësi, duke theksuar se mendon në luftën me Iranin 1980-1988, pushtimin e Kuvajtit e cila shkaktoi luftën në Gjirin Persik më 1991 si dhe krizën e fundit në mars e cila shkaktoi luftën dhe rezultoi me përmbysjen nga pushteti.


Sadam Huseini u ka ofruar bisedime trupave amerikane që e kishin arrestuar


Sadami është kapur tetë muaj pasi forcat amerikane përmbysën qeverinë në Bagdad, njofton Rojter.


Vriten dy palestinezë në Rripin e Gazës

Gaza, 15 dhjetor 2003 - Ushtarët izraelitë gjatë natës së kaluar kanë vrarë dy palestinezë në Rripin e Gazës, njoftuan burimet izraelite.
Te palestinezi i vrarë nuk janë gjetur armë. Nga katër palestinezët që ishin me të, njëri është arrestuar, kurse tre të tjerë kanë kaluar në territorin izraelit dhe pas tyre kanë filluar ndjekjet.


Musharaf i shpëtoi një sulmi

Islmabad, 15 dhjetor 2003 - Presidenti i Pakistanit Pervez Musharaf ka thënë se një bombë ka shpërthyer tek një urë derisa po kalonte aty pari, të vendosur nga ekstremistët islamikë.
"Ka qenë një akt terrorist dhe me siguri kam qenë unë në shenjestër", tha presidenti Musharaf për një TV. Shpërthimi ka ndodhur vetëm një minutë apo gjysmë minute pasi ka kaluar Musharafi, njofton Frans Press.


Në dy shpërthime afër Bagdadit janë vrarë të paktën 10 vetë dhe shumë të tjerë janë plagosur

Bagdad, 15 dhjetor 2003 - Nga dy shpërthimet e automobilave bombë ndaj stacioneve të policisë afër Bagdadit sot janë vrarë të paktën 10 vetë dhe shumë të tjerë janë plagosur.
Një shpërthim ka ndodhur në fshatin Huseinija, 30 km në veri të Bagdadit, ku janë vrarë nëntë vetë dhe mbi 20 policië janë plagosur. Ndërkaq në një shpërthim tjetër shoferi ka vrarë veten dhe ka plagosur tetë persona. Me atë rast janë shkatërruar katër vetura, njofton Rojter.


Uashingtoni: Sadam Huseini duhet të nxirret para drejtësisë


Japonia, Polonia dhe Australia e mirëpritën arrestimin e ish udhëheqësit irakian. Kundërshtarët e luftës, Franca dhe Gjermania, thanë se ky zhvillim mund të ndihmojë në stabilizimin e Irakut dhe të çojë drejt sovranitetit të tij.

Ministri i jashtëm i Rusisë parashikon se arrestimi do të ndihmojë përpjekjet për përmirësimin e sigurisë në Irak dhe për arritjen e një zgjidhjeje politike. Sekretari i përgjithshëm i Kombeve të Bashkuara, Kofi Anan, i bëri jehonë vlerësimit rus.
Ministria e jashtme kineze tha se shpreson që populli irakian do të jetë tani në gjendje të marrë në dorë fatin e vet dhe se zhvillimi i fundit do të çojë drejt paqes e qendrueshmërisë në Irak.


Sadami nuk po bashkëpunon me hetuesit

Bagdada, 15 dhjetor 2003 - Amerikanët thonë se Sadam Huseini nuk ka pranuar të japë ndonjë informacion që kur është kapur të shtunë në darkë.
Ish-udhëheqësi irakian është arrestuar nga amerikanët dhe mbahet në një vend të fshehtë pasi u kap në një tunel nëntokësor pranë Tikritit.
Sekretari amerikan i Mbrojtjes, Donald Rumsfeld, tha se ish-udhëheqësi irakian, megjithëse nuk ka bërë rezistencë, nuk po bashkëpunonte me hetuesit.
"Ai nuk ka bashkëpunuar, në kuptimin se nuk ka folur apo diçka e tillë," tha zoti Ramsfeld.
"Ai sigurisht ishte i bindur, apo i detyruar t'i nënshtrohej kontrolleve mjekësore," tha sekretari amerikan i mbrojtjes duke shtuar se ai do të trajtohet në mënyrë njerëzore dhe profesionale.


Statusi i Sadamit

Bagdad, 15 dhjetor 2003 - Statusi i Sadamit për momentin nuk është i qartë. Nëse ai është një i burgosur lufte, atëhere do të shtrohen pyetje për pamjet që u bënë publike pas arrestit të tij, që tregonin kontrollin mjekësor që po i bëhej atij.
Duket se SHBA-ja nuk shpejton që ta nxjerrë atë para një gjyqi.
Ekspertët e shërbimeve sekrete do të donin që ta merrnin në pyetje fillimisht, dhe nga ana tjetër do të jetë e vështirë që presidenti Bush të pranojë ndonjë gjykim ku nuk do të përfshihet edhe mundësia e dënimit me vdekje.
Kjo do të përjashtonte një gjykim sipas ligjeve evropiane apo edhe irakiane, sepse dënimi me vdekje është hequr edhe në Irak.