Fatmir Velaj, “çmim të artë“ në Sanremo

Piktori shqiptaro-austriak vlerësohet në Itali

13 dhjetor 2003 / TN

Vasil QESARI

Nga data 6 deri 9 dhjetor 2003, në qytetin e Sanremos, Itali u zhvillua Festivali i 11 ndërkombëtar i Pikturës Bashkëkohore "SanremoArte". Ky aktivitet i rëndësishëm artistik, u organizua nga qendra e artit "La Tavolozza" në bashkëpunim me Bashkinë e qytetit dhe Akademinë e Arteve të Sanremos. Në të merrnin pjesë 430 artistë nga Italia e nga vende të ndryshme të Europës. Për këtë festival, për pikturën më të mirë, krahas medaljes së argjentë vënë në dispozicion nga Presidenti i Republikës Italiane On. Carlo Azelio Ciampi, ishte vënë edhe trofeja e Papa Giovanni Paolo i II për pikturën më të shenjtë (Pittura Sacra).

Medaljen e artë për artistin më të mirë e vuri në dispozicion Republika e San Marinos. Veprimtaria në fjalë tërhoqi vëmendjen e shumë personaliteteve të artit e kulturës dhe u vizitua nga fituesi i çmimit Oscar, Roberto Bennigni, gazetari i shquar italian Bruno Vespa, sekretari i Shtetit për Kulturën Vittorio Sgarbi, këngëtarët Gianni Morandi, Massimo Ranieri etj. Në këtë festival u paraqit punimet "The country house 1", "The country house 2", "The testament" edhe piktori shqiptaro-austriak Fatmir Velaj. Në drekën e nderit që u shtrua në mjediset e “Suite Hotel Nyala” ë Sanremos merrnin pjesë personalitete të artit, kulturës dhe politikës.

Në përshëndetjen e tij presidenti i qendrës së artit "La Tavolozza", Casimoro Dell'Arco Talarico falenderoi të gjithë artistët që u kualifikuan në këtë veprimtari si edhe gjithë ata personalitete të fushës së artit, gazetarisë dhe politikës që kishin ardhur të përjetonin ato momente interesante në Sanremo. Ndër të tjera ai u shpreh se: "... për mua është kënaqësi e veçantë të prezantoj dhe t’i u uroj mirëseardhjen shumë artistëve nga vende të ndryshme të Europës. Në këtë kontekst, dëshiroj të përshëndes në mënyrë të veçantë, artistin nga Viena, Fatmir Velaj, jo vetëm në emrin tim personal por edhe të të gjithë stafit të jurisë dhe qendrës kulturore në Sanremo”.

Mbas drekës së nderit u bë ndarja e çmimeve. Juria e festivalit nderoi me medaljen e artë dhe çmimin e parë artistin shqiptar Fatmir Velaj, si artistin më të mirë në karrierën e gjithë festivalit. Këtë çmim, të vënë në dispozicion nga qeveria e Republikës së San Marinos, atij ia dorëzoi Konsulli i Republikës së San Marinos në Marseje Cav. Avv. Domenic Morganti. Në fjalën dhe motivacionin e çmimit, ai vlerësoi punimet e Fatmir Velajt, si një mënyrë e shkëlqyer e paraqitjes së mendimit, filozifisë dhe ndjenjave artistike. “Për mua, personalisht, - tha ai – ishte një kënaqësi e veçantë kur pashë punimet tuaja e,

ndërkohë, nuk u befasova kur juria e festivalit ju vlerësoi me çmimin më të lartë. Për Republikën e San Marinos, me një histori 1700 vjeçare, është kënaqësi e veçantë që artistë të tillë, t’i vlerësojë e t’u ofrojë mirëseardhjen në San Marino”. Pataj fjalën e mori fituesi i çmimit, Fatmir Velaj. Ai falenderoi për mikpritjen e ngrohtë që iu bë nga organizatorët e Festivalit si edhe për jurinë që e kish zgjedhur atë si artistin më të mirë të tij.

Ai falenderoi gjithë miqtë e dashamirësit e artit që kishin marrë pjesë në këtë aktivitetet, si edhe ata që e kishin inkurajuar qysh në fillimet artistike e, në mënyrë të veçantë, bashkëshorten e tij, Klara që, ndodhej e pranishme në sallë e, së cilës, ai ia dedikoi edhe fitmin e çmimit në fjalë... Për Fatmir Velaj, ky vlersim i lartë në Itali, i shtohet një sërë suksesesh të tjera që ai ka arritur në Austri e jashtë saj.

Vitin që vjen ai është ftuar të organizojë në Muzeumin Kombëtar të Rumanisë ekspozitën "Good Morning Balkan". Në hapjen e kësaj ekspozite në Bukuresht, është konfirmuar edhe pjesëmarja e Presidentit të Republikës së Rumanisë Ioan Iliescu, i cili ka marrë edhe kujdedstarinë e kësaj veprimtarie. Përurimi i kësaj ekspozite, ku do të marrë pjesë edhe koordinatori i Paktit të Stabilitetit Dr. Erhard Busek, do të zhvillohet në 24 Qershor 2004.