E shtune, 13 dhjetor 2003

E shtune, 13 dhjetor 2003

Përmbajtja:

Presidenti Rugova i shpreh keqardhje presidentit të Bankës Botërore për incidentin në Mitrovicë
Këshilli i Sigurimit mbështet plotësisht Standardet për Kosovën dhe Hari Holkerin
Grupi i Kontaktit dhe BE kanë përkrahur planin e Holkerit për zbatimin e standardeve në Kosovë
Pranë Zyrës së Kryeministrit ka filluar punën zyra këshilldhënëse për siguri publike
Qeveria e Kosovës në strategjinë e zhvillimit afatmesëm parashikon të hapen 650 mijë vende të punës
Qeveria e Kosovës nuk do ta përfillë vendimin e Holkerit për shfuqizimin e vendimit të Parlamentit
Hollbruk: Nëse NATO largohet nga Kosova, brenda 48 orësh do të ndodhte gjakderdhja më e madhe në historinë moderne
Subjektet politike shqiptare kanë mendime të ndryshme lidhur me vendimin për shpërndarjen e KK në Preshevë
Në Tiranë u pezulluan 12 oficerë të lartë të Marinës Ushtarake të Shqipërisë
Parlamenti maqedonas e ratifikoi Marrëveshjen për Misionin Policor "Proksima" të BE-së në Maqedoni
Ushtarët izraelitë në një pikë kontrolli kanë vrarë një palestineze 20-vjeçare
Bruksel: Marrëveshja për kushtetutën ende larg
Kongresi kritikon qeverinë amerikane
Bush paralajmëron kompaninë

Presidenti Rugova i shpreh keqardhje presidentit të Bankës Botërore për incidentin në Mitrovicë

Prishtinë, 13 dhjetor 2003 - Presidenti i Kosovës Ibrahim Rugova i ka drejtuar një letër Presidentit të Bankës Botërore, z.Xheimz Volfenson (James D. Wolfensohn), në të cilën i shreh keqardhje për incidentin që ndodhi para një jave në Mitrovicë.
"Më lejoni që në emër të institucioneve të Kosovës dhe në emër të popullit të Kosovës të shpreh keqardhje të thellë dhe kërkimfalje për incidentin që ndodhi në qytetin e Mitrovicës më 6 dhjetor 2003. Ju lutem ua përcillni keqardhjen tonë të sinqertë drejtorëve ekzekutivë dhe anëtarëve të tjerë të delegacionit të Bankës Botërore", thuhet në letrën e Presidentit Rugova.
"Me këtë rast dua të shpreh edhe keqardhjen time të thellë personale. Më dhemb posaçërisht shumë për faktin se kjo i ndodhi një delegacioni aq të lartë nga institucioni juaj i shquar. Populli dhe autoritetet e Kosovës e dinë se sa rol të rëndësishëm ka luajtur dhe po luan Banka Botërore në zhvillimin e Kosovës".
"Populli i Kosovës dhe institucionet e tij të zgjedhura çmojnë lart përpjekjet e Bankës Botërore për të luftuar varfërinë në gjithë Kosovën dhe për të siguruar që ndihma t'u arrijë më të varfërve, atyre që kanë më së shumti nevojë për ndihmë, dhe minoriteteve", thekson në fund të letrës së tij Presidenti i Kosovës Dr. Ibrahim Rugova drejtuar Presidentit të Bankës Botërore, Xheimz Volfenson.


Këshilli i Sigurimit mbështet plotësisht Standardet për Kosovën dhe Hari Holkerin

Kombet e Bashkuara, 13 dhjetor 2003 - Këshilli i Sigurimit të Kombeve të Bashkuara mbrëmë ka mbështetur Standardet për Kosovën, që të mërkurën i paraqiti shefi i UNMIK-ut Hari Holkeri.
Në një komunikatë të lëshuar nga KS, shpprehet mbështetja e plotë e planit Standardet për Kosovën, duke theksuar se ai duhet të shërbejë si bazë për vlerësimin e përparimit të arritur nga institucionet vendore në Kosovë.
"Këshilli pret nga PSSP në Kosovë që nëpërmjet konsultimeve me përfaqësuesit e institucioneve të përkohshme të vetëqeverisjes në Kosovë dhe me palët e tjera relevante, t'i japë fund hartimit të planit për imnplementimin e atyre standardeve në bazë të të cilave do të vlerësohet përparimi i arritur në Kosovë", thuhet në këtë komunikatë.
KS thekson se shefi i UNMIK-ut do të vazhdojë me konsultimet e ngushta me të gjitha palët e interesuara, para së gjithash me Grupin e Kontaktit, i cili, siç theksohet, ka shprehur gatishmërinë të ofrojë një kontribut të dukshëm në rishqyrtimin e përparimit të arritur dhe vlerësimet e veta t'ia dorëzojë PSSP në Kosovë.
"KS konstaton se varësisht nga vlerësimi i përparimit i cili do të bëhet në mënyrë periodike, rasti i parë për rishqyrtim të gjithanshëm do të jetë mesi i viti 2005", thuhet në komunikatë dhe theksohet se përparimi i mëtejshëm në drejtim të përcaktimit të procesit të statusit të ardhshëm do të varet nga vlerësimi pozitiv i atyre rishqyrtimeve të gjithanshme.
"KS konfirmon mbështetjen e plotë për shefin e UNMIK-it Hari Holkeri dhe u bën thirrje institucioneve të përkohshsme në Kosovë dhe të gjitha palëve të interesuara që të bashkëpunojnë plotësisht me të", thekoshet në fund të komunikatës.


Grupi i Kontaktit dhe BE kanë përkrahur planin e Holkerit për zbatimin e standardeve në Kosovë

Berlin-Bruksel, 13 dhjetor 2003 - Grupi i Kontaktit e ka përkrahur shefin e UNMIK-ut, Hari Holkerin në përpjekjet për zbatimin e standardeve për Kosovën. Siç ka bërë të ditu Ministria e Jashtme gjermane, përfaqësuesit e Grupit të Kontaktit kanë biseduar dje në Berlin me Kryeadministratorin e Kosovës, Hari Holkeri për zhvillimin e situatës në Kosovë dhe rajon.
Edhe Bashkimi Evropian e ka përkrahur plotësisht planin e shefit të UNMIK-ut, Hari Holkeri për zbatimin e standardeve në Kosovë.
Bashkimi Evropian u ka bërë thirrje të gjitha palëve në Kosovë që të pranojnë këtë dokument dhe të punojnë për realizimin e tij.


Pranë Zyrës së Kryeministrit ka filluar punën zyra këshilldhënëse për siguri publike

Prishtinë, 13 dhjetor 2003 - Që nga dita e djeshme pranë Zyrës së Kryeministrit Bajrami Rexhepi ka filluar punën zyra këshilldhënëse për siguri publike. Burime nga Qeveria e Kosovës njoftuan se drejtues i kësa zyreje është Enver Boruçaj, ish-anëtar i Shërbimit Policor të Kosovës.


Qeveria e Kosovës në strategjinë e zhvillimit afatmesëm parashikon të hapen 650 mijë vende të punës

Prishtinë, 13 dhjetor 2003 - Qeveria e Kosovës paraqiti dje pasdite strategjinë e saj aftmesme zhvillimore për pesë vitet e ardhshme. Në këtë kuadër ministri për Industri dhe Tregti, Ali Jakupi tha se në Kosovë parashihen të hapen 650 mijë vende të reja të punës.
Kryeministri Rexhepi tha se Kosova ndërkohë do të ecë rrugës së integrimeve evropiane, duke zhvilluar një ekonomi të tregut dhe gradualisht të bëhet një vend konkurrence dhe t'i tejkalojë problemet aktuale sociale që i ka.
Ai ka shtuar se Kosova aktualisht karakterizohet me humbje të tregjeve dhe me tendencën për rikthimin e atyre tregjeve apo edhe hapjes së tregjeve të reja.
"Gjatë pesë viteve të ardhshme Kosova parashikon të ngrisë industrinë ndërtimore, të ulë importin dhe të inkurajojë prodhimet vendore, si dhe të ulë nivelin e tashëm të përqindjes s taksave për të koncentruar ekonominë në zhvillimin e biznesit", ka thënë ministri Jakupi. Duke zbatuar këtë strategji tha ai në vitin 2008 të ardhurat për kokë banori në Kosovë do të jenë 3.132 euro.


Qeveria e Kosovës nuk do ta përfillë vendimin e Holkerit për shfuqizimin e vendimit të Parlamentit

Prishtinë, 13 dhjetor 2003 - Qeveria e Kosovës nuk do ta përfillë vendimin e shefit të UNMIK-ut Hari Holkeri, i cili e shpalli të pavlefshëm vendimin e Parlamentit të Kosovës që shfuqizon të gjitha ligjet diskriminuese serbe për Kosovën të miratuara pas vitit 1989.

Qeveria e Kosovës e pranon në tërësi dokumentin për "Standardet për Kosovën" dhe është në përgatitje të planit për implementimin e tij. Kështu deklaroi zëdhënësja e Kryeministrit Rexhepi, Mimoza Kusari pas mbledhjes së djeshme të Qeverisë, ku u diskutua për zhvillimet e fundit në Kosovë.
Zëdhënësja e UNMIK-ut, Izabela Karlovic tha se zhvillimi lidhur me ligjet nuk mund të ndikojnë mbi procesin e privatizimit në Kosovë. "Nuk ka kurrëfarë ndikimi të asaj që ka ndodhur pardje në procesin e privatizimit, pasi udhëzimet nga Nju-Jorku thonë qartë dhe kërkojnë që privatizimi të vazhdojë", tha zëdhënësja Karlovic.


Hollbruk: Nëse NATO largohet nga Kosova, brenda 48 orësh do të ndodhte gjakderdhja më e madhe në historinë moderne


Gjëja më pozitive e arritur në Bosnje, thotë ai, është se lufta nuk do të rifillojë, megjithatë, ai paralajmëroi rreth një largimi të parakohshëm të trupave amerikane.
Por, gjendja në Kosovë është shumë më pak premtuese se sa në Bosnje. Sipas ambasadorit Hollbruk në Kosovë kemi të bëjmë me dy aspekte shumë të gabuara.
"E para është se në bazë të rezolutës 1244 të Këshillit të Sigurimit të Kombeve të Bashkuara, ky i fundit duhej t'i transferonte 'autonomi të madhe' popullatës lokale, veçanërisht shqiptarëve, por ata nuk e kanë bërë një gjë të tillë. Dhe si për ironi, ambasadori Bremer po përpiqet të transferojë më shumë dhe më shpejt autoritet tek irakianët vetëm pas 5 muajsh në mes të luftës se sa Kombet e Bashkuara kanë transferuar autoritet tek shqiptarët e Kosovës. Këtë unë nuk e kuptoj.

Së dyti, 4 vjet pas përfundimit të luftës në Kosovë, ne kemi zhvilluar vetëm një takim midis shqiptarëve dhe sërbëve; një takim që zgjati 2 orë dhe u zhvillua në Vjenë e që ishte katastrofë. Teoria e Kombeve të Bashkuara është se gjërat do të përmirësohen gjatë 18 muajve të ardhshëm.

Shqetësimi im është se pikërisht e kundërta do të ndodhë. Mungesa e përparimit drejt një statusi përfundimtar të pranueshëm nga të dyja palët, do të bëjë që si shqiptarët ashtu edhe sërbët të polarizohen. Në se trupat amerikane, e madje edhe ato evropiane, largohen nga Bosnja, gjendja do të përparojë. Nëse trupat e NATO-s largohen nga Kosova, brenda 48 orësh, ne do të ndodheshim përballë gjakderdhjes më të madhe në historinë moderne.

Përfundimi kryesor që mund të nxirret nga kjo është se, megjithëse ne vazhdojmë të tërheqim trupa nga Bosnja, ne nuk mund të tërhiqemi nga Kosova. Ne jemi atje të bllokuar sepse nëse nuk arrihet një marrëveshje e pranueshme si nga Prishtina ashtu edhe nga Beogradi, trupat nuk mund të tërhiqen nga Kosova".
Kohët e fundit, ambasadori Hollbruk shkoi në Ballkan me ish përfaqësuesin e lartë të Kombeve të Bashkuara në Kosovë, Bernard Kushner. Ai tha se bisedoi me shumë zyrtarë sërbë rreth bllokimit të gjendjes në Kosovë.
"Kur shkova në Beograd me Bernardin u thashë sërbëve se atyre u duhet të bëjnë një zgjedhje historike. Ata duhet të zgjedhin midis Kosovës dhe Evropës. Nëse duan të integrohen në Bashkimin Evropian, ata duhet ta kuptojnë se këtë nuk mund ta bëjnë deri sa të zgjidhet statusi i Kosovës.

Nëse zgjedhin Kosovën, ata humbasin dyfish sepse Kosovën ata e kanë të humbur. Këtë e pranojnë edhe vetë sërbët në biseda private, edhe sërbët konservatorë. Madje ata kanë një mënyrë për ta shpjeguar humbjen e Kosovës. 'Millosheviqi e humbi Kosovën për ne', thonë ata.

Nga ana tjetër, serbët kanë dy shqetësime të ligjshme: sigurinë fizike dhe të drejtat civile të pakicës në Kosovë si dhe monumentet shumë të rëndësishme kulturore dhe fetare".
Një prej arsyeve që përsëritet më shpesh për mos zgjidhjen e statusit të Kosovës është ndikimi negativ i tij ndaj entiteteve të tjera në rajon, por ambasadori Hollbruok nuk është dakord me këtë arsyetim. Bosnja për shembull, thotë ai, nuk do të shpërbëhej nëse Kosova fitonte pavarësinë.
Riçard Hollbruk, kryearkitekti i marrëveshjeve të Dejtonit të arritura në vitin 1995, ka reputacionin e një njeriu që flet hapur. Kohët e fundit, ai foli në Uashington rreth sfidave të sotme në Ballkan dhe veçanërisht rreth nevojës për një zgjidhje në Kosovë, e cila, sipas tij, kërkon hapa më të guximshme nga ana e Bashkimit Evropian. (Z.A.)


Subjektet politike shqiptare kanë mendime të ndryshme lidhur me vendimin për shpërndarjen e KK në Preshevë

Preshevë, 13 dhjetor 2003 - Subjektet politike shqiptare të Luginës së Preshevës kanë shfaqur dje mendime të ndryshme lidhur me vendimin e Qeverisë serbe për shkarkimin e Kuvendit komunal në Preshevë.

Partia Demokratike Shqiptare dhe Lëvizja e Progresit Demokratik akuzoi Partinë për Veprim Demokratik për mosfunksionimin e deritashëm të këtij kuvendi, ndërkaq kjo e fundit i quan si normale rrjedhat që shkaktuan shpartallimin e Kuvendit lokal.
LPD për Preshevë thekson se deri më tash Qeveria e Serbisë në disa mënyra ka favorizuar PVD, dhe ka refuzuar të marrë pjesë në Këshilin e Përkohshëm komunal.
Ndërkaq, PDSH akuzon PVD-në për shpërbërjen e këtij kuvendi, duke e quajtur edhe si të papranueshme ofertën për hyrje të këtij subjekti në Këshillin e Përkohshëm Komunal.
Nga ana tjetër kryetari i Partisë për Veprim Demokratik Rizah Halimi njëkohësisht edhe kryetar i Komunës së Preshevës të gjitha këto akuza i vlerëson si të paqëndrueshme, duke theksuar se shkarkimet që janë bërë brenda partisë së tij kanë qenë plotësisht normale si në çdo vend tjetër.


Në Tiranë u pezulluan 12 oficerë të lartë të Marinës Ushtarake të Shqipërisë

Tiranë, 13 dhjetor 2003 - Në Tiranë u pezulluan 12 oficerë të lartë të Marinës Ushtarake të Shqipërisë, lidhur me dyshimin për përdhunimin e një vajze 16-vjeçare në bazën ushtarake të Bishtit të Pallës, ka bërë të ditur Ministria e Mbrojtjes shqiptare.

Komandanti dhe 11 oficerë të kësaj baze janë pezulluar për papërgjegjësi në punë, bëri të ditur zëdhënësja e kësaj Ministrie. Policia ka arrestuar 8 ushtarë dhe katë persoan civilë nën akuzën e dhunimit të 16-vjeçares, e cila pasi është mbajtur dy muaj në këtë bazë ushtarake është trafikuar për qëllime prostitucioni.


Parlamenti maqedonas e ratifikoi Marrëveshjen për Misionin Policor "Proksima" të BE-së në Maqedoni

Shkup, 13 dhjetor 2003 - Kuvendi maqedonas e ratifikoi ligjin për ratifikimin e marrëveshjes midis Maqedonisë dhe Bashkimit Evropian për statusin dhe aktivitetet e Misionit Policor "Proksima" të Bashkimit Evropian. Ky mision do të përbëhet prej afro 200 policëve të 30 vendeve, anëtare të BE-së, NATO-s si dhe vendeve kandidate për anëtarësim në Aleancën Veriatlantike.
Mandati i këtij misioni fillon më 15 dhjetor, kur edhe pëfundon misioni paraprak "Konkordia". Ky mision do të ndihmojë në reformimin e forcave policore të Maqedonisë, themelimin e policisë kufitare dhe konsolidimin e rendit juridik në vend.


Ushtarët izraelitë në një pikë kontrolli kanë vrarë një palestineze 20-vjeçare

Nablus, 13 dhjetor 2003 - Ushtarët izraelitë sot në mëngjes në një pikë kontrolli kanë vrarë një palestineze 20-vjeçare, njoftuan burimet spitalore palestineze.
Ushtarët izraelitë kishin hapur zjarr në automobilin në të cilin ndodhej ajo afër vendit Kalkilia dhe sipas burimeve palestineze nuk kishin pasur ndonjë shkas për të hapur zjarr.


Bruksel: Marrëveshja për kushtetutën ende larg

Bruksel, 13 dhjetor 2003 - Udhëheqësit evropianë ende po kërkojnë për një marrëveshje mbi pjesët themelore të kushtetutës së një BE të zgjeruar pasi një ditë konsultimesh përfundoi pa ndonjë progres.
Udhëheqësi britanik, Toni Bler tha se ai nuk e dinte nëse do të arrihej ndonjë marrëveshje në samitin e Brukselit që pritet të përfundojë në fundjavë.
Zoti Bler tha se kjo do të jetë shumë e vështirë pasi pozicionet e shteteve ishin shumë larg njëri-tjetrit.
Dy çështje, ajo e të drejtës votuese të çdo shteti dhe madhësisë së Komisionit Evropian do të përcaktojnë balancën e pushtetit midis shteteve të vogla dhe të mëdha kur BE-ja të zgjerohet me 25 anëtarë vitin tjetër.
Duket punë e vështirë për Silvio Berluskonin. Kryeministri italian e drejton këtë samit dhe raundi i takimeve njëri pas tjetrit ka filluar nga e para këtë mëngjes pasi këto takime përfunduan shumë vonë të premten.


Kongresi kritikon qeverinë amerikane

Uashington, 13 dhjetor 2003 - Kongresi amerikan ka botuar një raport hetues që kritikon mungesën e progresit nga ana e qeverisë së SHBA-së në kuptimin dhe ndalimin e rrjedhës së financimit të terrorizmit në botë.
Dy javë pas shkatërrimit në 2001 të Qendrës Tregtare Botërore dhe sulmit mbi Pentagonin nga avionë që u rrëmbyen, presidenti Bush lëshoi një urdhër ekzekutiv që udhëzonte agjencitë qeveritare të ndalonin transaksionet financiare midis terroristëve të dyshuar dhe agjencive të tyre përkrahëse.
Tashmë kanë kaluar më shumë se 2 vjet dhe hetuesit e Kongresit kanë nxjerrë një raport që thotë se qeveria amerikane ende nuk ka bërë aq sa duhet për të kuptuar, le më për të ndaluar, transaksionet financiare terroriste.
Hetuesit në raportin e tyre prej 50 faqesh vënë në dukje se ka të meta në punën e FBI-së dhe departamenteve të drejtësisë dhe thesarit.


Bush paralajmëron kompaninë

Uashington, 13 dhjetor 2003 - Presidenti amerikan Xhorxh Bush ka thënë se ai pret që një kompani nafte që ka qenë drejtuar nga zëvendëspresidenti, Dik Çeni të kthejë mbrapsht sasinë e parave që mund të ketë kërkuar më tepër nga ç'duhet nga qeveria amerikane për shërbime të ofruara në Irak.
Kompania Halli Burton mori një kontratë më herët këtë vit për të siguruar naftë për ushtrinë amerikane në Irak nga Kuvajti.
Një kontroll revizionimi i bërë nga Pentagoni ka konfirmuar se një nga degët e Halliburtonit- Kellog, Brown & Root ka kërkuar para më shumë se ç'duhet për disa nga shërbimet e kryera.
Zyrtarët e Pentagonit nuk kanë treguar se sa është sasia e parave për të cilën bëhet fjalë, por korrespondentët thonë se shifra mund të jetë rreth 61 milionë dollarë.