Përmbajtja:

• Prezentohet strategjia e zhvillimit afatmesëm të ekonomisë së Kosovës deri në vitin 2008

• UNMIK-u e cilëson si të pazbatueshëm vendimin e Parlamentit të Kosovës për shfuqizimin e ligjeve diskriminuese serbe

• BE u bën thirrje të gjithëve në Kosovë që të punojnë në përmbushjen e standardeve

• Udhëheqja e Prishtinës vizitoi kampin e KFOR-it suedez në Hajvali ku u bë pranim-dorëzimi i komandës

• Agim Çeku paralajmëron se TMK do të shndërrohet në ushtri të Kosovës

• Senatorja Hillari Klinton konferecën për mikrobiznesin për refugjatët në Nju Jork

• A. Branstrom: Grupet e vogla të cilat dëshirojnë destabilizimin e Kosovës nuk do të kenë vend ku të fshehen

• Në Mitrovicë janë zbuluar disa eshtra të trupave të njerëzve

• Qytetarët e Podujevës ballafaqohen me probleme gjatë rregullimit të dokumentacionit

• Në Tiranë filloi punimet Kongresi i PS-s

• Në bazë të marrëveshjes për decentralizimin e pushtetit lokal në Maqedoni do të formohen 71 komuna

• Opozita maqedonase kundërshton zyrtarizimin e Universitetit të Tetovës

• Qeveria serbe shpërndan Kuvendin Komunal të Preshevës

• Në Ulqin u shënua një termet me intensitet 2.8 ballë të shkallës së Rihterit

• Të paktën 12 njerëz janë vrarë në Bregun e Fildishtë

• Forcat amerikane kanë vrarë katër sulmues afganë

• Disa të plagosur në Nablus

• BE sot diskuton çështjen e votes

• SHBA-ja e Britania nën kritika e organizatës së të drejtave të njeriut

• Francë: Propozim për të hequr nga shkollat simbolet fetare

• Në Irak plagosen dy ushtarë polakë

Prezentohet strategjia e zhvillimit afatmesëm të ekonomisë së Kosovës deri në vitin 2008

 

Prishtinë, 12 dhjetor 2003 - Ministria e Tregtisë dhe Industrisë ka prezentuar sot strategjinë e zhvillimit afatmesëm të ekonomisë së Kosovës deri në vitin 2008. Sipas ministrit Ali Jakupi, me këtë strategji synohet një zhvillim më i hovshëm i ekonomisë me prodhimtari të shtuar dhe të ardhura të ngritura.

 

Ai tha se deri më tash ekonomia e Kosovës është udhëhequr me vendime të marra ad-hok, pa politika makroekonomike. Sipas tij, tashmë janë përcaktuar prioritetet, si ndërtimet e gjera në sferën e banimit, infrastruktura e rrugëve, energjia, aktivizimi i vendbanimeve rurale, stimulimi i prodhimtarisë vendore dhe i eksporteve.

Sipas kësaj strategjie në vitin 2008 pritet të jetë 8.8 miliardë euro, apo 3.312 euro për kokë banori. Lartësia e normës mesatare të punësimit sipas këtyre strategjive parashihet të jetë 12%, për të arritur nivelin e punësimit në afër 700 mijë persona në fund të vitit 2008.

 

 

UNMIK-u e cilëson si të pazbatueshëm vendimin e Parlamentit të Kosovës për shfuqizimin e ligjeve diskriminuese serbe

 

Prishtinë, 12 dhjetor 2003 - Kryeadministratori i Kosovës Hari Holkeri, lidhur me vendimin e Parlamentit të Kosovës për të shpallur të pazbatueshme ligjet e miratuara pas 22 marsit të vitit 1989, ka theksuar se ky vendim nuk është i vlefshëm dhe i efektshëm pasi kjo çështje nuk është në kompetenca të Parlamentit të Kosovës.

 

Zëdhënësja e UNMIK-ut Izabela Karlovic tha se z. Holkeri mbrëmë ka bërë të ditur përcaktimin e tij lidhur me vendimin e Parlamentit të Kosovës.

"Vendimi i Kuvendit të Kosovës të 11 dhjetorit 2003 për të abroguar të gjitha ligjet që kanë të bëjnë me Kosovën që janë miratuar nga Serbia dhe Jugosllavia pas 22 marsit të vitit 1989, nuk është në kompetenca të Kuvendit të Kosovës, prandaj nuk është i vlefshëm dhe nuk ka efekt", tha zëdhënësja Karlovic.

Zyrtarë të Misionit të OKB-së në Kosovë kanë thënë se çështja e ligjeve dhe aprovimi i tyre përfundimtar është e drejtë e shefit të UNMIK-ut.

 

Vendimi se cilat ligje duhet zbatuar në Kosovë janë përgjegjësi ekskluzive e Përfaqësuesit Special të Sekretarit të Përgjithshëm në Kosovë dhe kjo kompetencë i jepet atij sipas Rezolutës 1244 të KS të OKB-së, thotë zëdhënësja Karlovic.

 

 

BE u bën thirrje të gjithëve në Kosovë që të punojnë në përmbushjen e standardeve

 

Bruksel, 12 dhjetor 2003 - Italia si kryesuese e radhës së Bashkimit Evropian ka lëshuar një komunikatë përmes së cilës i jep përkrahje shefit të UNMIK-ut Hari Holkeri për operacionalizimin e "Standardeve për Kosovën" dhe mbështet këtë dokoment.

"I bëjmë thirrje të gjitha palëve në Kosovë që të pranojnë këtë dokument dhe të punojnë në përmbushjen e tij. Implementimi duhet të përcaktohet nga shefi i UNMIK-ut dhe në konsultim me përfaqësuesit e institucioneve kalimtare të Kosovës", thuhet në në këtë komunikatë të Bashkimit Evropian.

BE është e mendimit se politika "Standardet për Kosovën" është strategjia më e mirë. Rikujtojmë gjithashtu se përkrahja evropiane për rezolutat përkatëse të Këshillit të Sigurimit nuk kanë ndryshuar, ndërsa kërkohet që të vazhdojë procesi i negociatave midis Prishtinës dhe Beogradit.

BE me këtë rast ka dënuar sulmin mbi kryeministrin e Kosovës javën e kaluar në Mitrovicë dghe njeherit kërkon nga të gjithë në Kosovë që të heqin dorë nga dhuna, ndërkaq nga politikanët kërkohet që të dënojnë çdo akt dhune pavarësisht se nga cila palë bëhet.

BE rithekson se përkrah Kosovën nëpëmjet mekanizmave shoqëruese të stabilizimit dhe asociimit.

 

 

Udhëheqja e Prishtinës vizitoi kampin e KFOR-it suedez në Hajvali ku u bë pranim-dorëzimi i komandës

 

Prishtinë, 12 dhjetor 2003 - Kryetari i Komunës së Prishtinës, Ismet Beqiri dhe zv.kryetari Shefki Gashi, vizituan sot kampin e KFOR-it suedez "Viktoria" në Hajvali të Prishtinës, ku në një ceremoni rasti u bë pranim-dorëzimi i detyrës nga komandanti i KFOR-it suedez, nënkolonel Magnus Julihn. Ai sot dorëzoi detyrën dhe kthehet në vendlindje, si dhe nga komandanti i ri i KFOR-it suedez, nënkolonel Karl Engelbrektson, i cili sot pranoi detyrën e re në krye të KFOR-it suedez.

Gjatë bisedës, e cila kaloi në një atmosferë të përzemërt, nënkolonel Magnus Julihn tha se është i impresionuar me pritjen e popullatës kosovare dhe se po largohet me kujtimet më të mira për Kosovën dhe popullin e saj.

Ndërkaq, në fjalën e tij kryetari i Kuvendit Komunal të Prishtinës, Ismet Beqiri, pasi e falënderoi kolonelin Julihn për pritjen tha se udhëheqja dhe popullata e Prishtinës është shumë e kënaqur me punën dhe ndihmat e KFOR-it suedez për popullatën e Komunës së Prishtinës që nga përfundimi i luftës e deri sot. "Juve ju uroj kthim të mbarë në vendlindje, ndërsa komandantit të ri, kolonelit Karl Engelbrekston i uroj punë të mbarë në marrjen e deturës së re", tha ndër ndër të tjera gjatë bisedës, kryetari Beqiri.

Edhe zv.kryetari i Prishtinës, Shefki Gashi e falënderoi udhëheqjen e komandës së KFOR-it suedez dhe shtoi se KFOR-i suedez ka bërë shumë në pjesën rurale të Komunës së Prishtinës, për çka ju falënderojmë përzemërsisht.

Ndërkaq, nënkolonel Karl Engelbrektson, pasi e falënderoi udhëheqjen e KK të Prishtinës për vizitën, tha se është i lumtur që ai dhe ushtarët e tij janë të angazhuar në sigurinë e njerëzve dhe të mirave materiale në komunën e Prishtinës.

 

  

Agim Çeku paralajmëron se TMK do të shndërrohet në ushtri të Kosovës

 

Londër, 12 dhjetor 2003 - Duke folur për përmbushjen e standardeve të kërkuara nga bashkësia ndërkombëtare, komandanti i TMK-së, gjenerali Agim Çeku tha se nuk pret kurrfarë problemesh të mëdha, e as vështirësi, përveç në rekrutimin e pakicës serbe në TMK.

 

"Unë jam optimist se do të jemi në mesin e të parëve që do t'i përmbushim këto standarde dhe vetvetiu do të ndihmojmë në zhvillimin e atij procesi në Kosovë", ka thënë gjeneral Çeku në një intervistë për BBC-në. "Do të bëjmë përpjekje maksimale që të bindim pjesëtarët e bashkësisë serbe se ky është edhe institucion i tyre", ka thënë Çeku.

Komandanti i TMK-së ka hedhur poshtë pohimet se kinse TMK është e kriminalizuar, siç përiqen ta paraqesin politikanët dhe mediat serbe. "Si institucion nuk mund të garantoj se absolutisht është imun ndaj njerëzve të caktuar të cilët merren me punët që janë në kundërshtim me ligjet dhe dispozitat, por për të tillë nuk ka pasur, as që do të ketë vend", thotë ai.

Agim Çeku në bisedë me BBC-në paralajmëroi se TMK do të shndërrohet në ushtri të Kosovës. "Jemi të aftë për këtë, kemi të drejtë për këtë dhe andaj askush nuk duhet të frikohet.

 

Ambicja jonë është që bëheme forcë mbrojtëse e Kosovës, e mjaftueshme për ta mbrojtur Kosovën, por e pamjaftueshme të rrezikojë sigurinë e cilitdo fqinjë toni. Mbrojtjen tonë e shohim në kuadër të siguisë dhe mbrojtjes së përbashkët në rajon dhe në kuadër të NATO-s", ka thënë në fund Çeku për BBC-në.

 

 

Senatorja Hillari Klinton konferecën për mikrobiznesin për refugjatët në Nju Jork

 

Nju Jork, 12 dhjetor 2003 - Këshilli Kombëtar Shqiptaro Amerikan (KKSHA) lëshoi një deklaratë për shtyp në lidhje me konferecën për mikrobiznesin që u hap nga senatorja Hillari Klinton më 10 dhjetor në Ollbani, në Nju Jork.

Këshilli Kombëtar Shqiptaro Amerikan (KKSHA) u vlerësua për kontributin që po jep në dobi të biznesmenëve refugjatë dhe azilantë shqiptarë në ceremoninë e inaugurimit të "MicroBizNY", një bashkëshoqërim i organizatave jopërfituese dhe bizneseve të vogla në shtetin e Nju Jorkut.

Senatorja Hillari Klinton, e cila mbajti edhe fjalën kryesore, e përgëzoi KKSHA për bashkëpunimin me Qendrën e Rrjetit të Biznesit (QRrB) në kuadër të Projektit të Zhvillimit të Biznesit të Refugjatit, që sponsorizohet nga Zyra për Rivendosjen e Refugjatit pranë Departamentit Amerikan të Shëndetësisë.

 

Projekti i Refugjatit u ofron ndihmë teknike dhe teorike refugjatëve apo azilantëve që duan të hapin biznese të reja apo përmirësojnë menaxhimin e bizneseve eksituese.

Drejtoresha ekzekutive e QRrB, Nancy Carin, që ishte një prej panelistëve kryesorë, veçoi KKSHA dhe fondacionin ndërkombëtar "Trickle Up" për të ilustruar partneritetin e suksesshëm të organzatës së saj me instuticione të tjera jo-përfituese që ndihmojnë refugjatët dhe azilantët që synojnë të sigurojnë pavarësi financiare.

Konferenca një-ditore u sponsorizua nga banka "JP Morgan Chase", instituti "Aspen", etj. Ajo shërbeu si forum për një sërë entitetesh jo-përfituese dhe u ofroi atyre seminare përgatitore për t'i ndihmuar në arritjen sa më mirë të qëllimeve të tyre institucionale.

Shërbimet që ofrohen nga KKSHA dhe QRrB përfishijnë pajisjen me lejen e biznesit, ndihmë teknike para dhe pas marrjes së kredisë bankare, seminare përgatitore, ndihmë për hapjen dhe zgjerimin e biznesit, zhvillimin e planit të biznesit, asistencë legale dhe taksash, hulumtim të tregut, etj.

Të dy organizatat sponsorizojnë rregullisht seminare falas ku profesionistë të fushave të ndryshme, si nga siguracioni i biznesit, krediti bankar, avokatura dhe kontabiliteti i biznesit, si dhe biznesmenë të suksesshëm u japin pjesëmarrësve informata bazë mbi hapjen dhe menaxhimin me sukses të bisnezit.

 

 

A. Branstrom: Grupet e vogla të cilat dëshirojnë destabilizimin e Kosovës nuk do të kenë vend ku të fshehen

 

Prishtinë, 12 dhjetor 2003 - Gjenerali Anders Branstrom nga Suedia ka marrë komandën e Brigadës Shumëkombëshe Qendra në Prishtinë nga KFOR-i finlandez, i cili e kishte komandën deri më tash. "Ne do të vazhdojmë përkrahjen tonë të plotë që në Kosovë të mbizotërojë ligji dhe se grupet e vogla të cilat dëshirojnë destabilizimin e Kosovës nuk do të kenë vend ku të fshehen", tha gjenerali Branstrom.

 

Sipas tij në Kosovë veprojnë grupe si vendore ashtu edhe ato ndërkombëtare ekstremiste dhe, siç u shpreh, i vjen keq që nuk mund të japë informacione më të hollësishme. Ai shtoi se detyra e BSH Qendra është që së bashku me policinë të sigurojë një mjedis të qetë dhet të sigurtë pë popullatën e zonës për të cilën kjo Brigadë është përgjegjëse.

 

 

Në Mitrovicë janë zbuluar disa eshtra të trupave të njerëzve

 

Mitrovicë, 12 dhjetor 2003 - Në hapësirën ndërmjet Shtëpisë së Shëndetit dhe Entit të Sigurimit të Pensionit në Mitrovicë janë zbuluar disa eshtra të trupave të njerëzve është bërë e ditur nga policia në Mitrovicë. Dyshohet se bëhet fjalë për eshtra të viktimave të luftës. Njësia e policisë ligjore u paraqit në vendin e ngjarjes si dhe mori eshtrat. Ky rast po hetohet.

 

 

Qytetarët e Podujevës ballafaqohen me probleme gjatë rregullimit të dokumentacionit

 

Podujevë 12 dhjetor 2003 - Shërbimi i regjistrimit civil i komunës së Podujevës është ballafaquar me problemin e kthimit të dokumentacionit nga Qendra e Prishtinës, meqë UNMIK-u ka kërkuar respektimin e Rregullores 2000/43, mbi numrin, emrat dhe kufijtë e Kosovës të nënshkruar nga ish PSSP të OKB-së Bernard Kushner në vitin 2000.

Drejtori i Drejtorisë për Administratë të Përgjithshme (DAP) i komunës së Podujevës Hamit Shala tha se shërbimi i regjistrimit civil i komunës ka punuar në bazë të Statutit të komunës i cili është aprovuar nga Kuvendi më 2001 dhe prej kësaj date regjistrimi është bërë në bazë të emërtimeve me këtë statut.

Sipas tij Rregullorja 2000/43, që përcakton emërtimin e fshatrave, ka gabime të shumta dhe ka shkaktuar huti tek qytetarët meqë emërtimi i disa fshatrave nuk dihet në cilën gjuhë është. Prej mbi 70 fshatrave të komunës, me këtë Rregullore janë dhënë gabimisht 40 emra të fshatrave e vendbanimeve.

Drejtori Hamit Shala deklaroi se ne nuk kemi kërkuar e as nuk kemi bërë ndërrimin e emrave, por habit fakti që deri më tani Ministria e Shërbimeve Publike rezulton se nuk ka reaguar me kohë lidhur me këtë çështje, kurse si pasojë e kësaj qytetarët tanë po hasin në vështirësi në rregullimin e dokumentacionit, tha Shala.

 

 

Në Tiranë filloi punimet Kongresi i PS-s

 

Tiranë, 12 dhjetor 2003 - Socialistët e Shqipërisë në pushtet sot nisën në Tiranë Kongresin e tyre të 6-të i thirrur si 'Kongresi i ringritjes', e që pritet të zgjidhë krizën në PS.

Pika më e nxehtë e debatit në kongres vlerësohet ndarja e postit të kryetarit me atë të kryeministrit.
Por mjaft e fortë pritet të jetë edhe përplasja e tre kanditateve për postin e kryetarit të partisë.

Fatos Nano, kryeministër i vendit, Rexhep Meidani, ish president i Republikës dhe Edi Rama, kryetar i Bashkisë së Tiranës, garojnë për kryetar të partisë Socialiste.

 

 

Në bazë të marrëveshjes për decentralizimin e pushtetit lokal në Maqedoni do të formohen 71 komuna

 

Shkup, 12 dhjetor 2003 - Partnerët e koalicionit qeveritar kanë arritur marrëveshje për paketën e ligjeve për decentralizimin e pushtetit lokal në Maqedoni. Sipas kësaj marrëveshjeje, në Maqedoni do të formohen 71 komuna, ku parashihet që në komunat shqiptare gjuha shqipe të jetë gjuhë zyrtare.

 

Nënkryetari i Qeverisë Musa Xhaferi thotë se Ligji për financimin e komunave, ndarjen territoriale dhe qytetin e Shkupit do t'i propozohet Parlamentit për miratim në dy faza.

Me ndarjen e re territoriale përdorimi i gjuhës shqipe do të mundësohet edhe në komunat e Velesit, Prilepit dhe Krushevës, ku dominon popullata maqedonase. Qyteti i Shkupit do të jetë njësi e veçantë e vetëqeverisjes lokale në kuadër të cilës do të funksionojnë nëntë komuna.

 

 

Opozita maqedonase kundërshton zyrtarizimin e Universitetit të Tetovës

 

Shkup, 12 dhjetor 2003 - Deputetët e Parlamentit maqedonas, sidomos ata të opozitës shprehën një sërë kritikash për projektligjin e Qeverisë për zyrtarizimin e Universitetit të Tetovës. Sipas opozitës maqedonase ky institucion nuk i plotëson kushtet elementare për t'u zyrtarizuar.

 

Sipas tyre në këtë institucion të lartë arsimor mungon hapësira e lokalit, kuadri mësimdhënës dhe cilësia e studentëve. Ndërkaq, deputetët e Partisë shqiptare në pushtet BDI paraqitën argumente për domosdoshmërinë për zgjidhjen e çështjes së Universitetit të Tetovës.

Deputetët e BDI-së në Parlamentin maqedonas kanë theksuar në debatin e tyre se ka ardhur koha për zyrtarizimin e Universitetit të Tetovës.

Ndërkaq, deputeti i PDSH-së Zamir Dika tha se me këtë ligj nuk zyrtarizohet Universiteti i Tetovës, por themelohet një uiversitet i ri shtetëror. Ai po ashtu ka shtruar pyetjen se si do të bëhet legalizimi i diplomave të studentëve të cilët kanë mbaruar studimet në degët të cilat nuk parashihen të zyrtarizohen me ligjin e ri.

 

 

Qeveria serbe shpërndan Kuvendin Komunal të Preshevës

 

Preshevë, 12 dhjetor 2003 - Me vendimin e Qeverisë së Serbisë dje është shpërndarë Kuvendi Komunal i Preshevës, kurse përfaqësuesit e të gjitha partive politike janë ftuar që t'i emërojnë përfaqësuesit e vet në këshillin e përkohshem lokal.

Kuvendi i Komunës së Preshevës është shpërndarë pasi që nuk ka mbajtur asnjë mbledhje të rregullt që nga 24 korriku i këtij viti. Ligji parashikon që kuvendi të shpërndahet dhe aplikohen masat e jashtëzakonshme nëse gjatë tre muajve nuk mbahen mbledhjet e radhës.

Bllokada e punës së Kuvendit lokal në Preshevë është bërë për shkak të konfliktit të kryetarit të deritashem të Kuvendit, Skender Destanit dhe prefektit të Preshevës, Riza Halimi, njoftojnë mediat serbe.

 

 

Në Ulqin u shënua një termet me intensitet 2.8 ballë të shkallës së Rihterit

 

Ulqin, 12 dhejtor - Dje në orën 13.55 sipas orës lokale aparatet e Entit Seizmologjik të Podgoricës shënuan në Ulqin një termet me intensitet 2.8 ballë të shkallës së Rihterit. Epiqendra e tërmetit ka qenë tri kilometra në veri të Ulqinit. Fuqia e termetit që goditi Ulqinin ishte katër ballë në shkallën e Merkalit.

Njoftohet se nuk ka pasur dëme materiale, por ky termet ka shkaktuar shqetësime në mesin e popullatës së këtij lokalitetit, sidomos ku kihet parasysh se një termet i ngjashëm në Ulqin është shënuar edhe ditën e shtunë me fuqi 4.5 ballë të shkallës së Rihterit.

 

 

Të paktën 12 njerëz janë vrarë në Bregun e Fildishtë

 

Abixhan, 12 dhjetor 2003 - Të paktën 12 njerëz janë vrarë gjatë natës mes të enjtës dhe të premtës në konfliktin e armatosur afër selisë së televizionit kombëtar në Bregun e Fildishtë në Abixhan.

të premtën në mëngjes objektin e televizionit e kishin rrethuar forca të fuqishme të sigurimit, ndëkqa lëvizjet ishin ndaluar për të shmangur kufomat.

Sipas sekretarit të televizionit shtetëror RTI, sulmuesit e armatosur kanë provuar të bëjnë një sulm në selinë e televizionit dhe me atë rast u përleshën me pjesëtarët e sigurimit. Në këtë konflikt u vranë 12 sulmues, ka bërë të ditur radioja vendore.

 

 

Forcat amerikane kanë vrarë katër sulmues afganë

 

Kabul, 12 dhjetor 2003 - Forcat amerikane kanë vrarë katër afganë gjatë një demostrate kundër arrestimit të një komandanti ushtarak, njofton AP.

Një kolonë e ushtarëve amerikanë dhe aleatëve të tyre afganë është sulmuar në lindje të qytetit Xhalalabad të enjtën, tha zëdhënësi ushtarak amerikan, koloneli Brajan Hilferti.

"Ne po kalonim së bashku dhe u sulmuan nga forca e antikolacionit", tha Hilferti. "Ne u përgjegjëm me zjarr dhe vramë katër sulmues që kishin hapur zjarr kundër nesh", tha ai.

 

 

Disa të plagosur në Nablus

 

Nablus, 12 dhjetor 2003 - Njoftime bëjnë të ditur për 7 izraelitë të qëlluar me armë në qytetin e Nablusit në Bregun Perëndimor, siç duket prej palestinezëve të armatosur.

Ngjarja ka ndodhur në një zonë të njohur për përplasje fetare.

Ne vendin i thirrur "Varri i Jozefit, shumë hebrenj shkojnë të luten megjithë kërkesën e ushtrisë që i kërkon atyre të qëndrojnë larg kësaj zone.

Të paktën një izraelit thuhet të jetë në gjendje kritike prej plagëve të marra.

Grupi u shpëtua prej ushtarëve izraelitë dhe u çua në spital.

 

 

BE sot diskuton çështjen e votes

 

Bruksel, 12 dhjetor 2003 - Udhëheqësit e BE-së janë mbledhur në Bruksel për të zgjidhur mosmarrëveshjet që qëndrojnë në mes të rrugës për miratimin përfundimtar të Kushtetutës së re Evropiane.

Të 15 anëtaret e BE-së dhe dhjetë vendet që pritet të hyjnë në Bashkimin Evropian verën e ardhshme kanë vetëm dy ditë kohë për të zgjidhur çështjet, për të cilta nuk bihen dakord.

Çështja më e debatuar është ajo e të drejtës së votës në BE-në e zgjeruar.

Spanja dhe Polonia kanë refuzuar propozimin që e drejta e votës të bazohet në numrin e popullsisë.

Mbledhja të premten fillon me takimin e krerëve të tri shteteve të mëdha, Francës, Gjermanisë dhe Britanisë, që mund të ndihmojnë në gjetjen e zgjidhjeve dhe të shmangin dështimin e këtij takimi.

 

 

SHBA-ja e Britania nën kritika e organizatës së të drejtave të njeriut

 

Nju Jork, 12 dhjetor 2003 - Organizata për të drejtat e njeriut me qendër në Nju Jork, Human Rights Watch, ka kritikuar forcat amerikane e britanike se kanë përdorur bomba me fuqi goditëse të shpërndarë në zonat e banuara.

 

Në një raport të sajin, grupi thotë se 13 mijë bomba të tilla ishin përdorur, të cilat mund të kishin shkaktuar vdekjen e më shumë se një mijë civilëve.

Municioni i grumbulluar punon në mënyrën e shpërndarjes së bombave të vogla, të cilat ndonjëherë edhe dështojnë të shpërthejnë.

Ministria britanike e mbrojtjes ka thënë se vetëm një pjesë e vogël e bombave të tilla të përdorura në Irak, kanë funksionuar në këtë mënyrë.

Por, Human Rights Watch thotë se hetuesit e tij kanë zbuluar municione të shumta të pashpërthyera britanike në rajonin e Basrës përfshirë edhe tre në oborrin e një shtëpie.

Grupi gjithashtu e kritikon Britaninë se ka dështuar të sigurojë armët e lëna irakiane.

Fëmijët që luajnë në këto rajone shumë shpesh i kanë shpërthyer ato, thotë grupi.

 

 

Francë: Propozim për të hequr nga shkollat simbolet fetare

 

Paris, 12 dhjetor 2003 - Udhëheqësit e krishterë, hebrenj dhe myslimanë në Francë janë bashkuar për të kundërshtuar një propozim të qeverisë franceze për të hequr nga shkollat simbolet fetare.

Ata thanë se heqja e këtyre simboleve - si shamia për gratë dhe vajzat myslimane, qylafi për burrat hebrenj dhe kryqet për të krishterët, - nuk do të ndihmojnë në integrimin e minoriteteve fetare në shoqërinë franceze.

Presidenti Zhak Shirak ka njoftuar se të mërkurën do të japë vendimin nëse do të paraqesë apo jo legjislacionin përkatës në lidhje me këtë çështje.

 

 

Në Irak plagosen dy ushtarë polakë

 

Mahavila,Irak, 12 dhjetor 2003 - Dy ushtarë polakë janë plagosur të premtën në Irak. Ushtarët janë sulmuar sot në mëngjes afër qytetit irakian Mahavila. Ushtarin e plagosur rëndë forcat amerikane e kanë transferuar në Bagdad për kurim. Forcat polake deri më tash kanë humbur një ushtar.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |