|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Qytetarët e Podujevës ballafqohen me probleme gjatë rregullimit të dokumentacionit

Podujevë 12 dhjetor 2003 (TN) - Drejtori i Drejtorisë për Administratë të Përgjithshme (DAP) i komunës së Podujevës Hamit Shala sot bëri me dije opinionin publik dhe institucionet qendrore dhe komunale se Shërbimi i regjistrimit civil i komunës së Podujevës këtë javë është ballafaquar me problemin e kthimit të dokumentacionit nga Qendra e Prishtinës, meqë UNMIK-u ka kërkuar respektimin e Rregullores 2000/43, Mbi numrin, emrat dhe kufinjtë e Kosovës të nënshkruar nga ish PSSP të OKB-së Bernard Kouchner më 27.03.2000.

“Shërbimi i regjistrimit civil i komunës sonë ka punuar në bazë të Statutit të komunës i cili është aprovuar nga Kuvendi më 27.03.2001  dhe prej kësaj date regjistrimi është bërë në bazë të emërtimeve në k’të Statut, të cilat kanë ekzistuar edhe para luftës, ndërkaq që Statuti i komunës është bazë mbi të cilin janë rregulluar edhe librat e ofiqarisë dhe librat tjerë të regjistrimit civil të komunës tash 4 vjet”, ka theksuar z. Shala.

Sipas tij Rregullorja 2000/43 që përcakton emërtimin e fshatrave ka gabime të shumta dhe ka shkaktuar huti tek qytetarët e komunës së Podujevës meqë emërtimi i disa fshatrave nuk dihet në cilën gjuhë është. Prej mbi 70 fshatrave të komunës, me këtë Rregullore janë dhënë gabimisht 40 emra të fshatrave e vendbanimeve.

Drejtori Hamit Shala deklaroi se ne nuk kemi kërkuar e as nuk kemi bërë ndërrimin e emrave, por “habitë fakti që deri më tani Ministria e Shërbimeve Publike rezulton se nuk ka reaguar me kohë lidhur me këtë çështje, kurse si pasojë e kësaj qytetarët tanë po hasin në vështirësi në rregullimin e dokumentacionit” tha Shala.