Përmbajtja:

• Holkeri akuzoi Beogradin për shkak të mbështetjes së strukturave paralele serbe në Kosovë

• Mbledhje komemorative me rastin e vdekjes së gazetarit të njohur Jusuf Ferizi

• Policëve serbë u është dashur më pak se tre minuta të vrasin tri familje shqiptare në Podujevë, thotë një dëshmitar i krimit

• Kryetari i FR të LDK-së merr pjesë në takimin të Rinjve të Partive Popullore Evropiane

• Deputetët shpallën të pazbatueshme të gjitha ligjet serbe për Kosovën të miratuara pas 22 marsit të vitit 1989

• Dita Ndërkombëtare për të Drejtat e Njeriut u shënua dje në mbarë Kosovën

• Robert Kuper thotë se bllokimi i procesit të privatizimit në Kosovë nuk është i lidhur me statusin final të saj

• Solemnisht filluan punimet në rikonstruktimin e rrugës nacionale Kosovë – Shqipëri

• Në Gjilan u përurua trafostacioni i ri, donacion i Qeverisë zvicerane

• Objektet sportive dhe ato të kulturës duhet të menaxhohen nga Komuna e Prishtinës

• Deputetët serbë thanë se nuk pajtohen me standardet për Kosovën

• Në Greqi sot janë shënuar tri sulme me bomba

• Sot në Bruksel i zhvillon punimet konferenca për investimet në vendet e Ballkanit

• Në Vjenë sot prezentohet raporti për tregtinë me njerëz në rajonin e Ballkanit

• Tiranë: Ushtria mes një skandali seksual

• Deputetët e Parlamentit maqedonas hodhën poshtë kërkesën e opozitës maqedonase

• Vazhdojnë protestat e studentëve maqedonas kundër zyrtarizimit të Universitetit të Tetovës

• Nga një shpërthim në një kafiteri në Tel Aviv janë vrarë disa vetë dhe janë plagosur dhjetra të tjerë

• Trupat amerikane kanë vrarë një oficer të lartë të fedainëve të Sadam Huseinit

• Ushtarët izraelitë sot kanë vrarë tre palestinezë

• Kryeministri izraelit jep si alternativë ndaj planit të paqes shembjen e disa vendbanimeve hebraike

• Kostoja e dëmit nga ndryshimi i klimës miliarda doillarë

• Më pak vajza se djem në shkolla, thotë UNICEF

Holkeri akuzoi Beogradin për shkak të mbështetjes së strukturave paralele serbe në Kosovë

 

Vjenë, 11 dhjetor 2003 - Duke folur në Vjenë para Këshillit të përhershëm të OSBE-së, shefi i UNMIK-ut Hari Holkeri akuzoi Beogradin për shkak të mbështetjes së strukturave paralele serbe në Kosovë.

 

"Autoritetet e Serbisë gjatë muajve të kaluara kanë vazhduar forcimin e strukturave paralele në Kosovë, posaçërisht në nivelin komunal, gjë që është në kundërshtim me rezolutën 1244". "Beogradi duhet patjetër ta zëvendësojë atë politikë me përkushtimin për organet e vërteta multetnike të pushtetit në Kosovë. Qëndrimi i ndryshëm vetëm mund ta rrezikojë zhvillimin e multietnicitetit", tha Holkeri.

Shefi i UNMIK-ut theksoi se gjatë këtij viti në Kosovë janë kthyer mbi 3.000 persona të shpërngulur nga radhët e minoriteteve. Sipas Holkerit, kthimi i personave të zhvendosur do të jetë indikator vendimtar nëse Kosova ka arritur standardet që i kërkon prej saj bashkësia ndërkombëtare.

 

 

Mbledhje komemorative me rastin e vdekjes së gazetarit të njohur Jusuf Ferizi

 

Prishtinë, 11 dhjetor 2003 - Sot në Prishtinë u mbajt një mbledhje komemorative me rastin e vdekjes së gazetarit të njohur Jusuf Ferizi. Duke folur për figurën prej gazetari të Jusuf Ferizi, kolegu dhe miku tij Rrok Berisha tha se i ndjeri ishte një ndër penat më të dalluara dhe më të guxhmshme të gezetarisë së Kosovës.

 

Ai me këtë rast veçoi edhe punën e Jusuf Ferizit si korrespondent i RTV Prishtina nga Lindja e Mesme në vitet '80, si dhe komentet e vështrimet në Ditarin televiziv të përgatitura nga ai.

Poashtu në këtë mbledhje foli edhe redaktori i gazetës "Bota sot", Bajrush Morina, kurse në emër të sindikatës së RTV Prishtina Adem Nimani.

 

 

Policëve serbë u është dashur më pak se tre minuta të vrasin tri familje shqiptare në Podujevë, thotë një dëshmitar i krimit

 

Londër, 11 dhjetor 2003 - Gazeta britanike "Indipendent" shkruan për dëshminë e pjesëtarit të njësisë speciale të policisë serbe të quajtur "Skorpion" Goran Stopariq në procesin kundër Sasha Cvjetanit për krime mbi shqiptarët në Podujevë, në vitin 1999.

Duke përshkruar veten si shenjestër lëvizëse, për shkak të faktit se ka vendosur të dëshmojë, Stopariq ka theksuar se Cvjetanit dhe tre të policëve të tjerë u është dashur më pak se tre minuta të vrasin tri familje shqiptare me tetë fëmijë në Podujevë, dhe se viktimat nuk kanë pasur kohë as të lëshojnë ndonjë zë.

 

 

Kryetari i FR të LDK-së merr pjesë në takimin të Rinjve të Partive Popullore Evropiane

 

Prishtinë, 11 dhjetor 2003 - Me ftesë të organizatës së të Rinjve të Partive Popullore Evropiane (YEPP), kryetari i Forumit të Rinisë të LDK-së, Lulzim Zeneli do të marrë pjesë në takimin e tyre që mbahet në Vjenë. Ky takim do të organizohet më 12-13 dhjetor dhe në të do të marrin pjesë përfaqësues të më se 40 shteteve.

 

 

Deputetët shpallën të pazbatueshme të gjitha ligjet serbe për Kosovën të miratuara pas 22 marsit të vitit 1989

 

Prishtinë, 11 dhjetor 2003 - Me shumicë votash pro dhe me vetëm 17 vota kundër, që ishin vota të deputetëve serbë, Kuvendi i Kosovës i shpalli sot të pazbatueshme të gjitha ligjet serbe për Kosovën të miratuara pas 22 marsit të vitit 1989. Fillimisht kryetari i Komisionit për çështje legjislative Arsim Bajrami, në arsyetimin e komisionit tha se të gjitha këto ligje si dhe aktet e tjera kushtetuese i janë imponuar popullit të Kosovës.

 

Andaj komisioni propozon që të shpallen të pazbatueshme, pa diskutuar se cilat prej tyre janë vërtet diskrimiuese, ngase të gjitha janë ligje okupuese. Njëherit Komisioni kërkoi të shpallen ireleavante edhe efektet që kanë shkaktuar ato. Të gjitha grupet parlamentare shqiptare u pajtuan me shfuqizimin e këtyre ligjeve.

Në fillim të mbledhjes, shefi i koalicionit serb "Kthimi" kërkoi heqjen e pikës 4 nga rendi i ditës, ngase sipas tij, në bazë të Kornizës Kushtetuese, kuvendi nuk mund ta marrë një vendim të tillë, sepse kjo është në kompetencë të PSSP të OKB-së. Pasi propozimi i tij u hodh në votim, me shumicë votash u hodh poshtë.

Me propozimin e deputetit të LDK-së Alush Gashi, sërish hyri në rend dite emërimi i anëtarëve të Bordit për Telekomunikacion. Ministri i Transportit dhe telekomunikacionit Zef Morina tha se është me rendësi që kjo çështje të futet në rendin e ditës dhe të mirret vendimi, ndonëse përfaqësuesit e dy partive tjera PDK dhe AAK thanë se kjo çështje nuk është aq e ngutshme dhe se nuk janë të gatshëm ta përkrahin propozimin.

 

Me 49 vota pro, 32 kundër dhe 2 abstenime, edhe kjo çështje u fut rendin e ditës së seancës së sotme.
Dje edhe Aleanca Kosovare e Biznesit kërkoi që kuvendi të mos shqyrtojë Projektligjin për Odën Ekonomike, por ministri i Ekonomisë e Financave Ali Sadriu tha se ky Projektligj do ta rregullojë organizimin dhe funksionimin e subjekteve ekonomike në Odën Ekonomike.

 

Sadria tha se Oda Ekonomike ende funksionon në saje të ligjit të Serbisë, prandaj është e nevojshme që funksionimi i saj të jetë në përputhje me sistemin e ri ekonomik, duke krijuar kushte që subjektet ekonomike të bashkohen në të me qëllim të realizimit të intereseve të tyre ekonomike.

 

 

Dita Ndërkombëtare për të Drejtat e Njeriut u shënua dje në mbarë Kosovën

 

Prishtinë, 11 dhjetor 2003 - Dita Ndërkombëtare për të Drejtat e Njeriut u shënua dje edhe në Kosovë. Zyrtarët e Komesariatit të Lartë të OKB-së për të Drejtat e Njeriut theksuan nevojën e angazhimit më të madh për mbrojtjen e të drejtave e të gjithë qytetarëve të Kosovës pa dallime etnike, fetare, kulturore e të tjerë.

Në Ditën Ndërkombëtare për të Drejtat e Njeriut, shefi i Zyrës së Komesariatit të Lartë të OKB-së për të Drejtat e Njeriut në Kosovë, Pol Miler tha se të gjitha institucionet dhe asociacionet kosovare duhet të angazhohen për realizimin e plotë të këtyre të drejtave.

 

Ai tha Zyra e këtij Komesariati në Kosovë është në shërbim të të gjithëve. "Ne bashkëpunojmë me institucionet e Kosovës dhe me mekanizmat ndërkombëtarë në Kosovë me qëlllim të mbrojtjes dhe respektimit të të drejtave për të githë qytetarët e Kosovës", ka thënë Miler.

 

 

Robert Kuper thotë se bllokimi i procesit të privatizimit në Kosovë nuk është i lidhur me statusin final të saj

 

Bruksel, 11 dhjetor 2003 - Drejtori i përgjithshëm për Çështje të Jashtme të Bashkimit Evropian Robert Kuper, që punon për përfaqësuesin e lartë të BE-së, Havier Solana, i deklaroi radios "Ëvropa e lirë" se tash do të ketë standarde shumë më të qarta dhe mendon se në këtë mënyrë po ndihmohet populli i Kosovës që t'i plotësojë këto standarde.

I pyetur për bllokimin e procesit të privatizimit në Kosovë, Robert Kuper thotë se kjo gjë nuk ka të bëjë me presione nga Serbia dhe nuk është e lidhur me statusin përfundimtar të Kosovës.

 

Ai nënvizoi se Kosova është në Evropë dhe e dyta është që Evropa është në Kosovë. "Kosova është në Evropë gjeografikisht ne angazhohemi që Kosova të jetë në Evropë në të gjitha aspektet: politikisht, ekonomikisht dhe që shoqëria në Kosovë t'i plotësojë standardet e një shoqërie normale evropiane.

 

Pra kjo në thelb është një politikë evropiane, është një politikë për të ardhmen e Evropës... Mendoj se 80 për qind e ushtarëve të KFOR-it janë evropianë dhe Evropa ka kontribuar shumë në administratën e UNMIK-ut nëpërmjet shtyllës ekonomike. Pra, jemi thellësisht të përfshirë në Kosovë dhe jemi të lidhur me të ardhme", tha ndër të tjera ky diplomat i BE-së, duke shtuar se Kosova në një të ardhme do të mund të bëhet pjesë e BE-së.

 

 

Solemnisht filluan punimet në rikonstruktimin e rrugës nacionale Kosovë – Shqipëri

 

Gjakovë, Qafa e Prushit, 11 dhjetor 2003 - Në Gjakovë u shënua solemnisht fillimi i punimeve në rikonstruktimin e rrugës nacionale Kosovë - Shqipëri, përkatësisht Gjakovë - Qafa e Prushit me gjatësi rreth 10 kilometra.

 

Afati për kryerjen e punimeve sipas dinamikës është paraparë të jetë shtatë muaj. Në këtë solemenitet morën pjesë ministri i Transportit e Telekomunikacionit Zef Morina, ministri i Financave, Ali Sadria dhe shefi i Zyrës së Shqipërisë në Prishtinë, Bashkim Rama, por edhe përfaqësues të tjerë të institucioneve të Kosovës.

Me këtë rast ministri i Transportit Zef Morina, i cili duke folur për angazhimet për ndërtimin e infrastrukturës jugore në Kosovë ndër të tjera theksoi: "Ne se Qeveri dhe Ministri do të angazhohemi që nëpërmjet ndërtimit të infrastrukturës rrugore të ndërtojmë dhe forcojmë urat që lidhin me shtetin e Kosovës dhe shtetin e Shqipërisë. Këto lidhje do ta na mundësojnë të hapim perspektiva të reja jo vetëm të kësaj zone kufitare të Dukagjinit por për gjithë territorin e Kosovës", tha ministri Morina.

Fillimin e punimeve të kësaj rruge e përshëndeti edhe Ministri i Ekonomisë dhe Financave Ali Sadriu i cili në fjalën e tij ndër të tjera theksoi se "kjo është edhe një shenjë që t'i tregojmë botës se ne dimë të mbajmë shtet dhe të krijojmë buxhet dhe këtë projekt për herë të parë e financojmë me mjete tona".

Të pranishmëve iu drejtua edhe shefi i Zyrës së Shqipërisë në Kosovë, Bashkim Rama dhe kryetari i Kuvendit komunal të Gjakovës Haçif Shehu të cilët veçuan rëndësinë strategjike të kësaj arterje të rëndësishme ndërkufitare. Aktin solemn të prerjes së shiritit e bënë së bashku ministrat Morina e Sadriu, kryetari i Komunës së Gjakovës Aqif Shehu dhe Bashkim Rama.

Ndryshe rikonstruimi i rrugës nacionale Gjakovë - Qafa e Prushit do të kushtojë 1.4 milionë euro dhe ajo do të ndërtohet konform standardeve evropiane.

 

 

Në Gjilan u përurua trafostacioni i ri, donacion i Qeverisë zvicerane

 

Gjilan, 11 dhjetor 2003 - Në Gjilan u përurua dje trafostacioni i ri, donacion i Qeverisë zvicerane, i cili ka kushtuar mbi dy milion franga. Përurimin e këtij trafostacioni të kompletuar me aparaturë moderne e bënë Hans Peter Fisher, përfaqësues i Qeverisë zvicerane në Kosovë, Fatime Ahmeti, drejtoreshë e Distribucionit të KEK-ut në Kosovë dhe kryetari i Kuvendit të komunës së Gjilanit Lutfi Haziri. Hans Fisher tha se Qeveria zvicerane do të ndihmojë edhe në të ardhmen elektrodistribucionin e Gjilanit.

Trafostacioni, që u përurua dje është i katërti në Anamoravë, i finacuar nga Qeveria e Zvicrës, ku së bashku me riparimet në rrjetin energjetik, vlera e investimeve kapë shumën e mbi 15 milionë frangave zvicërane.

 

Këto investime e kanë riparuar tërësisht sistemin elektroenergjetik në Anamoravë dhe e kanë përmirësuar dukshëm furnizimin e konsumatorëve të kësaj pjese të Kosovës me energji elektrike, u tha në këtë solemnitet.

 

 

Objektet sportive dhe ato të kulturës duhet të menaxhohen nga Komuna e Prishtinës

 

Prishtinë, 11 dhjetor 2003 - Ministri i kulturës Behxhet Brajshori dhe kryetari i Kuvendit të Komunës së prishtinës, Ismet Beqiri kanë biseduar dje për disa çështje dhe probleme që po e përcjellin kulturën në komunën e Prishtinës.

 

Ministri Brajshori foli për mënyrën e menaxhimit të Pallatit të Rinisë në Prishtinë dhe kërkoi që shumë shpejt të definohen kompetencat rreth Pallatit të Rinisë, derisa Komuna e Prishtinës e ka mbështetjen e plotë të Ministrisë së Kulturës në aspektin menaxhues të Pallatit të Rinisë në Prishtinë.

 

Poashtu Brajshori foli edhe çështjen e ndërtimit të Shtëpisë së Operës dhe Baletit në Prishtinë dhe rikonfirmoi kërkesën që Kuvendi Komunal i Prishtinës të gjejë lokacion për ndërtimin e saj, ndërkoi që ministri shtroi kërkesën që edhe ndërtesa e ish-hotel Unionit afër Teatrit Nacional në Prishtinë të hyjë në kuadër të Ministrisë për Kulturë të Qeverisë së Kosovës.

Kryetari i Komunës së Prishtinës, Ismet Beqiri tha se Pallati i Rinisë është objekt që është ngritur nga vetëkontributi dhe djersa e qytetarëve të Prishtinës, ndërsa as që do të duhej të vihej në diskutim menagjimi i tij, dhe ai premtoi se së shpejti do të fillojë procedura për menaxhimin e tij nga Komuna e Prishtinës.

 

Po ashtu kryetari Beqiri foli për menaxhim të dobët edhe të sallës "1 Tetori" në Prishtinë, pastaj për menaxhimin po ashtu të dobët të kinemave të qytetit, si dhe të stadiumit të Prishtinës dhe shtoi se jo vetëm këto objekte, por edhe të gjitha objektet tjera duhet të menaxhohen nga institucionet e Kosovës, pasi ne të shumtën e rasteve edhe nuk dimë se çfarë po ndodh me këto objekte me rëndësi kulturore për kryeqytetin e Kosovës.

 

Ismet Beqiri përkrahu ndarjen e lokacionit për ndërtimin e Shtëpisë së Operes dhe të Baletit në Prishtinë, si dhe të menaxhimit të objektit të ish-hotel Unionit nga Ministria për Kulturë e Qeverisë së Kosovës.

 

 

Deputetët serbë thanë se nuk pajtohen me standardet për Kosovën

 

Mitrovicë, 11 dhjetor 2003 - Deputetët serbë të Kosovës Oliver Ivanoviq dhe Dragisha Kërstoviq thanë në një konferencë me gazetarë në Mitrovicë se nuk pajtohen me standardet dhe me atë që është bërë deri më tash lidhur me standardet për Kosovën, ndaj nuk kanë marrë pjesë dje në publikimin e tyre.

Ndërkaq nga Beogradi ka reaguar zëvendëskryeministri serb Nebojsha Çoviq i cili ka thënë se standardet bien mbi Rezolutën 1244.

 

 

Në Greqi sot janë shënuar tri sulme me bomba

 

Athinë, 11 dhjetor 2003 - Tri sulme me bomba me përmasa të vogla, në të cilat nuk ka pasur viktima, janë shënuar të enjtën në Athinë dhe në Selanik, njoftojnë mediat greke.

Persona të panjohur kanë ndezur bombola me gaz para shtëpisë së një gjykatësi në Athinë, ndërkaq në Selanik bomba të ngjashme ndezëse janë vënë nën automobilin e kryesit të punëve ndërtimore, si dhe para zyrës së elektro-ndërmarrjes shtetërore (DEI). Në zjarret që u shkaktuan janë bërë dëme të vogla materiale.

Policia beson se fjala është për ithtarët e grupit majtist ekstrem 17 Nënëtori, 15 anëtarët e të cilit janë shpallur fajtorë për sulme me bomba dhe plaçkitje të armatosura.

 

 

Sot në Bruksel i zhvillon punimet konferenca për investimet në vendet e Ballkanit

 

Bruksel, 11 dhjetor 2003 - Sot në Bruksel i zhvillon punimet konferenca për investimet në vendet e Ballkanit, organizatoirë të të së cilës është Pakti i Stabilitetit për Evropën Juglindore. Konfrenca do t'i mbledhë zyrtarët e rajonit, espertët, drejtorët dhe përfaqësuesit e organizatave ndërkombëtare, ndërkaq fjalën e hyrjes do ta mbajë ministri i punëve të jashtme të Bosnjës e Hercegovinës, Mladen Ivaniq.

 

 

Në Vjenë sot prezentohet raporti për tregtinë me njerëz në rajonin e Ballkanit

 

Vjenë, 11 dhjetor 2003 - Organizatat ndërkombëtare sot në Vjenë do të prezentojnë raportin për tregtinë me njerëz në rajonin e B e H, Kroacisë, Serbisë e Malit të Zi, Shqipërisë, Bullgarisë, Moldavisë dhe Rumanisë. Raporti është hartuar në bazë të të dhënave që janë mbledhur në kuadër të Paktit të Stabilitetit për Evropën Juglindore, UNICEF-it, UNHCR-it dhe OSBE-së.

 

 

Tiranë: Ushtria mes një skandali seksual

 

Tiranë, 11 dhjetor 2003 - Baza ushtarake e Bisht Pallës në Durrës ka pezulluar aktivitetin pasi disa ushtarë të saj janë përfshirë në një skandal seksual. Për më shumë se dy muaj në këtë bazë ushtarake, një nga më të rëndësishmet e ushtrisë shqiptare është kthyer në një shtëpi publike.

Ushtarë, marinarë dhe deri oficerë, kanë abuzuar me një vajzë 16 vjeçare, e cila vetëm pak ditë më parë ka denoncuar në polici.

Policia ka arrestuar të paktën 9 persona, midis tyre dhe të dashurin e 16 vjeçares, i cili e kish futur në këtë rrugë.

Shefi i Shtabi të Ushtrisë shqiptare, Pëllumb Qazimi ka kërkuar falje publike për skandalin si dhe familjes se minorenes. Ai i ka premtuar atyre se hetimi lidhur me këtë ngjarje do të shkojë deri në fund.

Ndërkohë është shkarkuar komandanti i bazës së Bisht Pallës, ndërsa aktiviteti i saj është pezulluar përkohësisht, njofton BBC.

 

 

Deputetët e Parlamentit maqedonas hodhën poshtë kërkesën e opozitës maqedonase

 

Shkup, 11 dhjetor 2003 - Deputetët e Parlamentit të Maqedonisë me shumicë votash hodhën poshtë kërkesën e opozitës maqedonase për interpelancë kundër ministrit të Arsimit Aziz Pollozhani, të inicuar nga Grupi parlamentar i VMRO-DPMN-së, i cili e akuzonte për keqpërdorime financiare dhe për incidentet ndëretnike që ndodhën kohë më parë nëpër disa shkolla të mesme të vendit.

 

Deputetët e VMRO-DPMN-së kanë theksuar në debatin e djeshëm se ministri Pollozhani kishte trimëruar nacionalsitët shqiptarë me iniciativën e tij për zyrtarizimin e Universitetit të Tetovës.

Në seancë edhe opozita shqiptare paraqiti një sërë kritikash në adresë të Ministrisë së Arsimit, duke vlerësuar se këtij dikasteri i mungon strategjia për zgjidhjen e problemeve.

Ministri Pollozhani thotë se kërkesa për interpelancë kundër tij kryekëput ka të bëjë me arsye politike dhe jo arsimore.

Ndërkohë deputetët kanë filluar të shqyrtojnë edhe propozim-ligjin për zyrtarizimin e Universitetit të Tetovës.

 

 

Vazhdojnë protestat e studentëve maqedonas kundër zyrtarizimit të Universitetit të Tetovës

 

Shkup, 11 dhjetor 2003 - Edhe dje përpara Parlamentit të Maqedonisë vazhduan protestat e studentëve maqedonas kundër zyrtarizimit të Universitetit të Tetovës. U dëgjuan brohoritjet e protestuesve maqedonas kundër miratimit të Ligjit për zyrtarizimin e Universitetit të Tetovës. Sipas organizatorëve protestat para Parlamentit do të vazhdojnë derisa ministri i Arsimit të Maqedonisë Aziz Pollozhani nuk jep dorëheqje.

 

 

Nga një shpërthim në një kafiteri në Tel Aviv janë vrarë disa vetë dhe janë plagosur dhjetra të tjerë

 

Tel Aviv, 11 dhjetor 2003 - Nga një shpërthim në një kafiteri në Tel Aviv janë vrarë disa vetë dhe janë plagosur mbi dhjetë të tjerë, njofton Rojter. Në njoftim thuhet se sulmin nuk e kanë bërë palestinezët, ka thënë një zyrtar i policisë. Ndërkaq, AP dhe AFP bëjnë të ditur për tre të vrarë në këtë shpërthim.

Policia thotë se motivet mund të kenë qenë kriminale.

Një zyrtar i emergjencës ka konfirmuar se në spital janë transportuar 18 të plagosur.

 

 

Trupat amerikane kanë vrarë një oficer të lartë të fedainëve të Sadam Huseinit

 

Mosul, 11 dhjetor 2003 - Trupat amerikane kanë vrarë një oficer të lartë të grupit paramlitar të fedainëve të Sadam Huseinit, kanë thënë dëshmitarët, njofton AP.

Ushtria amerikane ka konfirmuar se të mërkurën kanë pasur një sulm në Mosul, por refuzoi të komentojë njoftimin për vdekjen e kolonel Gahnem Abdul-Ghan Sulltan al Zeidi.

Dy fqinjë të Al-Zeidit, me kushte anonimiteti, thanë se trupat amerikane kanë shkatërruar një shtëpi në Mosul.
Në portën e shtëpisë së Al-Zeidit ishin vënë disa lajmërime ku shkruante se "heroi martir kolonel Al-Zeidi është martizuar gjatë agresionit nga forcat amerikane në shtëpinë e tij më 10.12,2003".

 

 

Ushtarët izraelitë sot kanë vrarë tre palestinezë

 

Rafah, 11 dhjetor 2003 - Në një përleshje të ashpër në kampin e refugjatëve në Rafah, ushtarët izraelitë sot kanë vrarë tre palestinezë, një të armatsour dhe dy civilë, ndërkaq tetë palestinezë janë plagosur.

 

Ushtarët izraelitë po kërkonin një palestinez në kamp, kur kundër tyre u hap zjarr nga të gjitha anët, thonë burimet izraelite. Ndërkaq, burimet palestineze thonë se fjala është për sulmin më të madh të forcave izraelite në Rafah në dy javët e fundit.

 

 

Kryeministri izraelit jep si alternativë ndaj planit të paqes shembjen e disa vendbanimeve hebraike

 

Tel Aviv, 11 dhjetor 2003 - Një ligjvënës izraelit me influencë ka shprehur mbështetjen për planet e Kryeministrit, Ariel Sharon, për shembjen vullnetarisht të disa vendbanimeve hebraike në Bregun Perëndimor.

 

Juval Steinitzm, kryetar i Komisonit të parlamentit për Punët e Jashtme dhe të Mbrojtjes, tha dje se planet e zotit Sharon do ta bëjnë Izraelin më të aftë për t'u mbrojtur. Zoti Sharon i tha komisionit të martëm se shembja e disa vendbanimveve do të ishte një opcion i pranueshëm, në qoftë se plani ndërkombëtar i paqes, nuk jep rezultate.

Administrata e Presidentit Bush thotë se çdo përpjekje për një zgjidhje të njëanëshme të konfliktit izraelito-palestinez nuk do të ketë sukses.

 

 

Kostoja e dëmit nga ndryshimi i klimës miliarda doillarë

 

Milano, 11 dhjetor 2003 - Një konferencë e Kombeve të Bashkuara mbi ndryshimin e klimës ka paralajmëruar mbi pasojat në rritje të ngrohjes globale.

Një zyrtar i lartë i Kombeve të Bashkuara, Klaus Toepfer tha se ndryshimi i klimës ishte një realitet që në mënyrë të vazhdueshme do të ketë ndikime negative mbi zhvillimin ekonomik dhe njerëzor të Tokës.

Katastrofat natyrore, shumica prej të cilave të shkaktuara nga motii keq, i kanë kushtuar qeverive të vendeve më shumë se 60 miliardë dollarë në vit, u tha në konferencën e mbajtur në Italy. Megjithatë një politikan i lartë amerikan hodhi dyshime mbi paralajmërimet e bëra për pasojat e ndryshimit të klimës.

Organizatorët e konferencës në Milano shpresonin të arrinin ratifikimin përfundimtar të Protokollit të Kiotos të vitit 1997 lidhur me efektin serë të emetimit të gazeve në atmosferë.

Por disa ditë më parë, Russia - mbështetja e të cilës për protokollin është esenciale pas SHBA-së, - u tërhoq duke thënë se do ta rishikonte nënshkrimin e protokollit.

 

 

Më pak vajza se djem në shkolla, thotë UNICEF

 

Kombet e Bashkuara, 11 dhjetor 2003 - Fondi i Kombeve të Bashkuara për Fëmijët, UNICEF thotë se fushata për edukimin e fëmijëve nuk kanë qënë të efektshme njëlloj si te vajzat ashtu edhe te djemtë.

Në raportin e tij vjetor UNICEF thotë se gati 120 milionë fëmijë në botë nuk frekuentojnë çdo vit shkollën fillore, shumica e tyre janë vajza.

Raporti thotë se zonat më të prekura janë Afrika sub-Sahariane dhe Azia jugore dhe lindore, ku numri i vajzave që ndjekin shkollën ka filluar të bjerë ndjeshëm.

Kjo sipas UNICEF-it ka pasoja jo vetëm mbi fëmijët, por edhe mbi familjet e tyre, komunitetin dhe vendet ku jetojnë.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |