Përmbajtja:

• Me një ceromoni rasti, sot u zyrtarizuan "Standardet për Kosovën"

• Drejtuesit e Komisionit për Bashkëpunim Ndërkombëtar Hamiti e Kurteshi po zhvillojnë takime në SHBA

• Kryeparlamentari Daci priti krerët e policisë Feler dhe Ahmeti

• LDK mbështet planin Standardet për Kosovën

• Vdiq gazetari Jusuf Ferizi

• KFOR-i norvegjez bastis në Zhegër edhe shtëpinë e deputetit Sabit Rrustemi

• Zjarri dogji objektin e postës në veri të Mitrovicës

• BE mbështet planin e operacionalizimit të standardeve dhe kërkon rifillimin e privatizimit në Kosovë

• Debat publik me ekspertët e drejtësisë për projektligjin kundër diskriminimit

• Në prag të festave të dhjetorit trupat paqeruajtëse të KFOR-it kanë shtuar masat e sigurisë në Kosovë

• Brajshou ua paraqiti Planin e standardeve për Kosovën përfaqësuesve politikë

• Rrjeti i Grupit të Grave shpalli këtë vit më të suksesshmin në mbrojtjen e grave të Kosovës

• Fillon së funksionuari "korridori tranzit i Kosovës"

• HRW kërkon të bëhet më shumë për përmirësimin e gjendjes së romëve nga Kosova që ndodhen në Maqedoni

• Dënim prej 15-20 vjet burg për serbin Obrenoviq

• Çoviq thotë se standardet e Bashkimi Evropian janë "autostradë për pavarësinë e Kosovës"

• Shpallen dënimet e grupit terrorist

• KQZ shkarkoi nga detyra Komisionin zonal të Tiranës për keqadministrim të rezultateve në votime

• Mijëra studentë maqedonas të Shkupit dhe Manastirit protestuan kundër zyrtarizimit të Universitetit të Tetovës

• Presidenti malazez ka thënë se fati i Kosovës nuk mund të lidhet me fatin e Malit të Zi

• Grupi Ndërkombëtar i Krizave: Raport për gjendjen në Luginën e Preshevës

• Vritet një ushtar amerikan dhe një tjetër plagoset në veri të Irakut

• Vriten tre vetë në Kashmirin indian nga shpërthimi i bombës

• Gjashtë fëmijë kanë humbur jetën në sulmin amerikan në Afganistan

• Izraelitët vranë një palestinez 16-vjeçar

• Iraku dhe kontratat e rindërtimit

• Bush i bëri Tajvanit një paralajmërim të rreptë se SHBA-të janë kundër çdo përpjekjeje të njëanëshme drejt pavarësisë

Me një ceromoni rasti, sot u zyrtarizuan "Standardet për Kosovën"

 

Prishtinë, 10 dhjetor 2003 - Në një ceromoni rasti, sot në mjediset e Kuvendit komunal të Prishtinës, u bë publikimi zyrtar i planit "Standardet për Kosovën", ku ishin të pranishëm shefi i UNMIK-ut Presidenti i Kosovës, Ibrahim Rugova kryministri Bajram Rexhepi dhe përfaqësues të tjerë politikë vendorë dhe ndërkombëtarë. Duke folur në këtë ceremoni, shefi i UNMIK-ut Hari Holkeri tha se kjo është një ditë e madhe dhe e rëndësishme për Kosovën dhe detyra e përbashkët është që të përgatitet Kosova për statusin përfundimtar.

 

Holkeri theksoi se për statusin përfundimtar ka vetëm një rrugë dhe kjo është progresi që duhet të arrihet në përmbushjen e standardeve. "Ky vendim varet nga ajo që thuhet dhe bëhet këtu në Kosovë pasi ekziston vetëm një rrugë drejt statusit përfundimtar të Kosovës dhe ajo është rruga drejt përmbushjes së standardeve", nënvizoi Holkeri.

 

Me këtë rast ai shprehu keqardhje që serbët në shenjë mospajtimi nuk morën pjesë në këtë ceremoni. Por, ai u bëri thirrje atyre që të bashkëpunojnë me UNMIK-n dhe institucionet e Kosovës për të përmirësuar kushtet e komunitetit të tyre.

Holkeri nënvizoi se përmbushja e standardeve është zgjedhja midis demokracisë dhe kriminalitetit e anarkisë, ndërmjet ngecjes në vend dhe prapambetjes në njërën anë dhe ndihmës së botës demokratike për të ecur përpra, në anën tjetër.

 

Presidenti i Kosovës Ibrahim Rugova tha se lancimi i standardeve është një moment me rëndësi, pasi tash ka ardhur koha të vlerësohen standardet dhe përparimi i bërë në Kosovë. "Standardet që bashkësia ndërkombëtare i kërkon nga Kosova kanë për qëllim vlerësimin e të arriturave të Kosovës para vendosjes së statusit final të Kosovës, që për ne është pavarësia, si dhe përmbushjen e normave për integrim në BE, në NATO dhe në bashkësinë ndërkombëtare", theksoi Presidenti Rugova. Presidenti përkrahu standardet dhe premtoi angazhimin e institucioneve dhe të qytetarëve të Kosovës për të përmbushur standardet. Kryeministri Bajram Rexhepi tha se Kosova do t'i përmbushë standardet brenda afatit të caktuar dhe bëri thirrje për praninë ndërkombëtare si dhe qytetarëve të Kosovës që të përkrahin qeverinë për të përmbushur këto standarde.

 

"Pa plotësimin e standardeve do ta kemi të vështirë të finalizojmë statusin përfundimtar të Kosovës ashtu siç e synojmë të gjithë ne. Prandaj, kontributi i secilit kosovar në realizimin e standardeve është kontribut drejt statusit të Kosovës, në përputhje me vullnetin e qytetarëve të saj", tha Rexhepi.

 

 

Drejtuesit e Komisionit për Bashkëpunim Ndërkombëtar Hamiti e Kurteshi po zhvillojnë takime në SHBA

 

Uashington, 10 dhjetor 2003 - Dr. Sabri Hamiti, kryetar, dhe z. Ismail Kurteshi, nënkryetar, i Komisionit për Bashkëpunim Ndërkombëtar të Kuvendit të Kosovës, të cilët po qëndrojnë në një vizitë zyrtare disaditëshe në SHBA, kanë zhvilluar takime të rëndësishme në Komitetein e Jashtëm të Senatit Amerikan dhe në Departamentin e Shtetit.

Udhëheqësit e Komisionit për Bashkëpunm Ndërkombëtar kanë pasur takim me z. Keneth A. Myers (Majers), shef i stafit të Komitetit të Jashtëm të Senatit. Ata kanë zhvilluar një bisedë gjithëpërfsirëse edhe me z. Phil English (Fil Inglish), kongresist nga Pensilvania, i cili, së shpejti, bashkë me një grup kongresistësh të tjerë, do të vizitojë Kosovën.

Ndërkaq, në Departamentin amerikan të Shtetit, Sabri Hamiti dhe Ismail Kurteshi janë takuar me znj. Kathy Stevens [Kethi Stivënz), shefe e Zyrës për Evropën e Mesme dhe Juglindore, si dhe një bisedë të veçantë me z. Michael R. Bosshart, zëvendësdrejtor i njësisë për Evropë Jugore dhe Qendore në Zyrën për Çështje Evropiane dhe Euroaziatike.

Deputetët Hamiti dhe Kurteshi kanë pasur edhe një takim te veçantë me znj. Sarah Farnsworth (Sara Farnzuorth), shefe e divizionit për Ballkanin e USAID-it, në të cilin merrnin pjesë ekspertë për ligje dhe për ndihma.

Në Uashington, deputetët e Kosovës kanë pasur një takim në Këshillin Shqiptaro-amerikan me kryetarin e këtij Këshilli z. Martin Vulaj.

Dr. Sabri Hamiti dhe z. Ismail Kurteshi do të marrin pjesë në një tryezë të rrumbullakët në Institutin Amerikan të Paqes, të kryesuar nga z. Daniel Server.

Gjatë qëndrimit në Uashington, ata do të kenë një takim edhe me kongresistin e njohur Eliot Engel.
Gjatë vizitës së tyre në Uashington, drejtuesit e Komisionin për Bashkëpunim Ndërkombëtar të Kosovës do të kenë takime edhe në Departamentin Amerikan të Mbrojtjes dhe në Këshillin për Siguri Kombëtare.

 

 

Kryeparlamentari Daci priti krerët e policisë Feler dhe Ahmeti

 

Prishtinë, 10 dhjetor 2003 - Kryetari i Kuvendit të Kosovë, Nexhat Daci, i ka ftuar në një takim të përbashkët komisdionerin e Policisë së UNMIK-ut, Shtefan Feler dhe kolonelin e SHPK-së, Sheremet Ahmeti, për t'u njoftuar për gjendjen në polici dhe për gjendjen e përgjithshme të sigurisë në Kosovë.

 

Pasi i ka marrë informacionet e duhuara, kryeparlamentari Daci e ka njoftuar kolonel Ahmetin se gjatë janarit të ardhshëm Kuvendii i Kossovës do ta ketë në rend dite çështjen e sigurisë në Kosovë dhe e ka ftar atë që para deputetëve të prezantojë vizionin e tij për zhvillimin e Shërbimit Policor të Kosovës.

 

Ai është shprehur se ky takim dhe takimi me kreun e TMK-së, si dhe debati në parlament për zhvillimin e këtyre dy strukturave shumë të rëndësishme për ardhmërinë e Kosovës, bëhen në kudër të marrjes së kompetencave dhe zhvillimit të tyre sipas modeleve të vendeve më demokratike të botës.

Komisioneri i policisë, Shtefan Feler është shprehur se policia në Kosovë është një shërbim i vetëm, me një funksion dhe me një qëllim: siguria për të gjithë qytetarët dhe liria e lëvuzjes së tyre në gjithë territorin e Kosovës.

Shërbimi Policor i Kosovës, është shprehur Sheremet Ahmeti, është i gatshëm të pranojë më shumë detyra dhe përgjegjësi, të bëhet polici e vërtetë e vendit, në mënyrë që bashkë me ndërkombëtarët ta luftojë me sukses çdo lloj krimi, si parakusht për një Kosovë të qetë dhe stabile.

Profesor Daci, në takim me përgjegjësit e policisë, ka kërkuar edhe një herë që strukturat e sigurisë dhe të mbrojtjes në Kosovë të jenë jashtë partive dhe jashtë politikës së ditës. Ai ka kërkuar, ndërkaq, që ish policët që e kanë kaluar testin provues, të pranohen në punë, kurse për gjithë të tjerët të vlejë standardi i paraparë.

 

 

LDK mbështet planin Standardet për Kosovën

 

Prishtinë, 10 dhjetor 2003 - Lidhja Demokratike e Kosovës (LDK) mbështet planin Standardet për Kosovën dhe vlerëson se ky propozim i kontribon dhe është pjesë e angazhimit tonë të përbashkët, të institucioneve vendore dhe ndërkombëtare në zhvillimin e proceseve politike, demokratike dhe ekonomike në Kosovë,- thuhet në një prononcim të zëdhënësit të LDK-së Lulzim Zeneli.

Sipas zëdhënësit të LDK-së, në këtë plan ka hapësirë për diskutime në mënyrë që të ketë një punë funksionale në implementimin dhe realizimin e tij dhe që çon në përmbushjen e përgjegjësive dhe obligimeve të përbashkta. Po ashtu ky plan hap shtegun e finalizimit të statusit të pavarësisë së Kosovës dhe të integrimit të Kosovës në mekanizmat evroatlantikë, thotë zëdhënësi Zeneli.

 

 

Vdiq gazetari Jusuf Ferizi

 

Stamboll, 10 dhjetor 2003 - Sot në një spital të Stambollit, në moshën 64-vjeçare vdiq gazetari i njohur Jusuf Ferizi. I ndjeri Jusuf Ferizi ka qenë gazetar shumëvjeçar i të përditshmes "Rilindja", pastaj për shumë vjet ka punuar në Televizionin e Prishtinës, kurse në kohët e fundit ka qenë kolumnist e gazetës "Bota sot". Ndërkaq, data dhe dita e varrimit do të caktohet më vonë.

 

 

KFOR-i norvegjez bastis në Zhegër edhe shtëpinë e deputetit Sabit Rrustemi

 

Gjilan, 10 dhjetor 2003 - Në orët e hershme të mëngjesit të sotëm në fshatin Zhegër, një njësi e KFOR-it norvegjez ka ndërrmarrë një aksion të gjerë, siç thuhet, në kërkim të armëve. Më saktësisht, kontrolli është shtrirë në njërën nga lagjet e fundme të këtij fshati dhe në mesin e familjeve të kontrolluara, është edhe ajo e deputetit të Kuvendit të Kosovës, Sabit Rrustemi.

Në një deklaratë të tij, z. Rrustemi thotë se kjo njësi e KFOR-it norvegjez e ka trazuar në orën 5 e 50 minuta, kur ka kërkuar që t'i hapen dyert për kontrollim.

"Përkundër faktit se unë e paralajmërova KFOR-in që jam deputet i Kuvendit të Kosovës dhe u thashë se as që mund të bëhet fjalë për armë në shtëpinë time, ata realizuan kontrollin brenda dhe përreth shtëpisë", tha Sabit Rrustemi. Ushtarët e KFOR-it e kanë penguar për një kohë edhe birin e tij për të shkuar në shkollë.

Ushtarët në fund kanë kërkuar falje se gjoja gabimisht qenkan orientuar në shtëpinë e deputetit Rrustemi.

 

 

Zjarri dogji objektin e postës në veri të Mitrovicës

 

Mitrovicë, 10 dhjetor 2003 - Një zjarr i fuqishëm ka përfshirë mbrëmë postën e vogël në veri të Mitrovicës, e cila ndodhet në qendër të qytetit. Shkaqet e shpërthimit të zjarri nuk dihen, ndërkohë që ai ishte shuar pas një ore. Zjarri ka djegur ndërtesën e postës si dhe një lokal tregtar që ndodhet afër.

 

 

BE mbështet planin e operacionalizimit të standardeve dhe kërkon rifillimin e privatizimit në Kosovë

 

Bruksel, 10 dhjetor 2003 - Në Bruksel në takimin e Forumit të parë të ministrave të jashtëm të Bashkimit Evropian dhe atyre të Ballkanit, ku merrnin pjesë edhe Kryeadministratori e Kryeministri i Kosovës, është diskutuar edhe Plani i operacionalizimit të standardeve për Kosovën.

 

Bashkimi Evropian shprehu mbështetjen e plotë për vënien në jetë të këtyre standardeve dhe kërkoi që sa më shpejt të fillojë procesi i privatizimit në Kosovë.

 

Po kështu kryeadministratori i Kosovës Hari Holkeri ka paralajmëruar ministrat e jashtëm të BE-së dhe të Ballkanit Perëndimor se të mërkurën në Prishtinë do të bëjë publik planin për operacionalizimin e standardeve.

 

Këtë e ka konfirmuar dje në Bruksel edhe komesioneri për Politikë të Jashtme dhe Siguri i BE-së Havier Solana, i cili tha se ky plan, edhe pse nuk e kishte parë, është konform qëndrimeve dhe kërkesave evropiane, pasi që shefi i UNMIK-ut përfaqëson edhe interesat e BE-së. Solana ka shprehur keqardhje me faktin se Serbia ka refuzuar projektproozimin përfundimtar të OKB-së rreth së ardhmes së Kosovës.

Diplomatët evropianë besojnë se refuzimi mund të jetë i lidhur me fushatën zgjedhore në Serbi. Ndërkaq, Solana tha se kishte besim se Holkeri do të dilte me një plan të arsyeshëm.

 

Ai gjithashtu i bëri thirrje Beogradit dhe Prishtinë që të rifillojnë bisedimet direkte, duke shtuar se standardet e caktuara për Kosovën janë të lidhura me kriterie evropiane, si për shembull kthimi i refugjatëve. Gjithashtu duhet të merremi me çështjen e peresonave të zhdukur, ka thënë me këtë rast z. Solana.

Menjëherë pas përfundimti të këtij takimi, kryeministri i Kosovës u shpreh para mediave në Bruksel se sot në Prishtinë Holkeri dhe ai do të paraqesin bashkërisht planin e operacionalizimit të standardeve, ndërkaq pjesëmarrja e Serbisë në vënien në jetë të këtyre standardeve nuk është fare e nevojshme, tha kryeministri Rexhepi.

 

 

Debat publik me ekspertët e drejtësisë për projektligjin kundër diskriminimit

 

Prishtinë, 10 dhjetor 2003 - Në Kuvendin e Kosovës u organizua një debat publik me ekspertët e drejtësisë për projektligjin kundër diskriminimit dhe projektligjit për barazi ligjore, të cilat pritet të paraqiten për miratim në Parlamentin e Kosovës.

 

Përfaqësuesit e organizatave qeveritare dhe joqeveritare si dhe ata të mekanizmave ndërkombëtarë në Kosovë, vlerësuan se këto dy projektligje paraqesin bazë të mirë juridike për vendosjen e Kornizës ligjore në krijimin e barazisë me respektimin e të drejtave të njeriut në Kosovë pa dallime etnike.

Përfaqësuesit e Parlamentit dhe të Qeverisë së Kosovës si dhe ata të UNMIK-ut dhe të OSBE-së thanë se këto projektligje janë hartuar në pajtim me standardet dhe konventat ndërkombëtare dhe mbi të drejtat dhe liritë e qytetarit.

 

 

Në prag të festave të dhjetorit trupat paqeruajtëse të KFOR-it kanë shtuar masat e sigurisë në Kosovë

 

Prishtinë, 10 dhjetor 2003 - Për shkak të mundësisë eventuale të sulmeve terroriste në prag të festave të dhjetorit, forcat paqeruajtëse të KFOR-it në Kosovë njoftuan se kanë shtuar masat e sigurisë në vend. Zëdhënësi i KFOR-it në Prishtinë, Kris Tompson tha se KFOR-i ka rritur numrin e pikave të kontrollit dhe ka shtuar patrullimet në zonat rurale.

 

 

Brajshou ua paraqiti Planin e standardeve për Kosovën përfaqësuesve politikë

 

Prishtinë, 10 dhjetor 2003 - ZV.kryeadministratori i Kosovës Çarlls Brajshou, Planin standardet për Kosovën, mbrëmë ua ka dorëzuar përfaqësuesve të forcave politike në Kosovë, të cilët me disa vërejtje e kanë pranuar atë.

 

Vërejtjet kryesore të vendorëve në këtë dokument sipas nënkryetarit të PDK-së Arsim Bajrami dhe kryetarit të AAK-së Ramush Haradinaj u adresohen ligjeve të aplikueshme dhe standardit të kthimit, kurse për Skënder Hysenin, këshilltar politik i presidentit Rugova, më e rëndësishme është se standardet tashmë nuk janë abstrakte.

 

 

Rrjeti i Grupit të Grave shpalli këtë vit më të suksesshmin në mbrojtjen e grave të Kosovës

 

Prishtinë, 10 dhjetor 2003 - Rrjeti i Grupit të Grave të Kosovës në takimin e djeshëm në Prushtinë shpalli këtë vit më të suksesshmin në mbrojtjen e interesave të grave të Kosovës. Arritje të veçantë për sivjet ka shënuar institucionalizimi i Rrjetit të Grupit të Grave të Kosovës. Ndërkaq, si të arritur tjetër për vitin 2003 përmendet edhe forcimi i bashkëpunimit me OSBE-në.

 

 

Fillon së funksionuari "korridori tranzit i Kosovës"

 

Shkup, 10 dhjetor 2003 - Drejtoritë e doganave të Maqedonisë, Malit të Zi dhe UNNMIK-ut kanë arritur marrëveshje që prej 1 janarit 2004 të fillojë së funksionuari i ashtuquajturi korridori tranzit i Kosovës. Sipas marrëveshjes parashihet që konvoji të organizohet dy ditë në javë; të hënën dhe të enjten. Tranziti i tillë do të zgjasë deri sa në Kosovë të mos miratohet ligji për dogana.

 

 

HRW kërkon të bëhet më shumë për përmirësimin e gjendjes së romëve nga Kosova që ndodhen në Maqedoni

 

Nju Jork, 10 dhjetor 2003 - Organizata e të drejtave të njeriut Human Rights Watch me qendër në Shtetet e Bashkuara bëri thirrje që të bëhet më shumë për përmirësimin e gjendjes së mjeruar të refugjatëve romë nga Kosova që ndodhen në Maqedoni.

Organizata botoi një raport lidhur me gjendjen e vështirë të këtyre refugjatëve. Aty thuhet se qeveria maqedonase nuk ka përpunuar një zgjidhje afatgjatë për të ndihmuar refugjatët romë nga Kosova që ndodhen në Maqedoni, numri i të cilëve, sipas vlerësimeve arrin në 25 mijë.

Human Rights Watch i bëri thirrje qeverisë së Maqedonisë dhe agjencive ndërkombëtare të gjejnë mënyrat për të përmirësuar gjendjen ligjore, ekonomike dhe sociale të refugjatëve. Veç kësaj, Human Rights Watch u bën thirrje vendeve të Bashkimit Evropian të tregojnë gatishmëri më të madhe për të pranuar refugjatët romë që dëshirojnë të vendosen atje.

 

 

Dënim prej 15-20 vjet burg për serbin Obrenoviq

 

Hagë, 10 dhjetor 2003 - Gjykata ndërkombëtare për krimet e luftës në Hagë do të dënojë të mërkurën një ish oficer serb për rolin e tij në masakrën e Srebrenicës në Bosnjë ku më shumë se 7 mijë myslimanë u masakruan.

Dragan Obrenoviq u deklarua fajtor për persekutim në lidhje me vrasjet.

Hetuesit kanë rekomanduar një burgim prej 15-20 vjetësh për Dragan Obrenoviq.

Ai u deklarua fajtor për persekutim. Në përgjigje të kësaj hetuesit i hoqën atij akuzat për genocid, zhdukje dhe vrasje.

Obranoviq ishte shefi i stafit i brigadës së serbëve të Bosnjës që vepronte në Srebrenicë në kohën e masakrës.
Ai është oficeri i dytë serb që deklarohet fajtor për krime në Srebrenicë.

 

 

Çoviq thotë se standardet e Bashkimi Evropian janë "autostradë për pavarësinë e Kosovës"

 

Beograd, 10 dhjetor 2003 - Nënkryetari i Qeverisë së Serbisë, Nebojsha Çoviq ka deklaruar se standardet të cilat i ka ofruar Bashkimi Evropian janë "autostradë për pavarësinë e Kosovës".

 

Sipas Çoviqit, Qeveria serbe nuk e ka pranuar tekstin e operacionalizimit të standardeve të UNMIK-ut për Kosovën, për shkak se është refuzuar amendamenti, i cili parashikonte që deri në fund të vitit 2004, rreth 70 për qind e familjeve serbe nga Kosova të kthehen në vatrat e veta.

 

 

Shpallen dënimet e grupit terrorist

 

Athinë, 10 dhjetor 2003 - Në Athinë shpallen dënimet e sugjeruara për 15 anëtarët e organizatës terroriste 17 nëntori që u cilësuan fajtorë pas një gjyqi që zgjati 9 muaj.

Për disa nga të pandehurit do të jepet disa herë burgimi i përjetshëm. Por ka gjasa që prokurori të kërkojë rishikimin e vendimit edhe për dy nga personat që u shpallën të pafajshëm.

Për personin e akuzuar si lider të organizatës, 60 vjeçarin, Aleksandros Jotopulos që u shpall fajtor për ideimin e 19 vrasjeve, do të propozohet po kaq herë dënimi me burgim të përjetshëm.
I njëjti dënim, por dhjetë herë, do të propozohet për ekzekutorin Dimitris Kufodinas.

Nga 15 personat e shpallur fajtorë, janë edhe katër të tjerë, për të cilët ligji parashikon burgimin e përjetshëm. Dënimet e tjera do të shkojnë deri në 25 vjet burgim, ndërsa për tre prej të pandehurve, që cilët deklaruan pendesën e tyre për veprimtarinë në gjirin e organizatës, do të ketë masa lehtësuese.

 

 

KQZ shkarkoi nga detyra Komisionin zonal të Tiranës për keqadministrim të rezultateve në votime

 

Tiranë, 10 dhjetor 2003 - Komisioni Qendror i Zgjedhjeve shkarko dje nga detyra Komisionin zonal të Tiranës për keqadministrim të rezultateve në votimet e fundit për pushtetin vendor. Komisioni Qendror i ka gjobitur madje komesionerët e Tiranës me shuma deri afro 600 dollarë për shkeljet që janë vërejtur në punën e tyre me të cilat sollën përsëritjen e zgjedhjeve në 118 qendra votimi të kryeqytetit.v

 

 

Mijëra studentë maqedonas të Shkupit dhe Manastirit protestuan kundër zyrtarizimit të Universitetit të Tetovës

 

Shkup, 10 dhjetor 2003 - Përderisa deputetët në Parlamentin maqedonas diskutonin për punën e ministrit Pollozhani, para ndërtesës së Parlamentit të Maqedonisë mijëra studentë maqedonas të Universitetit të Shkupit dhe Manastirit protestonin kundër miratimit të Ligjit për zyrtarizimin e Universitetit të Tetovës.

 

Më vonë protestuesve iu bashkangjitën disa qindra nxënës të shkollave të mesme si dhe qytetarë maqedonas të Shkupit, të cilët parakaluan edhe para Qeverisë së Maqedonisë dhe thyen xhamat e Ministrisë së Arsimit.

 

 

Presidenti malazez ka thënë se fati i Kosovës nuk mund të lidhet me fatin e Malit të Zi

 

Podgoricë, 10 dhjetor 2003 - Partitë politike në Mal të Zi kanë reaguar ndaj deklaratës së zëvendëskryeministrit serb Nebojsha Çoviq se mbijetesa e shtetit të përbashkët është e domosdoshme për shkak të Kosovës.

 

Strukturat në pushtet vlerësuan se Mali i Zi nuk mund të jenë peng i problemit të Kosovës, ndërkaq opozita i ka mbështetur qëndrimet e Çoviqit. Fati i Kosovës nuk mund të lidhet me fatin e Malit të Zi, ka thënë kryetari malazez Filip Vujanoviq.

 

 

Grupi Ndërkombëtar i Krizave: Raport për gjendjen në Luginën e Preshevës

 

Bruksel, 10 dhjetor 2003 - Në një raport për gjendjen në Luginën e Preshevës në Serbinë Jugore, Grupi Ndërkombëtar i Krizave, organizatë e pavarur ndërkombëtare që merret me parandalimin dhe zgjidhjen e konflikteve, thotë se incidentet e fundit të dhunës në këtë rajon nënkuptojnë se paqja delikate mund të prishet në çdo kohë.

Raporti thekson megjithatë se rëndësia e këtyre incidenteve nuk duhet të zmadhohet dhe se ato nuk gëzojnë mbështetjen e popullatës. Raporti jep edhe rekomandimet përkatëse për qeverinë serbe, për komunitetin ndërkombëtar dhe për politikanët shqiptarë të rajonit.

Në raportin me titull "Paqja e Brishtë në Serbinë Jugore", thuhet se incidentet e përsëritura të dhunë, megjithëse të vogla dhe pa mbështetje popullore, tregojnë qartë se paqja ende nuk ka zënë rrënjë aspak.

 

Midis shqiptarëve të atjeshëm ka një përshtypje të përgjithëshme se paqja nuk ka sjellë atë që u premtua: begatinë dhe fundin e tensioneve me forcat serbe të rendit.

Lugina e Preshevës përgjithësisht komentohet si një nga ato pak histori suksesi për zgjidhjen e konfliktit në ish Jugosllavi. Në vitin 2001, komuniteti ndërkombëtar, Natoja, Shtetet e Bashkuara dhe sidomos OSBE-ja, në bashkëpunim të ngushtë me autoritetet e Beogradit, arritën t'i japin fund me sukses kryengritjes shqiptare të armatosur në rajon.

Mirëpo, incidentet sporadike në Luginën e Preshevës vazhduan, thuhet në raportin e Grupit Ndërkombëtar të Krizave.

Rëndësia e tyre nuk duhet të zmadhohet, siç veprohet shpesh në Beograd, thotë raporti. Duket se këto sulme ndërmerren nga shumë pak njerëz, madje jo domosdo nga shqiptarët dhe gëzojnë shumë pak mbështetje popullore midis popullatës shqiptare të Luginës së Preshevës.

Nga ana tjetër, thuhet në raport, ato flasin për pakënaqësi të popullatës. Shqiptarët në këtë zonë janë thellësisht të pakënaqur me nivelet tepër të larta të papunësisë dhe me mungesën e së ardhmes ekonomike.

Gjithashtu, disa fraksione politike shqiptare në rajon duket se janë të interesuara që ta dobësojnë kontrollin e kryetarit të bashkisë së Preshevës, Riza Halimi, mbi qeverinë vendore, thuhet në raportin e Grupit Ndërkombëtar të Krizave.

Për më tepër, vazhdon raporti, fillimi i bisedimeve midis Beogradit dhe Prishtinës, natyrisht që ndikon edhe mbi Luginën e Preshevës, sepse të dyja palët po dalin me kërkesa maksimale: serbët janë për një ndarje të Kosovës ndërsa shqiptarët kërkojnë të kompensohen me Luginën e Preshevës.

Paqja e papërfunduar në Luginën e Preshevës dobësohet edhe nga vazhdimi i pasigurive rreth statusit përfundimtar të Kosovës, thuhet në raport. Prandaj, komuniteti ndërkombëtar duhet ta vazhdojë angazhimin e tij duke i bërë trysni si Beogradit edhe politikanëve shqiptarë që të zbatojnë marrëveshjet midis tyre, duke e përqendruar më tepër vemendjen në zhvillimin ekonomik.

 

 

Vritet një ushtar amerikan dhe një tjetër plagoset në veri të Irakut

 

Mosul, 10 dhjetor 2003 - Një ushtar amerikan është vrarë në veri të Irakut në qytetin mosul, kur kryengritësit hapën zjarr në një stacion benzine, thanë zyrtarët e ushtrisë amerikane.

Një tjetër ushtar është plagosur në këtë incident. "Një nga dy ushtarët ka vdekur", ka thënë zëdhënësja e ushtrisë Traj Kejt nga Divizioni 101 ajror në Mosul, njofton Rojter.

 

 

Vriten tre vetë në Kashmirin indian nga shpërthimi i bombës

 

Xhamua, 10 dhjetor 2003 - Tre vetë janë vrarë, në mesin e tyre dhe një polic, dhe gjashtë janë plagosur në shpërthimin e bombës të cilën e kishin aktivizuar të mërkurën guerilët afër një stacioni të autobusëve plot me njerëz, në pjesën indiane të Kashmirit.

Shpërthimi ka ndodhur në vendin Ponçu, 250 km në veri të qytetit Xhamua, rajon për të cilin janë në konflikt me dekada India dhe Pakistani.

Të vrarë janë një civil, një ndihmësinspektori policie dhe një gueril, kurse të plagosur janë ushtarët indianë.

 

 

Gjashtë fëmijë kanë humbur jetën në sulmin amerikan në Afganistan

 

Kabul, 10 dhjetor 2003 - Gjashtë fëmijë dhe të dy të rritur kanë vdekur gjatë sulmit të forcave amerikane në Afganistanin jugor mbi një kompleks objektesh në Gardez, bëri të ditur sot nënkoloneli amerikan Brajan Hilferti. Më herët ishte njoftuar për nëntë fëmijë të vdekur.

Fëmijët kanë humbur jetën në sulmin e kryer të premtën në atë kompleks, në të cilin kinse kishte fshehur armët komandant i arratisur afgan Mulla Xhalani, njofton AP.

Nënkolenoli Hilferti thotë se trupat e pajetë të gjashtë fëmijëve dhe dy të rriturve janë gjetur të shtunën, kur ushtria amerikane u kthye në vendin e sulmit. "Nuk kemi pasur paralajmërime se atje ka pasur civilë", tha i njëjti përfaqësues i forcave amerikane, i cili shtoi se civilët kanë humbur jetën me siguri kur mbi ta është shembur muri.

 

 

Izraelitët vranë një palestinez 16-vjeçar

 

Tel Aviv, 10 dhjetor 2003 - Një pelestinez 16-vjeçar e kanë vrarë forcat izraelite midis Ramallahut dhe Jerusalemit, njoftuan burimet spitalore palestineze.

Djaloshi i vrarë ka qenë në mesin e të rinjve që kanë hedhur gurë kundër ushtarëve. Më herët janë vrarë edhe tre pelestinezë në një shpërthim në një shtëpi në fshatin Tafu, afër Hebronit. Burimet palestineze thonë se viktimat kanë qenë aktvistë të Hamasit dhe kanë tentuar të bëjnë bomba. Në atë kohë nuk pasur ushtarë, thonë të dy palët.

 

 

Iraku dhe kontratat e rindërtimit

 

Uashington, 10 dhjetor 2003 - Departamenti amerikan i Mbrojtjes tha se për arsye të sigurimit kombëtar, kompanitë e Irakut dhe të vendeve që mbështetën luftën e udhëhequr nga Shtetet e Bashkuara do të jenë të vetmet që do të lejohen të marrin pjesë në tenderat për kontratat e rindërtimit.

Dokumenti i Pentagonit i cili u vu në qarkullim nga Autoriteti i Përkohshëm i Koalicionit në Irak, rendit 63 vende që plotësojnë kushtet për të marrë pjesë në tenderat për këto kontrata me vlerë të përgjithshme prej rreth 19 miliard dollarësh.

Të 26 kontratat në fjalë kanë të bëjnë me rindërtimin e industrisë irakiane të naftës. Ato përfshijnë gjithashtu projekte të komunikacionit, të industrisë elektrike dhe të ujit.

 

 

Bush i bëri Tajvanit një paralajmërim të rreptë se SHBA-të janë kundër çdo përpjekjeje të njëanëshme drejt pavarësisë

 

Uashington, 10 dhjetor 2003 - Presidenti Bush i bëri Tajvanit një paralajmërim të rreptë se Shtetet e Bashkuara janë kundër çdo përpjekjeje të njëanëshme drejt pavarësisë.

Presidenti Bush e bëri këtë koment në një konferencë shtypi, pas takimit të tij me kryeministrin kinez, Web Gjiabao, në Shtëpinë e Bardhë. Ishin fjalët që Pekini dëshironte të dëgjonte.

"Ne jemi kundër çdo vendimi të njëanëshëm si nga Kina ashtu edhe Tajvani, që do të ndryshonte status kuonë", tha Presidenti Bush.

Këto ishin komentet më të ashpra deri sot nga administrata e Presidentit Bush rreth planeve të presidentit të Tajvanit, Chen Shui-bian, për mbajtjen e një referendumi, në të cilin votuesve do t'u kërkohet t'i bëjnë thirrje Kinës të heqë dorë nga planet për përdorimine forcës kundër ishullit dhe të tërheqë raketat e drejtuara kundër Tajvanit.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |