|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

OPINIONE

Koment

Simbioza e Bankës Botërore me Shqipërinë

9 dhjetor 2003 / TN

 

Eugen SCANTEIE*

 

Shumë shpejt do të largohem nga Shqipëria dhe jo pa keqardhje të thellë. Dhe kuptohet, që ndërsa mezi pres të bashkohem me familjen dhe miqtë e mi, lë pas një pjesë të zemrës time. Teksa u hedh një sy këtyre tri viteve e gjysmë që kalova në Shqipëri ndihem me shumë fat që po i jap fund karrierës sime 25 vjeçare në Bankën Botërore me këtë detyrë.

 

Për mua ishte një privilegj i vërtetë që m'u dha mundësia të njoh dhe punoj me popullin shqiptar, që të shoh nga afër progresin e jashtëzakonshëm që ka bërë vendi gjatë këtyre viteve dhe që pata mundësinë të jap kontributin tim modest në këtë aspekt. Më vjen shumë keq që bashkëshortja ime nuk ndodhet këtu me në këtë mbrëmje, por e di mirë që ajo me mendje dhe zemër është këtu.

 

Kur erdha për herë të parë në Shqipëri në pranverën e vitit 2000, vendi ende po merrte veten nga ngjarjet e viteve 96-97 dhe nga kriza kosovare. Qysh atëherë është bërë progres në shumë fusha. Është forcuar demokracia, rritja ekonomike ka qenë e qendrueshme, situata makroekonomike e stabilizuar, shërbimet publike si: rrugët, furnizimi me energji elektrike janë përmirësuar ndjeshëm dhe e njëjta gjë mund të thuhet edhe për përmirësimin e kushteve të jetesës në qytete, për fuqizimin e administratës publike dhe rritjen e zërit të masave të popullit.

 

Tashmë Shqipëria është e gatshme për të hyrë në rrugën e zhvillimit ekonomik të qendrueshëm dhe uljes së varfërisë për t'iu bashkëngjitur famijes së madhe evropiane, pjesë e të cilës ajo është. Kjo nuk do të thotë që janë kapërcyer të gjitha problemet. Ende kemi përpara shumë sfida, por unë jam i sigurt që qeveria shqiptare do të ketë mbështetjen e popullit të saj dhe partnerëve të tjerë në kapërcimin e këtyre sfidave.

 

Banka Botërore dhe unë personalisht ndihem krenar që m'u dha mundësia të jap kontribut në këtë progres. Ndërsa merita për këtë progres i takon vetë popullit shqiptar dhe qeverisë së tij, ne nga ana jonë shpresojmë që programi i kredive të Bankës dhe këshillimet për politikat, të kenë qenë me rëndësi në këtë aspekt. Ne jemi përpjekur dhe do të vazhdojmë të përpiqemi edhe në të ardhmen të bëjmë më të mirën në mbështetje të strategjisë shqiptare për uljen e varfërisë dhe të sigurohemi që zhvillimi ekonomik të japë efektet e tij për të gjithë shqiptarët.

 

Personalisht, ndihem me shumë fat që m'u dha mundësia të kaloj këto vite mes njerëzve që mësova t'i dua dhe t'i respektoj. Këtu kam bërë shumë miq dhe m'u dha mundësia të njoh dhe të punoj me shumë zyrtarë të lartë, të nderuar dhe të përkushtuar, me deputetë, specialistë, biznesmenë, bankierë dhe përfaqësues të shoqërisë civile.

 

Duke qenë se unë vetë vij nga Rumania - ku meqë ra fjala do të qëndroj së bashku me time shoqe pasi të dal në pension - kur erdha këtu në Shqipëri pas shumë vjetësh në Shtetet e Bashkuara dhe në Kanada m'u duk sikur isha në shtëpinë time dhe nuk jam ndier kurrë si i huaj.

 

E kam vlerësuar shumë ngrohtësinë, mikpritjen dhe mirësinë e popullit shqiptar dhe jam përpjekur t'i përgjigjem në mënyrën më të mirë që dija - duke shkëmbyer eksperiencën time mbi zhvillimin dhe duke mbështetur reformën ekonomike dhe përpjekjet për uljen e varfërisë. Nëqoftëse ndonjëherë u jam dukur kritik, kjo ka ardhur nga dëshira e sinqertë për të parë një përshpejtim të hapit të progresit në Shqipëri dhe asnjëherë nuk kam dashur të nënvleftësoj punën e madhe të partnerëve dhe interlokutorëve tanë.

 

Gjithashtu do të doja të vlerësoja punën e ekipit të jashtëzakonshëm të zyrës së Bankës Botërore në Tiranë dhe të ekipit tonë në Uashington. Nuk është e rastësishme që shumë nga kolegët tanë kanë vite që punojnë me Shqipërinë. Për shumë nga ata, ashtu si edhe për mua, puna këtu ka qenë shumë interesante dhe e dobishme. Në asnjë mënyrë nuk mund të lë pa përmendur këtu kontributin e stafit shqiptar në suksesin e programit të Bankës.

 

Stafi ynë përbëhet nga njerëz kompetentë, që punojnë shumë dhe janë të përkushtuar, dhe me këtë rast do të dëshiroja t'i falenderoja të gjithë për mbështetjen dhe miqësinë e tyre të vazhdueshme. E di që flas edhe në emër të Drejtores sonë rajonale, zonjës Orsalia Kalantzopoulos, e cila më ka nderuar me prezencën e saj sonte në këtë pritje lamtumire, dhe do të doja t'ju siguroja se shefi i ri i zyrës së Bankës Botërore në Tiranë do të përzgjidhet me shumë kujdes për të justifikuar vendin e veçantë që Shqipëria zë në programin dhe në zemrat tona.

 

Shpresoj që kjo të mos jetë hera e fundit që shihemi dhe të më jepet mundësia të kthehem këtu sërish dhe shpesh.

 

 

*Autori është ambasador i Bankës Boterore në Shqipëri