|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Mitrovicë: G. Stanesku, në prani të disa zyrtarëve të tjerë ndërkombëtarë, ka hequr Flamurin Kombëtar Shqiptar nga shtylla në oborrin e ndërtesës së Kuvendit të Komunës

Mitrovicë, 28 nëntor 2003 / Hysni SYLA - Të premtën, rreth orës dhjetë e tridhjetë minuta, zyrtari ndërkombëtarë për çështje komunale  i UNMIK-ut, Georgy Stanesku, në prani edhe të disa zyrtarëve të tjerë ndërkombëtarë,  ka hequr Flamurin Kombëtar Shqiptar nga shtylla në oborrin e ndërtesës së Kuvendit të Komunës, ku ishte vendosur për nderë të 28 Nëntorit-Ditës së Flamurit.

 

Qytetarët e kanë vërejtur këtë veprim të Staneskut dhe përnjëherë janë tubuar para rrethojës së ndërtesës dhjetra sish, për të protestuar ndaj një akti të këtillë, duke e quajtur këtë akt provokativ.

 

Qytearët e tubuar kanë hyrë me dhunë brenda rrethojës së ndërtesës së Kuvendit të Komunës, ku poashtu kanë arritur edhe pjestarët e policisë së UNMIK-ut dhe ata të SHPK-së.

 

Urdhërat dhe sygjerimet e policisë për t’u larguar nga oborri i ndërtesës, qytetarët nuk i kanë përfillur, kurse në ndërkohë njëri sish ka sjellur Flamurin Kombëtar nga dyqani i tij dhe e ka vendosur aty ku ishte më parë.

 

Policia me këtë rast ka patur sjellje korrekte ndaj qytetarëve dhe nuk i ka penguar ata për ta ngritur sërish Flamurin Kombëtar aty ku e kishte vendin. Pas ngritjes së Flamurit, qytetarët janë shpërnda qetas dhe pa shkaktuar ndonjë incident, ndërsa që situata përnjeherë e tensionuar, është normalizuar.

 

Zëvendëskryetari i Kuvendit të Komunës, Mursel Ibrahimi e ka dënuar këtë veprim të Staneskut, duke e vlerësuar si akt provokativ e të papërgjegjshëm, që ka mundur të ketë pasoja të rënda për situatën e sigurisë në komunë, por që për fat të mirë, falë sjelljes korrekte, të matur dhe të arsyeshme të policisë, ka përfunduar pa kurrfarë pasojash.

 

Zyrtari për çështje komunale i UNMIK-ut në komunën e Mitrovicës, Georgy Stanesku, edhe më parë pati vepruar kështu, duke e hequr nga shtylla Flamurin Kombëtarë Shqiptarë.

 

Deri në momentin e dërgimit të kësaj informate, Flamuri është duke valuar i ngritur lartë në vendin e tij  dhe nuk ka patur përpjekje të ndërkombëtarëve për ta hequr sërish.