|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Kryetari i PLK-së, Gjergj Dedaj, dhe familja e tij vazhdon të jetë e kërcënuar

- Për të gjitha rastet e kërcënimeve, thotë z. Dedaj, është e njoftuar policia e SHPK-së dhe ajo e UNMIK-ut.

 

Prishtinë, 27 nëntor 2007 / Nazmi LUKAJ - Ish-nënkryetari i Kuvendit të Republikës së Kosovës dhe aktualisht kryetar i Partisë Liberale të Kosovës, z. Gjergj Dedaj, familja e të cilit ka përjetuar një tragjedi të rëndë gjatë luftës së fundit në Kosovë ( forcat policore serbe ia kanë vrarë 12  anëtarë të familjes së ngushtë ) pas përfundimit të saj  është kërcënuar nga persona të ndryshëm kriminalë.

 

Kërcënime, thotë z. Dedaj, ka pasur edhe këto ditë ai dhe familja e tij.  Për të gjitha rastet e kërcënimeve, thotë z. Dedaj, është njoftuar policia e SHPK-së dhe ajo e UNMIK-ut. “ Më shumë po më brengosin kërcënimet ndaj familjes.

 

Nëse vazhdojnë edhe më tutje të ma kërcënojnë familjen, do të jem i shtrënguar që ta strehojë familjen dikund në perëndim” - thotë i shqetësuar.

 

“Për vete, edhe nëse njëqindmijëherë më kërcënojnë, nuk brengosem për shqetësimet që m’i sjellin kërcënuesit, sepse unë jam i vendosur të qëndrojë i paluhatshëm  në skenën politike të Kosovës, në mbrojtje të parimeve të demokracisë, institucioneve të votës së lirë dhe të procesit të integrimit të Kosovës në strukturat evroatlantike”.  

 

Nga policia e SHPK-së dhe ajo e UNMIK-ut, z. Dedaj kërkon një azhuritet më të madh në pengimin dhe zbardhjen e të gjitha veprave kriminale, për të cilat thotë se po e shëmtojnë të ardhmen e Kosovës. PLK-ja, e cila e drejton ai, është anëtare e ELDR dhe e Internacionales Liberale.