Përmbajtja:

• Mesazh i Presidentit Ibrahim Rugova me rastin e 28 Nëntorit - Ditës së Flamurit

• Kryeparlamentari Daci është takuar me ish-sekretaren e Shtetit Ollbrajt dhe me ish-senatorin Bob Doll

• Zyra e SHBA-ve e quan sulmin mbi oficerët e SHPK-së një sulm mi vetë Kosovën

• Reagim i Forumit të Gruas të LDK për vrasjen e Sabahate Tolajt

• Forumi i Gruas i LDK-së organizoi pritje për 28 Nëntorin

• Në Pobergjë të Deçanit me nderime të larta u bë varrimi i pjesëtares së SHPK-së Sabahate Tolaj

• Strasburg: Haziri kërkoi në Këshillin e Evropës që të ripërpunohet modeli i decentralizmit për Kosovën

• "Standardet para statusit" ishte temë e debatit të organizuar në Prishtinë nga Forumi 2015

• Dy këshilltarët e Solanës po qëndrojnë në Kosovë që të njihen me përgatitjet për vazhdimin e dialogut me Beogradin

• Ministri Morina vizitoi komunën e Malishevës

• Lobi i Grave thotë se ligji i ri mbi zgjedhjet në Kosovë duhet t'i parashohë tri zona zgjedhore

• Robertson i bën presion serbëve për Mlladiqin

• Presidenti Bush i ka uruar presidentit Moisiu Ditën e Pavarësisë së Shqipërisë

• Moisiu mblodhi Këshillin e Sigurisë Kombëtare për të vlerësuar gjendjen në vend pas atentateve në Turqi

• Qëllohet mbi ambasadën italiane në Bagdad

• Vriten tre palestinezë në Rripin e Gazës

• Britania e Madhe sot mbylli ambasadën në Bullgari

• Udhëheqës shiitë kritikojnë planet amerikane në Irak

• Pentagoni dërgon më shumë marinsa në Irak

• Aktpadi për autorët e dyshuar të sulmeve në Stamboll

• Të paktën 163 njerëz janë mbytur në përplasjen e dy tragetëve në Kongo

Mesazh i Presidentit Ibrahim Rugova me rastin e 28 Nëntorit - Ditës së Flamurit

 

Prishtinë, 27 nëntor 2003   Presidenti i Kosovës, Dr. Ibrahim Rugova, u ka drejtuar qyetarëve të Kosovës një mesazh me rastin e 28 Nëntorit, Ditës së Flamurit. Në këtë mesazh të Presidentit Rugova thuhet: Qytetarë të nderuar të Kosovës, Zonja e zotërinj, Në Ditën e 28 Nëntorit, Ditën e Flamurit, Ju shpreh urimet e mia të përzemërta.

  

Dita e 28 Nëntorit të vitit 1912 është dita më e ndritshme në historinë moderne të kombit shqiptar. Kjo është ditë e pavarësisë shqiptare, e cila u përgjysmua më vonë. Njohja formale e pavarësisë së Kosovës do të qetësonte popullin e Kosovës dhe të gjithë shqiptarët. Pra, një Kosovë e pavarur, e integruar në BE dhe në NATO, dhe në miqësi të përhershme me SHBA-të.

Brenda vitit, në mes të dy festave të Flamurit, Kosova ka vazhduar progresin e vet në të gjitha fushat e jetës. Njëherësh, Kosova po hyn në fazën e zhvillimit ekonomik të gjithanshëm, po punon në privatizimin dhe në krijimin e vendeve të punës për të rinjtë, që janë objektiva të institucioneve të vendit tonë.

 

Poashtu, kemi pasur progres edhe në integrimin e minoriteteve në shtetin dhe shoqërinë e Kosovës. Ka pasur progres të shqiptarëve në Maqedoni, në Mal të Zi dhe në Luginën e Preshevës. Edhe Shqipëria është në fazën e konsolidimit demokratik dhe të integrimeve evropiane.

Në këtë ditë feste, mund të themi se shqiptarët sot në përgjithësi janë më të fuqishëm dhe po bëhen faktor i rëndësishëm në këtë pjesë të Evropës e të botës dhe në planin ndërkombëtar.

Në këtë ditë feste, urime të veçanta u shprehim të gjithë shqiptarëve në diasporë.

Me këtë rast përshëndesim UNMIK-un dhe kryeadministratorin Holkeri, OSBE-në dhe ambasadorin Fieski, me të cilët po punojmë në prosperitetin e Kosovës.

Poashtu, përshëndesim KFOR-in dhe komandantin, Gjeneralin Kamerhoff, me ushtarët e tij, që bëjnë sigurinë dhe mbrojtjen e Kosovës.

Përshëndetje të ngrohta u shprehim edhe përfaqësive diplomatike në kryeqytetin e vendit tonë.

Dhashtë Zoti që festën e ardhshme të 28 Nëntorit ta presim me njohjen formale të pavarësisë së Kosovës!

Gëzuar Dita e Flamurit, 28 Nëntori!

Zoti i bekoftë shqiptarët!

Zoti e bekoftë Kosovën!, - thuhet në fund të mesazhit të Presidentit të Kosovës Ibrahim Rugova, drejtuar qytetarëve të Kosovës me rastin e 28 Nëntorit.

 

 

Kryeparlamentari Daci është takuar me ish-sekretaren e Shtetit Ollbrajt dhe me ish-senatorin Bob Doll

 

Uashington, 27 nëntor 2003 - Kryeparlamentari i Kosovës, Nexhat Daci, i cili gjendet për një vizitë në SHBA, është takuar me ish-sekretaren e Shtetit Medlin Ollbrajt dhe me ish-senatorin Bob Doll. Në këto takime është biseduar për zhvillimet e fundit në Kosovë.

  

  

Zyra e SHBA-ve e quan sulmin mbi oficerët e SHPK-së një sulm mi vetë Kosovën

 

Prishtinë, 27 nëntor 2003 - "Vrasja brutale dhe e paramenduar e oficeres së SHPK-së Sebahate Tolaj, dhe plagosja e dy oficerëve tjerë të SHPK-së, Isuf Haklajt dhe Hysen Latajt, nuk është vetëm një sulm në tre oficerë të policisë së Kosovës por është një sulm mbi vetë Kosovën", tha z. Robert Sorenson, i ngarkuari i punëve në Zyrën e SHBA-ve në Prishtinë.

"Me sulmet e tjera mbi policinë dhe institucionet e gjyqësisë në rajonin Pejë-Deçan dhe në rajonet tjera të Kosovës në muajt e fundit, ky vit ka pasur një ngritje shqetësuese të dhunës kundër strukturave të reja ligjore të Kosovës.

 

Duke sulmuar mu në themelet e ligjit dhe rendit në Kosovë, këto sulme, si dhe elementet kriminale që qëndrojnë pas tyre, janë duke e dëmtuar përparimin e Kosovës drejt përmbushjes së standardeve të punës që duhet të plotësohen para se të mund të fillojë procesi i përcaktimit të statusit përfundimtar të Kosovës.

 

Populli dhe institucionet e Kosovës duhet të bëjnë gjitha përpjekjet që t'i çrrënjosin këto struktura kriminale dhe t'i sjellin para gjyqit kryesit e këtyre sulmeve, sidomos vrasësit që qëndrojnë pas vrasjes së oficeres Tolaj".

"Ftojmë të gjithë ata që kanë ndonjë informatë lidhur me këto ngjarje, pa marrë parasysh sa triviale apo të parëndësishme mund të duken ato informata, që të kontaktojnë policinë ashtu që këto krime të tmerrshme të mund të zgjidhen", thotë në fund z. Sorenson.

 

 

Reagim i Forumit të Gruas të LDK për vrasjen e Sabahate Tolajt

 

Prishtinë, 27 nëntor 2003 - Forumi i Gruas i LDK është thellë i tronditur për vrasjen e Sabahate Tolajt, oficere në njësitin hetues të SHPK dhe e dënon ashpër këtë akt mizor.

 

Sabahate Tolaj ishte luftëtare e devotshme e lirisë, luftëtare e betejës së Koshares dhe shumë betejave të tjera e cila me përkushtim i shërbeu popullit edhe pas luftës, drejtësisë, lirisë dhe pavarësisë së Kosovës Forumi i Gruas i LDK vlerëson se vrasjet me paramendim dhe krimet ndaj institucioneve të Kosovës po godasin rëndë këto institucione dhe të ardhmen e Kosovës.

Më shumë se krimi Kosovën po e mbyt paaftësia dhe pamundësia për ta luftuar atë. Forumi i Gruas i LDK konsideron se është koha krejt e fundit që organet dhe institucionet kompetente të ndalin krimin dhe të dalin me rezultate në luftimin e tij, thuhet në një reagim të FG së LDK-së.

 

 

Forumi i Gruas i LDK-së organizoi pritje për 28 Nëntorin

 

Prishtinë, 27 nëntor 2003 - Për nder të 28 Nëntorit, Ditës së Flamurit, Forumi i Gruas i LDK ka pritur një delegacion të grave të figurave që dhanë kontribut të jashtëzakonshëm për lirinë dhe pavarësinë e Kosovës, të cilët u vranë gjatë luftës dhe pas luftës në Kosovë.

Melihate Tërmkolli, kryetare e FG, theksoi se "në këtë datë festive për shqiptarët, dhembjen për të gjithë ata që ranë për lirinë dhe pavarësinë e Kosovës do ta bëjmë forcë për të realizuar synimin dhe vullnetin e popullit për njohjen e Kosovës, shtet i pavarur dhe demokratik".

Në këtë ditë të shënuar për të gjithë shqiptarët, LDK kujton me pijetet të lartë jetën, kontributin dhe veprën e tyre madhore për Kosovën si sakrificën më të lartë e më sublime. Gratë ishin dhe janë pjesë shumë e rëndësishme e këtijë kontributi, vlerësoi Melihate Tërmkolli, kryetare e Forumit të Gruas të LDK, në këtë pritje.

Në këtë pritje mori pjesë edhe Kolë Berisha, nënkryetar i LDK-së, pasi u uroi festën e 28 Nëntorit, premtoi se familjet e të rënëve do ta kenë përkujdesin e LDK-së dhe të institucioneve të Kosovës.

 

 

Në Pobergjë të Deçanit me nderime të larta u bë varrimi i pjesëtares së SHPK-së Sabahate Tolaj

 

Deçan, 27 nëntor 2003 - Në fshatin Pobërgjë të Deçanit, me pjesëmarrjen e mijëra qytetarëve, dje me nderime të larta u bë varrimi i pjesëtares së SHPK-së, Sabahate Tolaj, e cila para dy ditësh u vra pabesisht në një atentat afër Pejës. Në ceremoninë e varrimit, përveç familjarëve dhe kolegëve të saj, morën pjesë edhe personalitete nga jeta politike dhe civile e Kosovës.

Duke folur në ceremoninë e varrimit, Komesioneri i policisë së UNMIK-ut Shtefan Feler premtoi se vrasësit e Sebahates do të sillen para drejtësisë. Feler u shpreh se ky sulm ka për qëllim të pengojë detyrën e policisë në Kosovë. "E vranë Sabahaten për faktin se ishte police.

 

Kjo vrasje u bë me qëllim që të pengohet detyra e policisë, por kjo nuk do të ndodhë kurrë. Nuk dua të spekuloj për motivin e kësaj vrasjeje, por hetimet do të dëshmojnë këtë që po e them, sepse Sebahatja u vra duke kryer detyrën e policisë.

 

Vrasësit e saj do të sillen para drejtësisë. Këtë ia kam premtuar edhe familjes së Sebahates", tha ndër të tjera komesioneri i policisë së UNMIK-ut Shtefan Feler.

Ndërkaq, koloneli i SHPK-së, Sheremet Ahmeti, tha se Sabahatja u vra nga ata të cilët nuk e duan Kosovën paqësore, por të trazuar, i vrasin ata të cilët dhanë kontribut të jashtëzakonshëm në mbrojtje të popullit të Kosovës, tha kolonel Ahmeti.

Ndërkaq, kolonel Rrustem Berisha, ish-komandant i UÇK-së i Brigadës 138 "Agim Ramadani" tha se nuk ka besuar kurrë se pas katër vjetësh në Kosovë do të vriten policët tanë.

 

Ata që luftuan kundër okupatorit dhe sot në liri pranuan misionin e shenjtë në mbrojtje të popullit dhe ligjit. E tillë ishte Sabahatja, ngase ajo u dëshmua gjatë luftës në kuadër të Brigadës 138 për aftësinë e saj të jashtëzakonshme si komandante e logjistikës, tha Rrustem Berisha.

Nëpërmjet një telegrami familjen Tolaj e ngushëlloi edhe presidenti i Kosovës Ibrahim Rugova. Në këtë telegram të cilin e lexoi para pjesëmarrësve në këtë varrim, këshiltari Salih Cacaj, presidenti Rugova thotë se "Sabahaten e vranë ata që nuk e duan drejtësinë dhe janë kundër pavarësisë së Kosovës".

 

"Ata do të dalin para drejtësisë. Në historinë e re të Kosovës Sebahate Tolaj do të mbetet një heroinë e famshme që punojë në luftë dhe në liri për vendin tonë".

Sebahate Tolaj ishte luftëtare e UÇK-së dhe ka marrë pjesë në Betejën e Kosharës.

 

 

Strasburg: Haziri kërkoi në Këshillin e Evropës që të ripërpunohet modeli i decentralizmit për Kosovën

 

Starsburg, 27 nëntor 2003 - Në ditën e dytë të punimeve në sesionin vjeshtor, Kongresi i pushtetit lokal dhe regjional i Këshillit të Evropës në Strasburg, përveç zhvillimeve dhe rekomandimeve që bëri për vendet si Belgjika, Greqia, Shqipëria, Ajzerbajxhani e të tjera, në kuadër të raportit inicial që e paraqiti z. Master Owen, lidhur me problemet me të cilat ballafaqohet sot pushteti lokal në Evropën Juglindore, vendin më të madh ia kushtoi interesimeve rreth sfidave në Kosovë.

Diskutuesit u përqëndruan në theksimin e zhvillimeve pozitive, por edhe të vështirësive nëpër nivelet lokale të pushtetit si dhe rolin që mund të luajnë komunat në procesin e demokratizimit.

Kryetari i Asociacionit të Komunave të Kosovës dhe i komunës së Gjilanit, Lutfi Haziri, i cili po merr pjesë në punimet e këtij sesioni, ka folur për zhvillimet e deritashme të këtij procesi në Kosovë. Haziri tha se modeli që i ofrohet Kosovës për decentralizim, duhet të ripërpunohet.

Ai kërkoi që roli i Këshillit të Evropës në këtë proces të jetë më tepër përkrahës në implementimin e reformave, përmes Kongresit të Pushtetit Lokal, i cili duhet të luaj rol aktiv, ka thenë Haziri në Strasburg.

Kongresi i dha mbështetje Asociacionit të Komunave të Kosovës dhe e çmoi si shumë të rëndësishëm edhe rolin e komunave dhe anagazhimet të bartësve të zgjedhur të pushtetit në këto nivele, për shkak të nevojës për implementimin e dokumentit.

    

 

"Standardet para statusit" ishte temë e debatit të organizuar në Prishtinë nga Forumi 2015

 

Prishtinë, 27 nëntor 2003 - Standardet para statusit, është një temë deri më tash është përdorur më shumë si parullë politike se sa si një çështje me të cilën duhet të merren më seriozisht si UNMIK-u po ashtu edhe institucionet e përkohëshme vetëqeverisëse të Kosovës.

 

Kështu është thënë në debatin e djeshëm publik me temën: "Standardet para statusit" i organizuar nga Forumi 2015 në të cilin morën pjesë përfaqësues të shoqërisë civile, institucioneve kosovare dhe të UNMIK-ut.

Shikuar nga perspektiva e ekonomisë trajtimi i standardeve nga aspekti kohor dhe përmbajtësor sipas Muhamet Sadikut nga "Riinvesti" nuk janë të paarritshme edhe pse sipas gjendjes së tanishme të disa segmenteve të ekonomisë janë disa pengesa të cilat në të ardhmen duhet të identifikohen në mënyrë që të jenë objekt trajtimi i Qeverisë së Kosovës dhe administratës së UNMIK-ut për përshpejtimin e këtij procesi.

"Sa i përket partneritetit ndërmjet UNMIK-ut dhe të Qeverisë së e Kosovës, e kam përshtypjen se ndonjëherë UNMIK-u dhe Qeveria këtu janë duke punuar me agjenda të ndryshme", tha koordinatori i strategjive pranë UNMIK-ut.

 

Ai shfaqi shpresën se formimi i një serie të grupeve të përbashkëta të udhëhequra nga kryeministri dhe Hari Holkeri do të jenë frytdhënëse në marrjen e oponioneve sa i përket standardeve, të cilat do të përfshihen në një deklaratë që do të përpikohet së shpejti që të krjijohen politika të vërteta për ta çuar këtë proces përpara, tha ai.

 

 

Dy këshilltarët e Solanës po qëndrojnë në Kosovë që të njihen me përgatitjet për vazhdimin e dialogut me Beogradin

 

Prishtinë, 27 nëntor 2003 - Dy zyrtarë të lartë të Sekretariatit të Përgjithshëm të Këshillit të Bashkimit Evropian, Stefan Lehn dhe Aleskandros Janis po qëndrojnë për një vizitë triditëshe në Kosovë. Këta dy këshilltarë kryesor të Solanës do të njihen nga afër me përgatitjet e grupeve punuese për vazhdimin e dialogut me Beogradin.

 

Në orët e pasditës se djeshme kata dy këshilltarë janë takuar me kryeadministratorin e Kosovës, Hari Holkeri. Ata po ashtu kanë marrë pjesë edhe në takimin e tretë të të ashtuquajturit mekanizëm përcjellës për stabilizim-asociim. Përndryshe gjatë vizitës së tyre në Kosovë ata do të takohen edhe me përfaqësuesit e institucioneve të Kosovës, me Presidentin Rugova, me kryeministrin Rexhepi, si dhe me përfaqësuesit e zyreve diplomatike në Kosovë.

 

 

Ministri Morina vizitoi komunën e Malishevës

 

Malishevë, 27 nëntor 2003 - Ministri i Transportit dhe Posttelekomunikacionit të Kosovës, Zef Morina vizitoi komunën e Malishevës dhe u takua me udhëheqjen komunale. Gjatë këtij takimi kryesisht u bisedua për investimet që do të bëhen për zhvillimin e infrastrukturës rrugore të kësaj pjese të Kosovës.

 

 

Lobi i Grave thotë se ligji i ri mbi zgjedhjet në Kosovë duhet t'i parashohë tri zona zgjedhore

 

Prishtinë, 27 nëntor 2003 - Ligji i ri mbi zgjedhjet në Kosovë duhet t'i parashohë të paktën tri zona zgjedhore dhe jo një si dhe deri më tash. Një sistem më të përafërt për votuesit duke i afruar atij mundësinë të njohë kandidatin që e voton dhe që i zgjedhuri ta dijë se ndaj kujt është përgjegjës. Kështu u tha në një konferencë për media e cila është mbajtur nga Lobi i Grave të Kosovës.

 

 

Robertson i bën presion serbëve për Mlladiqin

 

Beograd, 27 nëntor 2003 - Sekretari i përgjithshëm i NATO-s George Robertson ka thënë se qeveria serbe e ka për detyrë të nxjerrë para drejtësisë ish-komandantin serb të Bosnjes Ratko Mlladiç.

Në vizitën e tij të parë në Beograd që nga bombardimi i NATO-s në vitin 1999, Lordi Robertson tha se kishte persona në Serbi që e dinin vendndodhjen e gjeneralit Mlladiq.

Ai bëri thirrje gjithashtu që të akuzuarit për krime lufte të dorëzohen vullnetarisht tek autoritetet.
Kundër gjeneralit Mlladiç është ngritur akt-padi se ka urdhëruar masakrën e rreth shtatë mijë myslimanëve në Srebrenicë gjatë luftës në Bosnjë.

Por ai tha se vizita e tij në Bashkimin Serbi-Mali i Zi ishte një sinjal i qartë se ky vend dëshironte të shihte përpara dhe jo në të shkuarën.

 

 

Presidenti Bush i ka uruar presidentit Moisiu Ditën e Pavarësisë së Shqipërisë

 

Uashington, 27 nëntor 2003 - "Miqësia e fortë midis dy vendeve tona mbështetet në qëllimin tonë të përbashkët për të ndërtuar një të ardhme për Shqipërinë, në të cilën populli juaj do të gëzojë standarde të larta të demokracisë, shtetin ligjor dhe të drejtat e njeriut, ashtu sikurse edhe mirëqenie ekonomike".

 

Kështu thuhet në një telegram të presidentit të Shteteve të Bashkuara të Amerikës, Xhorxh Bush dërguar homologut të tij shqiptar Alfred Moisiu me rastin e 28 Nëntorit, Ditës së Pavarësisë së Shqipërisë.

 

 

Moisiu mblodhi Këshillin e Sigurisë Kombëtare për të vlerësuar gjendjen në vend pas atentateve në Turqi

 

Tiranë, 27 nëntor 2003 - Presidenti shqiptar Alfred Moisiu mblodhi dje Këshillin e Sigurisë Kombëtare për të vlerësuar gjendjen në vend pas atentateve në Turqi dhe shtimit të rrezikut të terrorizmit.

 

Në takimin e djeshëm u kërkua që të merren masa për forcimin e sigurisë dhe për parandalimin e akteve të ndryshme që mund ta cënojnë atë. Pak ditë më parë zëvendësministri i rendit Igli Toska ka njoftuar se ka sinjale për sulme të mundshme ndaj Shqipërisë.

 

Sipas autoriteteve policore dy minat me telekomandë të zbuluara në fundjavën e kaluar në Shkodër ishin dedikuar të përdoreshin në Tiranë.

Menjëherë pas atentateve në Turqi, policia shqiptare rriti shkallën e gatishmërisë së saj dhe përforcoi kontrollet rreth selive diplomatike, veçanërisht pranë Ambasadës amerikane dhe asaj britanike. Masat e sigurisë janë shtuar edhe rreth institucioneve shtetërore dhe në kufijt e vendit.

 

 

Qëllohet mbi ambasadën italiane në Bagdad

 

Bagdad, 27 nëntor 2003 - Në ambasadën italiane në kryeqytetitn irakian ka shpërthyer dje një bombë. Sipas informacioneve të dëshmitarëve, ambasada u qëllua me një raketë. Televizoni italian bën të ditur se nuk ka pasur viktima apo të plagosur nga ky sulm.

 

Shumica e punonjësve të ambasadës nuk ndodheshin aty. Përpara jo shumë kohësh po në Irak vdiqën 19 italianë prej një sulmi vetëvrasës. Shërbimet sekrete në Romë kishin paralajmëruar se do të ndodhnin incidente të tjera.

 

 

Vriten tre palestinezë në Rripin e Gazës

 

Gaza, 27 nëntor 2003 - Ushtarë izraelitë kanë vrarë mbrëmë në jug të Rripit të Gazës dy civilë palestinezë. Ende nuk dihet se si ndodhi ky akt. Sipas burimeve palestineze, dy viktimat ishin civilë të paarmatosur, të cilët po shkonin në festën e Bajramit.

 

Sipas burimeve izraelite, ushtarët kishin parë katër burra të cilët donin të hynin më forcë në lagjen izraelite Kfar Darom.

Poashtu ushtarët izarelitë kanë vrarë një djalë nëntëvjeçar pelestinez në periferi të kampit të refugajtëve Rafah.

 

 

Britania e Madhe sot mbylli ambasadën në Bullgari

 

Sofje, 27 nëntor 2003 - Për shkaqe sigurie Britania e Madhe sot në mëngjes ka mbyllur ambasadën e saj në Bullgari. Zëdhënësi i Ministrisë së Jashtme britanike ka thënë se ambasada në Sofje do të jetë e mbyllur 24 orë, por nuk deshi të thotë se për çfarë kërcënimi të sigurisë është fjala.

 

Ambasada është mbyllur shtatë ditë pasi që në Turqinë fqinje në sulmet me bombë ndaj objektivave britanike u vranë të paktën 30 vetë.

 

 

Udhëheqës shiitë kritikojnë planet amerikane në Irak

 

Bagdad, 27 nëntor 2003 - Dy nga udhëheqësit shiitë të Irakut kanë kritikuar planet e paraqitura këtë muaj nga amerikanët për kthimin e pushtetit një qeverie irakiane.

Abdel Aziz al-Hakim, një anëtar i këshillit qeverisës irakian, tha se plani i tanishëm i transferimit të pushtetit, sipas të cilit udhëheqësit vendas të caktuar nga amerikanët do të zgjedhin një qeveri kalimtare, nuk do të pasqyronte dëshirën e popullit irakian.

Ai tha se qeveria irakiane duhet zgjedhur nga zgjedhje të drejtëpërdrejta popullore. Al-Hakim po fliste në emër të klerikut më me influencë shiit, Ajatollahu i Madh Sayed Ali al-Sistani.

Al-Hakim tha gjithashtu se Ajatollahu kishte shqetësim që kushtetuta kalimtare të garantonte identitetin islamik të Irakut.

 

 

Pentagoni dërgon më shumë marinsa në Irak

 

Uashginton, 27 nëntor 2003 - Pentagoni thotë se ka në plan të dërgojë gati tre mijë marinsa më shumë në Irak vitin e ardhshëm si pjesë e një rotacioni të madh të forcave amerikane që është njoftuar më parë.

 

Një zyrtar i Pentagonit tha se do të dërgohen atje tre njësi marinash më shumë se sa ishte planifikuar në fillim, por ai e përshkroi këtë ndryshim thjesht si një rregullim të vogël që nuk lidhet me situatën e tanishme të sigurisë në Irak.

 

Në Irak ka tani 130 mijë trupa amerikane. Sipas planit të rotacionit, ata do të zëvendësohen me rreth 108 mijë trupa të freskëta në muajt e parë të vitit të ardhshëm.

 

 

Aktpadi për autorët e dyshuar të sulmeve në Stamboll

 

Stamboll, 27 nëntor 2003 - Në Turqi janë ngritur aktpadi të tjera lidhur me sulmin e fundit ndaj objektivave britanike në Stamboll

Deri të mërkurën në darkë ishin ngritur akt-padi kundër 12 personave, përfshirë dy gra, me akuzat për anëtarësi dhe mbështetje të një organizate të paligjshme.

Një numër pesonash të tjerë janë liruar. Deri tani janë arrestuar disa dhjetëra persona pas sulmeve me bomba të së enjtes së kaluar. Policia nuk e ka dhënë shifrën e saktë.

Ata besohet se mbahen të arrestuar nga policia e Stambollit, Ankarasë, qytetit të Bingolit në Turqinë lindore, nga e kishin origjinën të paktën dy nga sulmuesit.

Sipas ligjit turk, të arrestuarit mund të mbahen në burg për katër ditë pa u akuzuar nëse policia nuk kërkon më shumë kohë për hetimet.

 

 

Të paktën 163 njerëz janë mbytur në përplasjen e dy tragetëve në Kongo

 

Kinshasa, 27 nëntor 2003 - Të paktën 163 njerëz janë mbytur në përplasjen e dy tragetëve në një liqen në Republikën Demokratike të Kongos, ndërkaq mbi 50 të jerë konsiderohen të zhdukur, thanë sot zyrtarët qeveritarë, njofton Rojter.

Ministrja e çështjeve humanitare Ketrin Nzuzi va Mbombo tha se 222 vetë kanë shpëtuar nga kjo fatkeqësi gjatë përplasjes së dy tragetëve në të cilët ndodheshin 450-500 njerëz. Aksidenti ka ndodhur të hënën gjatë një stuhie të fuqishme.

"Kanë qenë dy anije që janë përplasur për shkak një stuhie të fuqishme. Infomacionet e fundit që i kemi marrë sot në mëngjes në orën 8.30 flasin për rreth 163 të vdekur, trupat e të cilëve janë gjetur", tha ajo, duke shtuar se po vazhdojnë kërkimet për gjetjen e të mbijetuarve.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |