|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

OPINIONE

Pas vrasjes së Sabahate Tolajt dhe plagosjes së dy policëve të tjerë të njësitit të hetuesisë

Tash është bërë e qartë - në cak të shërbimeve kriminale janë hetuesit

26 nëntor 2003 / TN Meqë pas shumë apeleve që janë bërë nga personalitetet tona të larta politike për t’u ndalur krimi, nuk po ndalet ai, këto shërbime që deri më tash janë konsideruar si shërbime që dëshirojnë të krijojnë frymën e frikës në Kosovë, për të sjellë ndonjë “parti të luftës” në pushtet, po marrin edhe një konotacion edhe më të rëndë- me vetëdije a pa vetëdije janë në shërbim direkt të Serbisë. Ky është edhe një argument tjetër që SHPK-ja, dhe policia e UNMIK-ut, duhet të veprojnë me krejt forcën që kanë për t’i shpartalluar ato.                Shkruan: Nazmi LUKAJ Pas vrasjes së një hetuesi në Gjakovë, dhe plagosjes së një tjetri  në Prishtinë ( F. Syleviqit) shërbimet sekrete kriminale që veprojnë në Kosovë dhanë shenjat e para se krimin do ta orientojnë, veç politikanëve, edhe  nga të gjithë ata hetues që do të merren seriozosht dhe ndershëm me zbulimin e akteve kriminale, që kanë kryer këto shërbime gjatë këtyre më shumë se katër vjetëve në liri. Vrasja e Sabahate Tolajt dhe plagosja e dy policëve të tjerë ( edhe e ndjera, edhe të plagosurit ishin pjesëtarë të Njësitit të Hetuesisë) tashmë  e argumentojnë fuqishëm këtë gjë. Duke vepruar kështu, shërbimet sekrete kriminale dëshirojnë t’i arrijnë dy efekte:  t’i frikësojnë hetuesit se nëse merren me kriminelët, do të përfundojnë tragjikisht; dhe t’i krijojnë vetes hapësirë për veprim të mëtutjeshëm.

Bazuar në faktin se të dy policitë që veprojnë në Kosovë-ajo e UNMIK-ut dhe e SHPK-së- shumë pak kanë bërë në ndriçimin e rasteve kriminale, jeta e këtyre shërbimeve do të jetë e gjatë. Pasi kanë arritur ta frikësojnë popullatën të dëshmojë për rastet kriminale, dhe nëse arrijnë që t’i disiplinojnë edhe ata pak hetues që punojnë ndershëm punën e vet, veprimtaria kriminale e këtyre shërbimeve do të jetë gjithnjë e më e rrezikshme. Në anën tjetër, asnjë pikë shprese nuk është duke u vërejtur se këto polici do të arrijnë t’ia ndalin turrin këtyre shërbimeve të pista, edhe pse që të dy policitë kanë mjaft fakte për personat që merren me krimin. Ata tashmë i njohin nëpër komuna gati të gjithë qytetarët e lëre më të mos i dijnë këto. Por, pse nuk kanë vepruar për t’i shpartalluar shërbimet që po e lagin me lot çdo ditë lirinë- kjo është një çështje krejt tjetër.

Në radhë të parë, ka mundësi që  disa segmenteve të policisë së UNMIK-ut t’u shkojë përshtati krimi, për t’ia zgjeruar vetes komoditetin në Kosovë, por edhe që Kosova, pasi të mbushet me krim, t’ua hapin rrugën atyre qarqeve diplomatike që dëshirojnë  ta rifusin këtë në krijesën e re Serbi-Mali i Zi, për ta bërë këtë më lehtë.  Ndërsa, SHPK-ja nuk e ka marrë serizosht këtë çështje, për shkak se një pjesë e pjesëtarëve të saj, para se të inkuadroheshin në të, kanë punuar në këto shërbime të pista, dhe edhe më tutje vazhdojnë të shërbejnë për to. Këtë e argumenton jo vetëm mosreagimi energjik i SHPK-së deri më sot kundër kriminelëve, por edhe vrasja e djeshme afër firmës ”Molika “ në Raushiq të Pejës e pjesëtares së saj- Sabahate Tolajt, dhe plagosja e dy policëve të tjerë, po ashtu të njësitit të hetuesisë, që po udhëtonin bashkë me Sabahaten.

Pse? Sepse askush më mirë se njerëzit e SHPK-së nuk e kanë ditur se kur shkon ajo në punë,  çfarë orari ka, me çfarë dosje merret, etj. Vrasja e saj, e hetuesit në Gjakovë dhe e plagosja e Syleviqit, dhe mosveprimi i saj energjik deri më sot për t’i kapur  kriminelët, ka tronditur mjaft veprimtarinë e SHPK-së. Pas këtyre vrasjeve, SHPK-ja duhet ta bëjë një analizë të thukët, në të cilën duhet të shqyrtohen të gjitha problemet me të cilat ballafaqohet kjo polici, nëse dëshiron të jetë polici e mirëfilltë, për të besuar qytetarët në të. Kështu, si është tash, besimi i saj te popullata është fare i vogël. Madje, po qe se vazhdojnë krimet ndaj pjesëtarëve të saj të hetuesisë edhe më tutje, ka mundësi që t’i lëshojnë radhët e saj edhe ata pak hetues, dhe ata pak pjesëtarë të tjerë, që punën e bëjnë me përkushtim dhe me ndershmërinë më të lartë.

Prandaj përgjegjësit e SHPK-së, për të mos marrë kjo polici përmasa më të mëdha të tronditjes- duhet sa më parë të lirohet nga të gjithë ata pjesëtarë që dihet botërisht se kanë punuar në shërbimet sekrete të pasluftës, e të cilët edhe më tutje mbajnë lidhje me to.  Dhe, të mobilizohet që, më në fund, seriozisht ta luftojë krimin, për ta çliruar  Kosovën nga ethet e tij. Gjithashtu edhe policia e UNMIK-ut do të duhej ta bënte një analizë më të gjatë, për të vërtetuar nëse ka segmente brenda saj që me vetëdije nuk marrin masa energjike për ta goditur krimin.

Njerëzit e shërbimeve sekrete tashmë i njohin edhe qytetarët, e lëre më të mos i njohë edhe policia. Për t’u prangosur ata, mjafton vetëm që serizisht të goditet krimi. Krimi dhe kriminelët nuk kanë të ndalur. Me veprimin e vet, shërbimet sekrete kriminale në Kosovë, edhe pas shumë apeleve që janë bërë se po e godasin çështjen e Kosovës, vazhdojnë edhe më tutje ta kriminalizojnë këtë. Krimet e tyre vazhdojnë të çojnë ujë në mulli të Serbisë, e cila në botë po e shfrytëzon si argument për ta rikthyer Kosovën.

Meqë pas shumë apeleve që janë bërë nga personalitetet tona të larta politike për t’u ndalur krimi, nuk po ndalet ai, këto shërbime që deri më tash janë konsideruar si shërbime që dëshirojnë të krijojnë frymën e frikës në Kosovë, për të sjellë ndonjë “parti të luftës” në pushtet, po marrin edhe një konotacion edhe më të rëndë- me vetëdije a pa vetëdije janë në shërbim direkt të Serbisë. Ky është edhe një argument tjetër që SHPK-ja, dhe policia e UNMIK-ut, duhet të veprojnë me krejt forcën që kanë për t’i shpartalluar ato.