Përmbajtja:

• Qeveria i propozon Kuvendit t'i shpallë të pazbatueshme 53 ligje serbe të nxjerra pas 23 marsit të vitit 1989

• Programi i pasur kulturo-artistik në Prishtinë me rastin e 28 Nëntorit - Ditës së Flamurit

• Gjilan: Më 27 nëntor fillon aksioni për grumbullimin e ndihmave për skamnorë

• Kryetari i AKK-së merr pjesë në sesionin vjeshtor të Këshillit të Evropës

• Tash dy muaj nuk dihet asgjë për Avni Fetën

• U nënshkrua Memorandumi i Mirëkuptimit për Persona të Zhdukur

• Anëtarët e Kryesisë së LDK-së dje i uruan festën e Bajramit kryeytarit të BIK, Naim Tërnava

• Podujevë: Policia zbulon armë dhe muncion, kurse maskat plaçkitën një person

• Mijëra besimtarë të besimit islam në Kosovë kremtuan festën e Bajramit

• Policia informon se janë identifikuar dy veturat prej të cilave është kryer sulmi ndaj pjesëtarëve të SHPK-së në Pejë

• Feler i premtoi familjes Tolaj se policia e UNMIK-ut do të bëjnë çmos për kapjen e vrasëve të Sebahates

• Kryeshefi ekzekutiv i Prishtinës urdhëroi që me rastin e 28 Nëntorit të vendoset flamuri

• Misioni i OSBE-së filloi fushatën: "Reago - dhuna është krim"

• NATO ka hedhur poshtë reduktimin e trupave të saj në Kosovë deri në mesin e vitit 2004

• Robertson thotë se misioni i NATO-s do të jetë i suksesshëm kur Kosova të bëhet demokraci shumetnike

• Policia shqiptare ka arrestuar dy persona të dyshimtë se i takojnë organizatës terroriste

• Shqipëria mbështet "Marrëveshjen për Procesin Politik" në Irak

• Të premtën zhvillohet takimi i ministrave evropianë të punëve të brendshme, të sigurisë dhe juridikaturës

• Pauell tha se Maqedonia ka bërë përparim të dukshëm politik dhe shoqëror

• M.Xhaferi: Pjesëmarrja e shqiptarëve në forcat policore dhe ushtarake ende nuk ka arritur në shkallën e duhur

• Jemeni ka arrestuar një të dyshuar kyç rreth rrjetit të Al Kaidës

• Xhej Garner thotë se një seri gabimesh kishin penguar punën pas luftës në Irak

• Amerikanët arrestuan bashkëshorten dhe të bijën e nënkryetarit të Sadam Hyseinit

• Në Nepal janë vrarë 12 rebelë maoistë dhe 8 pjesëtarë të forcave të rendit

• Janë të mundshme sulmet terroriste në disa qytete turke

• Zgjedhjet presidenciale në Gjeorgji do të zhvillohen më 4 janar

• Shpërthime të fuqishme në qendër të Bagdadit

• Një gjykatës britanik kritikon amerikanët

• Kryeministri turk kritikon Britaninë e Madhe

• Agjencia bërthamore e OKB-së dënon mashtrimet e Iranit

• UEFA ndalon zhvillimin e takimeve të futbollit në Turqi

Qeveria i propozon Kuvendit t'i shpallë të pazbatueshme 53 ligje serbe të nxjerra pas 23 marsit të vitit 1989

 

Prishtinë, 26 nëntor 2003 - Qeveria e Kosovës në mbledhjen e sotme vendosi që t'i propozojë Kuvendit t'i shpallë të pazbatueshme në Kosovë 53 ligje të nxjerra pas 23 marsit të vitit 1989 nga Serbia.

 

Sipas zëdhënëses se qeverisë, Mimoza Kusari, këto ligje kanë ndihmuar transformimin fiktiv të ndërmarrjeve në pronën shoqërore të Kosovës në shoqëri aksionare në pronësi të Serbisë apo bashkim i ndërmarrjeve kosovare me ndërmarrjet e Serbisë në bazë të vendimeve politike.

Në lidhje me ndalimin e procesit të privatizimit, Qeveria kërkon largimin e të gjithë personave përgjegjës në lidhje me situatën e krijuar. Për bllokimin dhe konfuzionin rreth këtij procesi, zëdhënësja akuzoi direkt drejtoreshën e re të AKM-së, Maria Puçi dhe Zyrën ligjore të AKM-së.

Por, nëse Maria Puçi nuk jep dorëheqje, zëdhënësja tha se qeveria do të shqyrtojë përdorimin e masave të tjera për procesin e privatizimit, duke përfshirë edhe gjetjen e ndonjë institucioni tjetër apo krijimin e një institucioni për vazhdimin e privatizimit.

 

 

Programi i pasur kulturo-artistik në Prishtinë me rastin e 28 Nëntorit - Ditës së Flamurit

 

Prishtinë, 26 nëntor 2003 - Me rastin e festës kombëtare të 28 Nëntorit - Ditës së Flamurit, Kuvendi Komunal i Prishtinës ka organizuar një program të pasur kulturo-artistik në kryeqytetin e Kosovës. Kështu, në orën 10:00, në sallën e Teatrit Kombëtar në Prishtinë organizohet një akademi solemne, hapjen e së cilës do ta bëjë kryetari i Kuvendit Komunal të Prishtinës, Ismet Beqiri, ndërsa pritet që akademinë solemne ta përshëndesë edhe Presidenti i Kosovës, Ibrahim Rugova.

 

Në akademinë solemne me një program të pasur kulturo-artistik do ta prezentojë edhe Ansambli i këngëve dhe valleve "Shota".

Në orën 10:30, do të vendosen kurora lulesh në monumentin e Gjergj Kastriotit - Skënderbeu, në monumentin e dëshmorit të kombit, Zahir Pajaziti, si dhe në varrezat e dëshmorëve.

Në orën 10:40, do të prezentohen me një program të pasur kulturo-artistik ansambli i Universitetit, SHKA "Bajram Curri" nga Prishtina, SHKA "Malësia e Gallapit", SHKA "Gerçek", SHKA "Qamili i Vogël", etj.

Në orën 13:30, grupet e muzikës argëtuese do të prezentohen po ashtu me një program të pasur kulturo-artistik, me ç'rast pritet të marrin pjesë edhe grupe të ndryshme të muzikës argëtuese dhe ato hip-hop nga Prishtina.

Në orën 14:00, në stadiumin e qytetit në Prishtinë do të zhvillohet një ndeshje futbolli.

Në orën 17:00, në skenën para Teatrit Kombëtar do të shfaqet drama televizive "Nëntori i dytë". Projeksioni bëhet në skenë të hapur para Teatrit Kombëtar.

Në orën 19:00, në Galerinë e Muzeut Kombëtar do të hapet ekspozita e Shoqatës së Artistëve Figurativ dhe Aplikativ të Kosovës me emrin "Salloni i Nëntorit 2003".

Në orën 20:00 në sallën e Teatrit Kombëtar do të shfaqet opera "Dasma arbëreshe".

Në orën 21:00 në skenën para Teatrit Kombëtar në Prishtinë, do të shfaqet një koncert i madh me emra të njohur të muzikës argëtuese të Kosovës, ndërkaq në orën 00:01 pas mesnate, do të shpallet i mbyllur programi kulturo-artistik me rastin e 28 Nëntorit - Ditës së Flamurit.

 

 

Gjilan: Më 27 nëntor fillon aksioni për grumbullimin e ndihmave për skamnorë

 

Gjilan, 26 nëntor 2003 - Duke qenë të vetëdijshëm se një numër i madh i qytetarëve tanë bëjnë jetë të vështirë, Kuvendi Komunal i Gjilanit do të organizojë një aksion njëmujor për grumbullimin e ndihmave për të gjithë nevojtarët, në kuadër të vitit të lumturimit të Nënës Terezë, e cila arriti të jetë afër skamnorëve, edhe në pjesët më të largëta të botës.

Aksioni i titulluar "Gjilani 2003" do të fillojë më 27 nëntor dhe në bashkëpunim me shoqatën humanitare "Nëna Tereze", gjatë një muaji, do të shtrihet në gjithë territorin e komunës, për të grumbulluar ushqime, veshmbathje, mjete të higjienës si dhe gjera tjera të nevojshme, të cilat, para fillimit të këtij dimri, do t`iu shpërndahen të gjithë nevojtarëve, pa dallime etnike, fetare, racore a gjinore.

Sipas të dhënave nga Qendra Rajonale e Punësimit në Gjilan, vetëm në këtë komunë punë kërkojnë 56.783 qytetarë, përderisa numri i popullatës aktive për punë arrin në 83.273 veta. Nga ndihmat sociale janë të varur 1.775 familjarë me gjithsej 20.516 anëtarë.

Organizatori ka paraparë që në këtë aksion, i cili iu dedikohet të gjithë atyre që kanë nevojë për ndihmë, të përfshihen të gjitha shoqatat humanitare, organizatat lokale të rinisë dhe të grave, institucionet vendore e ndërkombëtare, kompanitë private e shoqërore si dhe donatorë të tjerë, si UNMIK-u, UNHCR-ja, OSBE-ja, TMK-ja dhe KFOR-i.

Në qytetin e Gjilanit do të jenë të hapura 5 pika grumbulluese, ndërsa 11 të tjera nëpër fshatrat më të mëdha të komunës, si në Pogragjë, Miresh, Uglar, Malishevë, Përlepnicë, Bresalc, Velekincë, Llashticë, Lladovë, Cërnicë, Zhegër.

 

 

Kryetari i AKK-së merr pjesë në sesionin vjeshtor të Këshillit të Evropës

 

Gjilan, 26 nëntor 2003 - Kryetari i Asociacionit të Komunave të Kosovës dhe i komunës së Gjilanit, Lutfi Haziri udhëtoi për në Strasburg, ku do të marrë pjesë në sesionin vjeshtor të Dhomës së Pushtetit Lokal në Këshillin e Evropës, së bashku me kryetarin e komunës së Prishtinës, Ismet Beqiri dhe atë të komunës së Shtimes, Fehmi Mujota.

Sipas z. Haziri, Këshilli i Evropës do të diskutojë rreth gjendjes së pushtetit lokal në Kosovë, por nuk pritet që në këtë session të bisedohet edhe për Draftin e decentralizit në Kosovë.

Lutfi Haziri, poashtu do të marrë pjesë edhe në punimet e grupit, i cili shqyrton progresin e komunave në Europën Juglindore, e quajtur "NALAS".

 

 

Tash dy muaj nuk dihet asgjë për Avni Fetën

 

Prishtinë, 26 nëntor 2003 - Për rreth dy muaj nuk dihet asgjë për Avni Beqir Fetën (1974) nga fshati Penuh i Besianës. Sipas deklaratës së familjarëve të Avniut (të dhënë më 26 nëntor 2003 në KMDLNJ), ai më 29 shtator, rreth orës 17.00, ka marrë veturën e një shoku të tij (fqinj) të tipit Opel Calibra, ngjyrë të kuqe, me targa 143 - KS - 930. Prej atij çasti nuk dihet asgjë për fatin e tij.

Atë ditë, Avniu kishte të veshur pantallona ngjyrë të zezë, një bluzë të zezë dhe një jakne të lëkurës, po me ngjyrë të zezë. Avniu është i gjatë 1.70 m me peshë prej 90 kg.

Familjarët e Avniut lusin të gjithë ata që mund të kenë ndonjë informatë për të le të lajmërojnë në numrat e tel. mobil 044 161 682 ose 044 315 325 apo në KMDLNJ në tel. (statik) 038/ 249 006 ose 244 029.

 

 

U nënshkrua Memorandumi i Mirëkuptimit për Persona të Zhdukur

 

Prishtinë, 26 nëntor 2003 - Komisioni Ndërkombëtarë për Persona të Zhdukur dhe UNMIK-u nënshkruan sot Memorandumin e Mirëkuptimit për Persona të Zhdukur. Me këtë rast Gordon Bejkon tha se bashkëpunimi UNMIK- Komisioni mund të ndihmojë mbylljen e kapitullit të padrejtësive që kanë ndodhur në Kosovë.

Për shefin e shtyllës së parë të UNMIK-ut Zhan Kristian Kadi, fati i të zhdukurve është plagë për gjithë Kosovën. Ndërkaq sipas kryeministrit Rexhepi nënëshkrimi i memorandumit do të ndihmojë në ndriqimin e fatit të të zhdukurve.

 

 

Anëtarët e Kryesisë së LDK-së dje i uruan festën e Bajramit kryeytarit të BIK, Naim Tërnava

 

Prishtinë, 26 nëntor 2003 - Me rastin e festës së Bajramit, dje një delegacion i LDK-së, Hajzer Krasniqi dhe Agim Krasniqi, anëtarë të Kryesisë qendrore të LDK-së, vizituan selinë e Bashkësisë Islame të Kosovës dhe kryetarit të saj, Naim Tërnava me bashkëpunëtorët, i uruan këtë festë të madhe.

 

 

Podujevë: Policia zbulon armë dhe muncion, kurse maskat plaçkitën një person

 

Podujevë, 26 nëntor 2003 (QIK) - Policia rajonale e UNMIK-ut ka raportuar për zbulimin e dy bombave të dorës gjatë kontrollimit të veturave dje rreth orës 21.30. Sipas policisë në veturën "Opel ascona" në rrugën "Skënderbeu" në Podujevë KFOR-i ka konfiskuar dy bombat e dorës për deminim.

Operacioni i kontrollimit të të shtëpisë së të dyshuarit ka vazhduar nga policia e cila ka zbuluar një revolver me 32 rrathë municioni dhe lloje të ndryshme të armëve që u konfiskuan.

 

Gjatë kontrollimit të shtëpisë së të arrestuarit janë zbuluar armë të llojeve të ndryshme, tha zëdhënësi i policisë rajonale të UNMIK-ut në Prishtinë Malkolm Eshbi, duke mos dhënë detaje të tjera. Ndërkaq, burime anonime nga policia e Podujevës pohojnë që të jetë zbuluar 1 predhë minahedhësi, municion "Gulinovi", etj.

Gjithashtu një vjedhje me armë është raportuar nga policia rajonale e UNMIK-ut e Prishtinës. Tre persona të panjohur me armë dhe të maskuar i grabitën viktimës 1500 euro dhe një telefon mobil, ka njoftuar policia, duke shtuar se kjo ndodhi derisa ai mbushi veturën me derivate në pompën e benzinës Alb Petrol.

 

Ngjarja ka ndodhur në rrugën Albatros, por nuk është raportuar për të lënduar. Ndërkaq, sipas burimeve jozyrtare ngjarja ka ndodhur në afërsi të fshatit Gërdofc dhe viktimës i janë plaçkitur 2300 euro.

Në raportin e policisë njoftohet edhe për një viktimë e cila nga një person i panjohur ka marrë një monedhë false prej 50 euro me të cilën e ka paguar një kartelë telefonike.

 

 

Mijëra besimtarë të besimit islam në Kosovë kremtuan festën e Bajramit

 

Prishtinë, 26 nëntor 2003 - Mijëra besimtarë të besimit islamë në Kosovë dje kremtuan festën e ditës së Bajramit. Besimatarët faljen e Bajramit e bënë në Xhaminë e Madhe në Prishtinë, ku nga aty përcollën mesazhin për humanitet, drejtësi, solidaritet dhe barazi njerëzore.

 

Manifestimi filloi me leximin e disa pjesëve kuranore dhe me ligjëratën për rëndësinë e kësaj feste, të cilën e mbajti maxhistër Xhabir Hamiti, ndërkaq faljen e Fiter Bajramit e ka udhëhequr kryeimami i Bashkësisë Islame të Kosovës, Sabri Bajgora.

 

Ndërkaq, kryetari i Bashkësisë Islame të Kosovës, Naim Tërnava në mesazhin e tij bëri thirrje për ndihmë dhe kujdes për të gjithë ata që kanë nevojë.

Pas faljes së Bajramit, Bashkësinë Islame të Kosovës e kanë vizituar dje edhe krerët e institucioneve të vendit, por edhe nga radhët e ndërkombëtarëve.

Kryeadministratori i Kosovës, Hari Holkeri festën e Bajramit të Madh e cilësoi shumë të rëndësishme në këtë linjë edhe për komunitetin ndërkombëtar të dislokuar në Kosovë.

 

Ai tha se administrata ndërkombëtare dhe konfesionet fetare në Kosovë kanë shumë gjëra të përbashkëta, duke shfaqur besimin e tij se komunitetet fetare mund të luajnë një rol të rëndësishëm në arritjen e standardeve, gjë që do të ishte në interesin e të gjitha grupeve etnike dhe fetare në Kosovë.

Ndërkaq, në mbrëmje në sallën e kuqe të Pallatit të Rinisë dhe Sporteve në Prishtinë me rastin e festës së Bajramit u mbajt një koncert festiv. Në këtë koncert morën pjesë Kori i Medresesë së Prishtinës dhe ansambli i këngëve dhe valleve "Shota".

 

 

Policia informon se janë identifikuar dy veturat prej të cilave është kryer sulmi ndaj pjesëtarëve të SHPK-së në Pejë

 

Prishtinë, 26 nëntor 2003 - Policia ndërkombëtare ka formuar një ekip të veçantë hetuesish nga Qendra për Krime Serioze në Prishtinë për të hetuar sulmin e armatosur kundër tre pjesëtarëve të SHPK-së në Pejë. Kështu bëri të ditur zëdhënësi i komesionerit të policisë së UNMIK-ut për hetimin e krimeve Robi Pedllov.

 

Ai tha se deri më tash dihet se kundër policëve kosovarë është qëlluar nga dy vetura: një "mercedes" ngjyrë gri dhe një "audi" i bardhë që është gjetur e gjetur i braktisur. Vetura kishte shumë dëmtime, sepse ishte ngarë shumë shpejt. Në mercedes ishin tre persona dhe tre numrat e parë të kësaj veture janë 329 KS. Dëshmitarët nuk kanë arritur t'i marrin numrat e tjerë, raporton policia.

"Mund të them se vetura e tipit "audi" të vjetër është gjetur e braktisur dy kilometra në afërsi të Klinës në një zonë malore në rrugën Pejë - Prishtinë", ka thënë zëdhënësi Pedllov. Ai bëri të ditur se disa dëshmitarë, tashmë u janë drejtuar policisë me informacione, por kërkoi ndihmë edhe nga të tjerët që mund të kenë qenë dëshmitarë të kësaj ngjarjeje tragjike.

 

 

Feler i premtoi familjes Tolaj se policia e UNMIK-ut do të bëjnë çmos për kapjen e vrasëve të Sebahates

 

Pejë, 26 nëntor 2003 - Komesioneri i policisë së UNMIK-ut, Shtefan Feller vizitoi dje Shtabin rajonal të policisë së Pejës, ku nga zyrtarët u informua më hollësisht rreth ngjarjes së pardjeshme tragjike afër Pejës, ku u vra policja Sabahate Tolaj dhe dy kolegë të saj u plagosën.

 

Pastaj Feler vizitoi familjen e polices së vrarë Sebahate Tolaj dhe u shprehu ngushëllime, duke u premtuar se policia e UNMIK-ut dhe SHPK do të bëjnë çmos në gjetjen e vrasëve të të ndjerës Tolaj.

Feler e cilësoi këtë vrasje si akt kriminel, i cili është i drejtuar kundër institucioneve vendore dhe ndërkombëtare, që po bëjnë përpjekje të vazhdueshme për vendosjen e sigurisë për të gjithë qytetarët e Kosovës.

 

 

Kryeshefi ekzekutiv i Prishtinës urdhëroi që me rastin e 28 Nëntorit të vendoset flamuri

 

Prishtinë, 26 nëntor 2003 - Kryeshefi ekzekutiv i komunës së Prishtinës, Sami Hamiti nëpërmjet Bordit të Drejtorëve dhe në pajtim me dispozitat e statusit të Prishtinës lëshoi një urdhëresë ku urdhërohen instituconet e përkohëshme të vetëqeverisjes, organet gjyqësore, shoqëritë aksionare, ato me përgjegjësi të kufizuara, bizneset individuale, që me rastin e festës së 28 Nëntorit - Ditës së Flamurit në ndërtesat e tyre të vendosin flamurin.

 

 

Misioni i OSBE-së filloi fushatën: "Reago - dhuna është krim"

 

Prishtinë, 26 nëntor 2003 - Misioni i OSBE-së në Kosovë prej dje filloi fushatën: "Reago - dhuna është krim", me qëllim të ndërgjegjësimit për problemin e dhunës ndaj femrave. Fushata filloi në Ditën ndërkombëtare kundër dhunës ndaj femrave dhe përfundon më 10 dhjetor, përkatësisht në Ditën Ndërkombëtare të të Drejtave të Njeriut. Ngjarje të ndryshme do të organizohen në mbarë Kosovën me theks të veçantë mbi këtë problematikë.

 

 

NATO ka hedhur poshtë reduktimin e trupave të saj në Kosovë deri në mesin e vitit 2004

 

Bruksel, 26 nëntor 2003 - NATO-ja do t'i reduktojë për një të tretën forcat paqeruajtëse në Bosnje si hap i parë drejtë marrjes së misionit mga ana e Bashkimit Evropian. Diplomatë në Bruksel kanë thënë se për shkak të statusit final të pazgjidhur të Kosovës. Aleanca ka hedhur poshtë reduktimin e trupave në Kosovë deri në mesin e vitit 2004.

 

 

Robertson thotë se misioni i NATO-s do të jetë i suksesshëm kur Kosova të bëhet demokraci shumetnike

 

Bruksel, 26 nëntor 2003 - Sekretari i Përgjithshëm i NATO-s, Xhorxh Robertson, deklaroi dje se kryeministri i Kosovës Bajram Rexhepi javën e kaluar i ka premtuar se do të vazhdojnë bisedimet Prishtinë - Beograd.

 

Ai shpreson se në Kosovë do të plotësohen standardet demokratike që janë kusht për fillimin e bisedimeve për statusin final të Kosovës. Lordi Robertson ka thënë se misioni i NATO-s do të jetë i suksesshëm kur Kosova të bëhet një demokraci shumetnike.

 

 

Policia shqiptare ka arrestuar dy persona të dyshimtë se i takojnë organizatës terroriste

 

Tiranë, 26 nëntor 2003 - Policia shqiptare ka arrestuar dy persona të dyshimtë se i takojnë organizatës terroriste, tek të cilët janë gjetur mjete shpërthyese, njoftuan agjencitë e huaja të lajmeve, duke cituar burimet policore në Tiranë.

Shtetasit shqiptarë Pjetër Baba (38) dhe Lulzim Çuni (35) janë arrestuar të premtën në Shkodër, ka deklaruar zëdhënësi i Ministrisë së Rendrit Engjëll Hysi.

Policia gjatë bastisjeve të banesave të tyre ka gjetur armë, municion, disa telefona celularë dhe dikumente falco. "Këto mjete ndoshta janë përgatitur për t'u aktivizuar në Tiranë", ka thënë Hysi.

 

 

Shqipëria mbështet "Marrëveshjen për Procesin Politik" në Irak

 

Tiranë, 26 nëntor 2003 - Ministria e Punëve të Jashtme e Republikës së Shqipërisë shpreh mbështetjen e saj ndaj "Marrëveshjes për Procesin Politik" të nënshkruar më datë 15 nëntor 2003, ndërmjet Autoritetit të Përkohshëm të Koalicionit në Irak dhe Këshillit Qeverisës Iraken.

Kjo marrëveshje përbën një plan konkret për transferimin e pushtetit në Irak drejt një qeverie tranzicioni irakiane. Arritja e këtij pikësynimi brenda datës së parashikuar të 30 qershorit 2004, do të bëjë të mundur vetëqeverisjen e popullit iraken.

Shqipëria, si një vend-anëtar i Koalicionit, mbështet këtë plan të hartuar mbi parime demokratike dhe e konsideron atë si çelësin e rrugës së zhvillimit demokratik të Irakut dhe më gjerë të rajonit.

 

Së bashku me partnerët e tjerë të Koalicionit, ne kemi dy synime të përbashkëta strategjike, një Irak të qëndrueshëm, të lirë, demokratik, dhe në paqe me fqinjët e tij dhe vetveten, si dhe dëshirën e përbashkët me popullin irakian për një kthim të shpejtë të sovranitetit në duart e tij.

 

 

Të premtën zhvillohet takimi i ministrave evropianë të punëve të brendshme, të sigurisë dhe juridikaturës

 

Bruksel, 26 nëntor 2003 - Për të premtën është caktuar takimi deri më tash më i madh i ministrave evropianë të punëve të brendshme, të sigurisë dhe juridikaturës, në të cilin përveç 15 ministrave të dikasterëve të Bashkimit Evropianë, do të marrin pjesë dhe 10 anëtarë të rinj të BE-së dhe të vendeve të Ballkanit, të gjithë përfaqësuesit ndërkombëtarë në vendet e rajonit, si dhe përfaqësuesit e Paktit të Stabulitetit.

 

 

Pauell tha se Maqedonia ka bërë përparim të dukshëm politik dhe shoqëror

 

Uashington, 26 nëntor 2003 - Kryeministri i Maqedonisë, Branko Cërvenkovski, ndodhet në Uashington, për bisedime me zyrtarë amerikanë. Ai është takuar me sekretarin e Shtetit Kolin Pauell dhe vizita përfshin takime me nënpresidentin Dik Çenej si dhe me nënsekretarin e mbrojtjes Pol Uolfowic.

Sekretari Pauell tha se ai e mirëpret ditën ku Maqedonia të integrohet plotësisht në institucionet Euro-Atlantike.

Ai u tha gazetarëve se e nxiti kryeministrin Cërvenkovski të vazhdojë të këmbëngulë për anëtarësim në NATO.

Pauell tha se Maqedonia ka bërë përparim të dukshëm politik dhe shoqëror në vitet e fundit, por ende i mbetet punë për të përmbushur standartet e anëtarësimit në aleancën e Natos dhe në organizatat e tjera Euro-Atlantike.

 

 

M.Xhaferi: Pjesëmarrja e shqiptarëve në forcat policore dhe ushtarake ende nuk ka arritur në shkallën e duhur

 

Uashington, 26 nëntor 2003 - ZV.kryeministri i Maqedonisë Musa Xhaferi, i cili është në përbërje të delegacionit që shoqëron kryeministrin Cervenkovski në SHBA, tha se ka shumë punë për të realizuar në praktikë në këtë vend.

Zoti Xhaferi thotë se pjesëmarrja e shqiptarëve në forcat policore dhe ushtarake të vendit ende nuk ka arritur në shkallën që parashikon marrëveshja e Ohrit.

"Krahasuar me dy vite ose dy vite e gjysmë më parë ka një kërcim të dukshëm. Ajo nuk është e mjaftueshme dhe konform marrëveshjes së Ohrit. Nga fundi i vitit 2004 policia e Maqedonisë duhet të reflektojë strukturën nacionale", tha Xhaferi.

Sipas tij, Maqedonia ka ndërmarrë disa hapa të rëndësishëm për të luftuar korrupsionin. Por pothuajse njëlloj si në vendet e tjera ballkanike, korrupsioni së bashku me krimin e organizuar dhe trafikun njerëzor, janë atje një plagë mjaft e përhapur që duket se kërkon masa radikale, tha ai.

 

 

Jemeni ka arrestuar një të dyshuar kyç rreth rrjetit të Al Kaidës

 

Sana, 26 nëntor 2003 - Jemeni thotë se të mërkurën shpreson të ketë arrestuar njeriun kyç për të dhëna rreth Al Kaidës, të dyshuarin e kërkuar për lidhje për sulmin kundër luftanijes amerikane në vitin 2000.

Mohamed Hamdi al-Ahdal, i njohur edhe si Abu Asem al-Maki është në krye të listës së Jemenit të të kërkuarve rreth dy vjet më parë, para se të kapej nga forcat e sigurimit të martën në Sana.

"Ky është një arrestim i rëndësishëm për shkak të informacioneve që do të marrim gjatë hetimeve, të cilat mund të zbulojnë elementë ose rrjetin bile edhe jashtë Jemenit", tha një zyrtar qeveritar i Jemenit.

 

 

Xhej Garner thotë se një seri gabimesh kishin penguar punën pas luftës në Irak

 

Londër, 26 nëntor 2003 - Gjenerali amerikan që ishte në krye të Irakut në javët pas rrëzimit të Sadam Huseinit ka thënë se rindërtimi i vendit do të kishte ecur më mirë nëse SHBA do të kishte më shumë besim tek irakianët
Gjenerali në pension, Xhej Garner i tha BBC-së se një seri gabimesh kishin penguar punën pas luftës.

Ai tha se më shumë ushtarë duhet të ishin dërguar në Bagdad, duhet të kishte patur komunikime më të mira me irakianët dhe gjeneratorë të mëdhenj duhet të ishin transportuar për të sjellë energjinë elektrike.

Gjenerali Garner tha se ushtria irakiane duhet të ishte punësuar në përpjekjet rindërtuese dhe jo të çmobilizohej. Gjithashtu koalicioni i drejtuar nga amerikanët duhet të përpiqej të sillte në pushtet një qeveri më me shpejtësi.

Gjenerali Garner u zëvendësua si kreu i administratës amerikane nga Pol Bremer pas më pak se një muaji në atë post.

 

 

Amerikanët arrestuan bashkëshorten dhe të bijën e nënkryetarit të Sadam Hyseinit

 

Bagdad, 26 nëntor 2003 - Trupat amerikane kanë arrestuar bashkëshorten dhe të bijën e nënkryetarit të regjimit të Sadam Hyseinit, i dyshuar për sulmet kundër trupave amerikane.

Trupat amerikane 70 milja në veri të Bagdadit kanë arrestuar bashkëshorten dhe të bijen e Izat Ibrahim Duri, një bashkëpunëtor shumë i lartë i Sadamit, tha sot zëdhënësi i ushtarak amerikan Uiliam Mekdonald, njofton AP.

Gjatë sundimit të Sadam Huseinit, Al Duri ishte nënkryetar i Këshillit të Komandës Revolucionare të Irakut.
Zyrtarët amerikanë besojnë se Al Duri ka planifikuar shumë sulme kundër forcave amerikane dhe javën e kaluar ofruan 10 milionë dollarë për informacione në kapjen e tij. Al Duri është i gjashti në listën e 55 irakianëve më të kërkuar.

 

 

Në Nepal janë vrarë 12 rebelë maoistë dhe 8 pjesëtarë të forcave të rendit

 

Katmandu, 26 nëntor 2003 - Dymbëdhjetë rebelë maoistë dhe tetë pjesëtarë të forcave të rendit janë vrarë në përleshjet në Nepal, kanë bërë të ditur burimet policore dhe ushtarake. Që nga viti 1996 në konfliktet e armatosura në këtë vend janë vrarë mbi 8000 njerëz.

 

 

Janë të mundshme sulmet terroriste në disa qytete turke

 

Stamboll, 26 nëntor 2003 - Janë të mundshme sulmet terroriste në disa qytete turke, duke përfshirë edhe Ankaranë dhe Stambollin, ka bërë të ditur sot Australia, duke përsëritur këshillën qytetërëve të saj që të mos udhëtojnë në Turqi.

Edhe Britania e Madhe ka informacione se së shpejti mund të ndodhin sulme të reja terroriste në qytetet më të mëdha në Turqi, thuhet në një komunikatë të Minstrisë së Jashtme, në të cilën paralajmërohen qytetarët britanikë të mos udhëtojnë në Turqi.

 

 

Zgjedhjet presidenciale në Gjeorgji do të zhvillohen më 4 janar

 

Tbilisi, 26 nëntor 2003 - Parlamenti i Gjeorgjisë vendosi njëzëri që zgjedhjet presidenciale për të zëvendësuar presidentin e përmbysur, Eduard Shevernaxe, të zhvillohen më 4 janar.

Presidentja e përkoshme, Nino Burjanaxe, ende nuk ka vendosur nëse do të konkurojë apo jo. Ajo i premtoi parlamentit se zgjedhjet do të zhvillohen në një klimë të qetë e paqesore.

Udhëheqësi i partisë kryesore të opozitës, Mikhail Saakashvili, i cili drejtoi revoltën popullore që detyroi zotin Shevarnaxe të jepte dorëheqjen, tha se opozita do të përpiqet të dalë me një kandidat të përbashkët për president.

 

 

Shpërthime të fuqishme në qendër të Bagdadit

 

Bagdad, 26 nëntor 2003 - Në qendër të Bagdadit u dëgjuan të martën mbrëma disa shpërthime të fuqishme, vetëm disa orë pasi zyrtarët amerikanë në Irak thanë se gueriljet po i drejtojnë sulmet e tyre më tepër kundër irakianëve sesa ndaj trupave amerikane.

Në zyrat e koalicionit të udhëhequr nga Shtetet e të Bashkuara u dëgjuan sirenat dhe, sipas dëshmitarëve, dy predha apo raketa goditën ndërtesat aty pranë. Por deri tani, zyrtarët amerikanë nuk kanë dhënë hollësi rreth incidentit.

Gueriljet kanë qëlluar me mortaja selinë e koalicionit në Bagdad edhe në të kaluarën.

 

 

Një gjykatës britanik kritikon amerikanët

 

Londër, 26 nëntor 2003 - Një nga gjykatësit më të lartë të Britanisë ka dënuar mbajtjen pa gjyq në burg në Guantanamo të qindra të dyshuarve duke e quajtur atë një dështim monstruoz të drejtësisë.

Gjykatësi, Lordi Steyn që është në gjykatën më të lartë britanike, Dhomën e Lordëve, tha se të dyshuarit e Al-Kaidas dhe talebanëve me qëllim mbaheshin përtej të drejtës së ligjit dhe gjykatave.

Në një fjalim në Londër, ai tha se cilësia e drejtësisë hartuar për të burgosurit në Guantanamo ka dështuar të plotësojë standartet minimale të sjelljes së proceseve gjyqësore të ndershme.

 

 

Kryeministri turk kritikon Britaninë e Madhe

 

Stamboll, 26 nëntor 2003 - Kryeministri turk Taip Erdogan ka kritikuar Britaninë e Madhe për shkak se publikisht ka paralajmëruar për rrezikun nga sulmet e reja terroriste në Stamboll, në Ankara dhe në qytete të tjera të Turqisë. "Nëse synojmë një front të përbashkët kundër terrozizmit, të dhënat e zbulimit duhet t'u jipen organeve shtetërore, e jo mediave", ka paralajmëruar Erdogan.

 

 

Agjencia bërthamore e OKB-së dënon mashtrimet e Iranit

 

Vjenë, 26 nëntor 2003 - Agjencia e Kombeve të Bashkuara për energjinë bërthamore miratoi një rezolutë ku dënohen mashtrimet e Iranit në të kaluarën rreth programit të tij bërthamor.

Këshilli i guvernatorëve të agjencisë e miratoi rezolutën gjatë një mbledhjeje që zhvilloi sot në Vjenë.

 

Megjithëse dënonte mashtrimet e Iranit në të kaluarën, rezoluta pranonte se kohët e fundit Teherani është treguar i hapur dhe se muajin e kaluar u premtoi ministrave të jashtëm të Bashkimit Evropian që vizituan këtë vend se do të ndalte pasurimin e uraniumit.

 

 

UEFA ndalon zhvillimin e takimeve të futbollit në Turqi

 

Stamboll, 26 nëntor 2003 - Pas sulmeve më të reja terroriste në Stamboll, Federata Evropaine e Futbollit (UEFA) ka ndaluar zhvillimin e takimeve të eurokupave në Turqi.

Kështu dy ndeshjet e Ligës së kampionëve (Galatasaraj - Juventus dhe Beshiktash - Çelzi) dhe një e Kupës së UEFA-s (Makabi - Valensia) do të luhen në një terren neutral. UEFA fillimisht takimin Makabi - Valensia, për shkak të situatës në Izarel, e kishte caktuar të luhet në Izmir.

Ky vendim i UEFA-s ka shkaktuar zemërimin e klubeve turke.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |