Dy lajme nga Podujeva

Dy lajme nga Podujeva


Qeveria komunale diskutoi për sistematizimin e vendeve të punës në Shërbimin civil

Podujevë, 26 nëntor 2003 (TN) – Në mbledhjen e sotme të Këshillit të Drejtorëve që e udhëhoqi Kryeshefi Ekzekutiv Ejup Visoka morën pjesë edhe Kryetari i komunës Agim Veliu, zv. kryetari Agim Kikaj dhe përfaqësuesi i UNMIK-ut Shahzad Bangash.

Në mbledhjen e sotme u shqyrtua çështja e udhëzimeve për përgatitjen e propozimeve për sistematizimin vendeve të punës në Shërbimin civil në bazë të Rregullores mbi organizimin e brendshëm dhe sistematizimin e vendeve të punës në Drejtoritë e Kuvendit komunal, bazuar në Statutin e komunës së Podujevës.

Sipas udhëzimeve të draftit që u është dërguar drejtorive, të gjitha propozimet për vende të punës në kuadër të drejtorive të paraqiten në pajtim me nevojat optimale, për bazë të mirren nevojat reale dhe jo numri ekzitues i punëtorëve në drejtori si dhe për secilin vend të punës të përshkruhen qartë detyrat e punës.

Kryetari i komunës Agim Veliu shprehu kënaqësi që po përcillen Ligjet e Kuvendit të Kosovës dhe kërkoi që mbi bazën e Rregullores të bëhet ristrukturimi dhe sistematizimi i vendeve të punës, kurse zv. Kryetari Agim Kikaj tha se kjo çështje me rëndësi të realizohet me kujdes në mënyrë që të dihen aktivitetet dhe përgjegjësitë për secilën drejtori në mënyrë që të ngritet cilësia e shërbimeve për qytetarët e komunës.

Pas debatit të shumicës së drejtorëve të cilët informuan se sistematizimi i vendeve të punës dhe përshkrimi e detyrave duhet bazuar edhe në Ligjet që janë miratuar ose janë në procedurë të aprovimit në Kuvendin e Kosovës, u vendos që në një nga mbledhjet e ardhshme të diskutohet detajisht për nevojat, përshkrimin, detyrat dhe numrin e punëtorëve për secilën drejtori.

Podujevë: Gjenden armë të shumta në rrugën “Skënderbeu”

Podujevë, 26 nëntor 2003 (TN) – Policia regjionale e UNMIK-ut ka raportuar për zbulimin e dy bombave të dorës gjatë kontrollimit të veturave dje rreth orës 21.30. Sipas policisë në veturën “Opel Ascona” në rrugën “Skënderbeu” në Podujevë KFOR-i ka konfiskuar dy bombat e dorës për deminim. “Operacioni i kontrollimit të të shtëpisë së të dyshuarit ka vazhduar nga policia e cila ka zbuluar një revolver me 32 rrathë municioni dhe lloje të ndryshme të armëve që u konfiskuan.

“Gjatë kontrollimit të shtëpisë së të arrestuarit janë zbuluar armë të llojeve të ndryshme”, ka pohuar zëdhënësi i policisë regjionale të UNMIK-ut në Prishtinë Malkolm Ashby duke mos dhënë detaje tjera. Ndërkaq burime anonime nga policia e Podujevës pohojnë që të kenë zbuluar 1 predhë minahedhësi, municion “Gulinovi”, etj.

Sipas raportit të policisë regjionale të UNMIK-ut në rrugën “Zahir Pajaziti” në parkun e qytetit një fëmijë e ka lajmëruar policinë se ka hasur në municion të kalibrit 7.62 mm dhe se policia ka dalë menjëherë në vendin e ngjarjes dhe ka konfiskuar municionin.

Një vjedhje me armë është raportuar nga policia regjionale e UNMIK-ut e Prishtinës. “Tre persona të panjohur me armë dhe të maskuar i vodhën viktimës 1500 euro dhe një telefon mobil”, ka njoftuar policia duke shtuar se kjo ndodhi derisa ai mbushi veturën me derivate në pompën e benzinës “Alb Petrol”.

Ngjarja ka ndodhur në rrugën “Albatros”, por nuk është raportuar për të lënduar. Ndërkaq sipas burimeve tona ngjarja ka ndodhur në afërsi të fshatit Gërdofc dhe viktimës i janë plaçkitur 2300 euro. Në raportin e policisë njoftohet edhe për një viktimë e cila nga një person i panjohur ka marrë një monedhë false prej 50 euro me të cilën e ka paguar një kartelë telefonike.