U përkujtua Zëdhënësi i lirisë

U përkujtua Zëdhënësi i lirisë – Xhemail Mustafa

24 nëntor 2004 / TN - Malsore GASHI - Mijëra qytetarë në mesin e të cilëve ishin edhe përfaqësues të Presidencës së Kosovës, ministra, pastaj deputet të Kuvendit të Kosovës nga radhët e LDK-së, anëtarë të kryesisë së LDK-së në krye me nënkryetarin z. Kolë Berisha, kryetar të komunave dhe përfaqësues të degëve të LDK-së, dje kanë marrë pjesë në parakalimin e organizuar nëpër qendër të qytetit e deri në vendin e vrasjës së Xhemail Mustafës, në hyrje të ndërtesës së tij, në lagjen “Dardania”.

Në krye të kolonës së gjatë të pjesëmarrësve të këtij parakalimi, qëllimi i të cilit ishte përshkimi i rrugës së fundit të cilën e ka kaluar i madhi Xhemë, ishin përfaqësuesit e degëve të Prishtinës të Forumit të Rinisë të LDK-së, të cilët edhe ishin organizatorët e këtij përkujtimi.

Në ora 15:05 kolona mbërriti në vendin e vrasjës së zëdhënësit të lirisë, ndërsa familjarë të shumtë të Xhemës, në mesin e të cilëve edhe shoqja e tij- Bahrija dhe vajza – Beriana, ishin dalur për t’i pritur ata që sot po e përkujtonin më të dashurin e tyre dhe që sot kishin ardhur nga të gjitha anët e Kosovës. Më pas aty u vendosën kurora me lule dhe u ndezën qirinj në shenjë përkujtimi për të pavdekshmin Xhemail Mustafa.