Përmbajtja:

• Presidenti Rugova dënon vrasjen e polices së SHPK-së

• Prefekti i Nju Jorkut Majkëll Bllumberg mbërriti në Prishtinë

• Presidenti Rugova përgëzoi qytetarët e Kosovës me rastin e festës së Bajramit të Madh

• Presidenti Rugova përgëzoi myftiun Naim Tërnava me rastin e festës së Bajramit të Madh

• Një police e vrarë dhe dy të plagosur në një atentat afër Pejës

• Kryeparlamentari Daci gjendet në një vizitë në SHBA

• Në Prishtinë u shënua trevjetori i vrasjes së Xhemail Mustafës, këshilltar shumëvjeçar i Presidentit Rugova

• L.Zeneli: LDK në diasporë të përsërisë në çdo takim që zgjidhja e vetme e statusit të Kosovës është pavarësia

• Podujevë: OJQ ATeam Kosova sjell medikamente për shtëpinë e shëndetit

• Udhëheqja komunale dhe Dega e LDK-së e Podujevës vunë lule mbi lapidarin e Xhemajl Mustafës

• Buxheti i Kosovës për vitin 2004 do të jetë 22 për qind më i lartë krahasur me buxhetin e këtji viti

• Gjatë kësaj jave pritet një qëndrim i UNMIK-ut lidhur me procesin e privatizimit në Kosovë

• Ema Bytyçi nga Prishtina ka fituar Çmimin e parë në festivalin e Tiranës "Kënga Magjike"

• Në Suedi po mbahet Festivali i Poezisë dhe Muzikës Shqiptare

• Rexhep Meidani rikthehet në garën për postin e kryetarit të PS-së

• Sali Berisha i bëri thirrje opozitës për protesta

• Qeveria maqedonase propozon miratimin e pakove të ligjeve për decentralizimin e pushtetit

• Prokuroria shqiptare ka nisur hetimet kundër një grupi trafikantësh të armëve, të arrestuar në Shkodër

• Rifillon procesi gjyqësor për tre ish ushtarët gjermanë të KFOR-it

• Rrëzimi i helikopterit amerikan ishte një aksident

• Aleanca e djathtë e opozitës është fituese në zgjedhjet parlamentare në Kroaci

• Bremer ka zhvilluar bisedime me këshillin qeveritar irakian për një kushtetutë të mundshme

• Në një konvikt studentor në Moskë 32 studentë të huaj kanë vdekur nga zjarri

• Kryesia e Komunitetit Shqiptaro-Amerikan në Çikago morën pjesë në një tubim në mbështetje të gjeneralit Uesli Klark

• Gjeorgjianët festojë largimin e Shevarnaxes

Presidenti Rugova dënon vrasjen e polices së SHPK-së

 

Prishtinë, 24 nëntor 2004 - Presidenti i Kosovës, Dr. Ibrahim Rugova, ka dënuar sulmin kriminal ndaj policëve të SHPK-së që ndodhi sot (e hënë) në mëngjes në aksin rrugor Pejë-Deçan, me ç'rast është vrarë Sebahate Tolaj, pjesëtare e policisë së SHPK-së, është plagosur rëndë polici Isuf Haklaj, ndërsa lëndime të lehta ka pësuar polici tjetër, Hysen Lataj.

"Dënojmë fuqishëm sulmin kriminal ndaj pjesëtarëve të policisë së Kosovës. Ky është akt i drejtuar ndaj mbrojtësve të rendit, pjesëtarëve të sigurisë së vendit tonë. Ky është sulm ndaj institucioneve tona", ka thënë Presidenti Rugova, duke kërkuar nga organet e hetuesisë dhe të ndjekjes që sa më parë t'i gjejnë kryesit e veprës dhe t'i sjellin para gjyqit.

Presidenti i shpreh ngushëllime të thella familjes së të ndjerës Sebahata Tolaj, ndërsa u uron shërim të shpejtë policëve të plagosur.

 

 

Prefekti i Nju Jorkut Majkëll Bllumberg mbërriti në Prishtinë

 

Prishtinë, 24 nëntor 2004 - Sot në Prishtinë mbërrit i prefekti i Nju Jorkut Majkëll Bllumberg, i shoqëruar nga përfaqësuesit e komunitetit shqiptar në Nju Jork. Në aeroportin e Prishtinës kryebashkiakun e Nju Jorkut e priti Presidenti i Kosovës Ibrahim Rugova, kryeministri Bajram Rexhepi dhe prefekti i Prishtinës Ismet Beqeri.

  
Në Prishtinë pastaj u zhvillua një takim në hotelin "Iliria", ku merrnin pjesë udhëheqësit e lartë të institucioneve të Kosovës me prefektin Bllumberg.

Në mbrëmje zoti Bllumberg në Teatrin Kombëtar do të mbajë një fjalim me rastin e festës kombëtare shqiptare, 28 Nëntorit - Ditës së Flamurit.

 

 

Presidenti Rugova përgëzoi qytetarët e Kosovës me rastin e festës së Bajramit të Madh

 

Prishtinë, 24 nëntor 2004 - Presidenti i Kosovës Ibrahim Rugova përgëzoi përzemërisht të gjithë qytetarët dhe besimtarët e Kosovës me rastin e Festës së Bajramit të Madh.

- Dita e Bajramit të Madh, është një ditë e madhe sepse sublimon muajin e shenjtë të agjërimit të Ramazanit, muajin e spastrimit, të paqes e të mirëkuptimit si dhe të forcimit të besimit në Zotin.

Dhashtë Zoti që Bajramin e Madh të ardhshëm ta presim me njohjen formale të Pavarësisë së vendit tonë, Kosovës.
Zoti Ju bekoftë. Zoti e bekoftë Kosovën, - thuhet në përgëzimet e Presidentit Rigova drejtuar qytetarëve të Kosovës me rastin e festës së Bajramit të Madh.

 

 

Presidenti Rugova përgëzoi myftiun Naim Tërnava me rastin e festës së Bajramit të Madh

 

Prishtinë, 24 nëntor 2004 - Presidenti i Kosovës Ibrahim Rugova, me rastin e Festës së Bajramit të Madh, përgëzoi kryetarin e Bashkësisë Islame të Kosovës myftiun Naim Tërnava, duke i shprehur urimet e tij më të sinqerta dhe të popullit të Kosovës.

E çmojmë lart punën Tuaj në ngritjen e mirëkuptimit, të tolerancës dhe të përkrahjes për lirinë dhe pavarësinë e Kosovës.

Zoti Tërnava,

Në Ditën e Bajramit të Madh, e përgëzoj zgjedhjen Tuaj për Kryetar të Bashkësisë Islame të Kosovës, detyrë që kam besim, do ta kryeni me përkushtim e dashuri, thuhet në fund të përgëzimeve të Presidentit Rugova dërguar myftiut Naim Tërnava.

  

  

Një police e vrarë dhe dy të plagosur në një atentat afër Pejës

 

Pejë, 24 nëntor 2004 - Sot në orët e mëngjesit, në aksin rrugor Pejë - Deçan, në një atentat të organizuar, është vrarë një pjesëtare e SHPK-së kurse dy policë të tjerë janë plagosur.

 

Policja e vrarë është Sabahate Tolaj mga fshati Pobërgjë, kurse dy policët e plagosur janë Jusuf Haklaj (1956) nga fshati Isniq dhe Hysen Ukë Lataj, të cilët janë shtrirë në spitalin e Pejës.

Policia menjeherë ka dalë në vendin e ngjarjes dhe po i kryen hetimet.

 

 

Kryeparlamentari Daci gjendet në një vizitë në SHBA

 

Prishtinë, 24 nëntor 2004 - Kryetari i Kuvendit të Kosovës, Nexhat Daci, po qëndron në një vizitë disaditëshe në SHBA. Gjatë kësaj vizite ai do të marrë pjesë në disa manifestimekushtuar kremtimit të Ditës së Flamurit - 28 Nëntorit.

 

Më 27 nëntor kryeparlamentari Daci do të marrë pjesë në manifestimin e madh të shënimit të Ditës së Pavarësisë, që do të organizohet në Çikago nga ana e komunitetit shqiptar, ku do të marrin pjesë edhe personalitete të njohura nga SHBA-të. Të nesërmen kryeparlamentari Daci do të marrë pjesë edhe në manifestimin kushtuar kësaj feste kombëtare në Detroit.

Kryparlamentari Daci do të ketë edhe disa takime të rëndësishme me personalitete të njohura të administratës amerikane. Më 25 nëntor ai do të marrë pjesë në një tryezë që do të organizohet në Departamentin e Shtetit, me ftesë të të cilit bëhet kjo vizitë, që do të ketë temë gjendjen aktuale në Kosovë, ku do të marrin pjesë zyrtarë të Departamentit të Shtetit dhe të institucioneve të tjera amerikane.

Kryetari i Kuvendit të Kosovës do të takohet edhe me kongresisten Sju Kelli, me kongresistin Eliot Engëll, ish- senatorin Bob Doll, me ish-sekretaren e Shtetit Medlin Ollbrajt, analistin Janush Bugajski etj.

 

 

Në Prishtinë u shënua trevjetori i vrasjes së Xhemail Mustafës, këshilltar shumëvjeçar i Presidentit Rugova

 

Prishtinë, 24 nëntor 2004 - Dje në Prishtinë me një ceremoni përkujtimore, u shënua trevjetori i vrasjes së Xhemail Mustafës, i cili për dhjetë vjet ishte këshilltar për informim i presidentit Ibrahim Rugova.   Udhëheqës dhe aktivistë të LDK-së, por edhe shumë qytetarë parakaluan nga selia e LDK-së deri në vendin ku u vra Xhemail Mustafa, dhe aty u vunë kurora lulesh dhe u ndezën qirinj, në shenjë përkujtimi për të. "Sot tre vjet në këtë vend e vranë njeriun e urtë, mendimtarin, publicistin dhe politikanin, Xhemail Mustafa", tha Florian Dushi anëtar i Forumit Rinor të LDK-së, që e organizoi këtë ceremoni përkujtimore.

   

Dushi tha se "një dorë e zezë kriminale e vrau njeriun emblematik të fjalës së lirë, mendimin dhe veprimin, njeriun që nuk iu nda familjes dhe Kosovës në çastet më të vështira të historisë së saj të vuajtjes, dhembjes dhe trishtimit, të cilat ai i përjetësoi në veprën e tij për t'i mos harruar në rrugtimin tonë të ri në liri".

Nekibe Kelmendi, deputete në Parlamentin e Kosovës, thase tre vjet pas vrasjes së Xhemail Mustafës nuk janë kapur e as ndëshkuar vrasësit e tij. Zonja Kelmendi tha se në këtë aspekt drejtësia në Kosovë ka dështuar, sepse është e pamundur që në këtë vend në mesditë të mos dihen dorasit .

 

Ky përkujtim, tha ajo, duhet t'u shërbejë qytetarëve si mesazh që t'i denoncojnë, t'i paraqesin vrasësit, sepse Kosovës nuk i duhet krimi, Kosovës i duhet një jetë në qetësi me njerëz të mëdhenj e jo të vriten njerëzit e mëdhenjë, siç ishte i ndjeri Xhemail Musftafa.

"Xhema ka qenë njeriu i fjalës dhe ai nuk ka vrarë askend as me fjalë", tha Muhamet Hamiti, zëdhënës i presidentit të Kosovës Ibrahim Rugova. Ai theksoi se pesha e punës së tij, pesha e angazhimit të tij, artikulimi i tij i fuqishëm për çështjen e Kosovës, për shqiptarët, i ka penguar dikujt.

Vrasësit, kudo qofshin ata duhet të kapen dhe të ndëshkohen nga institucionet tona, për të cilat u flijua Xhemail Mustafa, u tha në këtë tubim përkujtimor.

Pjesëmarrësit e kësaj ceremonie përkujtimorre, përfaqësues të Presidencës, të Kuvendit të Kosovës dhe zyrtarë të lartë të LDK-së si dhe qytetarë të tjerë ngushëlluan familjen Mustafa.

 

 

L.Zeneli: LDK në diasporë të përsërisë në çdo takim që zgjidhja e vetme e statusit të Kosovës është pavarësia

 

Malmë, 24 nëntor 2004 - Kryetari i FR të LDK-së dhe deputeti i Parlamentit të Kosovës, Lulzim Zeneli, bisedoi me anëtarët e Kryesisë së LDK-së Dega në Suedi. Fillimisht, në shenjë kujtimi në trevjetorin e vrasjes së Këshilltarit për Informim të Presidentit Rugova, z. Xhemajl Mustafa, Kryesia mbajti një minutë heshtje. Kryetari i Degës Hysen Ibrahimi, në këtë takim foli për aktivitetin e kësaj dege. Lulzim Zeneli diskutoi për shumë çështje aktuale në Kosovë.

 

Ai ndër të tjera se "misioni ynë ende nuk ka përfunduar dhe kërkoi nga degët e LDK-së në Diasporë që në vendet në të cilat ato veprojnë që t'ua përsëritni në çdo takim me institucionet shtetërore të atyre vendeve që zgjidhja e vetme e statusit të Kosovës është Pavarësia e saj".

 

Vetëm në këtë mënyrë, tha ai, ata do të kuptojnë se populli i Kosovës është mëse i vendosur në këtë drejtim dhe se zgjidhje tjetër për Kosovën nuk ka.

Pati pyetje dhe diskutime të shumta nga të gjithë anëtarët e Kryesisë, ku edhe një herë u potencua kontinuiteti në mes të LDK-së në nivelin qëndror dhe Degës së LDK-së në Suedi.

Në fund të takimit, kryetari i Degës, Hysen Ibrahimi, theksoi edhe një herë se Dega e LDK-së në Suedi, gjithnjë e ka përkrahur, përkrahë dhe gjithnjë do ta përkrahë vijën politike të Presidentit të Kosovës, Ibrahim Rugova.

    

  

Podujevë: OJQ ATeam Kosova sjell medikamente për shtëpinë e shëndetit

 

Podujevë, 24 nëntor 2004 - OJQ shqiptaro-amerikane ATeam Kosova@ këto ditë solli ndihma për shtëpinë e shëndetit në Podujevë, vlera e të cilave sipas udhëheqësit të kësaj OJQ-je mbërinë vlerën afro 15 mijë euro.

Drejtori i Shtëpisë së shëndetit dr. Bahri Thaçi tha se ATeam Kosova e ka ndihmuar institucionin shëndetësor që ai drejton me medikamente të ndryshme, pajisje medicinale, material për maternitetin dhe foshnjet, etj.

 

OJQ-në ATeam Kosova e cila vitin e kaluar hapi klinikën humanitare për pacientët me hipertension dhe diabetë, pas 3 muaj pushimi, e hapi klinikën përsëri në një ankes të shtëpisë së shëndetit, ka njoftuar udhëheqësi John Chesnut.

AFalë bashkëpunimit të mirë që kemi krijuar me këtë OJQ, ne u kemi ofruar ndihmën tonë duke u ofruar një hapësirë për punë, deklaroi z. Thaçi, kurse z. Çesnut tha se ndihma për shtëpinë e shëndetit do të vazhdojë edhe në të ardhmen.

  

  

Udhëheqja komunale dhe Dega e LDK-së e Podujevës vunë lule mbi lapidarin e Xhemajl Mustafës

 

Podujevë, 24 nëntor 2004 - Me rastin e trevjetorit të vrasjes së atdhetarit, publicistit, shkrimtarit dhe Këshilltarit për Informim të Kryetarit të Republikës së Kosovës, Xhemail Mustafa, udhëheqja komunale e Podujevës dhe e Degës së LDK-së vunë buqeta lulesh mbi lapidarin e të ndjerit në varrezat e fshatit Gllamnik të Podujevës. Vrasja e Xhemajl Mustafës, 3 vjet më parë ishte dhe mbeti goditje e rëndë e popullit të Kosovës për lirinë e sotme, demokracinë dhe pavarësinë që po e ndjejmë e për të cilën ai punoi dhe u vra pabesisht", tha kryetari i komunës së Podujevës dhe kryetar i Degës së LDK-së Agim Veliu

Buqeta dhe kurora lulesh e homazhe tek varri i Xhemajl Mustafës në vendlindjen e tij bënë edhe shumë veprimtarë të LDK-së dhe qytetarë tjerë.

 

 

Buxheti i Kosovës për vitin 2004 do të jetë 22 për qind më i lartë krahasur me buxhetin e këtji viti

 

Prishtinë, 24 nëntor 2004 - Buxheti i Kosovës për vitin 2004 do të jetë 22 për qind më i lartë krahasur me buxhetin e vitit 2003. Ndërkaq do të ketë pesë për qind rritje të pagave në sektorin e shërbimeve publike, njoftoi minstri i Ekonomisë dhe Financave të Kosovës Ali Sadrija.

 

Buxheti për vitin 2004 do të jetë 619,3 milionë euro, që ëshë një avancim krahasuar me vitin paraprak dhe trajton në mënyrë specifike dhe adekuate të gjitha nevojat e agjencive përkatëse dhe ministrive, tha ministri Sadriu. Ai bëri këto komente pas mbledhjes së mbajtur të Këshillit Ekonomik Fiskal.

Projektligji për ndarjen e buxheti të konsoliduar të Kosovës së pari duhet të shqyrtohet nga kryeadministratori i Kosovës, Hari Holkeri, më pas nga Qeveria prej nga do t'i dërgohet Parlamentit të Kosovës për miratim.

 

Këtë projektligj për Buxhetin e Kosovës në fund duhet ta nënshkruajë kryeamdinistratori i Kosovës.

 

 

Gjatë kësaj jave pritet një qëndrim i UNMIK-ut lidhur me procesin e privatizimit në Kosovë

 

Prishtinë, 24 nëntor 2004 - Një zëdhënës i UNMIK-ut në Prishtinë se gjatë javës së ardhshme pritet një qëndrim i administratës ndërkombëtare lidhur me procesin e privatizimit në Kosovë.

 

Administrata e OKB-së në Kosova mendon se Kuvendi i Kosovës mund të miratojë çfarëdo ligjesh, por ato nuk mund të jenë të plotfuqishme pa miratimin e përfaqësuesit të posaçëm të Sekretarit të Përgjithshëm në Kosovë.

 

Kështu ka deklaruar zëdhënësi i UNMIK-ut në Prishtinë Kristian Lindmajer, duke komentuar kërkesën e kryeministrit të Kosovës Bajram Rexhepi që Kuvendi i Kosovës të shpallë të pavlefshme tri ligje të miratuara pas 22 marsit të vitit 1989, të cilat aktualisht janë pengesa kryesore për rrjedhën normale të procesit të privatizimit në Kosovë.

Ai tha se vendimi për qëndrimin e UNMIK-ut lidhur me këtë çështje mund të dihet vetëm javën e ardhshme, mirëpo të gjithë e dimë shumë mirë se kompetencat e Kuvendit të Kosovës janë nën ato të përfaqësusit special të Sekretarit të Përgjithshëm, tha zëdhënësi Lindmajer.

 

 

Ema Bytyçi nga Prishtina ka fituar Çmimin e parë në festivalin e Tiranës "Kënga Magjike"

 

Tiranë, 24 nëntor 2004 - Këngëtarja nga Prishtina Ema Bytyçi ka fituar Çmimin e parë me këngën "Ku je ti" me muzikë të Adrian Hilës, në festivalin "Kënga magjike" që përfundoi mbrëmë në Tiranë.   Vendi i dytë i takoi këngëtarit Aleksandër Gjoka me këngën "Kuturu", kurse vendi i tretë këngëtares Albërie Hadërgjonaj, e cila prej vitesh jeton në Perëndim. Kësisioj ka marrë fund mbrëmë gara e ashpër mes 17 këngëtarëve, të nominuar për natën finale të edicionit të pestë të festivalit "Kënga magjike". Juria e këtij festivali përbëhej nga zonja dhe zonjusha.

  
Prezantimin e natës finale është bërë nga aktorja e njohur amerikane Brigit Nilsen, e cila ka përshëndetur këtë festival me një këngë hit të saj.

Ky ishte edicioni i pestë i Këngës Magjike, ku 39 këngëtarë shqiptarë që vinin nga Shqipëria, Kosova, Maqedonia, Holanda, Gjermania, etj., kanë interpretuar krijimet e tyre, e ku seleksionimi i natës finale ka qenë mjaft i vështirë. Janë dhënë edhe 16 çmime të tjera.

 

 

Në Suedi po mbahet Festivali i Poezisë dhe Muzikës Shqiptare

 

Malmë, 24 nëntor 2004 - Në Malmë të Suedisë sot po mbahet Festivali i Tretë i Poezisë dhe i Muzikës së Krijuesve Shqiptarë që jetojnë e veprojnë në shtetet skaninave.

 

Ky manifestim po mbahet në kuadër të shënimit të kremtave të Nëntorit në organizim të Rrethit të Shoqatave Shqiptare për Regjionin e Skones dhe tubon krijuesit nga Suedia, Danimarka dhe Norvegjia.

 

 

Rexhep Meidani rikthehet në garën për postin e kryetarit të PS-së

 

Tiranë, 24 nëntor 2004 - Pas sinjaleve që dha një javë më parë, për tërheqje të përkohshme nga kandidimi për kryetar, për shkak të pabarazisë në kushtet e garës, Rexhep Meidani ka vendosur që të shfrytëzojë të gjitha hapësirat, që i lejon rregullorja e kandidimit në fushatën elektorale, për postin e kreut të Partisë Socialiste.

 

Kjo është vendosur dje pasdite, pas një takimi të grupit të tij mbështetës, të cilët kanë rikonfirmuar sërish mbështetjen e tyre të fortë, për Meidanin si kandidat për kryetar partie.

 

Përveç mbështetjes në qendër, burime brenda grupit mbështetës, që udhëhiqet nga ish-kryeministri Meta, theksojnë se ka pasur sinjale dhe kërkesa nga socialistët e thjeshtë të bazës, për mbështetje të fortë edhe të Meidanit, gjë që e ka bërë ish-Presidentin më të vendosur për t´iu rikthyer garës së kandidimit.

 

 

Sali Berisha i bëri thirrje opozitës për protesta

 

Tiranë, 24 nëntor 2004 - Lideri i Partisa Demokratike dhe i opozitës në Shqipëri Sali Berisha u bëri thirrje qytetarëve të Tiranës që t'i bashkohen opozitës në protestën e saj që ajo do të zhvillojë sot në Sheshin Skënderbej të Tiranës për të denoncuar manipulimin e zgjedhjeve lokale në kryeqytet.

 

Për herë të parë Berisha do të jetë pa aleatët e tij të djathtë ndonëse organizatat rinore të spektrit të djathtë politik pritet t'i bashkohen protestave të Partisë Demokratike.

 

 

Qeveria maqedonase propozon miratimin e pakove të ligjeve për decentralizimin e pushtetit

 

Shkup, 24 nëntor 2004 - Qeveria maqedonase në gjysmën e parë të muajit dhjetor do t'i propozojë Parlamentit të Maqedonisë miratimin e pakove të ligjeve për decentralizimin e pushtetit, që sipas Qeverisë është pika e fundit për realizimin e Marrëveshjes së Ohrit, ka theksuar presidenti i Maqedonisë Boris Trajkovski.

 

Ndarja e re territoriale parasheh në Maqedoni të ketë 50 deri në 60 komuna ndryshe nga 120 sa funksionojnë aktualusht në këtë vend dhe pritet që pushteti lokal të marrë më shumë kompetenca.

 

Kufijtë e komunave do të përcaktohen sipas kriterieve të cilat janë në interes të qytetarëve e jo në bazë të kritereve politike. Një nga kriteret kryesore për formimin e komunave do të jetë edhe struktuara ndëretnike.

 

 

Prokuroria shqiptare ka nisur hetimet kundër një grupi trafikantësh të armëve, të arrestuar në Shkodër

 

Shkodër, 24 nëntor 2004 - Prokuroria shqiptare ka nisur hetimet kundër një grupi trafikantësh të armëve, të cilët u arrestuan një ditë më parë në qytetin e Shkodrës gjatë një operacioni të befasishëm policor.

 

Vëmendjen e specialistëve të hetimit e kanë tërhequr dy mina te telekomanduara, të cilat së bashku me disa armë dhe një sasi të madhe municioni luftarak u sekuestruan nga policia gjatë kontrollit që ajo bëri në banesat e dy trafikantëve menjëherë pas arrestimit të tyre.

 

Deri më tash, Prokuria e Shqipërisë nuk ka publikuar detajet rreth hetimeve që po kryhen në lidhje me këtë ngjarje, por vëmendjen e oponionit vendës e ka tërhequr fakti se në çfarë rruge kanë arritur të futen në territorin e Shqipërisë minat e telekomanduara dhe për çfarë do të përdoreshin ato.

 

 

Rifillon procesi gjyqësor për tre ish ushtarët gjermanë të KFOR-it

 

Darmstadt, 24 nëntor 2004 - Gjykata e Landit në Darmstadt ka filluar sërisht një proces për futje ilegale të armëve në Gjermani. Tre ushtarët gjermanë që janë akuzuar për futjen e armëve ilegale nga Kosova në Gjermani, ishin akuzuar ndërkohë nga një dhomë tjetër e gjyqit me heqje lirie disamujore për shkelje të ligjit të kontrollit të armëve të luftës.

Ushtarët ishin stacionuar në vitin 1999 si antarë të forcave të KFOR-it në Kosovë. Gjatë kësaj kohe ata kishin pasur urdhërin të zhduknin municionin, armët dhe bombat nga vendi ku ndodheshin.

 

Por dy prej tyre kanë sjellë një sasi të konsiderueshme me armë dhe municion në kazernën e Darmstadtit, Frankenstein. I treti, i cili ishte kryetar i kësaj njësie nuk e kundërshtoi veprimin e dy ushtarëve të tjerë. Gjykata e Landit e konsideroi pozitiv faktin se ushtarët i sollën armët në Gjermani për arsye trejnimi dhe u tregua më e butë me dënimet që u dha atyre.

 

 

Rrëzimi i helikopterit amerikan ishte një aksident

 

Shukhi, Afganistan 24 nëntor 2004 - Rrëzimi i një helikopteri amerikan në Afganistan, ku humbën jetën pesë ushtarë amerikane dhe u plagosën shtatë të tjerë, duket të ketë qenë aksident, thanë dëshmitarët të hënën, njofton Rojter.

Banorët në Shukhi, në provincën Kapis në veri të kryeqytetit Kabul, i thanë Rojterit se nuk kanë dëgjuar të shtëna dhe me gjasë kanë qenë problemet teknike të rrëzimit të helikopterit.

 

 

Aleanca e djathtë e opozitës është fituese në zgjedhjet parlamentare në Kroaci

 

Zagreb, 24 nëntor 2004 - Aleanca e djathtë e opozitës është fituese në zgjedhjet parlamentare në Kroaci. Pas numërimit të mbi 50% të votave, komisioni zgjedhor bëri të ditur sot në mëngjes se partia e djathtë Unioni Demokratik i Kroacisë (HDZ) dhe dy parti të tjera të koalicionit fituan 72 vende në parlament.

 

Partia social demokrate në qeveri arriti 65 vende nga 148 vendet në parlament. Kryetari i partisë HDZ Ivo Sanader ka deklaruar që dje se partia e tij do t'i fitonte zgjedhjet. Sipas tij, bisedat mes partnerëve të koalicionit mund të fillojnë që sot në mbrëmje.

 

Tema kryesore e fushatës elektorale ishte qëllimi i Kroacisë për t'u antarësuar në Bashkimin Evropian. Të dyja partitë e mëdha duan t´a cojnë Kroacinë në vitin 2007 në BE.

 

 

Bremer ka zhvilluar bisedime me këshillin qeveritar irakian për një kushtetutë të mundshme

 

Bagdad, 24 nëntor 2004 - Administratori amerikan civil Pol Bremer ka zhvilluar bisedime me këshillin qeveritar irakian për një kushtetutë të mundshme. Sipas një zëdhënësi amerikan, Bremer zhvilloi bisedime me përfaqësues të të gjithë popullit irakian.

 

SHBA-s shpresojnë të arrijnë formulimin e një kushtetute të përkohshme deri në shkurt të vitit të ardhshëm. Në këtë kushtetutë do të jetë përpiluar edhe një plan kohor për dhënien e pushtetit irakianëve si edhe për zgjedhje të lira për një parlament të përkohshëm.

 

Kushtetuta do të garantojë barazinë e të gjitha grupeve etnike dhe feve në vend dhe do t´u sigurojë të gjitha rajoneve autonomi në një masë të caktuar.

 

 

Në një konvikt studentor në Moskë 32 studentë të huaj kanë vdekur nga zjarri

 

Moskë, 24 nëntor 2004 - Prej një zjarri në një konvikt studentor në Moskë kanë vdekur 32 studentë të huaj dhe janë plagosur rëndë mbi 100 të tjerë. Sipas burimeve të agjencisë ruse të lajmeve Interfax, shumica e viktimave janë nga Kina, Bangladeshi, Vietmani dhe disa vende afrikane.

 

Sipas një zëdhënëseje të zjarrfikësve, tre kate të ndërtesës së shkollës së lartë për kuptim mes popujve Patris Lumumba u dogjën plotësisht.

 

 

Kryesia e Komunitetit Shqiptaro-Amerikan në Çikago morën pjesë në një tubim në mbështetje të gjeneralit Uesli Klark

 

Çikago, 24 nëntor 2004 - Të dielën në Çikako, kryesia e Komunitetit Shqiptaro-Amerikan dhe anëtarë të tjerë të këtij komuniteti, morën pjesë në një tubim në mbështetje të gjeneralit Uesli Klark (Wesley Clark), kandidat për president të Shteteve të Bashkuara të Amerikës në zgjedhjet 2004.

Në një atmosferë të këndshme, ku merrnin pjesë mbi 200 vetë, në mesin e tyre 30 shqiptarë, në ballë të hyrjes ishte vënë pllakati në të cilën shkruante: ALBANIANS FOR CLARK (Shqiptarët për Klarkun).

Kjo parullë i ra në sy gjeneralit dhe ai menjehere e filloi fjalimin e tij me Kosovën, për të cilën tha se edhe sot i dhemb zemra. Gjatë fjalimit, Klark shpalosi planin dhe programin e tij për President të Amerikës.

Në fund, ai duke u përshëndetur me të pranishmit, u ndal te delegacioni shqiptar dhe duke u përqafuar me kryetarin e komunitetit z.Ilaz Kadriu, deklaroi para masës së po të bëhet president i ShBA-ve, Kosova definitivisht do ta fitonte pavaresinë.

 

E tërë salla këtë e priti me duartrokotje. Delegacioni shqiptar u nda nga gjenerali Klark duke i uruar atij sukses në zgjedhjet 2004.

 

 

Gjeorgjianët festojë largimin e Shevarnaxes

 

Tbilisi, 24 nëntor 2004 - Presidenti gjeorgjian Eduard Shevardnaxe ka dhënë dorëheqjen e cila u pasua nga skena festimesh në kyeqytetin e vendit Tbilisi. Ai ra dakord të largohet nga posti, pasi u detyrua të largohet nga parlamenti ditën e shtunë, kur turma demostruesish pushtuan ndërtesën e parlamentit.

Mijëra vetë bërtisnin, gëzonin dhe kërceninin nëpër rrugët e kryeqytetit kur u njoftua dorëheqja e Shevernaxes. Kryetarja e Kuvendit, Nino Burjanaxe, është deklaruar presidente e përkohshme deri në mbajtjen e zgjedhjeve të reja pas dy muajsh.

Sekretari amerikan i shtetit Kolin Pauell i ka telefonuar zonjës Burjanaxe për t'i ofruar mbështetjen e Uashingtonit. Dorëheqja e z.Shevarnaxe u njoftua pas ndërmjetësimit të bërë nga Ministri i Jashtëm rus, Igor Ivanov.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |