Mitrovicë: Kryetari i KK, Faruk Spahija ka pritur komandantin e BSHVL-së, gjeneralin Barnard Ratel

Mitrovicë, 24 nëntor 2003 / Hysni Syla - Zyrtar për informim i KK - Kryetari i Kuvendit të Komunës, Faruk Spahija ka pritur komandantin e BSHVL-së, gjeneralin Barnard Ratel, me të cilin ka biseduar për situatën e sigurisë në komunë. Bashkëbiseduesit vlerësuan unanimisht se situata e sigurisë në komunën e Mitrovicës kohëve tw fundit është konsiliduar mjaftë dhe se ajo aktualisht është stabile.

Gjenerali Ratel e njoftoi kryetarin Spahija me përparimet që janë bërë në fushën e sigurisë, si rezultat i lehtësimeve që ka bërë BSHVL-ja me dorëzimin e kompetencave policisë së UNMIK-ut dhe SHPK-së për mbikqyrjen e urës kryesore mbi lumin Ibër, si dhe lehtësimeve tjera lidhur me lëvizjen e qytetarëve afër kazermës ku janë të vendosur ushtarët e KFOR-it.

Gjenerali Ratel, tha me këtë rast se përparimet në qarkullimin e lirë të të gjithë qytetrëve, në të dyja pjesët e qytetit, janë të dukshme. Komandanti i BSHVL-së gjenerali Ratel e njoftoi kryetarin Spahija se pas incidentit të paradoditshëm, kur disa shqiptarë u sulmuan nga një grup ekstremistësh serbë, ka qenë në pjesën veriore të qytetit dhe ka biseduar me liderët e atjeshëm serbë për t’ua bërë të qartë se nuk do të lejojë kurrfarë ekscesesh dhe askë tjetër të kujdeset për çështje të sigurisë, përveq policisë dhe KFOR-it.

Kryetari i Kuvendit të Komunës çmoi lartë kontributin e drejtpërdrejtë të gjeneralit Ratel për përparimet e arritura në fushën e sigurisë, duke i thënë atij se me këtë po iu tregon qytetarëve të komunës se implementimi i ligjit edhe në këtë fushë nuk ka alternativë.

Kryetari Spahija i ka premtuar gjeneralit Ratel se nuk do të mungojë angazhimi i strukturave komunale dhe subjekteve tjera për të rujatur këtë që është arritur dhe për të krijuar kushte edhe më të mira për lëvizje të lirë për të gjithë qytetarët e komunës.

Bashkëbiseduesit u dakorduan për të lëshuar për qarkullim të lirë edhe rrugën e Bajrit që kalon afër kazermavetw BSHVL-sw, si dhe apeluan tek qytetarët që gjatë festave të nëntorit të kenë kujdes dhe të mos e provokojnë me asgjë situatën e krijuar që u vlerësua si stabile.