Përmbajtja:

• Ish policët e Kosovës ndërprenë grevën

• U shënua 7-vjetori i vdekjes tragjike të veprimtarit të shquar prof.dr. Xhavit Ahmeti

• Kadare: Sa më të lirë që janë shqiptarët, aq më të lirë do të jenë edhe fqinjët tanë në Ballkan

• Të rinjtë e LDK-së nesër përkujtojnë 3-vjetorin e vrasjes së Xhemajl Mustafës

• Përfaqësuesi i UNDP-së thotë se 2004 duhet të jetë vit i zhvillimit ekonomik të Kosovës

• Edhe më tutje mbetet i bllokuar procesi i privatizimit

• PVD është për formimin e bllokut nacional

• Në Shqipëri janë shtuar masat e sigurisë në objektet qeveritare

• Policia dhe ushtria e Maqedonisë kanë shtuar masat e sigurisë në kufijtë e vendit

• Gafurr Adili është dënuar në Tiranë me shtatë muaj burg, kurse Taip Mustafa është liruar nga akuzat

• Kryeministri turk thotë se katër sulmuesit vetëvrasës ishin shtetas turq

• Të paktën 16 të vrarë nga shpërthimi i dy veturave bombë në një qytet në veri të Bagdadit

• Uashingtoni paralajmëron sulme të reja terroriste

• Presidenti Bush përfundon vizitën në Britani

• Një aeroplan i pasagjerëve është goditur mbi Bagdad, por pa pasoja

Ish policët e Kosovës ndërprenë grevën

 

Prishtinë, 21 nëntor 2003 - Ish policët e Kosovës, e ndërprenë grevën të filluar 30 ditë më parë, me kërkesën e vetme për kthim në vendet e punës. Vendimi për ndërprerjen e grevës është bazuar në premtimet që kanë dhënë kryeministri Bajram Rexhepi dhe kryeparlamentari Nexhat Daci, se çështja do të zgjidhet në të mirë të grevistëve, bëri të ditur kryetari i këshillit grevist, Nexhat Lalinovci.

 

Z.Lalinovci, paralajmëron se nëse premtimet e dhëna për integrim në Shërbimin Policor të Kosovës, nuk do të realizohen, ish policët serish do të futen në grevë.

 

 

U shënua 7-vjetori i vdekjes tragjike të veprimtarit të shquar prof.dr. Xhavit Ahmeti

 

Gjilan, 22 nëntor - Dje në vendlindjen e tij në Përlepnicë të Komunës së Gjilanit u shënua 7-vjetori i vdekjes tragjike të veprimtarit të shquar të çështjes kombëtare, Xhavit Ahmeti. Xhavit Ahmeti për shumë vite ka qenë këshilltar për arsim i Presidentit të Kosovës, Ibrahim Rugova. "Shtatë vite më herët, në rrugën e gjatë dhe të mundimshme të mbrotjes së pavarësisë së shkollës shqipe, në mënyrë tragjike përfundoi jetën e tij profesori Xhavit Ahmeti, i cili asokohe kryente detyrën e këshilltarit për arsim të presidentit Rugova dhe ishte deputet i Parlamentit të Kosovës. Sot, shtatë vite më vonë, kur një pjesë e idealeve të profesorit Xhavit Ahmeti janë realizuar, në vendlindjen e tij në Përlepnicë, u organizura një tubim përkujtimor, në të cilin pos familjarëve dhe qytetarëve të tjerë morën pjesë edhe përfaqësues të institucioneve e të strukturave politike komunale, udhëheqës të Zyrës së lartë të arsimit dhe të Drejtorisë së arsimit, deputetë të Parlamentit të Kosovës nga komuna e Gjilanit si dhe bashkëvendës të shumtë të tij.

 

Musa Kamberi, kryetar i nëndegës së LDK-së në Përlepnicë, tha se vdekja e dr. Xhavit Ahmetit ishte dhe mbetet një humbje e madhe jo vetëm për Univeristetin e Prishtinës, ku ai punoi, por edhe për shkencën dhe popullin shqiptar, në përgjithësi. Arsimi dhe pavarësia e Kosovës, ishin dy çështjet madhore, të cilat e preokuponin Xhavit Ahmetin dhe të cilave iu përkushtua me tërë kapacitetin e tij human e shkencor. Ai kishte besimin e plotë se sakrifica dhe lufta e shenjtë e popullit shqiptar të Kosovës do të kurorëzohet me liri dhe pavarësi, tha Kamberi.

Te Xhaviti, ne gjithnjë shihnim shembullin e njeriut të ditur e të ngritur, guximin intelektual, atdhedashurinë dhe vlera tjera të larta, të cilat i posedojnë vetëm njerëzit e formatit të tij.

 

Duke theksuar në fund se puna dhe vizioni i dr Xhavit Ahmetit do të mbeten një shembull i shkëlqyer për të sotmen dhe të ardhmen, Musa Kamberi përkujtoi me këtë rast edhe fjalët e profesor Ahmetit, i cili thoshte "Nëse i dëshironi të mirën Kosovës, asnjëherë mos pyetni se çfarë bëri Kosova për ju, por pyeteni veten se çfarë keni bërë ju për Kosovën".   Ndërkaq, Lirie Kajtazi, e cila foli në emër të komunës së Gjilanit, tha se "ndjejmë dhembje dhe krenari, bashkë, sepse shpalosim figurën e ndritshme të njeriut, i cili në shpirtin e tij kishte energji të jashtëzakonshme, të cilën e orientoi në funskion të çështjes së Kosovës dhe të arsimit shqip". Brezi që e njohu dhe bashkëjetoi me dr. Xhavit Ahmetin ka për obligim që ta shpalosë vazhdimisht para gjeneratave të ardhshme shembëlltyrën e intelektualit që diti jo vetëm ta kërkojë lirinë, por edhe të vihet në shërbim të saj, deri në momentin e fundit të jetës, tha ajo. Në fund të tubimit pëkujtimor, pranë lapidarit të përbashkët të prof. dr. Xhavit Ahmetit dhe Zija Shemsiut, në emër të qytetarëve të fshatit Përlepnicë, nëndegës së LDK-së dhe nëndegës së PDK-së të ketij fshati, u vënë kurora me lule. Ndërsa një delegacion i përbërë nga përfaqësuesit e fshatit Përlepnicë dhe Kuvendit Komunal të Gjilanit, vunë kurora me lule dhe bënë nderime edhe te varri i tij në Prishtinë.

   

  

Kadare: Sa më të lirë që janë shqiptarët, aq më të lirë do të jenë edhe fqinjët tanë në Ballkan

 

Prishtinë, 22 nëntor - Universiteti i Prishtinës dje në një mbledhje solemne nderoi me çmimin "Doctor Honoris Causa" (Doktor Nderi) shkrimtarin e madh të letërsisë shqipe Ismail Kadare.   Në këtë ceremoni morën pjesë presidenti Ibrahim Rugova, kryeadministratori Hari Holkeri si dhe personalitete të shquara të jetës politike dhe shoqërore të Kosovës. Për veprën dhe figurën prej shikrimtari folën Dr. Agim Vinca dhe studiuesi gjerman Ralf Kodriç.

 

Ismail Kadare çmimin e lartë akademik të Universitetit të Prishtinës e cilësoi si nderin më të madh që i është bërë ndojnëherë.

Në fillim të fjalës së tij tha se është i prekur ngaqë merr titullin nga Universiteti që ka qenë ndër të rrallët në kohët moderne, siç tha ai, një universitet vatër e diturisë dhe vatër e lirisë.

Kadare më tutje tha: "Kultura shqiptare dhe në përgjithësi kultura shqiptare në Kosovë, janë të lidhura në mënyrë të pazgjidhshme me lirinë.

 

Liria shqiptare është sot pjesë e ndërgjegjes dhe e lirisë evropiane. Liria e kombit shqiptar dhe ajo kryesisht këtu në Kosovë nuk është as penguese as bezdisëse për lirinë e popujve që janë rrotull nesh, të fqinjëve tanë.

 

Përkundrazi sa më të lirë që janë shqiptarët aq më të lirë do të jenë edhe fqinjët tanë në Ballkan", tha Ismail Kadare, pas marrjes së titullit "Doctor Honoris Causa".

Me pak fjalë Kadare u ndal për të shprehur mendimin e tij përkitazi me aktualitetin e shqiptarëve sot karshi fqinjësisë. Në mënyrë të ndërsjellë, ai tha se "sa më të hapur të jenë popujt e Ballkanit rrotull nesh, aq më të lirë do të jemi edhe ne".

 

Sipas tij, në Ballkan ka filluar një epokë e re. "Ndoshta jemi shumë afër ekranit të ngjarjeve dhe nuk i kapim dot përmasat e vërteta të kësaj ere të re, të kësaj fryme të re, të kësaj epoke të re", tha Kadare.

"Kemi arsye që të jemi optimistë që në këtë botë të trazuar, në këtë planet që sot është më i trazuar se kurrë, gadishulli ynë i trazuar dalëngadalë nuk do t'i shkaktojë më telashe dhe trazim botës", u shpreh Kadare, duke shtuar se pas një armiqësimi të gjatë të popujve ata edhe mund të afrohen dhe mund të bashkëjetojnë për të hyrë bashkërisht në familjen evropiane.

"Liria e kombit shqiptar dhe ajo kryesisht këtu në Kosovë, nuk është as penguese as bezdisëse për lirinë e popujve që janë rrotull nesh, të fqinëjve tanë.

 

Përkundrazi, sa më të lirë që janë shqiptarët, aq më të lirë do të jenë edhe fqinjët tanë në Ballkan", - tha shkrimtari i madh shqiptar Ismail Kadare, pas marrjes së titullit ADoctor Honoris Causa".

 

 

Të rinjtë e LDK-së nesër përkujtojnë 3-vjetorin e vrasjes së Xhemajl Mustafës

 

Prishtinë, 22 nëntor - Kryesitë e degëve të Forumit të Rinisë të LDK-së në Prishtinë, nesër do ta përkujtojnë ish-këshilltarin e Presidentit Ibrahim Rugova, Xhemail Mustafa, në trevjetorin e vrasjes së tij.

Përkujtimi do të bëhet me parakalimin e organizuar nga selia e LDK-së, ku do të bëhet nisja në orën 14:40 nepër qendër të qytetit, në mënyrë që në orën 15:05, në vendin e vrasjes së tij në lagjen "Dardania" të vendosen kurora me lule dhe do të ndizen qirinj në shenjë përkujtimi për Xhemajl Mustafën.

 

 

Përfaqësuesi i UNDP-së thotë se 2004 duhet të jetë vit i zhvillimit ekonomik të Kosovës

 

Prishtinë, 22 nëntor - Viti 2004 duhet të jetë vit i zhvillimit ekonomik të Kosovës, tha zyrtari i lartë i Programit për Zhvillim të OKB-së për Evropën Kalman Micei. Pas takimeve me presidentin e Kosovës Ibrahim Rugova, kryeministrin Bajram Rexhepi dhe kryeparlamentarin Nexhat Daci, ai theksoi me këtë rast se UNDP-ja do të jetë partner afatgjatë për zhvillimin e Kosovës.

Asistenti i administratorit rajonal të UNDP-së për Evropën Kalman Micei tha se vëmendja do të përqëndrohet tek ulja e shkallës së papunësisë, por edhe në mbështetjen e bizneseve të vogla, si dhe kthimin e të zhvendosurve. Ai shtoi se duhet krijuar klimë të përshtatshme për investime. Megjithkëtë ai ka porositur edhe insitutucionet e vendit që të përmirësojnë e përcaktojnë qartë politikat ekonomike.

 

 

Edhe më tutje mbetet i bllokuar procesi i privatizimit

 

Prishtinë, 22 nëntor - Ndonëse gjatë ditës së djeshme u zhvilluan diskutime intensive ndërmjet përfaqësusve ndërkombëtarë dhe atyre vendorë, nuk është arritur pajtimi që të zhbllokohet procesi i privatizimit në Kosovë. U tha se bisedimet për këtë çështje do të vazhdojnë në javën që vjenë.

 

Qeveria e Kosovës kërkon që procesi të vazhdojë menjëherë dhe të shpallen të pavlefshme ligjet diskriminuese të Serbisë, ndërkaq zyrtarët e UNMIK-ut thonë se ky vendim nuk mund të merret në Prishtinë.

 

Megjithatë, në takimet e veçanta të Qeverisë së Kosovës dhe të Agjencisë së Mirëbesimi të Kosovës, janë shënuar përafrim i qëndrimeve ndërmjet përfaqësuesve ndërkombëtarë dhe vendor, por ende ka kundërthënie, të cilat pritet të sqarohen në fillim të javës së ardhshme.

 

Ndërkohë Qeveria e Kosovës dje mori disa qëndrime ku kërkohet që tenderët për raundin e tretë të privatizimit të shpallen para fundit të këtij viti.

Kryetari i Bordit të AKM-së, e cila është përgjegjëse për proivatizimin, Nikolas Lambsdorf tha se ky proces është shqyrtuar në detaje në bazë të udhëzimeve nga Nju-Jorku, mirëpo bisedimet me qeverinë do të vazhdojnë edhe ditën e hënë, ku shpresohet që procesi do të zhbllokohet.

 

Sipas tij, udhëzimet që kanë ardhur nga Nju-Jorku kanë ndryshuar situatën dhe nuk është çështja se këtu në Prishtinë nuk është arritur pajtimi. Sipas këtij këto udhëzime shpjegojnë qartë se procesi i privatizimit ka bazë ligjore dhe nuk është nevoja të ndërrohen ligjet.

 

Po ashtu tha se nuk është nevoja që të ndryshohen as rregulloret e AKM-së, por duhet të punohet në politikat operacionale, që do të thotë rishqyrtim të secilës ndërmarrje veç e veç.

 

 

PVD është për formimin e bllokut nacional

 

Preshevë, 22 nëntor - Partia për Veprim Demokratik (PVD) me seli në Preshevë e ka vlerësuar të dëmshëm mosgatishmërinë e parlamentit të shkarkuar serb për të ndryshuar ligjin zgjedhor. Anda PVD, në kushte të rregullave ligjore diskriminuese, e sheh si akt të arsyeshëm iniciativën për formimin e bllokut nacional si e vetmja mundësi për realizimin e të drejtës për përfaqësim në parlamentin e Serbisë.

Mirëpo, PVD vlerëson se do të ishte kontraproduktiv vendimi për dalje në këto zgjedhje pa përfshirje më të gjerë të subjekteve politike që i tubojnë pakicat kombëtare.

PVD thotë se do të fillojnë përgatitjet për themelimin e Këshillit Nacional meqë u konstatua se me ndryshimet dhe plotësimet e Statutit të komunës së Medvegjës janë eliminuar pengesat e gjertanishme për pjesëmarrjen e këshilltarëve shqiptarë nga kjo komunë në Kuvendin e elektorëve të shqiptarëve të Luginës së Preshevës, thuhet në një komunikatë të PVD-së.

 

 

Në Shqipëri janë shtuar masat e sigurisë në objektet qeveritare

 

Tiranë, 22 nëntor - Në Shqipëri janë shtuar masat e sigurisë në objektet qeveritare. Një numër i madh i policëve dhe gardianëve të sigurimit janë vendosur rreth ambasadave dhe institucioneve qendrore. Në veprim i tillë preventi është ndërrmarë pas shpërthimeve në Stamboll dhe sulmeve të shumta terroriste në botë.

 

 

Policia dhe ushtria e Maqedonisë kanë shtuar masat e sigurisë në kufijtë e vendit

 

Shkup, 22 nëntor - Policia dhe ushtria e Maqedonisë kanë shtuar masat e sigurisë në kufijt e vendit, ndërkaq do të shtohet edhe siguria e ambasadave të huaja në Shkup, kanë paralajmëruar Ministria e Brendshme dhe ajo e Mbrojtjes. Zëdhënësja e policisë Marija Kontevska tha se këto masa ndërmerren përkundër njoftimeve se në Maqedoni ka prani të "Al Kaides".

 

 

Gafurr Adili është dënuar në Tiranë me shtatë muaj burg, kurse Taip Mustafa është liruar nga akuzat

 

Tiranë, 22 nëntor - Lideri i Organizatës "Armata Kombëtare Shqiptare, Gafurr Adili është dënuar në Tiranë me shtatë muaj burg për shkak të përhapjes së urrejtjes ndëretnike në vendet e Ballkanit. Pas shpalljes së aktvendimit, njoftohet se Adili është lëshuar sepse kohën e caktuar e kishte kaluar në paraburgim. I arrestuari tjetër Taip Mustafa është liruar nga të gjitha akuzat.

 

 

Kryeministri turk thotë se katër sulmuesit vetëvrasës ishin shtetas turq

 

Stamboll, 22 nëntor - Kryeministri turk Taip Erdogan thotë se katër sulmuesit vetëvrasës, të cilët gjatë ditëve të kaluar vranë 50 vetë, ishin shtetas turq. Duke folur në ceremoninë e varrimit të dy policëve të vrarë turq në shpërthimin e së enjtës, Erdogan tha se Turqia është e turpëruar me faktin se sulmet terroriste i kryen qytetarët e saj.

Policia turke deri më tash ka arrestuar rreth 20 vetë të dyshuar për pjesëmarrje në këto sulme terroriste.

 

 

Të paktën 16 të vrarë nga shpërthimi i dy veturave bombë në një qytet në veri të Bagdadit

 

Bakuba/Irak, 22 nëntor - Nga shpërthimi i dy veturave bombë janë vrarë të pakatën 16 vetë, shumica prej tyre policë amerikanë dhe irakianë, njofton AP, duke cituar zyrtarët. Me atë rast është vrarë edhe një vazjë 5-vjeçare.

Shpërthimi ka ndodhur sot rreth orës 8.00 të mëngjesit sipas kohës lokale nga një sulmues vetëvrasës para stacionit policor në qytetin Bakuba, 65 km në veri të Bagdadit. Poashtu janë plagosur 10 civilë.

 

 

Uashingtoni paralajmëron sulme të reja terroriste

 

Uashington, 22 nëntor - Shtetet e Bashkuara kanë lëshuar një paralajmërim në shkallë botërore lidhur me rrezikun e sulmeve të tjera terroriste.

 

Pas katër sulmeve me bomba në Stamboll javën e kaluar, departamenti i Shtetit thotë se janë shtuar gjasat që militantë të Al-Kaedës të përgatisin sulme kundër interesave amerikane në botë.

Autoritetet amerikane kanë paralajmëruar se sulemet e ardhshme të Al-Kaedës mund të jenë më shkatërruese se ato të 11 shtatorit në Amerikë.

Ky është paralajmërimi më i fundit i Departamentit të Shtetit për terrorizmin nga jashtë, megjithatë qeveria amerikane nuk e ka rritur nivelin e vigjilencës brenda SHBA-së.

 

 

Presidenti Bush përfundon vizitën në Britani

 

Londër, 22 nëntor - Presidenti amerikan Xhorxh Bush dhe Kryeministri britanik, Toni Bler, u zotuan përsëri se do ta mposhtin terrorizmin global. Presidenti amerikan i dha fund dje vizitës shtetërore triditëshe në Britani.

Para se të nisej për në atdhe, Presidenti Bush u tha studentëve të një shkolle në qytetin e lindjes së zotit Blair, Sedgefield, në pjesën verilindore të Anglisë, se Shtetet e Bashkuara dhe Britania kanë një punë për të bërë, të mposhtin terrorizmin global.

Kryeministri Bler theksoi forcimin e vazhdueshëm të aleancës amerikano britanike. Ai vuri në dukje se këto dy vende nuk do të frikësohen nga kërcënimet e sulmeve terroriste dhe theksoi se e vetmja përgjigje ndaj kërcënimit kundër lirisë është lufta.

 

Kjo ndalesë u dha të dy udhëheqësve rastin të shqyrtonin çështje botërore, si terrorizmin dhe luftën në Irak, në një mjedis më pak zyrtar, pas dy ditë bisedimesh zyrtare dhe ceremonive shtetërore në Londër.

 

 

Një aeroplan i pasagjerëve është goditur mbi Bagdad, por pa pasoja

 

Bagdad, 22 nëntor - Një aeroplan i pasagjerëve është goditur mbi aeroportin e Bagdadit me një raketë, por ka arritur të ulet i sigurt. Viktima nuk ka pasur.

Zëdhënësi i ushtrisë amerikane konfirmoi se një aeroplani civil kishte kërkuar uljen e jashtëzakonshme në aeroport.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |