Thekse nga intervista e Kryetarit Agim Veliu dhënë gazetës së përditshme “Zëri”

Thekse nga intervista e Kryetarit Agim Veliu dhënë gazetës së përditshme “Zëri” – 21 nëntor 2003



Ka qenë një periudhë më e vështirë e funksionimit të pushtetit lokal në Podujevë, dhe në këtë rast së pari dua ta bëj një korrigjim se ajo zvarritje e konstituimit të Qeverisë nuk ka qenë në kohëzgjatje që është dhënë në mjetet e informimit sepse Shërbimi civil i komunës ka pasur kontrata deri në fund të prillit të këtij viti dhe nga ky muaj ka skaduar afati i kontratës për të gjithë në bazë të vendimit të Kuvendit komunal. Pastaj KK pa zvarritje i ka filluar procedurat e nevojshme për emërimin e ekzekutivit të ri ku edhe lindën disa probleme që kanë zgjatur një kohë. Mirëpo edhe gjatë kësaj periudhe sa ne kemi bërë përpjekje ta ndërtojmë pushtetin e ri lokal që në fakt nuk kemi qenë pa pushtet sepse ka qenë një Bord i Drejtorëve me ushtrues të detyrave dhe kjo është bërë me qëllim që t’ju ofrohet mundësi e barabartë të gjithë atyre që do të konkuronin për poste të rëndësishme në komunën e Podujevës dhe gjatë kësaj kohe ka funksionuar Ekzekutivi i komunës së Podujevës, ndoshta me disa lëshime, por unë mendoj se ka funksionuar mirë.


Gjatë periudhës 10 mujore janë realizuar projekte në vlerë 8.5 milion euro

Në pyetjen se gjatë kësaj kohe a ka pasur ngecje në realizimin e projekteve dhe në cilat sfera konkretisht, z. Veliu me plot përgjegjësi u përgjigj se komuna e Podujevës nuk ka ngecur në asnjë sferë në realizimin e projekteve në interes të qytetarëve, por përkundrazi, kjo periudhë e këtij viti është më e suksesshmja në realizimin e projekteve për komunën e Podujevës për çka edhe opinioni është njoftuar me kohë nga ju gazetarët. z. Veliu e ilustroi këtë me fakte duke përmendur projekte të rëndësishme në infrastrukturë të realizuara në qytet dhe fshatra që kapin vlerën e mbi 8.5 milion euro të investuara nga komuna, donatorët dhe komuniteti.

Gjatë tri viteve të shkuara administrata komunale e Podujevës u ka dalë në shërbim qytetarëve të saj, përkundër disa vështirësive në punën e administratës. Ne jemi këtu që t’u ofrojmë shërbime të shpejta dhe azhure të gjithë qytetarëve të komunës sonë dhe besoj se në shumicën e rasteve administrata komunale këtë edhe e ka arritur, por nuk do të thotë që nuk ka pasur edhe mangësi. Në të ardhmen kjo do të shkojë kah përmirësimi, tha z. Veliu duke shtuar se një rol të madh këtu e luajnë edhe vetë qytetarët sepse komuna është servis për qytetarët dhe ajo do t’u ofrojë shërbime cilësore qytetarëve nëse ata i kryejnë obligimet ndaj komunës.


Kushtëzimi i pagesës së tatimit në pronë është treguar i suksesshëm

Sa i përket sukesit të një komune apo Qeverie komunale kjo varet edhe nga buxheti i saj e dihet që komunat e Kosovës kanë buxhete simbolike. Kryesisht janë dy burime për formimin e buxheteve komunale, është granti që vjen nga buxheti i Kosovës dhe nga të hyrat vetanake. Sa i përket të hyrave vetanake ne në komunën e Podujevës nuk mund të jemi të kënaqur me realizimin e tyre, në veçanti ngecin të hyrat që vijnë nga tatimi në pronë. Qytetarët duhet ta dijnë se tatimi në pronë është e hyrë ekskluzive komunale e cila qytetarëve u kthehet përmes investimeve në infrastrukturë dhe përmirësim të jetës. Me qëllim të rritjes së inkasimit të të hyrave nga tatimi në pronë komuna ka marrë vendim për kushtëzimin e dhënies së dokumenteve për qytetarët që nuk e kanë kryer këtë obligim dhe ky kushtëzim ka efektet e veta dhe shpresojmë që deri në fund të vitit do të bëhet një inkasim i konsiderueshëm i këtyre mjeteve. Kushtëzimi nuk është formë adekuate as e pëlqyeshme, por është e mundshme dhe u tregua i suksesshëm, por nga këto obligime janë të liruara të gjitha rastet e rënda sociale. Fundja komuna nuk mund të ofrojë shërbime cilësore nëse qytetarët nuk i kryejnë obligimet e veta ndaj komunës.

Në lidhje me rolin e opozitës në Kuvendin komunal z. Veliu tha se në disa periudha roli i saj ka qenë konstruktiv, kurse në disa periudha roli i një pjese të opozitës nuk ka qenë në nivelin e duhur. Mirëpo përgjithësisht roli i opozitës ka qenë konstruktiv. Mund të them se ne ende jemi në fillet e sistemeve demokartike dhe ende kemi kohë për të mësuar me jetën plurale dhe shumësinë e mendimeve dhe dallimeve në opinione.

Komuna e Podujevës nga lufta ka dalë një ndër më të shkatërruarat, me viktima në njerëz dhe shkatërrime të mëdha, tha z. Veliu duke shtuar se një numër i madh i njerëzve kanë mbetur pa më të dashurit e tyre dhe pa kulm mbi kokë. Por mund të them se gjatë kësaj periudhe së pasluftës se në komunën e Podujevës është bërë mjaft në sanimin e pasojave të luftës duke falënderuar organizatat e ndryshme humanitare që kanë ndihmuar në rindërtimin e shtëpive. Sipas z. Veliu me punën e ndërkombëtarëve dhe të vendorëve, kujtoj se çështja e strehimit është zgjedhur në masë të madhe. Ne nuk e kemi zgjedhur në tërësi problemin e strehimit, por mund të them se jemi të kënaqur me të arriturat e deritashme.

Ndërsa në pyetjen se a ka ende familje që jetojnë në tenda. Z. Veliu u përgjigj se nuk disponon me ndonjë informatë që ndonjë familje jeton në tenda në komunën tonë, por mund të ketë familje që nuk e kanë të zgjedhur çështjen e banimit por ata janë të strehuar përkohësisht. Më duhet të theksoj se këtë vit komuna e Podujevës nuk është përfshirë me ndonjë program të rindërtimit të shtëpive, por ajo do të përpiqet që me mundësitë e veta të ndihmojë sepse gjithnjë janë prezente nevojat për strehim. Një rol modest në zbutjen e problemeve sociale e ka luajtur edhe Drejtoria për shëndetësi dhe politikë sociale duke u dalur në ndihmë skamnorëve me gjëra ushqimore, mjete higjienike dhe lëndë djegëse kategorive më të rrezikuara përkundër mundësive të kufizuara që ka komuna.

* Intrevistën e zhvilloi reporteri i “Zëri” nga Podujeva Fadil Halimi