Kronikë nga Podujeva

Kronikë nga Podujeva


KFOR-i apelon vozitësit që rrezikojnë qytetarët dhe personat për armëmbajtje pa leje


Majori Parimuha njoftoi se gjatë ndalimit të automjeteve po hasin në posedim të armëve me e pa leje, mirëpo sipas tij arma nuk mund të mbahte në automjete edhe po qe se personi posedon lejen. “Në tri raste kemi hasur në armë gjuetie, për të cilat personat nuk kishin leje as për armë e ka ndodhur edhe pa dokumente p¡r vozitje”, tha Parimuha duke përmendur se vetëm në një automjet janë gjetur dy armë ilegale.

Sipas zv. komandantit Parimuha sezona e gjuetisë ka përfunduar dje dhe se KFOR-i nuk do të tolerojë gjuetarët nëse vazhdojnë gjuatjen pas kësaj periudhe. Një brengë tjetër që z. Parimuha e shpreu ishte vozitja e shpejtë e vendorëve që rrezikon sigurinë e qytetarëve, në veçanti fëmijëve por edhe të KFOR-it, SHPK-së dhe policisë së UNMIK-ut. Prandaj apeloi vozitësit që të kenë kujdes sepse tashmë ka mjegull dhe ngrica e edhe rrugë të papërshtatshme.

Ai apeloi poashtu qytetarët që të kenë kujdes me fëmijët që po gjuajnë petarda dhe kështu po shqetësojnë qytetarët. “Mirëpo një rol të veçantë, pos policisë, e kanë edhe prindërit dhe shkollat ku duhet tu sqarohet nxënësve për rrezikun nga përdorimi i atyre mjeteve”, tha në fund zv. komandanti Jan Parimuha.


Pronari i “Lesna” Adem Deshishku ndihmon skamnorët me dyer dhe dritare

Podujevë, 21 nëntor 2003 (TN)- Në pamundësi që të bëhet më shumë viti 2003 ka shtuar numrin e familjeve që kanë problem të madh strehimin, tha sot shefi për strehim i Drejtorisë për shëndetësi dhe politikë sociale (DSHPS) Ruzhdi Dema. Sipas raporti të DSHPS problemin e strehimit e rëndon fakti se në kohën e emergjencës një numër i konsiderueshëm i shtëpive të ndërtuara dhe meremetuara kanë mbetur të pa përfunduara.

Por z. Dema tha se është arritur që të identifikohen dhe të vizitohen gati të gjitha rastet që kanë probleme me strehimin. “Komuna ka bërë përpjekje që rasteve më urgjente t` u bëhet zgjedhje dhe prioritet çdo herë u është dhënë familjeve me jetimë ku gruaja është kryefamiljare, familjeve me anëtarë hendikep, familjeve më me shumë anëtarë dhe atyre që varen nga asistenca sociale”, deklaroi Dema.

Nga këto kategori, këtë vit në Lagjen e re në Ballofc janë vendosur 9 familje, kurse në bashkëpunim me Drejtorinë për çështje pronsoro-banesore (HABITAT) u është ofruar strehim 4 familjeve. Sipas z. Ruzhdi Dema, 2 familje janë vendosur në objekte shoqërore, 5 tjera në familje tjera dhe 10 familjeve u janë ofruar lëndë për kulm nga pishat e prera gjatë realizimit të projektit të ndërtimit të trafos së re.

“Është për tu theksuar solidariteti dhe humanizmi i njerëzve që shpeshëherë u dalin në ndihmë skamnorëve”, pohoi Dema duke veçuar pronarin e “Lesna” Adem Deshishku, i cili këto ditë për familje nevojtare, Komunës i ofroi 50 dyer dhe afro 20 dritare për t’u dalë në ndihmë familjeve në nevojë.

Në Lagjen Kuvajtiane në Ballofc do të vendosen 6 familje tjera sipas listës prioritare të Komitetit komunal të strehimit, njoftoi z. Dema.


Podujevë: I arrestuari nga ushtria serbe Arben Beqiri lirohet sot

Podujevë, 21 nëntor 2003 (TN) – Djali im Arbeni (20) i cili ishte arrestuar para disa ditëve në fshatin Boroc, 200 m larg kufirit Kosovë-Serbi, lirohet sot, ka njoftuar nëna e tij Vahidja duke u thirrur në bisedën telefonike që kishte me të birin.

Sipas familjarëve që kanë kontaktuar me organet gjyqësore të Prokuples, Arbeni do t’u dorëzohet familjes sot rreth orës 12.00 në pikën kufitare G-3 në Merdarë. “Djali na tha se nuk është keqtrajtuar dhe se është mbajtur në burgun e Prokuples”, tha nëna e tij Vahide Beqiri.

Aren Beqiri nga Podujeva dhe Rrahim Kajtazi (17) nga Podujeva janë arrestuar më 12 nëntor nga ushtria serbe afër pikës kufitare G-3. Rrahimi qe liruar menjëherë si i mitur kurse Arbeni në senacën gjyqësore në Kushumli ishte dënuar me 10 ditë burg.