Përmbajtja:

• Presidenti Rugova priti Miss Kosova 2003

• Sot u përurua "Qendra e re amerikane" pranë Bibliotekës Kombëtare dhe Universitare në Prishtinë

• Skender Hyseni, këshilltar i Presidentit Rugova, qëndroi për vizitë zyrtare në Kanada

• Kuvendi i Kosovës miratoi ligjin për sportin dhe projektligjin për transportin rrugor

• U nënshkrua Memorandumi për mbrojtjen e të drejtave të fëmijëve

• Kadare: Ky titull nderi i Universitetit të Prishtinës ka për mua një rëndësi të veçantë morale

• Qeveria e Kosovës kërkon që procesi i privatizimit të vazhdojë menjëherë

• KFOR-i njofton për fillimin e ushtrimeve rezervë të NATO-s me kodin "Niveli i parë"

• Ndërkombëtarët në Mitrovicë sjellin rregulla të reja në komunikimin me gazetarët

• Shënimi i 95-vjetori të Kongresit të Manastirit u mbyll me provomimin e dy veprave të Ismail Kadaresë

• Dëshmia e ish-komandantit të NATO-së, Uesli Klark në procesin kundër Millosheviqit nuk do të jetë publike

• Gjykata e Kumanovës ka dënuar dy shqiptarë me nga 10 vjet burg të akuzuar për terrorizëm

• BE ka caktuar një diplomat danez në postin e të dërguarit të posaçëm në Maqedoni

• Krimi i organizuar mund të marrë kontrollin në Shqipëri nëse politikanët nuk presin lidhjet me kriminelët

• Arrin në 25 numri i vrarëve në dy shpërthimet e sotme në Stamboll

• Të paktën 15 janë vrarë dhe 320 të plagosur në dy shpërthimet që ndodhën sot në Stmaboll

• Dhjetë të vrarë në Stamboll nga pesë shpërthime

• Një vetëvrasës me bombë ka vrarë tre vetë në qytetin Kirkuk në veri të Irakut

• Të paktën dy vetë janë vrarë dhe 12 të tjerë janë plagosur

• Bush dhe Bler takohen sot zyrtarisht

• Bush në Londër mbrojti luftën në Irak

• Muri izraelit mund të dëmtojë bizedimet e paqes në Lindjen e Mesme

• 10 milionë dollarë për kapjen e ndihmësit kryesor të Sadam Huseinit

Presidenti Rugova priti Miss Kosova 2003

 

Prishtinë, 20 nëntor 2003 - Presidenti i Kosovës Ibrahim Rugova priti sot Angesa Vuthajt, Miss Kosova 2003, e cila me këtë titull u nderua në një spektakël që u organizua ditë më parë në Prishtinë. Presideti Rugova, pasi e përuroi zonjushën Agnesa Vuthaj për titullin e vajzës më të bukur të Kosovës për vitin 2003, i uroi asaj suksese në garat e mëtejshme të bukurisë në konkurrencën ndërkombëtare dhe ta përfaqësojë në mënyrë të denjë Kosovën.   Presidenti me këtë rast Miss Kosova 2003 i dhuroi një dhuratë modeste.

   

 

Sot u përurua "Qendra e re amerikane" pranë Bibliotekës Kombëtare dhe Universitare në Prishtinë

 

Prishtinë, 20 nëntor 2003 - Në kuadër të Bibliotekës Kombëtare dhe Universitare të Prishtinës, sot u bë hapja solemne "Qendrës së re amerikane", në të cilën morën pjesë Presidenti i Kosovës Ibrahim Rugova, ministri i Arsimit Rexhep Osmani dhe të tjerë.

 

Me këtë rast Presidenti Rugova përshëndeti hapjen e kësaj qendre, duke thënë se kjo është edhe një shtyllë e fortë në ndërtimin e lidhjeve dhe miqësisë permanente me SHBA-të.

Duke përuruar këtë qendër, zonja Marsi Ris, shefe e Zyrës amerikane në Prishtinë, tha se hapja e kësaj qendre pranë Universitetit të Prishtinës është edhe një hap përpara drejt vazhdimësisë së përkrahjes amerikane për arsimin e lartë në Kosovë.

 

"Tashmë ne jemi duke përkrahur shkëmbimet universitare pranë Universitetit të Prishtinës, bursat shkollore, bursat pasuniversitare, dhe grante për hulumtime shkencore për të studijuar në SHBA-të ashtu si edhe zhvillimin e planëprogrameve dhe mësimin e gjuhës Angleze së bashku me ministrinë e Arsimit", theksoi zonja Ris.

 

Ajo shtoi se "Qendra amerikane" do të ofrojë qasje në numër të madh të burimeve të shkëlqyeshme informative për studentët, fakultetet dhe stafin e Universitetit të Prishtinës.

Zonja Ris shprehu kënaqësinë që kjo qendër do të jetë partner me Ministrinë e Arsimit dhe Bibliotekën Universitare dhe Kombëtare për të jetësuar dhe për ta bërë realitet këtë projekt për shumë njerëz në Universitetin e Prishtinës.

Ideja pë Qendrën amerikane është propozuar së pari nga Ibrahim Gashi, drejtor i Qendrës Këshilldhënëse Studentore amerikane pranë Bibliotekës Kombëtare dhe Universitare. Z. Gashi shpjegoi se Qendra do të ketë në gjirin e saj edhe Qendrën Këshilldhënëse Studentore, Koleksionin apo pjesën e ndarë të librave amerikanë, Qendrën kompjuterike për testime dhe hapësirën për seminare të vogla dhe ligjërime.

Një kontribut fillestar me rreth 500 libra i është dhënë Qendrës nga gazeta "Fort Worth Star-Telegram" në Teksas.

   

 

Skender Hyseni, këshilltar i Presidentit Rugova, qëndroi për vizitë zyrtare në Kanada

 

Otavë, 20 nëntor 2003 - Skender Hyseni, këshilltar kryesor i Presidentit të Kosovës Ibrahim Rugova, përfundoi të mërkurën një vizitë zyrtare në Toronto dhe Otava. Vizita u organizua nga Qendra për Studime Ruse dhe Evropiane-Jugore në Universitetin e Torontos dhe Departamenti i Kanadasë për Punë të Jashtme dhe Tregti Ndërkombëtare.

Z. Skender Hyseni takoi fillimisht aktivistët e komunitetit kosovar në Toronto. Ai pastaj ka mbajtur një fjalë para studentëve dhe studiuesve në Universitetin e Torontos.

Ligjërata e këshilltarit të Presidentit Rugova ofroi një vlerësim të katër viteve të kaluara në Kosovë si dhe të rrugës që ka vendi ynë përpara. Një numër studiuesish u shtruan pastaj në diskutim të hapur me zotin Hyseni.

 

Ai u përqëndrua në arritjet e konsiderueshme që janë bërë në Kosovë që nga intervenimi i NATO-s në vitin 1999. Ai shpjegoi dhe elaboroi për nevojën që të sigurohet pavarësia e Kosova në mënyrë që të mundësohet zgjidhja e çështjeve parësore me të cilat ballafaqohet vendi ynë.

Duke iu referuar deklaratave të këtyre kohëve të fundit që ka bërë z. Mark Grosman [Marc Grossman], nënsekretar amerikan i Shtetit, Skender Hyseni tha se rruga që kemi përpara është më e qartë.

Në Toronto, z. Hyseni u takua poashtu gjatë një darke pune me studentë pasuniversitarë të Universitetit të Torontos, fusha e interesimit e të cilëve është rajoni i Evropës Juglindore.

Programi zyrtar i vizitës së këshilltarit të Presidentit Rugova në Otava filloi të mërkurën, më 19 nëntor, me takime me zyrtarë të lartë nga Divizioni për Evropë Juglindore i Departmantit për Punë të Jashtme të Kanadasë.

 

Pas këtij takimi, u organizua një tryezë e rrumbullakët, nikoqir i së cilës ishte z. Deivid Preston [David Preston], drejtor i përgjithshëm i Byrosë për Evropën Qendrore, Lindore dhe Juglindore në Departamentin për Punë të Jashtme dhe Tregti Ndërkombëtare të Kanadasë. Në tryezë merrnin pjesë zyrtarë të lartë nga Departamenti i Punëve të Jashtme, nga Agjencia Kanadeze për Zhvillim Ndërkombëtar si dhe biznesi kanadez.

Z. Skender Hyseni përvijoi gjendjen e përgjithshme në Kosovë dhe foli për aktivitetet kanadeze në Kosovë, duke theksuar se Kanadaja ka dhënë kontribut të madh në fushat e arsimit, të shëndetësisë dhe të rendit e të ligjit.

Në Universitetit Karllton [Carleton University] në Ottava, zoti Hyseni iu drejtua një grupi studiuesish dhe zyrtarësh të ambasadave nga rajoni i Evropës Juglindore. Ai sërish nënvizoi se Kosova duhet të ketë rrugë të shtruar qartë për pavarësi, që, sipas tij, është me rëndësi vendimtare për stabilitetin e rajonit.

 

Skender Hyseni poashtu theksoi se zgjidhja e problemeve të mëdha ekonomike është pothuaj e pamundshme për sa kohë që statusi i Kosovës të mbetet i paqartë, duke vënë re se marrja e kredive dhe investimet e jashtme përgjithësisht janë të pamundshme në situatën aktuale. Të pranishmit donin të dinin për gjendjen në vend, sidomos në lidhje me çështjen e kthimit të refugjatëve.

Pas mbajtjes së kësaj fjale në Universitet, z. Skender Hyseni i dha një intervistë televizive programit televiziv parlamentar të Kanadasë.

Në mbrëmje, z. Jan Kickert, ministër-këshilltar në Ambasadën e Austrisë në Otava, shtroi një darkë për nder të z. Hyseni. Z. Kickert ka qenë figurë e rëndësishme në Kosovë që ka marrë pjesë në bisedat paqësore që çuan në intervenimin e NATO-s dhe ka shërbyer si këshilltar i PSSP-së Bernar Kushner.

 

Mysafirë të tjerë në këtë darkë ishin edhe znj. Margaret Muërz [Moores] dhe z. Methju Majer [Matthew Mayer] nga Divizioni për Evropë Juglindore, znj. Valerie Percival, e cila ka punuar më parë në Prishtinë si analiste e organizatës International Crisis Group, z. Robert Ostin [Austin] nga Universiteti i Torontos, Robert Blackburn nga SNC Lavalin, si dhe Vendi Gilmur [Wendy Gilmour] që ka shërbyer në Kosovë si këshilltar i komandantit të KFOR-it, Gjeneralit Majkëll Xhekson [Michael Jackson].

Vizita e z. Skender Hysenit, këshilltar i Presidentit të Kosovës, në Kanada ishte me rëndësi për të njohur zyrtarët, studiuesit dhe studentët kanadezë me gjendjen në Kosovë. Zoti Hyseni ka dhënë shpjegime dhe arsye bindëse pse çështja e statusit dhe e standardeve për Kosovën duhet të shkojnë krahas.

 

 

Kuvendi i Kosovës miratoi ligjin për sportin dhe projektligjin për transportin rrugor

 

Prishtinë, 20 nëntor 2003 - Në seancën e sotme të rregullt, Kuvendi i Kosovës miratoi ligjin për sportin dhe miratoi në parim edhe projektligjin për transportin rrugor dhe bartjen e mallrave. Pas diskutimit nen për nen shumica e deputetëve votuan ligjin për sportin i cili duhet të sanksionojë qartë parregullsitë që janë shënuar deri tash në sportin kosovar.

Deputetët me shumicë votash miratuan në parim edhe projektligjin për transportin rrugor dhe bartjen e mallrave. Zef Morina, ministër i Transportit dhe Telekomunikacionit, tha se ky ligj është përgjigje ndaj nevojave për një ligj modern në fushën e transportit rrugor dhe të bartjes së mallrave.

 

Gjithashtu Morina tha se "ky projektligj promovon konsolodimin e strukturave përgjegjëse në sektorin e transportit rrugor, për arsye se sqaron përgjegjësitë dhe kompetencat përkatëse të subjekteve që janë përgjegjëse në sektorin e transportit rrugor, zhvillimin e transportit të qytetarëve dhe të mallrave". Sipas Morinës, ky projektligj ngrit nivelin e transparencës dhe efikasitetin në sektorin e transportit rrugor.

Kuvendi shtyri për seancën e javës së ardhshme projektligjin për kadastër.

 

 

U nënshkrua Memorandumi për mbrojtjen e të drejtave të fëmijëve

 

Prishtinë, 20 nëntor 2003 - Me rastin e 20 nëntor 2003it, Ditës së nënshkrimit të Konventës Ndërkombëtare për të Drejtat e Fëmijës, në Prishtinë u nënshkrua Memorandumi për mbrojtjen e të të drejtave të Fëmijës.

Ministria e Punës dhe Mirëqenies Sociale, ajo e arsimit, e shëndetësisë dhe përfaqësues të policisë me nënshkrimin e këtij memorandumi u zotuan se do të angazhohen maksimalisht për mbrojtjen e të të drejtave të fëmijës, sipas Konventës Ndërkombëtare për të Drejtat e Fëmijës, të nënshkuruar para 14 vjetësh.

 

 

Kadare: Ky titull nderi i Universitetit të Prishtinës ka për mua një rëndësi të veçantë morale

 

Prishtinë, 20 nëntor 2003 - Nesër në Prishtinë në një mbledhje solemne shkrimtari i mirënjohur shqiptar, Ismail Kadare do të nderohet me titullin Doktor Nderi i Universitetit të Prishtinës.

Duke komentuar këtë titull, Ismail Kadare tha për BBC-në dje në Shkup, se ky titull nderi i Universitetit të Prishtinës ka për të një rëndësi të veçantë morale, ngase vjen nga një universitet me histori dramatike.

"Në jetën e shkrimtarit qëllon të ketë shumë tituj nderi, por ky titull nderi i Universitetit të Prishtinës ka për mua një rëndësi të veçantë morale. Është vërtetë i çmuar, sepse vjen nga një vend, nga një Universitet me histori dramatike. Historia e Universitetit të Prishtinës është histori e Kosovës.

 

Drama e tij është pjesë e dramës të Kosovës. Triumfi i tij është pjesë e triumfit të Kosovës. Pra, ky titull i lartë vjen nga një universitet me një moralitet shumë të lartë dhe natyrisht kjo rrezaton edhe tek titulli që jep", tha Kadare.

 

 

Qeveria e Kosovës kërkon që procesi i privatizimit të vazhdojë menjëherë

 

Prishtinë, 20 nëntor 2003 - Qeveria e Kosovës ka kërkuar që procesi i privatizimit të ndërmarrjeve shoqërore në Kosovë të vazhdojë menjëherë për faktin që dëmet e krijuara që nga bllokimi i këtij procesi nuk mund të kompensohen.

 

Këtë kërkesë Qeveria e Kosovës e bëri dje pas një mbledhjeje të saj në të cilën në të shumtën e kohës është diskutuar çështja e privatizimit dhe njoftimi i shefit të UNMIK-ut që ndërmarrjet e privatizuara deri tash duhet rishqyrtuar sërish.

 

Qëndrim i pakontestueshëm i Qeverisë së Kosovës që privatizimi duhet të vazhdojë menjëherë. Duke marrë parasysh se edhe në Nju-Jork është vlerësuar se nuk ka pasur arsye bindëse për bllokimin e këtij procesi, ngase vendimi i marrë nuk ka qenë vendim i Bordit të AKM-së.

Në anën tjetër zyrtarë nga Zyra ligjore e Misionit të OKB-së në Prishtinë ndërkaq kanë thënë se në privatizimin e ndërmarrjeve në Kosovë duhet të zbatohen ligjet e miratuara para 22 marsit të vitit 1989, përkatësisht para rrënimit të autonomisë së atëhershme të Kosovës, por edhe disa ligje të tjera pas kësaj periudhe që cilësohen jodiskriminuese.

Procesi i privatizimit në Kosovë është ndërprerë në fillim të muajit të shkuar pas trysnisë së autoriteteve të Beogradit, megjithëse zyrtarisht është thënë se procesi është ndaluar derisa të zgjidhen disa çështje ligjore.

 

 

KFOR-i njofton për fillimin e ushtrimeve rezervë të NATO-s me kodin "Niveli i parë"

 

Prizren, 20 nëntor 2003 - Përfaqësuesit e trupave paqësore të KFOR-it në Prizren paralajmëruan mbajtjen e ushtrimeve rezervë të NATO-s "Forcat mbi horizont", me kodin "Niveli i parë". Ndërkaq qëllimi kryesor i tyre do të jetë gatishmëria për ruajtjen e paqes dhe sigurisë në rajon.

 

Udhëheqësi i Zyrës së KFOR-it, koloneli gjerman Horst Piper në në një konferencë shtypi tha se tashmë në komandën e KFOR-it ka filluar faza e parë e përgatitjeve në Kosovë për udhëheqjen e trupave rezervë në kuadër të këtyre ushtrimeve.

 

Ai shtoi se gjatë këtij ushtrimi NATO dhe shtetet partnere do të vendosin një shtab të forcave rezervë si dhe një numër të madh trupash në zonën e përgjegjësisë për të demonstruar aftësitë e NATO-s brenda një kohe të shkurtës, duke mundësuar forcimin e forcave rezervë të NATO-s të quajtura "Forcat mbi horizont".

Njësitë mund të arrijnë nga ajri dhe toka dhe janë të integruara në strukturat e Komandës dhe të kontrollit të KFOR-it.

 

 

Ndërkombëtarët në Mitrovicë sjellin rregulla të reja në komunikimin me gazetarët

 

Mitrovicë, 20 nëntor 2003 - Ndërkombëtarët në Mitrovicë kanë sjellë rregulla të reja sa i përket komunikimit me gazetarët që raportojnë nga ky qytet. Zëdhënësi i UNMIK-ut në Mitrovicë, Xhorxhi Kakuk ka thënë se një vendim i tillë ëshë marrë për faktin se disa mediume të shkruara kanë falsifikuar informatat që jepeshin nga administrata ndërkombëtare.

 

Ai ka shtuar se disa shkrime që bëhen nga disa gazetarë jo vetëm që janë trrillime por janë në kundërshtim të drejtpërdrejt me atë që thuhet, tha Kakuk duke përmendur rastet e keqinterpretimeve që ishin bërë nga disa gazetarë javën e kaluar.

 

UNMIK-u suspendoi pjesën e sesionit për pyetje të hapura dhe përgjigje në konferencën javore deri më 1 janar të vitit 2004. Prej dje e deri në atë datë të gjitha kërkesat për informata duhet të jenë shkrim, ndërkaq zyrtarët e administratës së UNMIK-ut në Mitrovicë nuk do të japin intervista ndërmjet telefonit, ka thënë zëdhënësi i UNMIK-ut Xhorxhi Kakuk.

 

 

Shënimi i 95-vjetori të Kongresit të Manastirit u mbyll me provomimin e dy veprave të Ismail Kadaresë

 

Shkup, 20 nëntor 2003 - Shënimi disaditësh i 95-vjetorit të Kongresit të Manastirit ku është përcaktuar alfabeti shqip, dje është rrumbullaksuar me promovimin e dy veprave të shkrimtarit të njohur shqiptar, Ismail Kadare: "Vajza e Agamemnonit" dhe "Pasardhësit", të përkthyera në gjuhën maqedonase.

Ky jubile, i cili shënoi edhe kremtimin për herë të parë në nivel shtëtëror të një ngjarje të rëndësishme të shqiptarëve, u përcoll me aktivitete të shumta të karakterit shkencor dhe kulturor.

 

 

Dëshmia e ish-komandantit të NATO-së, Uesli Klark në procesin kundër Millosheviqit nuk do të jetë publike

 

Hagë, 20 nëntor 2003 - Më 15 dhe 16 dhjetor në procesin kundër Sllobodan Millosheviqit do të dëshmojë edhe ish-kryekomandanti i NATO-s, gjenerali amerikan Uesli Klark. Dëshmia e gjeneralit Klark, i cili ka drejtuar operacionet luftarake të NATO-s në Kosovë, nuk do të jetë e hapur për publikun.

 

Kopja e dëshmisë nuk do të shpërndahet para se të kalojnë 28 orë nga përfundimi i seancës. Në deklaratë thuhet se zyrtarët amerikanë do ta lehtësojnë më parë dëshminë, duke hequr informacione që mund të kenë lidhje me sigurinë kombëtare.

 

 

Gjykata e Kumanovës ka dënuar dy shqiptarë me nga 10 vjet burg të akuzuar për terrorizëm

 

Kumanovë, 20 nëntor 2003 - Gjykata e qytetit të Kumanovës ka dënuar dje dy shqiptarë me nga 10 vjet burg të akuzuar për terrorizëm. Sylejman Sylejmani dhe Samet Lutfiu u shpallën fajtorë se në rajonin e Kumanovës kishin vendosur një minë kundërtank dhe me paramendim kishin privuar nga jeta tre persona.

 

Nga shpërthimi i një mine afër fshatit Sopot të Kumanovës më 4 mars të këtij viti kanë humbur jetën dy ushtarë polakë të kontigjentit të forcave paqeruajtëse të NATO-s në Maqedoni dhe një përkthyese maqedonase.

 

 

BE ka caktuar një diplomat danez në postin e të dërguarit të posaçëm në Maqedoni

 

Shkup, 20 nëntor 2003 - Bashkimi Evropian në Bruksel ka caktuar diplomatin danez Peterson në postin e të dërguarit të posaçëm të BE-së në Maqedoni. Z. Peterson do të zëvendësojë të dërguarin aktual të BE-së Aleksis Bruns. Pritet që Peterson të fillojë detyrën e re në janar të vitit të vjenë.

 

Posti i të dërguarit të posaçëm të BE-së u caktur menjëherë pas përfundimit të konfliktit të vitit 2001 me qëllim që të ndihmojë Maqedoninë në zbatimin e Marrëveshjes paqësore të Ohrit.

 

 

Krimi i organizuar mund të marrë kontrollin në Shqipëri nëse politikanët nuk presin lidhjet me kriminelët

 

Tiranë, 20 nëntor 2003 - Shefi i policisë së Tiranës Piri Ndreu ka ngritur shqetësimin se krimi i organizuar në Shqipëri mund të marrë kontrollin e vendit nëse politikanët nuk presin lidhjet e tyre me elementët kriminalë.

 

Në një letër të hapur publikuar dje shefi i policisë së Tiranës ka kërkuar nga Qeveria të mbështesë policinë në luftën kundër krimit. Ndreu ka akuzuar se zyrtarë të lartë dhe anëtarë të Parlamentit shërbejnë si të ashtuquajtur engjuj mbrojtës për figurat e krimit të organizuar.

 

 

Arrin në 25 numri i vrarëve në dy shpërthimet e sotme në Stamboll

 

Stamboll, 20 nëntor 2003 - Ka arritur në 25 numri i të vrarëve në dy shpërthimet që ndodhën sot në Stamboll, ndërkaq numri i të plagosurve arrin në 390, njoftojnë agjencitë e lajmeve në njoftimet më të reja, duke u mbështetur në burimet e autoriteteve shëndetësore turke.

Një nga shpërthimet ka ndodhur te Konsullata britanike në pjesën elite të qytetit Bejoglu, kurse tjetri ka shkatërruar selinë e bankës britanike HSBC më kaurtin modern financiar Levent.

Sulmuesit në kamiona të vegjël të mbushur kanë shpërthyer lëndën plasëse.

Përgjegjësinë për këto dy sulme kanë marrë rrjeti i Al Kaidës dhe një organizatë ekstremiste islamike turke.

 

 

Të paktën 15 janë vrarë dhe 320 të plagosur në dy shpërthimet që ndodhën sot në Stmaboll

 

Stamboll, 20 nëntor 2003 - Të paktën 15 janë vrarë nga dy shpërthimet që ndodhën sot në Stmaboll, duke shkatërruar bankën HSBC dhe Konsullatën britanike në sulmet vetëvrasëse të militintëve islamikë, njofton Rojter.

Televizioni turk citon zyrtarë shëndetësorë të qytetit të cilët kanë konfirmuar zyrtarisht vdekjen e 15 vetëve dhe plagosjen e 320 të tjerëve.

Ministri i Jashtëm britanik Xhek Stro i dënoi sulmet, duke i qaujtur "akt të neveritshëm të terrorizmit". Stro tha se sulmet kishin të gjitha shenjat e terrorizmit ndërkomëbtar të praktikuar nga Al Kaida.

Gjithashtu Stro tha se katër punonjës të Konsullatës britanike nuk dihet se ku janë.

Agjencia turke e lajmeve Anadolia thotë se nuk dihet saktësisht sa shpërthime kanë ndodhur, dy apo pesë, ngase ka ndodhur konfuzion, meqenëse njerëzit kanë bërë shumë telefonata, duke njoftuar për shpërthimet nga pjesë të ndryhsme të qytetit.

 

 

Dhjetë të vrarë në Stamboll nga pesë shpërthime

 

Stamboll, 20 nëntor 2003 - Pesë shpërthime kanë tronditur sot Stambollin, duke përfshirë një shpërthim para bankës HSBC në një kuart shumë të frekuentuar dhe një tjetër para konsullatës britanike, njoftuan rrjetet televizive.

Ndërkaq një tjetër bombë ka shpërthyer në rrethojat e kopshtit të Konsullatës britanike në pjesën e qytetit Bejoglu. Njoftohet për dhjetë vetë vrarë, njofton CNN turk.

Edhe dy shpërthime kanë pasuar, duke përfshirë një në pjesën aziatike të qytetit, thonë televizionet.

 

Një vetëvrasës me bombë ka vrarë tre vetë në qytetin Kirkuk në veri të Irakut

 

Kirkuk, 20 nëntor 2003 - Një vetëvrasës me bombë ka vrarë tre vetë dhe ka plagosur të paktën gjashtë të tjerë në një sulm para zyrës së Partisë Kurde në Irakun verior në qytetin Kirkuk, njofton Rojter.

Një shpërthim i fuqishëm afër zyrës së partisë Unioni Patriotik i Kurdistanit ka ngritur në ajër dy vetura.

Një zyrtar i policisë ka thënë se qind për qind është sigurt se ky sulm ka qenë nga një vetëvrasës me bombë.
Dëshmitarët thonë se dy vetë u vranë afër vendit të shpërthimit jashtë zyrës, kurse një tjetër duke kaluar nëpër në shesh.

 

 

Të paktën dy vetë janë vrarë dhe 12 të tjerë janë plagosur

 

Ramadi, 20 nëntor 2003 - Të paktën dy vetë janë vrarë dhe 12 të tjerë janë plagosur të mërkurën në mbrëmje në një shpërthim me autobombë para ndërtesës së këshillit lokal në qytetin Ramadi, 100 km në perendim të Bagdadit.

Qyeti Ramadi është pjesë e trekëndëshit sunit, ku rezistenca ndaj forcave të koalicionit është më e ashpër.

 

 

Bush dhe Bler takohen sot zyrtarisht

 

Londër, 20 nëntor 2003 - Presidenti Bush takohet sot me kryeministrin britanik, Toni Bler në ditën e dytë të vizitës së tij shtetërore në Britani.

Kjo është dita kur ceremonia i lë vend politikës. Një ditë në të cilën Shtëpia e Bardhë e di se tema të vështira duhen adresuar.

Një nga më të fortat, çështja e fatit të të burgosurve britanikë në Guantanamo.

Presidenti Bush thuhet se e ka diskutuar çështjen kur u takua me udhëheqësin social demokrat Çarls Kenedi.

Zoti Kenedi sugjeroi se amerikanët mund të bëjnë kompromis për këtë. Çështje të tjera për t'u disktuar janë Iraku dhe tarifat e çelikut.

Ekipi i Bushit ka thënë se ata nuk janë gati ende të njoftojnë dhënie fund të këtyre tarifave, por presidenti mund t'i bëjë të ditur privatisht kryeministrit Bler nëse ky vendim do të ndryshojë në një të ardhme të afërt.
Të dy udhëheqsëit pasdite do të japin një konferencë për shtypin.

 

 

Bush në Londër mbrojti luftën në Irak

 

Londër, 20 nëntor 2003 - Presidenti i SHBA-ve Xhorxh Bush në Londër i bëri një mbrojtje të fuqishme të politikës së tij në Irak. Ai tha se përdorimi i matur i forcës është në disa raste i nevojshëm si mjeti i fundit i luftës. Populli na ka ngarkuar me përgjegjësinë për ta mbrojtur. Dhe ndonjëherë përmbushja e kësaj detyre kërkon frenimin e një njeriu të dhunshëm nëpërmjet përdorimit të dhunës.

Në fjalimin krysor të këtij udhëtimi, të mbajtur përpara një audience të zgjedhur dhe jo në parlamentin britanik, Presidenti Bush tha se Shtetet e Bashkuara dhe Britania e Madhe kanë një qëllim të përbashkët në Irak. "Shtetet e Bashkuara dhe Britania e Madhe kanë një mision të përbashkët në botë, përtej balancës së pushtetit dhe përtej ndjekjes së interesave vetjake. Ne duam përparimin e lirisë dhe paqen që sjell kjo liri".

Ditën e parë të vizitës së Presidentit Bush në kryeqytetin britanik pati disa demonstrata të vogla, por protesta më e madhe është planifikuar të zhvillohet të enjtën, kur zoti Bush të takohet me Kryeministrin Tony Blair.

 

Një grup i vogël protestuesish që u mblodhën në afërsi të Pallatit Buckingham, u dëgjuan por nuk u panë nga funksionarët që ishin të pranishëm në ceremoninë zyrtare të pritjes në oborrin e Pallatit. Kjo ishte një ceremoni e reduktuar që i mungonte shëtitja me monarken britanike në karrocë të hapur nëpër Londër.

 

 

Muri izraelit mund të dëmtojë bizedimet e paqes në Lindjen e Mesme

 

Londër, 20 nëntor 2003 - Presidenti amerikan Bush tha se ndërtimi i murit izraelit përreth Bregut Perëndimor mund të dëmtojë bisedimet përfundimtare për një marrëveshje paqeje në Lindjen e Mesme.

Në një fjalim që mbajti në Londër, Presidenti Bush kritikoi përsëri murin sigurisë, të cilin zyrtarë izraelitë thonë se po e ndërtojnë për të parandaluar sulmet e ekstremistëve palestinezë kundër objekteve në Irzael.

 

Ai i bëri thirrje Izraelit të pezullojë ndërtimin e vendbanimeve hebraike, të shëmbë vendbanimet e paautorizuara dhe t'i japë fund poshtrimit të përditshëm të popullit palestinez. Shtetet e Bashkuara mbështesin planin e ri të paqes që parashikon krijimin e një shteti palestinez brenda vitit 2005.

Presidenti Bush tha se palestinezët duhet t'i japin dund mbështetjes për udhëheqës të lidhur me korrupsionin dhe terrorizmin dhe të ndërmarrin hapa paqesor për ndërtimin e demokracisë.

 

 

10 milionë dollarë për kapjen e ndihmësit kryesor të Sadam Huseinit

 

Uashington, 20 nëntor 2003 - Shtetet e Bashkuara kanë caktuar një shpërblim prej 10 milionë dollarësh për informacion rreth zëvendësit kryesor të Sadam Huseinit, Izat Ibrahim al-Duri, për të cilin mendohet se është pas sulmeve të kohëve të fundit kundër trupave amerikane.

 

Shpërblimi e bën Al-Durin personin më të kërkuar në Irak, pas vetë Sadam Huseinit. Koalicioni i udhëhequr nga Shtetet e Bashkuara ka caktuar një shpërblim prej 25 milionë dollarësh për informacion që çon në kapjen e ish presidentit irakian.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |