Po Himarat e tjera a do të ndëshkohen?

OPINIONE

Po Himarat e tjera a do të ndëshkohen?

20 nëntor 2003 / TN

Çerçiz LOLOÇI

Kritikat e ashpra të komunitetit ndërkombëtar, të ministrave të Jashtëm të BE-së dhe posaçërisht të kreut të diplomacisë greke Papandreu, për incidentet e turit të dytë zgjedhor në Himarë, i janë përgjigjur aty-për aty sekretari i përgjithshëm Gramoz Ruçi dhe ministri i Drejtësisë Peçi duke shprehur vullnetin e institucioneve të shtetit jo vetëm për të mos njohur rezultatin e manipuluar, por edhe për të ndëshkuar këdo që ka krijuar tensione dhe ka qenë përgjegjës për ndodhitë e dhunshme.

Duke mos u marrë shumë me mënyrën sesi i përgjigjet reagimit të një ministri grek të Jashtëm një sekretar shqiptar partie dhe një ministër minoritar drejtësie (mjaftojnë edhe këto prononcime publike, të varfëra, pa ide, të vjetëruara sa s'ka, që do t'i përjashtonte përfundimisht edhe nga një post minor publik), duke ndier vërtet neveri që mendje shumë të kthjellta europiane kanë ende paragjykime për një zonë që është substancë shqiptarie, në këtë duel replikash dhe kundër-replikash bën përshtypje heshtja e palëve brenda dhe jashtë vendit për atë çka ndodhi në zgjedhjet e 12 tetorit.

Megjithëse Shqipëria, është ndër të vetmit nga vende postkomuniste që vazhdon të monitorohet në çdo institucion dhe në çdo palë zgjedhjesh, manipulimi i Himarës është një pikë ujë me manipulimin masiv që u rikrye si përçdoherë në qytetet tona kryesore dhe sidomos në Tiranë dhe Durrës.

Në këto qytete, por edhe në Shkodër, Korçë, Vlorë, Gjirokastër, në pothuaj të gjitha qytetet e kategorisë së parë dhe të kategorisë së dytë, me një aksion blitz të zyrave shtetërore, ka ndodhur përjashtimi i madh i dhjetëra qytetarëve duke pasuruar kështu "arkivin" e mosndershmërisë së zgjedhjeve. Për këtë përjashtim që u konstatua edhe nga monitoruesit ndërkombëtarë, nuk u kërkua ndjesë dhe nuk u kërkua ndëshkim me rrugë ligjore as nga Partia Socialiste dhe as nga ndonjë institucion tjetër shqiptar.

Një grup komisionerësh, kryesisht përfaqësues të Partisë Socialiste dhe aleatëve të tyre, por edhe të Partisë Demokratike dhe partive të tjera të djathta që, me vetëdije apo nga pakujdesia, kanë bërë dhjetëra shkelje të Kodit të ri Zgjedhor, nuk janë ndëshkuar publikisht dhe nuk ka asnjë person që të shkojë në organet e drejtësisë.

PD, megjithë denoncimin e manipulimit të zgjedhjeve, ka deklaruar publikisht se përfaqësuesit e saj nga qendrat e votimit deri në KZQV që kanë shkelur Kodin Elektoral të përgjigjen ligjërisht, por kjo gjë nuk ka ndodhur nga eksponentët socialistë. Shkelje të tjera janë vënë re në mënyrën e plotësimit të procesverbaleve, në prishjen me dashje të kodeve të sigurisë së kutive të votimit, në dorëzimin e dokumentacionit të bashkisë, në veprime arbitrare të Komisionit Qendror të Zgjedhjeve, etj..

Për të gjitha këto shkelje si dhe për të tjera, mjaft të rënda, kanë reaguar të gjitha institucionet monitoruese, përfshi OSBE/ODHIR, Komisioni Europian, por rishqetësimi i tyre për ngjarjet e Himarës duket se i ka zgjuar institucionet shqiptare. Deklarata e ministrave të Jashtëm të BE-së, ka sjellë reagimin e menjëhershëm të strukturave të mbetura (a mund të përfytyrohet në 2003 që Gramoz Ruçi, Luan Hajdaraga dhe Spiro Peçi i përgjigjen Kris Patten dhe Jorgo Papandreut), por më shumë se kaq shqiptarët e kuptojnë se pas shtyrjes së afatit për marrëveshjen e Asociim-Stabilizimit, të tjera ditë të vështira vijnë për strukturat shtetërore dhe për vetë ata.