|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Ministri Zef Morina vizitoi komunën e Podujevës

		Podujevë, 19 nëntor 2003 (TN) – Ministri i Postelekomunikacionit në Qeverinë e Kosovës z. Zef Morina me bashkëpunëtorë vizitoi sot komunën e Podujevës me ç’rast u prit nga udhëheqja komunale e prirë nga kryetari Agim Veliu. Në takimin e sotëm Kryetari i komunës së Podujevës Agim Veliu njoftoi Ministrin Morina me realizimin e projekteve në infrastrukturë, me theks të veçantë për infrastrukturën rrugore të Podujevës e cila nga lufta ishte tejet e shkatërruar.“Pas asfaltimit të rrugëve në qytet, rrugës Podujevë – Shajkofc, rrugës së Bradashit, ne kemi filluar investime të reja në rrugët rurale, por kryesisht në asfatimin e tyre sepse janë investime më të qëndrueshme”, i deklaroi z. Veliu Ministrit Zef Morina.

Më tej kryetari Veliu njoftoi Ministrin e postelekomunikacionit në Qeverinë e Kosovës me prioritet e Qeverisë komunale duke përmendur këtu asfaltimin e rrugës së fshatit Bellopojë e gjatë 5 km ku komuniteti ka mbledhur 160 mijë euro, komuna do të participojë me të njëjtën shumë, “por projekti i tillë kërkon edhe ndihmën e Ministrisë”, deklaroi z. Veliu pasi që vlera e tërësishme e projektit llogaritet në mbi 600 mijë euro. Ndër prioritetet kapitale Kryetari Veliu përmendi edhe rrugën regjionale Kërpimeh – Pollatë – Reçicë, 12 km të gjatë, e cila lidhet me pjesën kufitare ku lidhen 16 fshatra me një numër të madh të banorëve.

“Kjo rrugë është e rëndësishme për faktin se ai rajon kufitar paraqet pasuri të vërtetë për zhvillimin e turizmit, blegtorisë, etj, por para së gjithash asfaltimi i saj do të ndalonte migrimin e popullatës në qytet si dhe do të krijonte kushte për zhvillimin e atij rajoni”, deklaroi kryetari Agim Veliu. Ai poashtu përmendi edhe projektin e rrugës Kërpimeh – Revuçë – Kaqandoll, rrugë që do ta lidhte komunën e Podujevës me komunën e Mitrovicës. Kryetari Veliu e njoftoi Ministrin Morina edhe me të arriturat tjera në komunën e Podujevës si dhe kërkoi nga Ministri Morina bashkëpunim të ngushtë dhe ndihmë për realizimin e këtyre projekteve kapitale jo vetëm për Podujevën.

Ministri Zef Morina shprehu kënaqësi me të arriturat në komunën e Podujevës dhe përgëzoi udhëheqjen komunale si dhe premtoi se bashkëpunimi do të vazhdojë dhe se ndihma e Ministrisë së Postelekomunikacionit nuk do të mungojë. “Ne do ti shohim mundësitë për ta ndihmuar komunën e Podujevës në këto projekte, sepse është interes yni që rrugët ti asfaltojmë, rehabilitojmë dhe rregullojmë në interes të qytetarëve dhe zhvillimit të përgjithshëm të Kosovës”, tha z. Morina duke shtuar se bashkërisht me komunat dhe aty ku është e mundshme edhe me komunitetin të hapen edhe rrugë të reja.

Sa i përket rrugës së Bellopojës, Ministri Morina premtoi se ndihma e Ministrisë që ai drejton nuk do të mungojë, kurse për projektet tjera kërkoi që ato të operacionalizohen dhe bashkë me udhëheqjen komunale të fillojnë punët në fillim të vitit 2004. Në takimin e sotëm në mes të udhëheqjes komunale të Podujevës dhe Ministrit Morina me bashkëpunëtorët u bisedua edhe për çshtjet si ruajtjen e brezit rrugor nga ndërtimet, transportin ndërurban, problemin e kombibusëve, gjendjen e hekurudhave, Ligjin mbi rrugët dhe ngritjen e cilësisë së tyre, etj.

“Ramë dakord me udhëheqjen e komunës dhe kryetarin Veliu për disa projekte që kanë filluar e para së githash për ndihmën që ne do ta japim për asfaltimin e rrugës së Bellopojës dhe dy rrugë tjera; ate të Kërpimehut dhe tjetrën që lidhë Podujevën me Mitrovicën”, deklaroi Ministri Morina. Ai tha se është i entuziazmuar me të arriturat në komunën e Podujevës dhe përgëzoi udhëheqjen e komunës për punën e bërë.