Përmbajtja:

• Presidenti Rugova priti kryeministrin e Luksemburgut Zhan-Klod Junker

• Kryeministri i Luksemburgut Zhan-Klod Junker po qëndron sot për një vizitë njëditore në Kosovë

• Novicki takoi gjeneralin Kamerhof, ministrin Isufi dhe koordinatorin e UNMIK-ut Ros

• Në takimin e sekretarit amerikan të shtetit Pauell me ministrat e jashtëm të BE-së në Bruksel u debatua edhe për Kosovën

• Solana thotë se shqyrtimi i plotësimit të standardeve për Kosovën mund të bëhet gjatë vitit 2005

• Civileti i dorëzoi Holkerit dokumentin për decentralizimin e pushtetit lokal në Kosovë

• Parapagimi për RTK-në bëhet përmes faturave të KEK-ut

• Lutfi Haziri merr pjesë në konferencën për demokracinë lokale në Kosovë që mbahet në Oslo

• Shëndetësisë së Kosovës iu shtua edhe Departamenti i Infermierisë dhe Mamisë

• Në Kosovë që nga viti 1999 deri më sot janë braktisur 229 fëmijë

• Përfaqësuesit e KFOR-it dënuan spekulimet e mediave serbe për vrasjen e Mihailloviqit

• Në Izbicë të Skënderajt u bë varrimi i gjashtë viktimave të masakrës serbe nga viti 1999

• Ismail Kasumi emërohet drejtor i Departamentit të Sportit

• Akademikët shqiptarë kërkuan që objekti ku është mbajtur Kongresi i Alfabetit në Manastir, të vëhet në mbrojtje të UNESCO-s

• D0S më nuk ekziston

• Batler: Maqedonia mund të bëhet anëtare e NATO-s në vitin 2006

• Parlamenti Maqedonisë për kryetar të ri zgjodhi Lupço Jordanovskin, ndërkaq për nënkryetar Hysni Shaqirin

• Katër vetë të vdekur nga rrëzimi i helikpoterit ushtarak suedez

• Mbretëresha Elizabet priti Presidentin Bush

• Bush fillon vizitën në Londër

• Vrasësit me bombë të cilët sulmuan dy sinagoga në Stamnboll ishin shtetas turq

• Mubarak ndërpreu fjalimin para parlamentit për shkak të "problemeve të vogla me shëndetin"

• Irani e Iraku nënshkruajnë marrëveshje bashkëpunimi

• Tikriti sulmohet për të tretën natë me radhë

• Izraelitët vranë një sulmues nga Jordania

Presidenti Rugova priti kryeministrin e Luksemburgut Zhan-Klod Junker

 

Prishtinë, 19 nëntor  2003 - Presidenti i Kosovës Ibrahim Rugova priti sot kryeministrin e Luksemburgut Zhan-Klod Junker (Jean-Claude Juncker), i cili po qëndron për një vizitë njëditëshe në Kosovë, në kuadër të një turneu ballkanik. Presidenti Rugova pasi shprehu kënaqësinë që po takonte sërish kryeministrin Junker, e falenderoi atë për përkrahjen që ka dhënë Luksemburgu para luftës, gjatë luftës dhe tash në rindërtimin e Kosovës, por edhe për prezencën ushtarake të këtij vendi në Kosovë.

 

"Ne biseduam për progresin që kemi arritur në Kosovë, për objektivat tona, zhvillimin ekonomik, vendet e reja të punës, privatizimin, integrimin e grupeve etnike në Kosovë", tha pas takimit Presidenti Rugova.

- Po ashtu, tha ai - tash e kemi edhe periudhën e vlerësimit të situatës në Kosovë, që quhen standardet, që ne dëshirojmë ato të realizohen sa më shpejt, - tha Rugova dhe u shpreh për një Kosovë demokratike, tolerante paqësore, të pavarur e të integruar në Bashkimin Evropian, në strukturat veriatlantike.

 

Poashtu theksoi se instiucionet e Kosovës do të punojnë në rritjen e progresit të Kosovës. "Ne presim një bashkëpunim dhe një përkrahje ekonomike të Luksemburgut, të na përkrahë në nivel të Unionit Evropian dhe bashkësisë ndërkombëtare", nënvizoi Presidenti Rugova pas takimit.

Nga ana e tij, kryeministri i Luksemburgut Zhan-Klod Junker, pasi përkujtoi se takimin e fundit me Presidentin Rugova e ka pasur para disa muajsh në Luksemburg, ai tha se kishte premtuar që takimi i radhës do të mbahet në Kosovë.

"Kjo është arsyeja, për të mos thënë arsyeja kryesore, që unë jam sot këtu. Luksemburgu ka qenë shumë afër me popullin e Kosovës, në kuptim të ndihmës financiare, por ky ka qenë vetëm një dimension i angazhimit tonë", tha zoti Junker.

"Janë shënuar 20 bilion euro investime në projekte të ndryshme në Kosovë e po ashtu janë një numër i madh i OJQ-ve të Luksemburgut që veprojnë në Kosovë", tha ai.

Kryeministri Junker tha se në këtë takim gjithashtu është biseduar edhe për çështjet e tjera që kanë qenë në agjendë.

"U informuam më shumë rreth qëndrimit të Presidentit për çështjet siç janë: përmbushja e standardeve para statusit, si dhe diskutimit për statusin final, që ne mendojmë se do të ndodhë në vitet e ardhshme, ndoshta kah viti 2005", tha Junker, duke shtuar se kjo është çështje me rëndësi për vendin e tij, sepse Luksemburgu do ta ketë presidencën e radhës së Bashkimit Evropian në pjesën e parë të vitit 2005.

 

 

Kryeministri i Luksemburgut Zhan-Klod Junker po qëndron sot për një vizitë njëditore në Kosovë

 

Prishtinë, 19 nëntor  2003 - Kryeministri i Luksemburgut Zhan-Klod Junker po qëndron sot për një vizitë njëditore në Kosovë, ku pati takime me përfaqësuesit më të lartë të Kosovës, presidentin Ibrahim Rugova, kryeparlamentarin Nexhat Daci dhe Kryeministrin Bajram Rexhepi si dhe me shefin e UNMIK-ut Hari Holkeri.

Poashtu ai sot ka vizituar edhe trupat e vendit të tij në pjesën veriore të Kosovës në kuadër të KFOR-it.

"Ideja për afatizimin e përmbushjes së standardeve deri në mesin e vitit 2005 duhet përkrahur dhe të gjithë duhet të angazhohen për ta jetësuar atë", tha kryeministri Junker pas takimeve që pati, vendi i të cilit do të jetë kryesues i radhës së Bashkimit Evropian gjatë gjashtë muajve të parë të vitit 2005.

 

 

Novicki takoi gjeneralin Kamerhof, ministrin Isufi dhe koordinatorin e UNMIK-ut Ros

 

Prishtinë, 19 nëntor  2003 - Ombudspersoni i Kosovës Marek Antoni Nowicki sot vizitoi gjeneralin Holger Kammerhof, komandant i KFOR-it. Novicki dhe Kamerhof në këtë takim biseduan për mundësitë e përparimit të bashkëpunimit të më tutejshëm në mes të Institucionit të Ombudspersonit dhe KFOR-it.

Ndërkaq gjatë ditës së djeshme Ombudspersoni i Kosovës u takua edhe me Ahmet Isufin, ministër i Punës dhe i Mirëqenie Sociale me bashkëpuntorët.

 

Në këtë takim është biseduar për çështjet me interest të përbashkët e veçanërisht për situatën e pensionistve kosovarë. Veçanërisht është diskutuar për novojën e përfshirjes adekuate të invalidëve të punës, si dhe zgjidhja e problemit të grupacioneve të tjerë invalidor në Kosovë.

Minsitri Isufi, informoi Ombudspersonin Nowicki për iniciativat e qeverisë në këtë lëmë.
Obudspersoni i Kosovës kërkoi që skamnorët dhe çdo njeri që kërkon ndihmë sociale duhen të jenë në qendër të interesimit të autoriteteve qeveritare.

Poashtu Nowicki dje ka takuar edhe z.Carne Ross, koordinator i UNMIK-ut për strategjinë e standardeve. Në këtë takim është biseduar për procesin e evulimit të standardeve për Kosovën.

Duke pasur parasysh fushat të cilat përfshijnë standardet për Kosovën, Institucioni i Ombudpsersonit është kompetent dhe i gatshëm që mendimet t'i shprehë në menyrë të pavarur në lidhje me standardet të cilat janë nën jurisdiksionin e tij.

Ombudspersoni, në kuadër të kompetencave do të bashkëpunojë në këtë proces tepër të rëndësishëm, njofton Shërbimi i IOK.

 

 

Në takimin e sekretarit amerikan të shtetit Pauell me ministrat e jashtëm të BE-së në Bruksel u debatua edhe për Kosovën

 

Bruksel, 19 nëntor  2003 - Në Bruksel është zhvilluar një takim ndërmjet Shteteve të Bashkuara të Amerikës dhe Bashkimit Evropian në praninë e sekretarit amerikan të Shteti Kolin Pauell dhe ministrave të jashtëm të vendeve anëtare të BE-së. Është thënë se bashkëpunimi amerikano-evropian është kyç për zgjidhjen e krizave të ndryshme nëpër botë, që nga Iraku, Afganistani e deri tek lufta kundër terrorizmit global.

Gjithashtu, Pauell dhe homologët e tij evropianë kanë diskutuar edhe për situatën në Kosovë. "Ne kemi punuar dhe do të vazhdojmë të punojmë së bashku për stabilizimin e Ballkanit", ka thënë Kolin Pauell në Bruksel. Shtetet e Bashkuara të Amerikës dhe BE kanë thënë se ndajnë qëndrimet e njëjta sa i përket Kosovës.

Zyrtarët në Bruksel kanë thënë se SHBA-të kanë mirëpritur dje mbështetjen që ministrat e BE-së i kanë dhënë idesë së Grupit të Kontaktit të bërë publik nga nënsekretari amerikan i Shtetit Mark Grosman që në rast të plotësimit të disa standardeve në vitin 2005 të niset me zgjidhjen e statusit final të Kosovës.

Edhe amerikanët kanë mbështetur idenë që një ditë më herët e kishin miratuar ministrat e jashtëm të BE-së sipas të cilës duhet të bëhet evoluimi i përparimeve në përmirësimin e standardeve nga ana e kosovarëve, para se të hapet çështja e statusit final të Kosovës.

Sekretari amerikan i Shtetit dje është takuar edhe me përfaqësuesit e lartë të Bashkimit Evropian, me kryediplomatin Havier Solana, me ministrin e Jashtëm të Italisë, Franko Fratini, si dhe me komesarin e politikës së Jashtme Kris Paten.

 

 

Solana thotë se shqyrtimi i plotësimit të standardeve për Kosovën mund të bëhet gjatë vitit 2005

 

Bruksel, 19 nëntor  2003 - Përfaqësuesi i lartë i BE-së për Politikë të Jashtme dhe Siguri, Havier Solana në mbledhjen e ministrave të jashtëm në Bruksel, deklaroi se shqyrtimi i plotësimit të standardeve për Kosovën mund të kryhet nga mesi deri në fund të vitit 2005 dhe më pas mund të fillohet të mendohet për gjetjen e një zgjidhjeje të statusit përfundimtar të Kosovës.

Në në të njejtën mënyrë shefi i politikës evropiane ka hedhur poshtë edhe versionin e pavarësisë automatike të Kosovës në rast se federata serbo-malazeze ndahet deri në vitin 2005.

"Pavarësisht të mbetjes bashkë të federatës serbo-malazeze, Kosova duhet të plotësojë standardet para se të bisedohet për statusin përfundimtar të saj final", u shpreh Havier Solana. Në të njejtën kohë BE nënvizoi se dialogu ndërmjet Prishtinës dhe Beogradit është baza ku mbështetet politika e standardeve para statusit.

 

 

Civileti i dorëzoi Holkerit dokumentin për decentralizimin e pushtetit lokal në Kosovë

 

Prishtinë, 19 nëntor  2003 - Shefi i Misionit të Këshillit të Evropës Karlo Civileti i dorëzoi dje pasdite në Prishtinë shefit të UNMIK-ut, Hari Holkerit dokumentin me rekomandimet që do të mundësojnë decentralizimin e pushtetit lokal në Kosovë.

Z. Holkeri tha me këtë rast tha se së shpejti do të vendoset një mekanizëm i cili do të shqyrtojë në tërësi projektin e Këshillit të Evropës, ndërkaq institucionet e Kosovës do të jenë ato që do të marrin përsipër zbatimin e tërë procesit.

 

Ai tha se tashmnë ka pasur shembuj të kalimit të përgjegjësive tek institucionet e dala nga zgjedhjet vendore, ndonëse misioni i tij ka ruajtur të drejtat e përcaktuara me dokumentët ndërkombëtare. Holkeri i hodhi poshtë pohimet se me procesin e decentralizimit do të legalizohen enklavat etnike dhe sistemi paralel në Kosovë.

Shefi i Misionit të Këshillit të Evropës Karlo Civileti tha se qëllimi kryesor i hartimit të këtij plani ka qenë që procesi vendimarrës t'u ofrohet sa më shumë qytetarëve dhe të sigurohen shërbime më të mira dhe më efikase të administratës publike.

Problemi më i madh gjatë diskutimeve për procesin e decentralizimit të komunave në Kosovë ka qenë çështje e implementimit të tij në enklavat serbe në Kosovë në të cilat ende funksionojnë haptazi strukturat paralele serbe.

 

Mirëpo, sipas z. Civileti ky plan nuk është i ndërtuar mbi baza etnike dhe serbët e Kosovës sipas tij duhet të marrin pjesë në decentralizimin e pushtetit lokal, i cili u nënshtrohet ligjeve të Kosovës të hartuara sipas standardeve ndërkombëtare.

 

 

Parapagimi për RTK-në bëhet përmes faturave të KEK-ut

 

Prishtinë, 19 nëntor  2003 - Radio Televizioni i Kosovës dhe Korporata Energjetike e Kosovës (KEK), kanë nënshkruar dje kontratën për implementimin e parapagimit mujor për transmetuesin publik. Parapagimi për RTK do të realizohet përmes faturave mujore të energjisë elektrike duke filluar nga muaji nëntor.

Në bazë të këtij dokumenti ligjor, çdo amvisëri, biznes, ndërmarrje apo institucion në Kosovë duhet të paguajë taksën mujore prej 3.5 euro. Këtu përjashtohen rastet e regjistruara sociale në Ministrinë e Punës dhe Mirëqenies Sociale.

Kontrata është pjesë e zbatimit të urdhëresës administrative të UNMIK-ut nr 2003/12 të datës 3 qershor 2003, për arkëtim të parapagimit për transmetuesin publik. Faturës së muajit nëntor i shtohet rubrika për parapagimin e emetuesit publik me shkurtesën PEP.

Për mënyrën e financimit dhe parapagimit të RTK muajve të kaluar, jo rrallë janë zhvilluar debate të ashpra nëpër media të ndryshme.

Si është në Evropë?

 

Edhe në Evropë shumica televizioneve shtetërore financohen nga parapagimi i qytetarëve. Parapagimi më i lartë vjetor paguhet në Islandë - 340 euro, e më së paku në Rumani - 14 euro. Në Britaninë e Madhe parapagimi vjetor është 170 euro, në Zvicër 280, në Francë 115, në Itali 93 euro. Greqia aplikon taksën në orët e rrymës.

 

Mirëpo, parapagim nuk ka në Luksemburg, as në Spanjë, ndërkohë që parapagimi është braktisur në Portugali, në Holandë dhe në pjesën flamane të Belgjikës. Tani televizionet e tyre financohen nga buxheti.

Kjo formë e financimit (nga buxheti) me Rekomandimet e Këshillit të Evropës konsiderohet "ndihmë shtetërore për median publike" dhe është paraparë me një Kontratë të veçantë të Protokollit të Amsterdamit, i cili thotë se në ligjet e vendeve anëtare të Bashkimit Evropian duhet të futet një sistem i veçantë i normave të cilat do të garantojnë se me fonde nga buxheti nuk rrezikohet konkurrenca fer e tregut.

 

 

Lutfi Haziri merr pjesë në konferencën për demokracinë lokale në Kosovë që mbahet në Oslo

 

Gjilan, 19 nëntor  2003 - Më 20 e 21 nëntor 2003, në Oslo do të mbahet konferenca me temën "Demokracia lokale në Kosovës", në të cilën do të marrë pjesë edhe Lutfi Haziri, kryetar i Asociacionit të Komunave të Kosovës dhe kryetar i komunës së Gjilanit.

Organizatori i kësaj konference, IDEA-UNDP ka paraparë që për dy ditë të trajtojë problemet dhe sfidat e zhvilllimit të demokracisë, duke shpresuar edhe në kontributet që mund t`i japin vetë pjesëmarrësit.

Para nisjes për në Oslo, Lutfi Haziri tha se pret që konferenca do të jetë një përvojë më shumë për demokracinë lokale, por edhe një mundësi e mirë për përfaqësuesit e Kosovës që në një nivel të këtillë të paraqesin vizionin e tyre për demokracinë lokale.

 

 

Shëndetësisë së Kosovës iu shtua edhe Departamenti i Infermierisë dhe Mamisë

 

Prishtinë, 19 nëntor  2003 - Prej dje shëndetësisë së Kosovës iu shtua edhe Departamenti i Infermierisë dhe Mamisë, i cili vlerësohet se do të ndihmojë në përmirësimin e cilësisë së kujdesit shëndetësor për popullatën e Kosovës. Ndërkohë u përurua edhe Qendra e Mjekësisë Familjare.

 

Kështu 57 studentë për infermierë dhe për mami do të mësojnë në kolexhin, i cili është hapur në kuadër të Fakultetit të Mjekësisë të Universitetit të Prishtinës. Studentët do të shkollohen sipas standardeve të Organizatës Botërore të Shëndetësisë dhe Bashkimit Evropian.

Këtë program e mbështet Agjencia Evropiane e Rindërtimit me 1.200.000 euro. Njëherësh BE deri më tash ka investuar 29 milionë euro në sektorin e shëndetësisë në Kosovë.

 

 

Në Kosovë që nga viti 1999 deri më sot janë braktisur 229 fëmijë

 

Prishtinë, 19 nëntor  2003 - Gjatë vitit 2000 në Kosovë kishte 67 fëmijë të braktisur, ndërkaq më 2001 numri fëmijëve u rrit në 75. Që nga vera e vitit 1999 e deri në dhjetor të vitit 2002 në Kosovë janë braktisur 229 fëmijë, ndërkaq 25 fëmijë u janë kthyer nënave të tyre.

 

Këto të dhëna i ka bërë të ditur Instituti për Politikë Sociale në kuadër të Ministrisë së Punës dhe Mirëqenies Sociale, të cilin e drejton Mehdi Bërbatovci. Ai thotë se prej 229 rasteve 212 raste të braktisjes së foshnjeve janë të përakatësisë shqiptare, ndërkaq të tjerat janë të përkatësive të ndryshme etnike.

 

Megjithatë, sipas z. Bërbatovci, për një numër të madh të këtyre fëmijëve është rregulluar statusi dhe se është arritur sukses në adoptimin e tyre.

 

 

Përfaqësuesit e KFOR-it dënuan spekulimet e mediave serbe për vrasjen e Mihailloviqit

 

Viti, 19 nëntor  2003 - Përfaqësuesit e KFOR-it dhe të policisë ndërkombëtare në një konferencë me gazetarë në Viti dënuan fuqishëm aktin e vrasjes së Daniel Mihailloviqit në Mogillë të Vitisë.

 

Ata shprehën shqetësimin e tyre lidhur me insistimin e mediave serbe që këtë rast ta politizojnë në baza etnike. Komandanti i KFOR-it për Viti tha se është e turpshme të politizohet ky rast, sepse shkakton dhembje të madhe, kur dihet se ka të bëjë me mosmarrëveshje personale ndërmjet dy familjeve serbe.

 

 

Në Izbicë të Skënderajt u bë varrimi i gjashtë viktimave të masakrës serbe nga viti 1999

 

Skënderaj, 19 nëntor  2003 - Në varrezat e fashtit Izbicë të Skënderajt dje u bë varrimi i eshtrave të gjashtë viktimave të masakrës famëkeqe serbe në mars të vitit 1999.

 

Eshtrat e këtyre viktimave të masakrës së ushtrisë serbe katër vite më parë janë gjetur në varrezat masive në Serbi, ndërkaq identifikimi i tyre është bërë para pak ditësh në morgun e Rahovecit sipas metodës së ADN-së. Të varrosurit ishin nga Buroja, Vajniku, Klladernica dhe nga Klina e Poshtme.

 

Në ceremoninë e varrimit morën pjesë familjarë, qytetarë të shumtë dhe përfaqësues të pushtetit lokal të Skënderajt.

 

 

Ismail Kasumi emërohet drejtor i Departamentit të Sportit

 

Prishtinë, 19 nëntor  2003 - Ismail Kasumi është emëruar sot drejtor i Departamentit të Sportit nga Ministria e Kulturës, Rinisë dhe Sportit. Kasumi merret me sport prej më shumë se 35 vjetësh dhe ka të kryer fakultetin e kulturës fizike. Ndryshe Kasumi është instruktor i lartë i zhytjes dhe i skijimit.

Gjatë okupimit në vitet '90, ai ka qenë kryetar kryetar i Federatës së Sporteve të Kosovës, ndërkaq tani është drejtor për Rini dhe Sport në komunën e Prishtinës.

 

 

Akademikët shqiptarë kërkuan që objekti ku është mbajtur Kongresi i Alfabetit në Manastir, të vëhet në mbrojtje të UNESCO-s`

 

Shkup, 19 nëntor  2003 - Akademikët shqiptarë nga Shqipëria, Kosova dhe Maqedonia kërkuan që objekti ku është mbajtur Kongresi i Alfabetit në Manastir të vëhet në mbrojtje të si objekt i rëndësisë së veçantë për historinë dhe kulturën shqiptare.

 

Kjo kërkesë e akademikëve shqiptarë e mbështetur edhe nga zëvendëskryeministri i Maqedonisë, Musa Xhaferi ndodhi në ditën e dytë të simpoziumit shkencor që po mbahet në Shkup me temën: "Kongresi i Manastirit në funksion të standardizimit dhe pasurimit të gjuhës shqipe".

 

 

D0S më nuk ekziston

 

Beograd, 19 nëntor  2003 - Koalicioni i D0S, i cili është krijuar për ta përmbysur regjimin e Slobodan Milosheviqit në zgjedhjet në Serbi që janë mbajtur në vitin 2000, mbrëmë është shpërbërë dhe më nuk ekziston.

 

Kryesuesi i këtij koalicioni, Dragolub Miqunoviq ka thënë se koalicioni me fitoren në vitin 2000 ka bërë hap historik në udhëheqjen e Serbisë në rendin demokratik dhe në rrugën e reformave ekonomike dhe shoqërore, si edhe në integrimet ndërkombëtare, e veçanërisht në rrugën e anëtarësimit në BE.

 

 

Batler: Maqedonia mund të bëhet anëtare e NATO-s në vitin 2006

 

Shkup, 19 nëntor  2003 - Maqedonia mund të presë të bëhet anëtare e NATO-s në samitin e Stambollit në vitin 2006 dhe ka mbështetjen e plotë të SHBA-së, ka deklaruar ambasadori amerikan në Shkup Lorens Batler në TV maqedonas.

 

Batler ka vlerësuar se angazhimi i ushtarëve maqedonas në koalicionin ndërkombëtar në Irak dhe në Afganistan, si dhe nënshkrimi i marrëveshjes dypalëshe me SHBA-në për të mos i dorëzuar qytetarët amerikanë Gjykatës Penale Ndërkombëtare, kanë treguar se Maqedonia gjendet në rrugë të sigurt drejt Aleancës Veriatlantike.

 

 

Parlamenti Maqedonisë për kryetar të ri zgjodhi Lupço Jordanovskin, ndërkaq për nënkryetar Hysni Shaqirin

 

Shkup, 19 nëntor  2003 - Deputetët e Maqedonisë kanë zgjedhur për kryetar të Parlamentit Lupço Jordanovskin dhe për nënkryetar Hysni Shaqirin. Këtyre zgjedhjeve i paraprinë debate nga opozita, në veçanti deputetët e Partisë VMRO-DPMN, të cilët kundërshtuan kandidaturat e Lubço Jordanovskit dhe Hysni Shaqirit për këto poste.

Opozita maqedonase VMRO-DPMN, kryetarin e sapozgjedhur të Parlamentit të Maqedonisë, e cilëson si kundërshtar të presidentit të vendit, Boris Trajkovski. Po këta deputetë i sugjeruan Hysni Shaqirit, i cili u zgjodh nënkryetar, të tërhiqej nga kandidatura për shkak të historisë së tij të luftës.

 

Partia opozitare maqedonase mendon se Shaqiri nga pozita e nënkryetarit të Parlamentit do të acarojë popullatën maqedonase dhe siç u shprehën disa deputetë të saj do t'ua shtojë dhembjet nënave maqedonase, bijtë e të cilave u vranë në konfliktin 2001.

 

 

Katër vetë të vdekur nga rrëzimi i helikpoterit ushtarak suedez

 

Stokholm, 19 nëntor  2003 - Të paktën katër vetë kanë humbur jetën nga rrëzimi i një helikopteri ushtarak suedez të shpëtimit. Aksidenti ka ndodhur gjatë stërvitjeve në bregun perendimor të Suedisë, ka bërë të ditur ushtria suedeze.

Përveç katër të vdekurve në këtë aksident që ka ndodhur të martën në mbrëmje, edhe dy vetë konsiderohen të zhdukur, thotë ushtria suedeze, duke theksuar se kjo është fatkeqësia më e rëndë në ushtrinë suedeze në 35 vitet e fundit.

 

 

Mbretëresha Elizabet priti Presidentin Bush

 

Londër, 19 nëntor  2003 - Mbretëresha Elizabet i dha mirëseardhjen Presidentit amerikan Xhorxh Bush ditën e parë të vizitës së tij triditëshe në Britani. Presidenti Bush u prit sot me nderime ushtarake dhe himni kombëtar amerikan u këndua gjatë ceremonisë së pritjes në pallatin Bakingham.

Presidenti Bush do të mbajë një fjalim në Pallatin Whitewall, në të cilin pritet që ai të mbrojë përdorimin e forcës ushtarake në Irak. Një zyrtar i lartë i Shtëpisë së Bardhë tha se Presidenti Bush ka në plan të përshkruajë një botë, në të cilën paqja dhe siguria mbështeten në tre parime, bashkëpunimi ndërkombëtar, lufta si mjet i fundit dhe nxitje e demokracisë.

Zyrtari tha se Presidenti do të theksojë përsëri angazhimin e Shteteve të Bashkuara ndaj institucioneve shumëkombëshe dhe do të thotë se Lindja e Mesme nuk duhet përjashtuar nga proceset demokratike vetëm për shkak se është kryesisht rajon mysliman.

Pas fjalimit, Presidenti Bush ka në plan të takohet me familjet e viktimat britanike të sulmeve terroriste të 11 shtatorit 2001 kundër Shteteve të Bashkuara.

 

 

Bush fillon vizitën në Londër

 

Londër, 19 nëntor  2003 - Presidenti amerikan Xhorxh Bush dhe zonja e tij kanë kaluar natën në Pallatin Bakingam në Londër.

Dita e presidentit fillon me 41 të shtëna topi në shenjë mikpritjeje dhe përfundon me një darkë zyrtare në Pallatin Buckingham - ceremoni që Shtëpia e Bardhë shpreson se do të jenë çastet më kryesore të vizitës.

Presidenti Bush do të takohet edhe me të afërmit e britanikëve që gjetën vdekjen gjatë sulmeve të 11 shtatorit 2001.

Ai do të zhvillojë bisedime me udhëheqësin konservator, Majkëll Hauard, dhe atë liberaldemokrat, Çarls Kenedi; dhe do të mbajë një fjalim për politikën e jashtme.

Shtëpia e Bardhë thotë se fjalimi do të jetë i rëndësishëm. Presidenti pritet të thotë se ai vazhdon të besojë në organizatat shumëpalëshe, por se ka kohë kur vendet duhet të përdorin forcën për të mbrojtur paqen dhe për të mbrojtur vlerat.

 

 

Vrasësit me bombë të cilët sulmuan dy sinagoga në Stamnboll ishin shtetas turq

 

Stamboll, 19 nëntor  2003 - Autoritetet turke bënë të ditur sot se analizat ADN kanë konfirmuar se vrasësit me bombë, të cilët të shtunën e kaluar sulmuan dy sinagoga, ishin shtetas turq.

Mesut Çabuk (29) dhe Gokan Elaltuntas (22) kanë kryer sulmet në të cilat u vranë 23 vetë, ndërkaq u plagosën 300 të tjerë, tha para gazetarëve guvernatori i Stambollit Muamer Gyler.

Ai tha se stili i sulmeve është i ngjashëm me sulmet që i bën rrjeti terrorist Al Kaida, njofton AP.

 

 

Mubarak ndërpreu fjalimin para parlamentit për shkak të "problemeve të vogla me shëndetin"

 

Kajro, 19 nëntor  2003 - Presidenti egjiptian Hosni Mubarak ndërpreu sot fjalimin e vet para parlamentit, që e transmetonte edhe televizioni shtetëror, siç thuhet, për shkak të "problemeve të vogla me shëndetin".

"Presidenti është mirë dhe do të kthehet për disa minuta për të përfunduar fjalimin", tha kryetari i parlamentit Fathi Sorour në një seancë të përbashkët të parlamentit dhe të Këshillit Shura.

 

 

Irani e Iraku nënshkruajnë marrëveshje bashkëpunimi

 

Bagdad, 19 nëntor  2003 - Udhëheqësi i Këshillit Qeverisës Irakian, Jalal Talabani, ka thënë se Irani ka pranuar të ndihmojë në luftën kundër terrorizmit në Irak.

Duke folur për bisedimet në Teheran - vizita e parë jashtë vendit e një delegacioni të këshillit irakian - zoti Talabani tha se iranianët pranuan se vala e tanishme e sulmeve në Irak nuk ishte rezistencë ndaj pushtimit, por punë e vrasësve të pashpirt.

Ministri i jashtëm irakian, Hoshyar Zebari, tha se Irani do të punonte për të forcuar kufirin midis të dy vendeve.

Të dy palët kanë nënshkruar gjithashtu një marrëveshje që Irani të përfshihet në shumë fusha të rindërtimit të Irakut.

Ato aprovuan në mënyrë provizore një marrëveshje që nafta irakiane të përpunohet në një rafineri iraniane.

 

 

Tikriti sulmohet për të tretën natë me radhë

 

Tikrit, 19 nëntor  2003 - Forcat amerikane sulmuan mbrëmë pozicione të guerriljeve në qytetin irakian të Tikritit për të tretën natë me radhë. Trupat amerikane hapën zjarr me mortaja kundër godinave dhe objekteve të tjera nga rrethinat e qytetit të lindjes së ish udhëheqësit irakian Sadam Husein. Zyrtarët thanë se disa prej objetivave ishin përdorur nga guerriljet për të sulmuar forcat amerikane.

Po dje, avionët amerikanë bombarduan disa objekte të përdorura nga luftëtarët guerilas në afërsi të qytetit Bakuba në pjesën veriore të Irakut, në njërin nga operacionet më të mëdha ajrore të ndërmarra që nga përfundimi i luftimeve në shkallë të gjerë.

 

Sulmi i djeshëm ishte një tjetër hap në ofensivën e re kundër kryengritësve në këto zona. Dy ushtarë amerikanë u vranë të hënën në incidente të veçanta në veri të Bagdadit. Dhjetëra shpërthime u dëgjuan mbrëmë edhe në Bagdad.

 

 

Izraelitët vranë një sulmues nga Jordania

 

Jerusalem, 19 nëntor  2003 - Forcat izraelite sot kanë vrarë një sulmues nga Jordania, i cili plagosi disa njerëz duke kaluar kufirin e Izraelit afër qytetit Eiliat, njofton Rojter duke cituar burimet e sigurimit izraelit.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |