E marte, 18 nëntor 2003

E marte, 18 nëntor 2003

Përmbajtja:

Robertson gjatë vizitës lamtumirëse tha se Kosovë tha duhet të përmbushë standardet deri në gjysmën e vitit 2005
Nga konferenca për gazetarë në Prishtinë e lordi Xhorxh Robertson
Ministrat e jashtëm të BE-së thanë se Kosova dhe populli i saj e kanë vendin në Evropë
Mek Shejn: Kosovarët të marrin përgjegjësitë
Policia ka arrestuar tre persona dhe ka konfiskuar 100 vetura të kompanisë "Ital beton", thotë zëdhënësi Çapell
Kryesia e Kuvendit të Kosovës ka shqyrtuar peticionin për Unionin Shqipëri – Kosovë
Ismail Kadare të enjtën nderohet me titullin Doktor Nderi i Univesritetit të Prishtinës
Të enjtën serbët në Mitrovicë do të kërkojnë kthimin e ushtrisë dhe të policisë së Serbisë në Kosovë
Vetëvrasjet dukuri me përmasa shqetësuese në Kosovë
Podujevë: Mbi 4 mijë nënshkrime janë mbledhur në peticionin për gjetjen rrëmbyerve dhe robërve nga Kosova
Policia e UNMIK-ut ka arrestuar të birin e pronarit të Kompanisë italiane "Ital-Beton" në Kosovë
Në një ceremoni rasti në Prishtinë kanë dhënë betimin 90 inspektorë të rinj tatimor
UNHCR dënon sulmin ndaj të zhvendosurve serbë në Mushtisht
Bashkimi i Intelektualëve Shqiptarë në Zvicër angazhohet për riaktivizimin e aksionit "Familja ndihmon familjen"
Presidenti Moisiu dënoi lidhjet e politikës me krimin
Qeveria e Shqipërisë do të ngarkojë me përgjegjësi individët që kanë vepruar në kundërshtim me ligjin, në zonën e Himarës
Në Shkup po i zhvillon punimet simpoziumi shkencor kushtuar 95-vjetorit të alfabetit të gjuhës shqipe
Gjenerali Klark do të dëshmojë në Tribunalin e Hagës kundër Millosheviqit
Tribunali i Hagës ka akuzuar ish-liderin e serbëve të Kninit Milan Babiq për krime lufte
Solana dhe Paten kanë vlerësime të ndryshme për dwshtimin e zgjedhjeve presidenciale në Serbi
Kryeministri i Luksemburgut viziton Shkupin dhe Kosovën
Rexhep Meidani u tërhoq nga gara për postin e kryetarit të Partisë Socialiste
Kancelari Shrëder u rizgjodh shef i Partisë Socialdemokrate
Eshtë penguar një atentat kundër kryeministrit të Holandës
Nga rrëzimi i një aeroplani në Sudan 13 vetë humbën jetën
Vriten dy izraelitë, kurse në një incident tjetër plagosen shtatë palestinezë
Londra me masa të mëdha të sigurisë
Ofensivë e re ushtarake në Irak
Dorëheqja e anëtarit të Autoritetit të Përkohshëm
Presidenti Bush ripohon angazhimin amerikan për të mbajtur trupat amerikane në Irak

Robertson gjatë vizitës lamtumirëse tha se Kosovë tha duhet të përmbushë standardet deri në gjysmën e vitit 2005


Ai tha se nga udhëheqësit e Kosovës kishte marrë premtimet për ta vazhdur dialogun teknik me Serbinë dhe Malin e Zi si njëri nga standardet që Kosova duhet të përmbushë deri në vitin 2005. Ai shtoi se bisedimet teknike duhet të vazhdojnë, duke premtuar se në javën tjetër në Beograd do të përcjell mesazhe të njëjta sikurse edhe në Kosovë.
Ndërkaq, më herët, në aeraportin e Prishtinës, lordi Robertson ka deklaruar se beson që kosovarët do t'i plotësojnë standardet e kërkuara nga komuniteti ndërkombëtar, deri në gjysmën e vitit 2005.

Për këtë ai u shpreh i bindur në angazhimin e qytetarëve, të cilët sipas tij janë të përkushtuar dhe do të arrijnë të përmbushin këtë kërkesë për hapjen e çështjes së statusit final të Kosovës. Ai konsideron se çështja e statusit të Kosovës nuk është më e rëndësishme se sa përmbushja e standardeve, i cili figurativisht u shpreh se statusi nuk i ushqen fëmijët e Kosovës.
Lordi Robertson qëndroi në Kosovë së bashku me komandantin e krahut jugor të Aleancës Veriatlantike, admiralin Gregori Xhonson.
Robertson ka vizituar edhe fshatin Novosellë të Mitrovicës, ku është takuar me banorë të këtij fshati me popullsi të përzier, si dhe vizitoi shtëpitë e ndërtuara për të zhvendosurit, që kthehen në mënyrë të organizuar.
Sekretari i përgjithshëm i NATO-s me këtë rast u bëri thirrje udhëheqësve shqiptarë dhe përfaqësuesve të pakicës serbe në Kosovë që të mbështesin qartë një Kosovë shumetnike.
Ndërkaq, pas takimit me banorët shqiptarë dhe serbë të këtij fshati, lordi Robertson u tha gazetarëve se të zhvendosurit kanë të drejtë të kthehen dhe se për këtë duhet të jepet një mesazh i qartë nga udhëheqësit politikë.
Lidhur me qytetin e ndarë të Mitrovicë, z. Robertson tha se ka histori që nuk mund të kapërcehet për disa muaj apo disa vjet, por siç u shpreh ai, "rojat e urës" janë larg tash dhe është vendosur një polici shumetnike.


Nga konferenca për gazetarë në Prishtinë e lordi Xhorxh Robertson

Prishtinë, 18 nëntor 2003 - Pas përfundimit të takimit me përfaqësuesit e institucioneve të Kosovës dhe me ata ndërkombëtarë, Sekretari i Përgjithshëm i NATO-s, lordi Robertson mbajti një konferencë me gazetarë.

Robertson tha se prania e forcave ndërkombëtare në Kosovë do të vazhdojë, pavarësisht nga arritja e standardeve dhe nga statusi i Kosovës, edhe pse mund të ndryshojë struktura e KFOR-it, por jo edhe efektiviteti për ta ruajtur përparimin në Kosovë dhe për të garantuar sigurinë e saj.
Ndërkaq, lidhur me rastin e zgjedhjeve të djeshme presidenciale në Serbi, ku shumicën e madhe e fituan radikalët, lordi Robertson tha se nëse serbët duan ta ruajnë përparimin drejt anëtarësisë së Bashkimit Evropian, ata duhet të vazhdojnë ta dënojnë dhe denoncojnë ekstremizmin dhe gjuhën e ekstremizmit.
Ai shfaqi shpresën se njerëzit në Serbi do të mbesin të vendosur për të qenë pjesë e Evropës dhe kundër radikalizmit ekstrem, i cili i solli kaq shumë mjerim gjithë rajonit, tha Robertson. Ai ndërkohë porositi edhe shqiptarët që të mos përkrahin gjuhën e urretjes.
"Aq shumë njerëz morën pjesë në çlirimin e Kosovës dhe në përmbysjen e spastrimit etnik, mirëpo nëse Kosova do të bëhej një vend vetëm i shqiptarëve, atëherë në do të humbim", tha Lordi Robertson.


Ministrat e jashtëm të BE-së thanë se Kosova dhe populli i saj e kanë vendin në Evropë

Bruksel, 18 nëntor 2003 - Ministrat e jashtëm të Bashkimit Evropian në takimin e djeshëm në Bruksel thanë se zgjidhja e statusit final të Kosovës mund të fillojë kah mesi i vitit 2005, apo më herët nëse më parë bëhet një përparim i mjaftueshëm në përmbushjen e standardeve të kërkuara nga bashkësia ndërkombëtare.
Në një deklaratë të veçantë nga ky takim ministrat e jashtëm të BE rikonfirmuan se qytetarët e Kosovës shumentike dhe demokratike do ta kenë vendin e tyre në Evropë pas zbatimit të plotë të Rezolutës 1244.

Ministrat e jashtëm të BE-së riafirmuan dje në takimin e tyre në Bruksel edhe njëherë se dialogut ndërmjet Prishtinës dhe Beogradit është standardi kyç dhe element esencial i politikës së bashkësisë ndërkombëtare në Kosovë të emëruar: standardet para statusit. BE-ja nga ky takim u ka bërë thirrje edhe njëherë të gjitha palëve të involvuara që të sigurojnë një fillim të hershëm dhe konstruktiv të punës së grupeve punuese, si vazhdimësi e takimit të Vienës.
Këshilli i BE-së po ashtu ka mirëpritur qëllimin e Hari Holkerit për të caktuar udhëzimet më konkrete për përparim në operacionalizimin e standardeve para statusit.
BE shpreh mbështetje edhe për planin e Grupit të Kontaktit që nëse plotësohen standardet, atëherë do të fillojë çështje e zgjidhjes së statusit final të Kosovës. Duke reafirmuar se Kosova dhe populli i Kosovës e kanë vendin në Evropë, ministrat e BE-së kanë nënvizuar në konkluzionet se BE është i gatshëm të ndihmojë në këtë proces.


Mek Shejn: Kosovarët të marrin përgjegjësitë

Londër, 18 nëntor 2003 - Denis Mekshejn (Denis McShane), sekretar i Shtetit në kabinetin qeveritar britanik, i ka cilësuar të drejta kërkesat për bartjen e përgjegjësive tek institucionet e Kosovës dhe për përbushjen e standardeve.
"Mendoj se është e drejtë ajo që ka vendosur të bëjë BE-ja, si edhe Grupi i Kontaktit dhe SHBA-të, që të intensifikohet marrja e marrjes përgjegjësive nga ana e kosovarëve. Kjo është për të mirën e tyre, që të përmbushin standardet, ta luftojnë krimin dhe, ajo që është më e rëndësishme, të hzjnë në dialog me Serbinë", ka deklaruar zoti Mek Shejn, në një intervistë për BBC-në.
Ai ka thënë se Kosova është pjesë e Evropës dhe se pa një marëveshje midis Prishtinës e Beogradit. ANuk do të ketë përparim dhe mirëqenie në Evropë, derisa në Ballkanin Perëndimor nuk ka një marrëveshje rreth marrëdhënieve ndërmjet Prishtinës e Beogradit", është shprehur zyrtari britanik.
Mekshejn ka thënë gjithashtu se një Serbi demokratike do të ndihmojë që rajoni të jetë i qëndrueshëm dhe demokratik.
Këto komente z. Mekshejn i ka bërë pas vendimit të ministrave të Jashtëm të Bashkimit Evropian që të mbështesin idenë e paraqitur nga amerikanët që bisedimet për zgjidhjen e statusit përfundimtar të Kosovës të fillojnë kah mesi i vitit 2005 dhe pas dështimit të zgjedhjeve presidenciale në Serbi.


Policia ka arrestuar tre persona dhe ka konfiskuar 100 vetura të kompanisë "Ital beton", thotë zëdhënësi Çapell

Prishtinë, 18 nëntor 2003 - Zëdhënësi Derek Çapell bëri të ditur se policia e UNMIK-ut ka arrestuar tre persona dhe ka konfiskuar 100 vetura të kompanisë "Ital beton".

Bëhet fjalë për një britanik, një shqiptar dhe një italian të cilët po mbahen në arrest me akuza për përfshirjen në vjedhjen e veturave komerciale dhe dokumentim falso. Sipas policisë, shtatë nga 100 veturat e konfiskuara janë identifikuar si të vjedhura.

Poashtu gjatë operacionit të policisë është konfiskuar edhe një kilogram drogë. Sipas zyrtarëve të policisë së UNMIK-ut besohet se Kompania AItal beton@ është e përfshirë në vjedhjen e organizuar të pajisjeve të rënda për ndërtim në Evropë. Pronari i Kompanisë "Ital beton" është arrestuar kohëve të fundit në Turqi dhe është ekstraduar në Itali.


Kryesia e Kuvendit të Kosovës ka shqyrtuar peticionin për Unionin Shqipëri – Kosovë

Prishtinë, 18 nëntor 2003 - Në takimin e sotëm të kryesisë së Kuvendit të Kosovës është shqyrtuar edhe peticioni për Unionin Shqipëri - Kosovë, i nënshkruar nga rreth 46 mijë qytetarë.
Anëtari i kryesisë nga radhët e PDK-së Hydajet Hyseni, tha se kryesia e ka vlerësuar si të ligjshëm peticionin, ndaj edhe procedimi i mëtejmë do të bëhet sipas rregullave parlamentare.
Sipas Hysenit, vullneti i qytetarëve duhet ta gjejë rrugën deri tek institucionet dhe peticioni i LPK-së vjen si një nga opsionet që natyrshëm kanë qenë të pranishme në jetën politike të Kosovës. Përfaqësuesi serb Oliver Ivanoviq paralajmëroi se jetësimi i nismave që do të ndryshonin kufijtë, nënkupton destabilizim të sërishëm të rajonit.
Në mbledhjen e sotme, kryesia ka vendosur që në rend dite të seancës së të enjtes të shqyrtohet për të parën herë një projektligj dhe të bëhet edhe shqyrtimi i dytë për dy projektligje tjera.


Ismail Kadare të enjtën nderohet me titullin Doktor Nderi i Univesritetit të Prishtinës

Prishtinë, 18 nëntor 2003 - Shkrimtari i mirënjohur Ismail Kadare është nderuar me titullin Honoris Causa (Doktor Nderi) nga Universiteti i Prishtinës. Ky çmim Kadaresë do t'i dorëzohet të enjtën më 20 nëntor, në një mbledhje solemne të Universitetit të Prishtinës.
Vite më parë Ismail Kadare është pranuar anëtar korrespondent i Akademisë së Shkencave dhe Arteve të Kosovës.


Të enjtën serbët në Mitrovicë do të kërkojnë kthimin e ushtrisë dhe të policisë së Serbisë në Kosovë

Mitrovicë, 18 nëntor 2003 - Të enjtën serbët kanë paralajmëruar organizimin e një proteste në Mitrovicë, në të cilën, siç thuhet, për shkak të sutuatës së sigurisë, do të kërkojnë kthimin e ushtrisë dhe të policisë së Serbisë në Kosovë.

Organizator i kësaj proteste është i ashtuquajturi "Këshill nacional serb" i veriut të Kosovës. Gjithashtu serbët do të protestojnë edhe kundër dorëzimit të gjeneralëve serbë në Tribunalin e Hagës.
Në këtë protestë janë ftuar të marrin pjesë edhe dy ekstremistë serbë nga Beogradi - akademik Kosta Çavoshki dhe analisti ushtarak Milan Drecun, i cili ka qenë një nga propagandistët kryesorë të regjimit të Millosheviqit në TV e Serbisë.
Çavoshki është edhe kryetar i një këshilli për mbrojtjen e ish-diktatorit jugosllav Sllobodan Millosheviq, i cili po gjykohet në Hagë për krime lufte. Për momentin nuk dihet nëse serbët kanë marrë leje për organizimin e kësaj proteste dhe nëse policia e UNMIK-ut do të lejojë pjesëmarrjen e dy ekstremistëve serbë nga Beogradi.


Vetëvrasjet dukuri me përmasa shqetësuese në Kosovë

Prishtinë, 18 nëntor 2003 - Në amfiteatrin e Bibliotekës Kombëtare dhe Universitare të Kosovës të shtunën u mbajt një tribunë e hapur me temën "Vetëvrasjet - si të parandalohen" të organizuar nga 4 degët e Prishtinës të Forumit të Rinisë të LDK-së.

Këtë tribunë, të cilën e hapi dhe i përshëndeti të pranishmit sekretari i përgjithshëm i FR të LDK-së, Avni Gashi, foli për arsyeshmërinë e mbajtjes së kësaj tribune, duke cekur 256 raste të vetëvrasjeve vetëm prej fillimit të vitit 2001 e deri më sot.
Ndërkaq, dy ligjëruesit e kësaj tribune, dr.Skender Boshnjaku (neuropsikiatër) dhe dr. Shefqet Krasniqi (teolog), paraqitën pikëpamjet shkencore, përkatësisht fetare në lidhje me këtë dukuri e cila pas luftës ka marrë përmasa të një dukurie shqetësuese në Kosovë. Ishte konstatim i përbashkët i të dy ligjëruesve se rruga më e mirë e parandalimit të kësaj dukurie është forcimi i besimit në zotin.
Në pjesën e dytë të kësaj tribune ligjëruesit u përgjigjen në pyetjet e shumta të të pranishmëve të cilat shpesh u përcollën me duartrokitje të gjata.


Podujevë: Mbi 4 mijë nënshkrime janë mbledhur në peticionin për gjetjen rrëmbyerve dhe robërve nga Kosova

Podujevë, 18 nëntor 2003 - Aksioni i Këshillit Koordinues i Asociacioneve Familjare të Pengjeve, të zhdukurve dhe familjeve me viktima të luftës (KKAF) dhe Rrjeti i aktivistëve "Kosova Action Network" ka filluar para dhjetë ditëve edhe në komunën e Podujevës, njoftoi sot koordinatori i këtij aksioni Latif Mehmeti, i cili tha se aksioni ka filluar me përkrahjen e udhëheqjes komunale.
Aktualisht në vetëm 10 qendra janë mbledhur 3100 nënshkrime dhe ky aksion do të vazhdojë në të 68 fshatrat dhe 3 Lagjet e Qytetit të Podujevës, thotë ai.
Ndërkaq, Kryetari i NKMLDNJ-së në Podujevë Ahmet Hasani njoftoi se veprimtarët e këtij nënkëshilli kanë mbledhur 1250 nënshkrime dhe se po punohet vazhdimisht në terren për mbledhjen e nënshkrimeve për gjetjen e pengjeve dhe të të zhdukurve nga Kosova, numri i të cilëve sipas organizatorëve të aksionit "Të gjithëve po na mungojnë", është mbi 3500 persona.
Aksioni për mbledhjen e nënshkrimeve në komunën e Podujevës është duke vazhduar dhe vetëm në ditët e para ka rezultuar me grumbullimin e mbi 4 mijë nënshkrimeve.


Policia e UNMIK-ut ka arrestuar të birin e pronarit të Kompanisë italiane "Ital-Beton" në Kosovë

Prishtinë, 18 nëntor 2003 - Policia e UNMIK-ut ka arrestuar shtetasin italian, Tomas Polsel, i biri i pronarit të Kompanisë së njohur italiane në Kosovë "Ital-Beton". Kjo kompani njihet në Kosovë si firma, që ka fituar më së shumti tenderë për asfaltimin e rrugëve.

Sipas njoftimeve të fundit, Polsel është arrestuar nga policia e UNMIK-ut e cila gjatë bastisjes në banesën e tij ka gjetur një kilogram drogë dhe me akuzën për falsifikim dokumentash. Policia dhe gjykatësja hetuese dyshojnë se pronari i Kompanisë "Italo - Beton" ka manipuluar me automjetet e punës.
Pronari i kësaj kompanie aktualisht gjendet në Itali.


Në një ceremoni rasti në Prishtinë kanë dhënë betimin 90 inspektorë të rinj tatimor

Prishtinë, 18 nëntor 2003 - Para ministrit për Ekonomi dhe Financa të Kosovës, Ali Sadriu kanë dhënë dje betimin 90 inspektorë të rinj tatimorë.

Në fjalën e rastit ministri Sadriu tha se ata duhet të jenë syri vigjilent i shtetit si ndaj tatim-paguesve delikuentë, po ashtu edhe ndaj individëve të papërgjegjshëm të cilët arrijnë të futen në sistem pa pasur asgjë të përbashkët me fjalët e shenjta të këtij betimi, që ata kishin bërë në këtë ceremonial.
Inspektorët tatimorë gjatë betimit të tyre thanë se do t'i binden ligjit dhe do t'i kryejnë detyrat e tyre pa ndonjë anim etnik, religjioz, apo racor.


UNHCR dënon sulmin ndaj të zhvendosurve serbë në Mushtisht

Prishtinë, 18 nëntor 2003 - UNHCR Kosova dënon ashpër incidentin që ngjau në fshatin Mushtisht, të komunës së Suharekës, të enjten, më 13 nëntor 2003.

Hedhja e gurëve drejt të zhvendosurve serbë gjatë vizitës "Shko dhe shiko" është sulm serioz në të drejtën e tyre themelore për të vizituar pronën dhe vendin e tyre të origjinës, e po ashtu të drejtën për kthim UNHCR merr pjesë në mënyrë aktive në organizimin e vizitave "Shko dhe shiko", në tërë Kosovën, që nga viti 2000.

Vetëm në vitin 2003, më tepër se 70 vizita të organizuara nga UNHCR janë kryer pa ndonjë problem të madh B në shumë raste me përkrahje inkurajuese nga komuniteti pritës dhe autoritetet lokale.
Procesi i kthimit në Kosovë është i paanulueshëm dhe UNHCR riafirmon angazhimin e vet në të drejtën për kthim dhe mundësinë për qasje në pronën për të gjitha komunitetet, pa dallim të përkatësisë etnike, thuhet në një komunikatë të UNHCR-it në Prishtinë.


Bashkimi i Intelektualëve Shqiptarë në Zvicër angazhohet për riaktivizimin e aksionit "Familja ndihmon familjen"

Bernë, 18 nëntor 2003 - Në Bernë të Zvicrës u mbajt mbledhja e Kuvendit të gjashtë të Bashkimit të Intelektualëve Shqiptarë në Zvicër. Duke i bërë një vështrim të shkurtër aktivitetit të kësaj shoqate, Dr. Ahmet Xhigoli, theksoi që shkas i këtij tubimi është mbledhja e Kuvendit të gjashtë ku me këtë po përmbyllet puna gjashtëvjeçare e shoqatës.

Në vazhdim, ai, shkurtimisht bëri një njoftim për rrugën e formimit të kësaj Shoqate dhe për rezultatet e punës gjatë kësaj periudhe. Po ashtu z. Xhigoli theksoi që për këto gjashtë vjet të kaluara, në këtë shoqatë janë bërë përpjekje dhe vetëmohime të mëdha dhe janë arritur rezultate të konsiderueshme si dhe në masë të madhe janë realizuar detyrat e parashtruara në programin e saj.
BISHZ-ja, prej themelimit e deri më tani, ka publikuar në rreth 40 deklarata dhe reagime qëndrimet e saja lidhur me zhvillimet në Kosovë, Shqipëri, Maqedoni, dhe në trevat tjera shqiptare, dhe po ashtu me vëmendje ka përcjellë dhe ka reaguar ndaj të gjitha shkrimeve të pavërteta lidhur me çështjen e Kosovës të paraqitura në mediat zvicerane dhe më gjërë.
Interesim të veçantë në këtë tubim nxiti edhe propozimi për riaktivizimin e aksionit "Familja ndihmon familjen", për shkak të gjendjes akoma të rënduar të shumë familjeve shqiptare në vendlindje, ndaj edhe mbretëroi binda se të parët në këtë aksion me kontribute duhet të jenë vetë anëtarët e Kryesisë së BISHZ-së. Në kuvend u bë edhe zgjedhje e kryesisë së re, me që rast për kryetar u emërua Ahmet Xhigoli, kurse nënkryetar, Sinollah Shehu.

Në fund të kuvendit me mirënjohje u shpërblyen, Prefekti i Kuksit, për kontributin e madh në strehimin e refugjatëve nga Kosova, profesor Astrit Leka, për angazhimin e tij në ngritjen e shtatoreve të Skenderbeut dhe të Nënës Terezë në disa nga metropolet evropiane. (R.R.)


Presidenti Moisiu dënoi lidhjet e politikës me krimin

Tiranë, 18 nëntor 2003 - Presidenti i Shqipërisë, Alfred Moisiu, ka kritikuar sot ashpër lidhjet e politikës me krimin.
Gjatë prezantimit të punës së Inspektoriatit të lartë të kontrollit të pasurive, a ka kërkuar që akuzat për korrupsion dhe për lidhje me krimin të shoqërohen me dënime.
Presidenti Moisiu nuk e ka kursyer nga kritikat as prokurorinë. Ai ka thënë se edhe prokuroria është treguar jo shumë aktive në luftimin e krimit e të korrupsionit.


Qeveria e Shqipërisë do të ngarkojë me përgjegjësi individët që kanë vepruar në kundërshtim me ligjin, në zonën e Himarës

Tiranë, 18 nëntor 2003 - Qeveria e Shqipërisë tha se individët që kanë vepruar në kundërshtim me ligjin gjatë zgjedhjeve poltësuese për pushtetin lokal në zonën e Himarës do të ngarkohen me përgjegjësi.
*Qeveria Shqiptare garanton edhe një herë opinionin publik, brenda dhe jashtë vendit, si edhe partnerët tanë ndërkombëtarë se, përsa i përket shqetësimeve të krijuara në këtë zonë, në respektim të legjistacionit në fuqi, do të ngarkojë me përgjegjësi të gjithë ata individë dhe struktura, të cilat kanë vepruar në kundërshtim me ligjin+, thuhet në një deklaratë për opinion të zëvendësministrit të Jashtëm, Luan Hajdaraga..
*Qeveria Shqiptare është në pritje të rezultatit përfundimtar dhe po bashkëpunon ngushtë me Komisionin Qendror Zgjedhor dhe me institucionet ndërkombëtare të specializuara, si OSBE dhe ODHIR, për të dhënë vlerësimin dhe gjykimin e duhur+, thuhet më tutje në dekleratën e z. Hajdaraga.


Në Shkup po i zhvillon punimet simpoziumi shkencor kushtuar 95-vjetorit të alfabetit të gjuhës shqipe

Shkup, 18 nëntor 2003 - Në Shkup, në lokalet e Akademisë së Shkencave të Maqedonisë me një simpozium shkencor po shënohet 95-vjetori i alfabetit të gjuhës shqipe, ku përpos shkencëtarëve e personaliteteve të shumta shqiptare nga Shqipëria, Kosova, Maqedonia e diaspora, mori pjesë edhe presidenti maqedonas, Boris Trajkovski.
Të pranishmit i përshëndetën kryetari i Akademisë së Shkencave dhe Artevet të Maqedonisë, akademik Mateja Mateski, si dhe nënkryetari i Qeverisë së Maqedonisë dhe krytari i Këshillit Organizativ, Musa Xhaferi.

Ky i fundit tha me këtë rast se kjo ngjarje po shënohet në mënyrë mjaft të civilizuar dhe demokratike. Në këtë simpozium në temën: "Kongresi i alfabetit në Manastir në funksion të standardizimit të gjuhës shqipe", ku 30 punonjës shkencor lexuan kumtesat e tyre.

Në konferencë shkencore u tha se Kongresi i Manastirit ka shprehur para opinionit të huaj aspiratat properëndimore, duke dëshmuar se shqiptarët kishin gjuhën, historinë dhe kulturën e tyre të lashtë. Prandaj zgjedhja e alfabetit latin për shqiptarët, ishte edhe një dëshmi e emancipimit të kulturës tonë.
Në trajtesën e tij shkencore, akademik Idriz Ajeti nga Kosova, ka thënë se Kongresi i Manastirit për unifikimin e gjuhës shqipe, ka hyrë në historinë e kulturës shqiptare.

Ai theksoi se Kongresi i Manastirit i frymëzuar nga idetë e mëdha të Rilindjes nga dy alfabete, dalloi dy: alfabetin e Stambollit dhe alfabetin, që e kemi sot.
Në trajtesën e tij, historiani i njohur nga Shqipëria, Kristaq Prifti thotë se këtë detyrë madhore të njësimit të alfabetit të shqipes, historia ia ngarkoi ta zgjidhte Kongresit të Manastirit, i cili u thirr me nismën e Klubit "Bashkimi" të Manastirit në rrethana të reja të favorshme politike, që u krijuan për lëvizje kulturore kombëtare pas fitorës së revolucionit xhonturq në vitin 1908 dhe pas shpalljes së Kushtetutës turke.
Me kumtesën e tij u paraqit edhe intelektuali dhe publicisti i shquar shqiptar, Thoma Kacori, i cili me vite jeton dhe vepron në Bullgari.
Njëri prej organizatorëve të këtij simpoziumi akad. Ali Aliu ishte i kënaqur me rrjedhën e këtij manifestimi për shënimin e përvjetorit të Kongresit të Manastirit. "Çdo gjë ka rrjedhë mirë. Sot filloi pjesa tjetër e këtij programi - pjesa shkencore, që do të vazhdojë punimet dhe brenda tri seancave do të lexohen mbi 35 kumtesa", tha z. Aliu.
Po kështu në Tetovë ka përfunduar konferenca shkencore, kushtuar 95-vjetorit të alfabetit shqip. Historianë të shumtë nga mbarë hapësira shqiptare, folën për rëndësinë e Kongresit të Manastirit dhe për periudhat nëpër të cilat kaloi kombi ynë.


Gjenerali Klark do të dëshmojë në Tribunalin e Hagës kundër Millosheviqit

Hagë, 18 nëntor 2003 - Ish-komandanti i NATO-s, gjenerali amerikan Uesli Klark do të dëshmojë në Tribunalin e Hagës kundër ish-diktatorit jugosllav Sllobodan Millosheviq.
"Për shkak të rëndësisë historike të këtij procesi, pasi është gjyqi i parë ndërkombëtar kundër një kryetari shteti, unë pranova të dëshmoj",- tha gjenerali i pensionuar Klark, njëri nga kandidatët demokrat për president të Shteteve të Bashkuara të Amerikës.


Tribunali i Hagës ka akuzuar ish-liderin e serbëve të Kninit Milan Babiq për krime lufte

Hagë, 18 nëntor 2003 - Tribunali i Hagës ka akuzuar ish-liderin e serbëve të Kninit Milan Babiq për krime lufte gjatë viteve '90 në Kroaci, për dëbimin e popullsisë kroate dhe të tjerëve, bëri të ditur sot zëdhënësja e Tribunalit Florans Hartman.
Milan Babiq vitin e kalauar ka qenë dëshmitar i Prokrurisë së Hagës kundër Sllobodan Millosheviqit.


Solana dhe Paten kanë vlerësime të ndryshme për dwshtimin e zgjedhjeve presidenciale në Serbi

Bruksel, 18 nëntor 2003 - Dy zurtarët më të lartë të Bashkimit Evropian për politikë të jashtme, Havier Solana dhe Kris Paten kanë shprehur qëndrime të ndryshme lidhur me zgjedhjet e dështuara presidenciale në Serbi.
Z. Solana nuk ka shprehur ndonjë shqetësim për dështimin e këtyre zgjedhjeve, por ka porositur autoritetet serbe që këtë situatë ta kalojnë sa më parë.
Mbrëmë vonë, në një konferencë për shtyp në Bruksel, Solana ka thënë se për Unionin Serbi-Mal i Zi janë më të rëndësishme zgjedhjet parlamentare të Serbisë.
Ndërkaq, komesari evropian për politikë të jashtme, Kris Paten, nuk e ka fshehur zgënjimin e tij për dështimin e zgjedhjeve. Në të njëjtën konferencë shtypi, z. Paten ka thënë se ka pritur se votuesit serbë do të çmonin vlerat demokratike, të cilat e afrojnë Serbinë me Bashkimin Evropian.


Kryeministri i Luksemburgut viziton Shkupin dhe Kosovën

Luksemburg, 18 nëntor 2003 - Kryeministri i Luksemburgut Zhan Klod Junker sot me vizitën në Shkup e fillon një turne ballkanike, gjatë së cilës do të vizitojë Bosnjën e Hercegovinën dhe Kosovën.
Sipas një njoftimi të qeverisë së Luksemburgut, Junker të martën i shoqëruar nga ministri i drejtësisë Lyk Friden, në Shkup do të takohet me presidentin maqedonas Boris Trajkovski, e pastaj në Kosovë do të vizitojë kontigjentin paqeruajtës të Luksemburgut në pjesën veriore të Mitrovicës.


Rexhep Meidani u tërhoq nga gara për postin e kryetarit të Partisë Socialiste

Tiranë, 18 nëntor 2003 - Ish-presidenti i Shqipërisë Rexhep Meidani u tërhoq dje nga gara për postin e kryetarit të Partisë Socialiste. Sipas tij ai nuk mundi të vazhdonte mëtej pasi nuk kishte barazi në kandidim, si dhe nuk respektohej dinjiteti i gjithësecilit.

Një ndër shkaqe e tërheqjes nga kjo kandidaturë është edhe trysnia që u bë ndaj nënshkruesve të kandidaturës së tij për kryetar të partisë, mungesa e transparencës dhe konkurrencës normale, si dhe mekanizmat bllokuese për këtë garë. Ai shtoi se është edhe kundër një procesi ndëshkimor, që vërehet kohët e fundit në PS.
Ndërkohë, kryetari i Bashkisë së Tiranës, Edi Rama, një tjetër kandidat për postin e Partisë Socialiste, deklaroi se do të vazhdojë fushatën e tij në këtë konkurrim dhe do të shkonte në bazën e PS-së për të evitur, siç tha, daljen e Partisë Socialiste në opozitë.


Kancelari Shrëder u rizgjodh shef i Partisë Socialdemokrate

Bohum, 18 nëntor 2003 - Kancelari aktual gjerman Gerhard Shrëder është rizgjedhur në postin e shefit të partisë duke marrë 80,8 për qind të votave në Kongresin e Partisë Socialdemokrate të mbajtur në Bohum, ndryshe nga dy vite më parë kur ai kishte fituar 88,6 për qind të votave.

Ndërkaq, sekretari i përgjithshëm i partisë Olaf Sholc dhe nënkryetari Volfgang Klement dolën më të humbur. Sholc u rizgjodh me një shumicë të ngushtë votash, kurse në postin e nënkryetarit të partisë u zgjodhën Ute Fogt dhe Kurt Bek.


Eshtë penguar një atentat kundër kryeministrit të Holandës

Amsterdam, 18 nëntor 2003 - Policia e Holandës ka bërë të ditur sot se është penguar një sulm kundër kryeministrit Jan Peter Balkenend, duke arrestuar kah fundi i tetorit një burrë i cili në rezidencën e kryeministrit u paraqit me thikë të gjatë 20 cm.
Burri u bë i dyshimtë kur pyeste për adresën e private të shtëpisë së kryeministrit. Zëdhënësja e gjykatës ka konfimuar se ai person ndodhet në paraburgim, por nuk ka dhënë hollësi për rastin.


Nga rrëzimi i një aeroplani në Sudan 13 vetë humbën jetën

Kartum, 18 nëntor 2003 - Të 13 pasagjerët dhe anëtarët e ekuipazhit të një aeroplani transportues që është rrëzuar sot në jug të Sudanit, kanë vdekur në atë aksident.
Aeroplani transportues rus "Antonov" që fluturonte në linjën Kartum- Vau u rrëzua për shkaqe tash për tash të panjohura.
Ky është aksidenti i tretë ajror në Sudan gjatë këtij viti. Në tetor u rrëzua një helikopter ku vdiqën 20 vetë, kurse në korrik u rrëzua Boing 737 i Sudan Airuezit, ku gjetën vdekjen 115 pasagjerë.


Vriten dy izraelitë, kurse në një incident tjetër plagosen shtatë palestinezë

Betlehem, 18 nëntor 2003 - Dy izrealitë janë vrarë sot afër Betlehemit në Bregun Prerendimor, kanë bërë të ditur burimet ushtarake.
Ushtria nuk e di nëse fjala është për një sulm klasik apo për të shtëna nga snajperi. Izraelitët janë vrarë në momentin kur kishin ngadalsuar makinën e tyre, duke hyrë në autostradën afër Betlehemit.
Për këtë sulm askush nuk e ka marrë përgjegjësinë, por ushtria izraelite thuhet të ketë arrestuar tre palestinezë. Në një incident tjetër, izraelitët kanë hyrë në një kamp palestinez në Rripin e Gazës dhe kanë plagosur shtatë vetë, kanë njoftuar burimet mjekësore palestineze, njofton Rojter.


Londra me masa të mëdha të sigurisë

Londër, 18 nëntor 2003 - Janë vendosur masa të papara të sigurisë në qendër të Londrës në prag të vizitës shtetëtore të presidentit George Bush, i cili arrin sot pasdite.
Katërmbëdhjetë mijë policë do të jenë në detyrë gjatë katër ditëve të vizitës, pothuaj tre herë më shumë nga numri i paraparë.
Policia thotë se dislokimi i shtuar është bërë për shkak të shqetësimeve për sigurinë e zotit Bush dhe mundësisë së prishjes së rendit publik, meqë janë planifikuar protesta të mëdha kundër tij.
Kjo përndryshe është vizita e parë formale shtetërore e një presidenti të SHBA-ve që nga ardhja e zotit Woodrow Wilson më 1918.


Ofensivë e re ushtarake në Irak

Tikrit, Irak, 18 nëntor 2003 - Trupat amerikane në Irak thonë se kanë vrarë një numër të përkrahësve të Saddam Husseinit brenda dhe përreth qyteteve Tikrit dhe Bakuba.
Rreth njëqind disidentë të dyshuar janë arrestuar.
Ofanziva ushtarake amerikane është përgjigje ndaj sulmeve kundër tyre.
Aeroplanë ushtarakë, helikopterë, artileria dhe armë që udhëhiqen nga satelitët janë përdorur kundër bazave të disidentëve të dyshuar.
Zëdhënësi i trupave amerikane, gjenerali Mark Kimmitt thotë:
"Ne po përgjigjemi me rezultate ushtarake, po përgjigjemi me armë ushtarake dhe çdoherë kur përplasemi me armikun gjithnjë fitojmë dhe do të vazhdojmë të bëjmë një gjë të këtillë derisa situata të mos jetë e qëndrueshme", tha gjenerali Kimmitt.


Dorëheqja e anëtarit të Autoritetit të Përkohshëm

Bagdad, 18 nëntor 2003 - Autoritetet amerikane kanë hedhur poshtë akuzat e një anëtari italian të autoritetit të përkohshëm të udhëhequr nga amerikanët në Irak. Marko Kalami ka dhënë dorëheqje, për siç thotë mospajtim me politikat e këtij autoritetei.
Ai ka punuar në Nasirija, ku nëntëmbëdhjetë italianë u vranë në sulmin me bombë javën e kaluar dhe ka theksuar se politikat e gabueshme kanë kontribuuar në këtë sulm.
Ai akuzoi autoritetin të ketë dështuar për të kuptuar kompleksitetin e shoqërisë irakiane.


Presidenti Bush ripohon angazhimin amerikan për të mbajtur trupat amerikane në Irak

Uashington, 18 nëntor 2003 - Presidenti amerikan Xhorxh Bush tha se përfundimi zyrtarisht i pushtimit amerikan të Irakut vitin që vjen, nuk përbën një strategji për t=u tërhequr dhe as nuk nënkupton fundin e pranisë ushtarake amerikane në atë vend.
Presidenti Bush foli me gazetarë gjatë një takimi me gra udhëheqëse irakiane, dy prej të cilave shërbejnë në Këshillin Qeverisës të Irakut, të ngritur nga Shtetet e Bashkuara.
"Unë i sigurova këto gra se Amerika nuk do të tërhiqet. Kur them 'do të qendrojmë', kjo nuk ka diskutim. Ajo që terroristët duan pikërisht të arrijnë, është ta na dëbojnë nga Iraku para se këto udhëheqëse të jenë në gjendje të ngrenë qeverinë e tyre dhe të jetojnë në paqe. Dhe ne do t'ia dalim mbanë", tha zoti Bush.
Një nga gratë irakiane që u takuan me Presidentin Bush, është anëtarja e Këshillit Qeverisës, Songul Chapouk, turkmene nga Bagdadi, e cila kërkoi që trupat amerikane të mos largohen deri sa forcat irakiane të sigurimit të stërviten dhe të jenë në gjendje të marrin përsipër misionin e tyre.