U mbajt tribuna e hapur “Vetëvrasjet- si të parandalohen”

Prishtinë, 18 nëntor 2003 / TN / Jeta RAFUNA - Salla e amfiteatrit të Bibliotekës Kombëtare dhe Universitare të Kosovës ishte e vogël për t’i zënë të gjithë ata që kishin ardhur për të përcjellur tribunën e hapur me temën “Vetëvrasjet- si të parandalohen” të organizuar nga 4 degët e Prishtinës të Forumit të Rinisë të LDK-së.

Këtë tribunë e shpalli të hapur sekretari i përgjithshëm i FR të LDK-së, Avni Gashi, i cili pasi përshëndeti të pranishmit në mesin e të cilëve ishte edhe dr.Berim Ramosaj, këshilltar i presidentit Ibrahim Rugova, si dhe z.Lulzim Zeneli, zëdhënës i LDK-së, i njoftoi të pranishmit për arsyeshmërinë e mbajtjës së kësaj tribune ku ai ceku 256 raste të vetëvrasjeve vetëm prej fillimit të vitit 2001 e deri më sot.

Ndërsa, dy ligjeruesit e kësaj tribune, dr.Skender Boshnjaku ( neuropsikiatër ) dhe dr. Shefqet Krasniqi ( teolog ), paraqitën pikëpamjet shkencore, përkatësisht fetare në lidhje me këtë dukuri e cila pas luftës ka marr përmasa të një dukurie shqetësuese në Kosovë.

Ishte konstatim i përbashkët i të dy ligjëruesve se rruga më e mirë e parandalimit të kësaj dukurie është forcimi i besimit në zotin. Në pjesën e dytë të kësaj tribune ligjëruesit u përgjigjen në pyetjet e shumta të të pranishmëve të cilat shpesh u përcollën me duartrokitje të gjata.