|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Podujevë: HABITAT-i deri në fund të vitit pritet të merr vendime rreth 500 rasteve

Podujevë, 18 nëntor 2003 (TN) – Udhëheqja komunale e Podujevës dhe përfaqësuesit e UNMIK-ut u takuan sot me përfaqësuesin e HABITATI-it z. Xavier  Blais. Në këtë takim ku ishin të pranishëm kryetari Agim Veliu, zv. kryetari Agim Kikaj, përfaqësuesi i UNMIK-ut Shahzad Khan Bangash dhe An Sofi si dhe zyrtari i Drejtorisë për shëndetësi dhe politikë sociale (DSHPS) Zenel Zeneli u diskutua për funksionimin e zyrës së HABITAT-it në Podujevë dhe bashkëpunimin e mëtejmë.

 

z. Bles njoftoi udhëheqjen komunale me problematikën e lirimit të banesave të uzurpuara dhe procedurën e vendosjes së familjeve që kanë nevojë dhe ato me kushte të rënda sociale, ka njoftuar zyrtari i DSHPS Zenel Zeneli. Sipas tij përfaqësuesi i HABITAT-it njoftoi edhe për ndryshimin e procedurës së vendosjes dhe lirimit të banesave. “Kjo tashmë do të bëhet në dy mënyra: varësisht nga dëshira e pronarit objekti mund ti lirohet ose nëse pronari pajtohet i jep në administrim HABITAT-it”, deklaroi Zeneli.

 

Ai tha se z. Bler i deklaroi udhëheqjes komunale se DSHPS është ndër të vetmet në Kosovë që bashkëpunon rregullisht me Zyrën e HABITAT-it, mirëpo ai pati vërejtje në mospunën e zyrës së HABITAT-it të Podujevës për çka kërkoi ndryshime dhe bashkëpunim në të ardhmen. Kryetari i komunës Agim Veliu premtoi se bashkëpunimi me HABITAT-in do të vëhet në baza të shëndosha dhe se problemet rreth lirimit të banesave të uzurpuara do të zgjidhen bashkërisht.

 

Sipas z. Blers pritet që deri në fund të dhjetorit HABITAT-i të vendosë për rreth 4 mijë raste në gjithë Kosovën, rreth 500 prej të cilave në komunën e Podujevës.