Përmbajtja:

• Holkeri tha se ka marrë mbështetjen e bashkësisë ndërkombëtare për misionin e tij në Kosovë

• Udhëheqja e Vitisë reagon ndaj politizimit të vrasjes së djeshme në Mogillë

• Ministria e Arsimit ua tërheq vërejtjen nxënësve që janë regjistruar në shkolla pa e mbaruar klasën e 9-të

• Marrëveshje midis udhëheqjes komunale të Prishtinës dhe tri instituteve gjermane

• Në periudhën 1999 - 2002, në Bibliotekën Kombëtare Universitare (BKU) janë keqpërdorur mbi 61.000 euro

• Në Suedi u mbajt Kuvendi VI zgjedhor i Lidhjes së Arsimtarëve Shqiptarë

• Sot në Kosovë arrin për një vizitë njëditëshe Sekretari i Përgjithshëm i NATO-s, Xhorxh Robertson

• Hari Holkeri dhe Havier Solana u takuan mbrëmë në Bruksel

• Ministrat e jashtëm të BE-së në takimin e sotëm në Bruksel diskutojnë edhe për Kosovën

• Të riun serb në fshatin Mogillë të Vitisë e vrau fqinji i tij serb

• Në Pantinë të Vushtrrisë është gjetur kufoma e një burri shqiptar

• Gjilan: Veprimtarët e LDK-së mbështesin punën e ekzekutivit

• Në zgjedhjet për presidentin e Serbisë kanë marrë pjesë edhe pjesëtarët e pakicës serbe në Kosovë

• Në Maqedoni vazhdojnë manifestimet e përvjetorit të Kongresit të Manastirit

• Mali i Zi së shpejti suprimon shërbimin ushtarak

• Dështuan zgjedhjet e djeshme presidenciale në Serbi

• Forcat amerikane kanë arrestuar ish-oficerin e trupave speciale irakiane

• Ndryshim taktikash në Irak

• Kasetë e re nga Sadami?

• Anan dënon vrasjen e punonjëses së UNHCR-së

• Kamerat e sigurimit turk kanë xhiruar një nga të dyshuarit vetëvrasës

• Të paktën 6 civilë afganë janë vrarë

Holkeri tha se ka marrë mbështetjen e bashkësisë ndërkombëtare për misionin e tij në Kosovë

 

Prishtinë, 17 nëntor 2003 - Shefi i UNMIK-ut Harri Holkeri u kthye sot në Prishtinë, pas një turneu të gjatë në Nju Jork, Paris, e Bruksel. Me të mbërritur në aeroportin e Prishtinës, Holkeri deklaroi se misioni që ai drejton ka mbështetjen e bashkësisë ndërkombëtare, ndërkaq çështja e statusit të Kosovës do të diskutohet në vitin 2005.

 

Por, sipas tij, më parë duhet përbushur standardet e caktuara nga bashkësia ndërkombëtare e pastaj të hapet çështja e statusit.

Holkeri me këtë rast tha se procesi i privatizimit në Kosovë do të vazhdojë, duke sqaruar se më 21 nëntor bordi i AKM do të takohet në një mbledhje për të emëruar anëtarë të rinj të saj.

 

Poashtu ai tha se në Nju Jork është bërë analiza e parimeve të rregulloreve aktuale të AKM. Holkeri tha se bashkësia ndërkombëtare i mbështet këto rregullore dhe ato nuk do të ndryshojnë.

 

 

Udhëheqja e Vitisë reagon ndaj politizimit të vrasjes së djeshme në Mogillë

 

Viti, 17 nëntor 2003 - Udhëheqja komunale e Vitisë ka reaguar ashpër ndaj qarqeve të caktuara politike dhe të mediave serbe për politizimin e vrasjes së djeshme të një të riu serb në Mogillë të kësaj komune.

 

Këto qarqe pa kurrfarë faktesh dhe pa pritur kryerjen e hetimeve nga organet e autorizuara, që apriori kanë akuzuar shqiptarët, tregon qartë se ende vazhdon politika e vjetër serbe ndaj Kosovës, tha Musa Misini, kryetar i komunës së Vitisë.

 

Ai kërkoi që rasti të zbardhet sa më parë dhe autorët e krimit të dalan para drejtësisë.

Udhëheqja komunale e Vitisë njëherit i ka shprehur ngushëllime familjes Millosheviq për vrasjen e anëtarit të saj.

Siç dihet policia e UNMIK-ut dje ka arrestuar dy serbë të këtij fshati të dyshuar për vrasjen e të riut Daniel Millosheviq, të cilët i ka denoncuar vetë prindi i djaloshit të vrarë.

 

 

Ministria e Arsimit ua tërheq vërejtjen nxënësve që janë regjistruar në shkolla pa e mbaruar klasën e 9-të

 

Prishtinë, 17 nëntor 2003 - Ministri i Arsimit, Shkencës e Teknologjisë, Rexhep Osmani, bëri të ditur se në shkollat e mesme private të Kosovës, të palicencuara nga ministria, është regjistruar edhe një numër nxënësish të cilët nuk e kanë mbaruar klasën e 9-të.

 

Ai ua tërhoqi vërejtjen prindërve të këtyre nxënësve që fëmijët e tyre t'i kthejnë në klasën e 9-të, ngase me ligjin e arsimit fillor klasa e 9-të është e obligueshme. Njëherit, z. Osmani theksoi se ministria që ai e drejton është e vendosur të mbrojë ligjshmërinë.

Gjithashtu ministri i Arsimit i njoftoi sot gazetarët edhe për përdorimin e mjeteve të suficitit buxhetor prej 7 milionë eurosh. Sipas tij, këto mjete janë investuar në përmirësimin e kushteve në Qendrën e Studentëve të Universitetit të Prishtinës dhe në zgjerimin e hapësirës shkollore dhe në infrastrukturën e 35 shkollave fillore e të mesme të Kosovës.

Osmani bëri të ditur se ministria, në bashkëpunim me autorë të teksteve shkollore dhe me shtëpinë botuese "Libri shkollor", ka përgatitur për botim disa dispensa për nxënësit e klasës së 9-të, të cilat do të përdoren derisa të bëhet hartimi i teksteve përkatëse shkollore.

 

 

Marrëveshje midis udhëheqjes komunale të Prishtinës dhe tri instituteve gjermane

 

Prishtinë, 17 nëntor 2003 - Në Kuvendin komunal të Prishtinës sot u nënshkrua një marrëveshje midis udhëheqjes komunale dhe tri instituteve gjermane për mbështetje profesionale në hartimin e planit zhvillimor strategjik urban të qytetit të Prishtinës.

Në emër të qytetit të Prishtinës marrëveshjen e nënshkroi Sami Hamiti, kryeshef i ekzekutivit, ndërkaq në emër të mysafirëve Rajner Grejf.

 

 

Në periudhën 1999 - 2002, në Bibliotekën Kombëtare Universitare (BKU) janë keqpërdorur mbi 61.000 euro

 

Prishtinë, 17 nëntor 2003 - Drejtori i Bibliotekës Kombëtare Universitare të Prishtinës (BKU), Sali Bashota, bëri sot të ditur se në periudhën qershor 1999 - shtator 2002 ky institucion është dëmtuar për 61.355 euro.

 

Bashota thotë se një inspektim financiar ka nxjerrë në shesh keqpërdorime të shumta në këtë institucion gjatë kësaj periudhe kohore dhe theksoi se nga llogaritë e biliotekës janë tërhequr mjete pa asnjë mbulesë.
Z. Bashota tha gjithashtu se gjatë kësaj periudhe kohore nuk është kryer asnjë obligim i bibliotekës ndaj Korporatës Elektroenergjetike të Kosovës dhe ndaj "Termokosit".

Nsërkaq, ministri i Arsimit, Rexhep Osmani, bëri të ditur se ky inspektim finaciar në Bibliotekën Kombëtare Universitare është bërë me kërkesë të kësaj minitrie. Ai tha se raporti i kompletuar do t'u dërgohet për procedurë të mëtejshme organeve të hetuesisë, pasi bëhet fjalë për shkelje të rënda e keqpërdorime të mëdha.

 

 

Në Suedi u mbajt Kuvendi VI zgjedhor i Lidhjes së Arsimtarëve Shqiptarë

 

Stokholm, 17 nëntor 2003 - Në Suedi u mbajt Kuvendi VI zgjedhor i Lidhjes së Arsimtarëve Shqiptarë (LASH), të cilën e udhëhoqi kryetari i deritashëm i degës Prof. dr. Bedri Paci, e ku ishte i pranishëm edhe Ministri i Kulturës, Sportit dhe Çështjeve Jorezidenciale, Behxhet Brajshori.

 

Gjithashtu të pranishëm ishin edhe shumë rektorë të shkollave fillore suedeze, të cilët ndoqën zhvillimin e punimeve të Kuvendit Bedri Paci lexoi raportin e veprimtarisë së LASH-it mes dy kuvendeve, raport i cili edhe pse kishte disa vërejtje, u aprovua nga Kuvendi.

Ndërkaq, duke folur në këtë Kuvend, ministri i Kulturës Behxhet Brajshori, shprehu kënaqësinë me rezultatet e arritura të Lidhjes së Arsimtarëve Shqiptarë në Suedi, ku pothuajse 90 për qind të fëmijëve shqiptarë janë të përfshirë në mësimin e gjuhës amtare.

Kuvendi zgjodhi Kryesinë e re të LASH-it, kurse kryetari i ri u zgjodh Beqir Sadiku.

 

 

Sot në Kosovë arrin për një vizitë njëditëshe Sekretari i Përgjithshëm i NATO-s, Xhorxh Robertson

 

Prishtinë, 17 nëntor 2003 - Sot në Kosovë arrin për një vizitë njëditëshe Sekretari i Përgjithshëm i NATO-s lordi Xhorxh Robertson. Ai do të takohet me Presidentin e Kosovës, Kryeministrin, si dhe me krerët më të lartë të UNMIK-ut dhe të KFOR-it.

Në prag të vizitës së Robertsonit është theksuar se pavarësisht nga angazhimet në botë, Aleanca Veriatlantike do të tregojë interesim për Kosovën, kanë deklaruar zyrtarë të Aleancës në Bruksel. Kjo është vizita e fundit e lordit Robertson në mandatin e tij, pasi në muajin dhjetor e përfundon detyrën e tij në Aleancën Veriatlantike.

 

 

Hari Holkeri dhe Havier Solana u takuan mbrëmë në Bruksel

 

Bruksel, 17 nëntor 2003 - Kryeadministratori i Kosovës Hari Holkeri ka qëndruar dje në Bruksel ku ka pasur një takim me përfaqësuesin e lartë të Bashkimit Evropian për Politikë të Jashtme dhe Siguri, Havier Solana. Bëhet e ditur se në këtë takim është biseduar për përmbushjen e standardeve në Kosovë që do të çonin deri te hapja e statusit final.

Nga Zyra e Havier Solanës bëhet e ditur se në këtë takim është thënë se misionet në Ballkan në shumicën e të cilave tash BE e ka marrë rolin kryesor duhet të koordinohen në mënyrë që të kenë ndikim pozitiv në njera tjetrën, pasi që edhe situata në rajonin e Ballkanit është e mvarur prej një vendi në tjetrin.

 

 

Ministrat e jashtëm të BE-së në takimin e sotëm në Bruksel diskutojnë edhe për Kosovën

 

Bruksel, 17 nëntor 2003 - Ministrat e jashtëm të Bashkimit Evropian në takimin e sotëm në Bruksel do të diskutojnë për situatën në Ballkan dhe me këtë rast do të miratojnë konkluzat, në të cilat do të përfshihet edhe Kosova.

 

Siç është paralajmëruar, BE do të konfirmojë se mbështet idenë e Grupit të Kontaktit që në vitin 2005 të fillojë me zgjidhjen e statusit final të Kosovës në rast se kosovarët përmbushin disa standarde themelore.

Zyrtarët e BE-së kanë thënë se presin që viti i ardhshëmn të jetë vit i përmbushjes së disa standardeve, për çka thanë ata përgjegjësinë më të madhe do ta ketë shumica shqiptare në Kosovë dhe pastaj në vitin 2005 të hapet çështja e statusit përfundimtar nëse gjithëçka do të shkojë sipas planit.

 

 

Të riun serb në fshatin Mogillë të Vitisë e vrau fqinji i tij serb

 

Viti, 17 nëntor 2003 - Danilo Mihajlloviq nga fshati Mogillë i Vitisë është vrarë nga një fqinj i tij serb, i cili më pas është arrestuar, ka bërë të ditur zëdhënësja e UNMIK-t në Prishtinë. Angjela Xhozef me këtë rast ka hedhur poshtë spekulimet e mediave serbe se Mihailoviq është vrarë nga një grup shqiptarësh.

"Si viktima ashtu edhe i dyshuari janë serbë, ndërkaq kjo zonë është e përzier në të cilën jetojnë edhe shqiptarë edhe serbët", thotë zëdhënësja Xhozef, duke hedhur poshtë kështu spekulimet në mediat serbe se kinse Danijel Mihailloviq ishte vrarë nga një grup shqiptarësh me një plumb në kokë, ndërsa viktima po shkonte me traktor për ta punuar arën e tij.

Zëdhënësja e policisë Angjela Xhozef ka thënë se një person e ka njoftuar policinë se vëllai i tij 21 vjeçar është gjetur i vdekur dhe më pas ka njoftuar policinë edhe për të dyshuarin, i cili është arrestuar nga policia dhe po merret në pyetje. Ajo thotë se bëhet fjalë për një mosmarrëveshje ndërmjet bashkëfshatarëve, pasi edhe viktima edhe i dyshuari për vrasjen e tij janë nga fshati Mogillë i Vitisë.

Të gjitha agjencitë serbe të lajmeve dhe mediat e tyre elektronike gjatë tërë ditë së djeshme njoftonin se serbin Mihajloviq e kanë vrarë "terroristët shqiptarë".

 

 

Në Pantinë të Vushtrrisë është gjetur kufoma e një burri shqiptar

 

Vushtrri, 17 nëntor 2003 - Kufoma e një burri shqiptar është gjetur të shtunën në mbrëmje në Pantinë të Vushtrrisë, ka bërë të ditur policia e UNMIK-ut Mitrovicë. Sipas zëdhënëses Trajsi Beker trupi i pajetë është gjetur në afërsi të një zone malore në këtë fshat. Nuk është bërë i njohur identiteti i viktimës, por policia është duke hetuar rastin.

 

 

Gjilan: Veprimtarët e LDK-së mbështesin punën e ekzekutivit

 

Gjilan, 17 nëntor 2003 - Mbledhja e fundit me kryetarët e nëndegëve dhe aktiveve të Degës së LDK të Gjilanit, e drejtuar nga kryetari Xhemajl Hyseni, temë bisede pati dy çështje për trajtim, aprovimin e deritashëm të ligjeve në Kuvendin e Kosovës si dhe projektet e realizuara deri tash nga ekzekutivi i komunës së Gjilanit, gjegjësisht nga Shërbimi Civil Administrativ.

Rreth pikës së parë ata i njohu deputeti Sadudin Berisha, ndërkaq aktivistët e LDK-së shprehën interesimin rreth punës së Kuvendit dhe kërkuan takime më të shpeshta me deputetë.

Ndërkaq rreth veprimtarisë së deritashme të ekzekutivit gjilanas, ata i informoi, Enver Muja, kryeshef Ekzekutiv.

Komuna e Gjilanit në këta dhjetë muajt e këtij viti, ka realizuar 119 projekte në vlerë prej afro 12 milionë euro, prej të cilave vetëm nga buxheti i komunës janë ndarë 1 milion e 800 mijë euro, ndërsa mjetet tjera janë siguruar nga angazhimi i komunës në gjetjen e donacioneve, tha Enver Muja.

 

Sipas tij, infrastruktura e komuns së Gjilanit qëndron në krye të listës me 52 projekte të përmbushura, kryesisht në rrugë, kanalizim, ujësjellës, për të cilat deri tash janë investuar 8 milion e 95 mijë euro. Në arsim janë realizuar 23 projekte në vlerë prej 1 milion e 800 mijë euro.

Në urbanizëm dhe ambient, 21 projekte në vlerë prej 1 milion e 167 mijë euro. Në kulturë, rini dhe sport, 17 projekte në vlerë prej 602000 mijë euro. Dhe, në shëndetësi, 6 projekte në vlerë prej 2013000 mijë euro. Deri në fund të këtij viti pritet të realizohen edhe 70 projekte të tjera për të cilat mjetet tashmë janë ndarë, tha kryeshefi i Ekzekutivit.

Veprimtarët e LDK-së nga terreni, duke mbështetur pa rezervë punën dhe angazhimin në realizimin e këtyre projekteve, kërkuan një përfshirje më të madhe edhe të atyre lokaliteteve, në të cilat është investuar më pak si dhe përkushtim të mëtejmë në përmbushjen e programit të mandatuar nga elektorati.¨

 

 

Në zgjedhjet për presidentin e Serbisë kanë marrë pjesë edhe pjesëtarët e pakicës serbe në Kosovë

 

Prishtinë, 17 nëntor 2003 - Në zgjedhjet për presidentin e Serbisë kanë marrë pjesë edhe pjesëtarët e pakicës serbe të Kosovës. Për këtë qëllim në territorin e Kosovës janë hapur dje 248 qendra të votimit në 19 komuna të Kosovës. Sipas vëzhguesve procesi zgjedhor serb është zhvilluar normalisht.

 

Policia ndërkombëtare, ka thënë se nuk ëshë regjistruar asnjë incident, edhepse ajo nuk ishte përgjegjëse për të siguruar vendvotimet. Megjithatë zyrtarë të policisë kanë thënë se ata kanë patrulluar përreth vendvotimeve dhe ishin të gatshëm të intervenonin nëse paraqitej nevoja.

Ndërkaq, Misioni i UNMIK-ut nuk është përfshirë në procesin e zgjedhjeve presidenciale serbe që është zhvilluar edhe në Kosovë, mirëpo as nuk e ka penguar atë. Zyrtarët e UNMIK-ut po ashtu kanë thënë se ky proces nuk do të ketë ndikim mbi statusin final të Kosovës dhe mbi këtë bazë ata nuk shihnin ndonjë arsye që ta pengonin atë, ka thënë zëdhënësi i UNMIK-ut, Sunil Narula.

Në anën tjetër, përfaqësuesit e Kosovës e kanë kundërshtuar me forcë mbajtjen e këtyre zgjedhjeve në territorin e Kosovës, të cilët kanë thënë se pengon në radhë të parë integrimin e pakicës serbe në shoqërinë e këtushme dhe fuqizon propagandën e partive nacionaliste serbe që do të bëjnë dëm në zhvillimin e dialogut Prishtinë – Beograd

 

 

Në Maqedoni vazhdojnë manifestimet e përvjetorit të Kongresit të Manastirit

 

Manastir, 17 nëntor 2003 - Në Maqedoni vazhdojnë manifestimet për shënimin e 95-vjetorit të Kongresit të Manastirit. Me këtë rast një delegacion në të cilin kanë marrë pjesë edhe kryetarët e akademie të shkenave të Maqedonisë, Shqipërisë dhe Kosovës, Mateja Matevski, Ylli Pepo dhe Rexhep Ismaili, në qytetin e alfabetit në Manastir kanë vendosur një pllakë përkujtimore.

 

Kjo pllakë është vendosur në hyrje të ndërtesës ku është mbajtur Kongresi i Manastirit në të cilin u bë unifikimi i alfabetit të gjuhës shqipe.

Ndërkaq, zëvendëskryeministri i Maqedonisë, Musa Xhaferi, kryetar i Këshilli Organizativ të këtij jubileu tha se është pozitive që qytetarët e Manastirit treguan tolerancë dhe mirëkuptim për këtë ngjarje historike të shqiptarëve.
Të pranishëm në manifestimin e djeshëm në Manastir ishin edhe anëtarët e familjes Qiriazi, të delegatëve të Kongresit dhe të pronarëve të shtypshkronjës së alfabetit shqip.

Ndryshe, për këtë ngjarje të rëndësishme historike për popullin shqiptar sot në Shkup në sallën e Akademisë së Shkencave të Maqedonisë fillon akademia shkencore.

 

 

Mali i Zi së shpejti suprimon shërbimin ushtarak

 

Podgoricicë, 17 nëntor 2003 - Në Mal të Zi së shpejti do të suprimohet shërbimi ushtarak. Kështu thuhet në ligjin e ardhshëm i cili po përgatitet në marrëveshje me kreun e lartë shtetëror.

 

Presidenti malazez Filip Vujanoviq, kryeministri Milo Gjukanoviq dhe presidenti i Unionit Serbi-Mali i Zi, Svetozar Maroviq, në një takim kanë rënë dakord që të fllojnë përgatitjet për suprimimin e shërbimit ushtarak në rajonin e Malit të Zi, kështu që koncepti mbrojtës në të ardhmen do të bazohet në formacionet profesionale ushtarake në pajtim me nevojat, por edhe mundësitë ekonomike të Malit të Zi, shkuan gazeta malazeze "Vijesti".

 

 

Dështuan zgjedhjet e djeshme presidenciale në Serbi

 

Beograd, 17 nëntor 2003 - Zgjedhjet e djeshme presidenciale për të tretën herë me radhë dështuan në Serbi. Në votime kanë dalë rreth 40 e votuesve.

 

Befasi e madhe ka qenë kur është komunikuar se kandidati presidencial i Partisë radikale të Serbisë, Tomisllav Nikoliqi i ka fituar 350,000 vota më shumë sesa kandidati i koalicionit në pushtet Dragolub Miqunoviqi, i cili aktualisht është edhe kryetar i parlamentit të Bashkësisë shtetërore të Serbisë dhe të Malit të Zi.

 

Siaps rezultateve preliminare Tomisllav Nikoliq ka fituar 46,6 për qind të votave, Dragolub Miqunoviqi 33,1 për qind, Velimir Iliqi 9,3 për qind, dhe tre kandidatët e tjerë, i kanë fituar më pak se sa 3 % të votave.

Vëzhguesit thonë se ky është dështim i rëndë jo vetëm për koalicionin në pushtet të DOS, por edhe për Partinë Demokratike. Gjithashtu edhe dy partitë demokratike të cilat janë në opozitë.

 

 

Forcat amerikane kanë arrestuar ish-oficerin e trupave speciale irakiane

 

Bagdad, 17 nëntor 2003 - Forcat amerikane kanë arrestuar ish-oficerin e trupave speciale irakiane, i cili dyshohet për organizimin e sulmeve kundër ushtarëve amerikanë në rajonin rreth kryeqytetit Bagdad, ka bërë të ditur ushtria amerikane.

Në deklaratën e ushtrisë thuhet se Kathim Mohamed Faris, i cilsuar si "ish-oficer i forcave speciale irakiane dhe lider i fedajinëve për të cilën besohet se është përgjegjës për sulmet me mjete shprthyeese kundër forace të koalicionit", është arrestuar të shtunën në qytetin Habanija.

 

 

Ndryshim taktikash në Irak

 

Uashington, 17 nëntor 2003 - Presidenti amerikan Xhorxh Bush ka thënë se forcat amerikane në Irak po ndryshojnë taktikat e tyre për t'ju përshtatur atyre të armiqve. Ai tha se java kishte qenë mjaft e vështirë - humbje e afro 20 trupave nga përplasja e dy helikopterëve. Por, presidenti Bush shtoi se SHBA do të vazhdonte të ishte e fortë dhe do të merrej me terroristët.

Komandantët amerikanë gjithashtu kanë sinjalizuar një politikë më agresive.

 

 

Kasetë e re nga Sadami?

 

Katar, 17 nëntor 2003 - Një stacion televiziv, Al Arabija ka transmetuar një mesazh në audio që thuhet se është i ish udhëheqësit irakian, Sadam Husein. Zëri në regjistrim thonte se amerikanët kishin arritur në një fund pa krye në Irak dhe bënte thirrje për sulme kundër Këshillit qeverisës irakian të caktuar nga amerikanët.

Kjo është kaseta e nëntë që thuhet se është bërë nga Sadam Huseini që kur ai u largua nga pushteti në Irak.

Shërbimi sekret amerikan ka thënë se kasetat e mëparshme mund të ishin autentike, megjithëse si ata dhe Këshilli qeverisës dyshojnë se Sadam Huseini po koordinon sulmet kundër forcave të koalicionit.

 

 

Anan dënon vrasjen e punonjëses së UNHCR-së

 

Nju Jork, 17 nëntor 2003 - Sekretari i përgjithshëm i KB, Kofi Anan ka dënuar vrasjen e një punonjëseje të KB në Afganistan. Ai tha se vrasja ishte e ulët dhe indinjuese, por nuk do të ndalonte KB nga përkrahja që po i jepte popullit afgan.

Vrasja e 29 vjeçares, Bettina Goislard e cila po udhëtonte me një makinë me shenja të qarta dalluese të KB ka goditur rëndë gjithë organizatën.

Bettina Goislard kishte punuar për UNHCR-në në Ghazni për mbi një vit. Kreu i UNHCR-së, Rud Lubbers e quajti atë një sulm tjetër mbi punonjës të pafajëshëm humanitarë.

Autoritetet në Ghazni thonë se kanë arrestuar 2 persona që ishin anëtarë të Talebanit.

UNHCR-ja tha se do të pezullojë aktivitetet e saj në Ghazni dhe do të rishikojë aktivitetin në gjithë vendin.

 

 

Kamerat e sigurimit turk kanë xhiruar një nga të dyshuarit vetëvrasës

 

Stamboll, 17 nëntor 2003 - Kamerat e sigurimit turk kanë xhiruar një nga të dyshuarit vetëvrasës të cilët kryen sulmet mbi sinagogat e Stambollit, ku u vranë 23 persona, njoftuan sot burimet zyrtare.

Ministri i brendshëm turk ka deklaruar se një nga sulmuesit mund të njihet në xhirimet e kamerave të sigurimit të veneosura në sinagogë.

Ministri citohet të ketë thënë se xhirimi "nuk është aq i qartë", andaj duhet përmirësuar për të identifikuar sulmuesin, njofton Rojter.

 

 

Të paktën 6 civilë afganë janë vrarë

 

Kabul, 17 nëntor 2003 - Të paktën 6 civilë afganë janë vrarë kur gjatë fundjavës së kaluar bombardoi një aeroplan amerikan në lindje të Afganistanit.

Guvernatori i provinës Paktika ka thënë se bomba ka goditur një shtëpi dhe ka lënë të vdekur gjashtë civilë, në mesin e të cilëve ka pasur edhe fëmijë.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |